Matiyu 20
20
Agisana a aza zamalinga
1Ana Yesu wi lo a kadanshi, ɗa u danai, “Tsugono tsu gaɗi ci ta̱ nahannai: Vuza yoku ɗa wi n kashina ka̱ nɗimbi. N usana u yoku, ɗa wu uta̱i ka̱lika̱li adama a na u la̱nsa̱ aza a zamalinga a na a kuyaꞋanka yi ulinga a kashina ka̱ ni. 2Wu ushuki kutsupa le ikebe#20:2 La̱na̱ a kaci ku udani “Ikebe”, punu ɗe ka̱ta̱ vu la̱na̱ “Dinari” a̱ Ubuta̱ wi ili i Kuyeve. i kuliva̱ i kanna ke te tsu na a kiwanai. Katsupu ka ɗaɗa ikebe ya azurufa i te a kanna ke te. Ɗa u suki le a bana yaꞋan ulinga a kashina ka̱ ni.
3“Ana kanna ka gaɗukpai, a̱yi a nwalu asuvu e kuden, ɗa we enei uma o yoku a kashani gbani. 4Ɗa u ɗikai le ɗa u danai le wi ta̱ a kutsupa le ili i na i gaꞋin kanna ko kotso baci. 5Ɗa a lazai a banai kuyaꞋan ulinga a kashina ka.
“Ana kanna ka yawai a kaci derere ɗa u ɗekei uma o yoku, ana kaꞋa ke sherei kaci kpamu, ɗa u yaꞋin nannai. 6Ana viyum vi te vo okpoi koci a na a yaꞋan ulinga, ɗa u doki u uwai a asuvu a̱ likuci ɗa we enei aza o yoku lo kashani. We ecei le, ‘Yi ɗa̱i i zuwai ɗa anana yi a kuyaꞋan ulinga ba?’
7“Ɗa a̱ ushuki, ‘Adama a na vuza wi lo u ɗikai tsu ulinga ba.’
“Ɗa vuma va u danai le, ‘To, walai i bana i yaꞋan ulinga a kashina ka̱ va̱.’
8“Ana kanna ko kotsoi, vuza vu kashina va u danai vuza vi kelime va aza a zamalinga a, ‘Ɗeke aza a zamalinga a ka̱ta̱ vu tsupa le. Gita̱ n aza a na n kotsosoi kula̱nsa̱, ka̱ta̱ vu kotsoso n aza a na n la̱nsa̱i a cau.’
9“Ana aza a zamalinga a na a yaꞋin ulinga u viyum vi te koci a̱ ta̱wa̱i kisa katsupu ke le, yaba dem vi le wi isai azurufa e te. 10Ana aza a na a̱ gita̱ngi ulinga n usana a̱ ta̱wa̱i kisa katsupu ke le, e sheshe ta̱ i ta̱ a kisa katsupu ka na ka laꞋi n a̱bunda̱i. Amma ɗa, a tsupai le feu azurufa e te e te dem. 11Ana a isai ikebe i le, ɗa a yaꞋankai vuza vu kashina va ka̱sa̱la̱. 12A danai, ‘Aza a zamalinga o ukocishi a yaꞋan ta̱ ulinga viyum vi te koci. Amma ɗa vu tsupai le derere n a̱tsu. A̱tsu ta na ci yaꞋan ta̱ ulinga n kanna ku usuɗukpi ali a kubana kulivi!’
13“Vuza vu kashina va wu ushuki vuza te vi le, ‘Ka̱ja̱Ꞌa̱ ka̱ va̱, n doro ɗa̱ ba. N tsupa ɗa̱ ta̱ derere uteku u na tsu dansai. 14Ɗika ikebe i nu gogo na ka̱ta̱ vu wala! N sheshe ta̱ kuneke vuza na n ɗikai ukocishi katsupu ka̱ ni derere n ka na n nekei nu. 15Mi ta̱ a kuyaꞋan ili i na n cigai n ikebe i va̱. Vi ta̱ ikovi a na n yaꞋin kasingai u uma a nan lo?’ ”
16Ɗa Yesu u danai, “Ta feu nannai. Vuza na baci de dem wi vuza vi kelime gogo na wi ta̱ o kokpo vuza vu ukocishi, Vuza na baci dem wi vuza vu ukocishi, wi ta̱ o kokpo vuza vi kelime.”
Kadanshi ku ukpa̱ ke Yesu ka tatsu
(Mar. 10:32-34; Luk. 18:31-34)
17Ana Yesu wi a nwalu a kubana a Urishelima, ɗa u ɗikai Kupanazere a̱ ni u bankai paki ɗa u danai le, 18“Ci yawa baci a Urishelima, i ta̱ e kuneke Maku ma Vuma u anan ganu vu gbagbaꞋin nu nlum n Wila̱. I ta̱ a kukiɗaka yi afada u kuwa̱. 19Ka̱ta̱ e neke yi e ekiye a Aza̱ka̱yimbi ka̱ta̱ o zoꞋoso yi, a faba yi, ka̱ta̱ a bapa yi a maɗanga ma atakaci. Amma a kanna ka tatsu, Ka̱shile ki ta̱ a̱ kuɗengusa̱ yi a kasaun.”
Ufolu wa̱ a̱na̱ku a Yakubu n Yahaya
(Mar. 10:35-45)
20Ɗa vuka vu Zabidi u ta̱wa̱i u Yesu n olobo e re a̱ ni, Yakubu n Yahaya. U kuɗa̱ngi ɗa u folonoi ni u yaꞋanka yi ili.
21Ɗa Yesu we ecei ni, “Yi ɗa̱i vi cigai?”
Ɗa u folonoi ni, “Ayin a na baci vu kumbai tsugono tsu nu, va̱ kuka̱sa̱kpa̱ ta̱ olobo e re a̱ va̱ a̱ da̱sa̱ngu a̱ ubuta̱ u tsugbayin ɗevu n avu, vuza te e kukiye ku usingai, vuza te tamkpamu e kukiye ku ugula̱ ku nu?”
22Amma ɗa Yesu u danai le, “I yeve ili i na yi e kece ba. Olobo, yi ta̱ a kufuɗa yo soꞋo mataꞋan ma atakaci ma na mi o kusoꞋo?”
Ɗa a̱ ushuki, “E, ci ta̱ a kufuɗa.”
23Yesu u danai, “Mayun ɗa i kusoꞋo ta̱ mataꞋan ma atakaci ma̱ va̱! Amma mpa n kuzagba vuza na u kuda̱sa̱ngu e kukiye ku usingai ko ku ugula̱ ku va̱ ba. Ubuta̱ u nan lo wa Esheku a̱ va̱ a lapulaka ta̱ aza a na u zagbai koci.”
24Ana mukumitoni kupa n na m buwai va m panai nannai, ɗa a yaꞋin wupa n aza e re e le. 25Ɗa Yesu u ɗekei mukumitoni a̱ ubuta̱ u te ra̱ka̱ ɗa u danai, “I yeve ta̱ ngono ma Aza̱ka̱yimbi n ci ciga ta̱ o yotsongu a̱ra̱ɗi e le u uma. Aza e kelime e le a ci ciga ta̱ a yaꞋan ulinga n utsura u le. 26Amma u yotso ka yaꞋan nannai wa̱ a̱ɗa̱ ba. Vuza na baci u cigai kokpo vuzagbayin a̱ ka̱tsuma̱ ka̱ ɗa̱, sai wo okpo kagbashi ka aza a na a buwai. 27Vuza na baci wi a kuciga kokpo vuza vi kelime, sai wo okpo vuza na u kuyaꞋanka aza a na a buwai tsugbashi. 28Ko mpa, Maku ma Vuma, n ta̱wa̱ na adama a na a yaꞋanka mu tsugbashi ba, amma n yaꞋanka uma tsugbashi, ka̱ta̱ n neke wuma u va̱ n ciya̱ mi isa uma n a̱bunda̱i a̱ ubuta̱ wu unushi u le.”
Yesu u potsokpoi a̱yimba̱ e re
(Mar. 10:46-52; Luk. 18:35-43)
29Ana Yesu m mukumitoni n ni a̱ ka̱sa̱kpa̱i Jeriko, ɗa ka̱bunda̱i ka uma ko yongoi o kutono le. 30A̱yimba̱ e re o yoku a na i lo ida̱shi a uye a panai a na Yesu ɗa wi a kupasamgbanai, ɗa a̱ gita̱i yoroli, “Vuzagbayin, Maku ma Dawuda! Pana asuvayali a̱ tsu!”
31Ɗa ka̱bunda̱i ka uma ka danai le a paɗa bini, amma ɗa o doku a laꞋasakai yoroli ka̱u, “Vuzagbayin, Maku ma Dawuda! Pana asuvayali a̱ tsu!”
32Ana Yesu u panakai le, ɗa u shamgbai ɗa we ecei le, “Yi ɗa̱i i cigai n yaꞋanka ɗa̱?”
33Ɗa a̱ ushuki, “Vuzagbayin, ci ciga ta̱ ce ene keteshe!”
34Yesu u panai asuvayali e le, ɗa u saꞋwai a̱shi e le. GogoꞋo va lo ɗa a fuɗai e enei, ɗa ta na o tonoi ni.
Currently Selected:
Matiyu 20: asgNT
Highlight
Share
Copy
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
