Yahaya 11

Ukpa̱ u LiꞋaziru

1Kanna ke te, mɓa̱la̱ n ka̱na̱i vuma vi yoku vu na e ci ɗeke LiꞋaziru. Wi ta̱ ida̱shi a̱ likuci i Bataniya koɓolo n ataku a̱ ni, Meri† m Marta. (2Meri vu nam pa va a̱yi ɗa vuza na u kuta̱wa̱ wa̱ tsunku Vuzagbayin maniꞋin ma̱ ma̱gula̱ni e ene, ka̱ta̱ wu ura a ɗa n ka̱nji ka̱ ni. Taku vi ni LiꞋaziru a̱yi ɗa wi nu mbanaki ma.) 3Ɗa Meri m Marta a̱ suki vuza yoku u bana u dana Yesu, “Vuzagbayin, vuza vu ucigi vu nu u ka̱na̱ ta̱ mbanaki.”

4Ana Yesu u panai nannai, ɗa u danai, “Mbanaki n nam pa n kubanka yi ukpa̱ ba. Ili i nam pa i yaꞋan ta̱ nahannai adama a na e neke Ka̱shile tsugbayin, mpa Maku ma̱ Ka̱shile n kuciya̱ ta̱ tsugbayin adama a ukuna u nam pa.” 5Yesu u ciga ta̱ Marta m Meri n LiꞋaziru feu. 6Amma ana u panai LiꞋaziru wi nu mbanaki, ɗa u doku u shamgbai ɗe a̱ ubuta̱ u na wi ali ayin e re kpamu derere.

7Ɗa u danai mukumitoni n ni, “YaꞋan tsu wala ka̱ta̱ tsu bono a Yahuda.”

8Amma ɗa mukumitoni n ni n danai, “Malum, kaikulu, aza e kelime a Ayahuda a̱ ɗenga̱i kuna wu n atali. Nini ɗa̱i kpamu vi cigai kubono ɗe gogo na?”

9Ɗa wu ushuki, “A kanna dem ci ta̱ n iyum kupa n i re. Kutashi ku kanna ki baci lo, uma i ta̱ a kuwala i a̱ kuta̱ɗa̱tsa̱ ba. I ta̱ e kene adama a na i ta̱ n kutashi ka aduniyan ku nam pa. 10Amma a wala baci n kayin, i ta̱ a̱ kuta̱ɗa̱tsa̱ adama a na i n kutashi ba.”

11Ɗa u danai le, “Ka̱ja̱Ꞌa̱ ka̱ tsu LiꞋaziru wi ta̱ alavu, amma mi ta̱ a kubana adama a na ci jimgbasa yi.”

12Mukumitoni ma n danai, “Vuzagbayin, alavu a ɗa yi baci, ashe u kuta̱wa̱ ta̱ wa̱ ɗenga̱ ka̱ta̱ u potso!” 13Ele e sheshe ta̱ ko Yesu wi ta̱ a kudana LiꞋaziru va alavu a ɗa wi koci, amma i na Yesu wi a kudana i ɗaɗa LiꞋaziru u kuwa̱ ta̱ ɗe.

14Ɗa u danai le magaba, “LiꞋaziru u kuwa̱ ta̱. 15N yaꞋan ta̱ ma̱za̱nga̱ a na mi koɓolo n a̱yi ba, adama a na i ciya̱ kasingai punu. Ciya̱ i neke ka̱ɗu nu mpa. Ta̱wa̱i, tsu banai wa̱ ni gogo na.”

16Makumitoni mo yoku, Toma (vuza na e ci ɗeke “Mepeshe”) u danai aza a na a buwai va, “YaꞋan ra̱ka̱ vu tsu, tsu soku malum ma, adama a na tsu kuwa̱ koɓolo n a̱yi!”

Yesu koɓolo m Meri m Marta

17Ana Yesu u yawai, ɗa u cinai wana ɗai LiꞋaziru u yaꞋan ayin a̱ na̱shi ana a̱ ciɗa̱ngi ni. (18Bataniya nwalu m meli vi re ɗa koci a kubana a Urishelima.) 19Ayahuda† n a̱bunda̱i a̱ uta̱ ta̱ a Urishelima ɗa banai u Marta m Meri adama a na a yaꞋanka le ikya̱shi yu ukpa̱ adama a taku vi le. 20Ana Marta u panai a na Yesu wi lo a̱ kuta̱wa̱, ɗa wu uta̱i adama a na u gasa n a̱yi, amma ɗa Meri wo okpoi punu a kpaꞋa. 21Marta u danai Yesu, “Vuzagbayin, ishi baci vi ishi lo, taku vu va̱ wi ishi a̱ kukuwa̱ ba. 22Amma n yeve ta̱ ko n gogo na Ka̱shile ki ta̱ e kuneke wu ili dem i na vu folonoi ni.”

23Yesu u danai, “Taku vu nu wi ta̱ a̱ kuɗenga̱ ka̱ta̱ u yongo n wuma kpamu.”

24Marta wu ushuki, “N yeve ta̱ wi ta̱ a̱ kuɗenga̱ ka̱ta̱ u ciya̱ wuma kpamu a kanna ku ukocishi, Ka̱shile ka̱ ɗengusa̱ baci a̱ a̱kpisa̱ dem.”

25Yesu u danai ni, “Mpa ɗa vuza na n ci ɗengusa̱ a̱kpisa̱, mpa ɗa kpamu wuma. Aza a na e nekei a̱ɗu nu mpa i ta̱ o kuyongo n wuma, ko ishi a̱ kuwa̱. 26Yaba dem vu na baci kpamu wi o kuyongo n wuma, ɗa u nekei ka̱ɗu nu mpa, wi a̱ kukuwa̱ ba. Marta, vu neke ta̱ ka̱ɗu n ili i nam pa?”

27Ɗa wu ushuki, “E, Vuzagbayin. N neke ta̱ ka̱ɗu a na avu ɗa Kirisiti Kishi, Maku ma̱ Ka̱shile, avu ɗa kpamu vuza na a danai wi lo a̱ kuta̱wa̱ a aduniyan.”

Yesu u shika̱i

28Ana Marta u danai nannai, ɗa u bonoi asuvu a kpaꞋa ɗa u yaꞋin kadanshi m Meri endeꞋen ni. “Malum ma mi ta̱ lo, we ece wu ta̱ kpamu.” 29Ana Meri u panai nannai, ɗa u ɗenga̱i gogoꞋo ɗa u lazai a kubana u Yesu. (30Ka̱ta̱ Yesu u yawa asuvu a̱ likuci a ba, amma ta ɗe biꞋi wi a̱ ubuta̱ u na Marta u gasai n a̱yi.)

31Uma n a̱bunda̱i a na a banai kukya̱sa̱ Meri, ana e enei ni u ɗenga̱i gogoꞋo ɗa wu uta̱i a kpaꞋa ka, ele a zuwa ta̱ ko a kasaun kaꞋa wi a kubana ka̱ta̱ u shika̱. Ɗa o tonoi ni.

32Amma Meri u bana ta̱ a̱ ubuta̱ u na Yesu wi. Ana we enei ni, ɗa u kuɗa̱ngi e ene a̱ ni, ɗa u danai, “Vuzagbayin, ishi baci vi ishi lo, taku vu va̱ wi ishi a̱ kukuwa̱ ba.”

33Ɗa Yesu we enei ni a̱ ma̱shi koɓolo n uma a na i n a̱yi va feu. Ɗa u na̱mgba̱i ka̱tsuma̱ ka̱u. 34We ecei, “Te ɗai i ciɗa̱ngi ni?”

Ɗa a danai ni, “Vuzagbayin, ta̱wa̱ ve ene ubuta̱ wa.”

35Ɗa Yesu u shika̱i.

36Uma a na i kashani ɗevu lo a danai, “Yi ta̱ e kene tsu na u cigai ni ka̱u.”

37Amma aza o yoku a̱ ka̱tsuma̱ ke le a danai, “A̱yi ɗa vuza a na u ɓa̱yuwa̱i ka̱yimba̱ ka a̱shi. Mayun ɗa wi ishi a kisa LiꞋaziru a̱ ubuta̱ wu ukpa̱.”

Yesu u ɗengusa̱i LiꞋaziru

38Ɗa Yesu u doku u na̱mgba̱i ka̱tsuma̱ ka̱u. Ɗa u banai a kasaun ka na e sheꞋwei a katali ɗa a palai utsutsu wa n katali ko yoku. 39Ɗa u danai le, “Gida̱la̱kpa̱i katali ka kakambu ke te.”

Amma Marta u danai, “Vuzagbayin, vi yeve ta̱ LiꞋaziru u kuwa̱i ayin a̱ na̱shi a ɗa na, u kugita̱ ta̱ ɗe kushama.”

40Ɗa Yesu u danai ni, “Ka̱ta̱ vi ciɓa ili i na n danai nu ba? ‘Vi neke baci ka̱ɗu, vi ta̱ e kene tsugbayin tsu Ka̱shile.’ ”

41Ɗa a̱ gida̱la̱kpa̱i katali ka kakambu ke te. Ɗa Yesu u ɗengusa̱i a̱shi a̱ ni gaɗi u danai, “Dada, n yaꞋan ta̱ ma̱za̱nga̱ a na vu panakai mu. 42N yeve ta̱ ayin tutu vu tsu panaka mu ta̱, amma n dana ta̱ ili i nam pa ya adama a uma a na i nu mpa na. N ciga ta̱ a̱ ushuku nu mpa a na avu ɗa vu suki mu.”

43Ana Yesu u kotsoi kuyaꞋan kavasa, ɗa u ɗengusa̱i ka̱la̱ka̱tsu nu utsura ɗa u ɗekei, “LiꞋaziru, uta̱!” 44Ɗa wu uta̱i. A ala yi ta̱ e ekiye n ene n arikinlai a̱ ka̱ciɗa̱, ɗa a shiyai ni kpamu n kakashi a̱ a̱shi a̱ ni.

Ɗa Yesu u danai le, “Shikpai ni ka̱ta̱ i ka̱sa̱kpa̱i u wala.”

O foɓusoi kuna Yesu

(Mat. 26:1-5; Mar. 14:1-2; Luk. 22:1-2)

45Ayahuda n a̱bunda̱i aza a na a̱ ta̱wa̱i kene Meri ɗa e enei ili i na Yesu u yaꞋin, ɗa e nekei a̱ɗu n a̱yi. 46Amma aza o yoku a̱ ka̱tsuma̱ ke le a banai a danai Afarishi ili i na Yesu u yaꞋin. 47Anan ganu vu gbagbaꞋin n Afarishi a e ɗekei Aza e Kusheshe a̱ ubuta̱ u te ɗa a danai, “Yi ɗa̱i tsa kuyaꞋan? Vuma vu nam pa wi ta̱ a kuyaꞋan urotu wi ili i mereve n a̱bunda̱i. 48Tsu ka̱sa̱kpa̱ yi baci a kulyaꞋa kelime n ili i na nam pa, yaba dem wi ta̱ e kuneke ka̱ɗu n a̱yi. Osoji o Roma i ta̱ a̱ kuta̱wa̱ a̱ la̱nga̱sa̱ A̱Ꞌisa̱ a Gbayin a̱ tsu n iɗika i tsu.”

49Vuza vu Kusheshe vi yoku a̱ ka̱tsuma̱ ke le kula ku ni ku ɗa Kayafa, a̱yi ɗa kpamu mogono ma anan ganu a̱ ka̱ya̱ ka nan lo. U danai, “A̱ɗa̱ i yeve ili ba, ko kenu! 50Nini ɗai yi a̱ kuka̱sa̱kpa̱ a̱ niꞋwa̱nta̱ngu iɗika dem? U laꞋa ta̱ n kugaꞋan vuma vi te u kuwa̱#Yah. 18:14. adama a na uma a na a buwai a yaꞋan wuma.”

51Kadanshi ka na Kayafa u yaꞋin, kusheshe ku ni ku ɗa ba. Amma, adama a na a̱yi ɗa mogono ma anan ganu a̱ ka̱ya̱ ka nan lo ka, wi ta̱ a kadanshi ki ili i na i kuta̱wa̱ ya yaꞋan: Wi ta̱ a kadanshi ka na Yesu wi ta̱ a̱ kuta̱wa̱ wa̱ kuwa̱ adama a Ayahuda. 52Ko n nannai Yesu wi a̱ kukuwa̱ adama a Ayahuda koci ba. U kukuwa̱ ta̱ adama a na u tuka̱ uma a̱ Ka̱shile a na ishi a wacuwai a aduniyan dem koɓolo. 53Ɗaɗa a kanna ka nan lo aza e kelime a Ayahuda a̱ gita̱i kusheshe uteku u na a kuna Yesu.

54Adama a nannai, Yesu u doku u ka̱ra̱Ꞌa̱ e keteshe a uɓon u Yahuda ba, ɗa u ka̱sa̱kpa̱i Urishelima. U banai a̱ likuci i Ifuramu, i na yi a̱ ka̱kina̱ ka kakamba, ɗa u shamgbai ɗe m mukumitoni n ni.

55Ayin a̱ Ka̱ɗiva̱ ka Kupasamgbanai a yawa ta̱ ɗevu. Uma n a̱bunda̱i a na i ida̱shi a̱ likuci i wawaꞋa a banai a Urishelima kafu kanna ka̱ ka̱ɗiva̱ ka adama a na a̱ ciya̱ a takpa nshinda̱ tsu na Wila̱ u danai. 56A ciga ta̱ e ene Yesu. Ele punu biꞋi a̱ A̱Ꞌisa̱ a Gbayin a, ɗa a̱ gita̱i mecenshenei, “Yi ɗa̱i ye enei? Wi ta̱ a̱ kuta̱wa̱ ka̱ɗiva̱ ka gaji?” 57Anan ganu vu gbagbaꞋin n Afarishi a danai uma vuza na baci de dem we enei Yesu, u bana u dana le, ka̱ta̱ a̱ ciya̱ a̱ ka̱na̱ yi.

Currently Selected:

Yahaya 11: asgNT

Highlight

Copy