Fíĉilum 27
27
Sakob nabut ᵽayol bi eyab gásonien gagu go Esau añumen me eyab
1Isak maer náfanume nár, ban bujugol m’búkasulo ák’ápim. Funah fice, navoh añolol afamma : « Esau ! » Naagol : « Eé, ínje ume n’eutteni. » 2Naagol : « Nujuge hum búoh ínje nífanume. Iffasut funagom fal eĉet. 3Nimaŋe uŋar fuŋajeni ni simelei min ujow bi ni baha numugulom bo énuhureŋ. 4Mb’uban núsilom yo básiler babu bo niruhen me itiñ min ísonieni bala iĉet. » 5Ñer Esau nailo ajow.
Kan Rebeka umu n’eutten wo gulobe me. 6Nafaen avoh Sakob naagol : « Niune ᵽai aah Esau 7ak’amugulol énuhureŋ ni baha ákail ásilol atiñ ; mb’aban násonienol bala aĉet. 8Aᵽ’uutten, ban nukan ti nijae me elobi : 9Ᵽan ujow bi n’ekore yay nujogulom dó míjehel múuba malie, min ísil ᵽai básiler babu bo nafaŋ me namaŋe. 10Mbiban nuteb bo uk’usenol atiñ min ásonieni bala aĉet. »
11Sakob naagol : « Nuffase Esau nafalefalet, ban ínje ifaletut. 12Iní ter ᵽayom namamaenorom, ᵽan affas búoh dáru let Esau, ban ᵽan ajoh búoh ínje ebutol nimaŋe, min til ñer atabom. » 13Naagol : « Jamb’úholi, úttun firimom. Ujow uk’ujogulom míjehel mamu. Atabi me, gatab gagu ᵽan gulo n’ínje. »
14Ñer Sakob najow ak’aŋallol míjehel mamu. Min Rebeka ñer ásil básiler babu bo áinol aruhen me. 15Naban naŋar wañ áᵽurol afamma Esau wafaŋ me jáari wo natoh ró me ni yaŋ yay, akan áᵽurol apuma Sakob. 16Naŋar may ubaŋ míjehel mamu afut guñenol ni ehondorol, bafaletut me. 17Aban nasen Sakob básiler babu ni unaĉ waw ájaenum bi esen ᵽayol.
18Sakob najow ak’atogol to, navogol : « Ammay ! » Naagol : « Añúm, ínje ume n’eutteni ; bare áᵽurom ay uomme alobe maa n’ínje ? » 19Naagol : « Injé om Esau, añoli afamma. Nikane wo nulobom me. Uilo ñer unamo min utiñ ellu yay yo nurorenom me, mb’uban nusenom gásonien gagu gúiya. » 20Isak najahali naagol : « Bu nukane min úbajul énuhureŋ yay jas me ? » Naagol : « Atúla aamme Aláemit o núinen me ni o, o asenom yo. » 21Naagol : « Añúm, útosul ulofom min imamaenori, mamu níju iffas ter maagen joon aw áᵽurom Esau om. » 22Min Sakob atos atogol to. Isak namamaenorol naah : « Firim fafu, fo faa Sakob fom, bare guñen gagu, go maagen gal Esau. » 23Nemme guñen Sakob gufalefalet may ti gal atiol Esau, ᵽail ájuut átallool. Bare bala ásonienol ti maagen, 24nabbañ arorenol : « Ti maagen, aw Esau uomme ? » Naagol : « Injé faŋaom. » 25Naagol : « Ñer ugabom básileri itiñ, min mb’íju ísonieni. » Nagabol atiñ, nasenol may bíñu arem. 26Mbiban Isak naagol : « Yoo, áñum, ulofulom min úlloŋora. » 27No Sakob akan mo me, ᵽayol naun gatiŋ wañ waw wo nakano me. Ñer nasenol gásonien gauge naagol :
« Maagen gatiŋ gauge gal áñum gom,
ganogor me ti gaa galah go Atúla ásoniene.
28Mb’Aláemit aseni gamon gáaveul me fatiya,
mb’aseni ᵽoᵽ fubaj fal ettam,
ti bahager ni bíñu yammeŋe.
29Mbi súsuh sammeŋe suutten n’aw,
mbi bugan gammeŋe guya gújulil bújoŋori.
Ᵽan uyab gayoŋ gutii ᵽe, iki guya gújulil bíᵽimbori.
An atabi me, mbi gatab gagu gúbbañul bi ni o,
bare an ásonieni me, mbi ᵽoᵽ ayab gásonien ti go. »
30Mamu Isak ásonien me añolol Sakob.
Sakob o n’eju ehalor ni ᵽayol, Esau nábbañul n’jasaol. 31O may násil básiler babu bo ᵽayol aruhen me ateb akaol esen naagol : « Apa, uilo min utiñ ellu yay yo niŋalli me n’jasaw jaju. Mb’uban núsonienom ti nulobom me. » 32Naagol : « Aw uomme ay ? » Naagol : « Injé, áᵽuri afamma Esau. » 33Isak no naffas me búoh dáru Esau om, náñag natelen nímoro naagol : « Min til ay akaene jasaw iki aŋallom ellu yatemoritemor itiñ aw m’baĉigerulat ? O til nísonien me, ban gásonien gaugu ᵽan gúni ni o bi nánonan. » 34Esau no naun me firim faufu, nalo me tes naya gáᵽib aah ᵽayol : « Injé may, úsonienom ! » 35Naagol : « Atii abutom min aram gásonien gagu gáarien me gúni gúiya. » 36Naagol : « Maagen, gajow gagu gaa Sakob, ni mo gukanol go : abuta bugan ! Nabutom bi ñúuba, min aram fufaneom ni may gásonien gagu go niñumen me eyab ni aw. » Nabbañ aagol : « Ŋañouti gásonien gace bi n’ínje ? » 37Naagol : « Nikanolkan mb’áni gayoŋi bándor, ban nikanol ᵽoᵽ mbi buru gutiol ᵽe jíni umigelol. Nísonienol mb’abaj bahager ni bíñu yammeŋe. Añúm, wa níjue ᵽiaŋ ibbañ ikan bi n’aw ? » 38Naagol : « Min ñer gásonien gaugu ganur pat nubaje ? Ammay, uboket usenom may gásonien gace ! » Min áarul akoŋ. 39Ñer ᵽayol naagol :
« Ᵽan uĉin úhatulo ettam yay yáari me !
Ᵽan úhatulo bo gamon gagu gúloeul me !
40N’gafojei#27.40 gafoje : garien gom gahulie ban ni guñeh, go ekosombil yay nihi guogen bi bútaj fitih babajer. mb’útiñum me,
ban ᵽan ukan amigel atii.
Bare búuy babu bíya, ésuh bi n’ésuh,
mbi biĉili me min uᵽah ni fimigeleti. »
Sakob natey mbaa Haran
41Esau nabaŋ Sakob ni fiiñ mala gásonien gagu gaa ᵽayol go naramol me. Naah m’biinumol : « Ᵽayóli aĉet me funah, ᵽan imugol. » 42Rebeka no naffas me biᵽinorum Esau, návogul Sakob naagol : « Ukánum, atii Esau naᵽinore jamugi bi elugen wo nukanol me. 43Añúm, uuttenom, nuffase buma : uilo ujow bi n’álinom Laban baubu Haran. 44Mb’urobo bo nunah bi no fiiñ atii fujae me eyom. 45Mb’unamo bo bi no najae me éjumor wo nukanol me, níboñul an ákail aŋali. Mata imaŋut íburul buru éubaul funah fanur. »
46Naban naah áinol Isak : « To niemme, buroŋ baube nipoñbopoñ mata gúsabulom, waar Esau bugaa Hit, guyogenomyogen nár. Iní me may Sakob ban abbañ áyabul bo anaare, ñer níni to m’buroŋ bi wa ? »
Currently Selected:
Fíĉilum 27: bqjDBL2
Highlight
Share
Copy
Want to have your highlights saved across all your devices? Sign up or sign in
Wycliffe Bible Translators, Inc. All rights reserved.
