Matiyu 11

Yesu n Yahaya vu Kusumbu ka Akucina

(Luk. 7:18-35)

1Ana Yesu u kotsoi kudana Kupanazere ili i nam pa, ɗa u ka̱sa̱kpa̱i ubuta̱ wa u banai a̱ likuci kakau i na yi a̱ Ga̱lili adama a na u yaꞋan kadanshi ka̱ Ka̱shile n kuyotsongusu.

2Yahaya vu Kusumbu ka Akucina a̱ kunu ku ugbashi, ɗa u panai ili i na Yesu Kishi wi a kuyaꞋan. Ɗa u suki mukumitoni n ni n yoku wa̱ ni. 3Ana a yawai ɗa e ecei ni, “Avu ɗa vuza na ci lo a kuvana va, ko tsu vana vuza yoku kau?”

4Ɗa Yesu wu ushuki, “Banai i dana Yahaya ili i na i panai ɗa ye enei: 5A̱yimba̱ e enei, nkutsuma̱ n walai, nkutu m potsoi. Agulani a panai, a̱kpisa̱ a̱ ɗenga̱i n wuma kpamu. Aza a unambi a panai Arabali a Singai feu. 6Ka̱shile ki ta̱ a kuzuwaka yaba dem vu na u kpa̱ɗa̱i kuꞋiwan mu una̱singai adama a ili i na mi a kuyaꞋansa.”

7Ana mukumitoni n Yahaya n lazai, ɗa Yesu u gita̱i kuyaꞋan kadanshi ka Yahaya ka a̱ ubuta̱ u ka̱bunda̱i ka uma ka. U danai, “Vuma vi ne vu ɗai i banai kene e mere mu une? Wi ta̱ an mita̱ ma kajanu ma na wunla̱i u tsu gba̱ɗa̱sa̱? 8Vuma vi ne vu ɗai i banai kene? A̱yi vuma vu ɗa vu na u ukai aminya a singai? Uma a na a tsu uka aminya a singai o ci yongo ta̱ e kefeku ko mogono. 9Yi ɗa̱i biꞋi i tsu bana ye ene mayun? A̱yi keneki kaꞋa? E, keneki kaꞋa mayun. N dana ɗa̱ u laꞋa ta̱ keneki. 10Ka̱shile ka yaꞋan ta̱ kadanshi adama a̱ ni a Katagarda ka Ciɗa:

‘Mi ta̱ a̱ kusuku kalingata ka̱ va̱ kelime ka̱ nu,

vuza na u kufoɓusoko wu uye.’#Mal. 3:1.

11“N dana ɗa̱, Yahaya Vuza vu Kusumbu ka Akucina u laꞋa ta̱ yaba dem vu na u saꞋwai kuyongo n wuma m gbayin. Amma vuza kenu o tsugono tsu gaɗi u laꞋa yi ta̱ m gbayin. 12A̱ kugita̱ a ayin a na u ta̱wa̱i ali gogo na, tsugono tsu gaɗi ci ta̱ a kulyaꞋa kelime n utsura, uma kpamu a gbagbala ta̱ ka̱u adama a na a̱ ciya̱ a uwa a tsu ɗa.#11:12 Uye u yoku u na ve kuyeve udani n Cihelene: Aza a gbani-gbani kpamu i a kataci a uwa a̱ la̱nga̱sa̱ tsu ɗa. 13Eneki ra̱ka̱ n Wila̱ a yaꞋan ta̱ kadanshi ko tsugono tsu gaɗi ga̱ba̱ ali sai ayin a Yahaya. 14Yu ushuku baci n ele, Yahaya ɗa Iliya, keneki ka na yi lo a kuvana. 15Vuza na baci de dem wi n atsuvu a kupana, u pana!

16“Yi ɗa̱i n kudana adama a uma o gogo na a nam pa? I ta̱ an muku n na mi ida̱shi e kuden e meɗekenei:

17‘Ci liꞋa̱ka̱i ɗa̱ vishari,

amma i jeꞋe ba!

Ci cananaka ɗa̱ ta̱ vishipa vu kpalu,

amma i shika̱ ba!’

18“Ana Yahaya u ta̱wa̱i u ka̱na̱ ta̱ una̱, ɗa u iwain kusoꞋo ma̱ra̱, ɗa yaba dem u danai, ‘Wi ta̱ n wunla̱i u gbani-gbani!’ 19Amma Maku ma Vuma mi ta̱ a̱ kuka̱ra̱Ꞌa̱ n u lyaꞋi n u soꞋi, ɗa kpamu yaba dem u danai, ‘Vuma vu nan lo vuza vu ulyuwa ɗa n ka̱ga̱li ka washi! A̱yi ka̱ja̱Ꞌa̱ ka aza a kisa ku utafu kaꞋa feu n aza a unushi.’ Amma kuyeve ku mayun ku ci yotsongu ta̱ a̱ ubuta̱ wi ili i singai i na wi a kuyaꞋan.”

Yesu u ɓarangi aza a na a iwain ni

(Luk. 10:13-15)

20A̱ likuci n a̱bunda̱i i na Yesu u yaꞋin ili i mereve i daɓa, uma a iwain kutono Ka̱shile. Ɗa u yaꞋin wupa n ele ɗa u danai, 21“Ili ya atakaci i ɗa wa̱ ɗa̱ aza o Korasinu! Ili ya atakaci i ɗa feu wa̱ ɗa̱ aza a Besaida! Ili i mereve i na n yaꞋin wa̱ nu i ɗa baci n yaꞋin a̱ likuci i gbani-gbani i Taya n Sida, a na uma a nan lo a uka ta̱ ɗe akashi o ntogu, ka̱ta̱ a sukuma ka̱ci ke le n kokomo, adama a na o yotsongu tsu na a̱ ka̱sa̱kpa̱i unushi u le! 22N dana ɗa̱ a kanna ka afada, Ka̱shile ki ta̱ a kulaꞋa n kupana asuvayali a uma a Taya n Sida a na wa pana asuvayali a̱ ɗa̱! 23A̱ɗa̱ tamkpamu, aza a Kafarnahum! Yi ta̱ a kuciga a̱ ɗengusa̱ ɗa̱ gaɗi? I ta̱ a kutaɗuku wu a kpaꞋa ka akina! Ishi baci ili i mereve i na n yaꞋin wa̱ nu i ɗa n yaꞋin o Sodom, an likuci ya yi ta̱ lo biꞋi ali n anana! 24Amma n dana ɗa̱, a kanna ka afada, Ka̱shile ki ta̱ a kulaꞋa n kupana asuvayali o Sodom an wa pana asuvayali a̱ ɗa̱!”

Yesu u nekei uma kuvuka

(Luk. 10:21-22)

25A ayin a nan lo Yesu u danai, “Dada, Vuzavaguɗu vu gaɗi n iɗika! N cikpa wu ta̱ adama a na vi yotsongu ta̱ aza a na e yevei ili ba ili i na vu sokonki aza a ugboji n aza e kuyeve. 26E, Dada, u yokpo wu ta̱ vi yaꞋan nahannai!

27“Esheku a̱ va̱ e neke mu ta̱ ili ra̱ka̱. Ko vuza u yeve Maku ma ba, saidei Esheku. Ko vuza kpamu u yeve Esheku a ba, sai Maku ma n aza a na Maku ma zagbai u dana.

28“Ta̱wa̱i wa̱ va̱, a̱ɗa̱ vu na yo oꞋoi kuɗika ucanuku wa̱ a̱miki ra̱ka̱, ka̱ta̱ mpa n neke ɗa̱ kuvuka. 29Ɗikai jola vu va̱ i lapangu, ka̱ta̱ i piꞋisa a̱ va̱, adama a na mpa mi ta̱ m ma̱riki babu ugbamukaci, yi ta̱ ta na a̱ kuciya̱ kuvuka. 30Jola vu nam pa kpamu vi ta̱ babu a̱miki, ucanuku wa kpamu wi ta̱ fa̱ka̱.”

Currently Selected:

Matiyu 11: asgNT

Highlight

Copy