Mat 22
22
Linganizyo ya malyelelo ŵa ukwati
(Lk 14:15-24)
1Yesu elaŵila nawo soti mu malinganizyo kuti, 2“Ufumu wa Kululu tingaulinganizye na mfumu icitila mwana wake malyelelo ŵa ukwati. 3Etuma anyanchito ŵake kuyoyita ŵala woyitiwa ku ukwati, koma ekana. 4Etuma soti anyanchito ayakine, noŵawuzya kuti, ‘Kaŵawuzyeni woyitiwa ku ukwati kuti awele, napaya ngʼombe, na nyama zoyina nipo vonse vili mu malo mwake. Welani ku malyelelo ŵa ukwati.’
5“Koma aliyoŵamvwile nipo efumapo; muyakine eciya ku munda, muyakine eciyositisha, 6nipo ayakine ekata anyanchito ŵala noŵapuŵisha noŵapaya. 7Mfumu yekalipa, nipo yetuma asilikali ŵake kuyoceneka ŵala epaya anyanchito ŵake noshoka mzinda wawo.
8“Mfumu yewuzya anyanchito ŵake kuti, ‘Malyelelo ŵa ukwati awamyiwa, koma ŵala eyitiwa enze osawamila. 9Nkhoyani mu misewu mukayite ŵanthu anyinji ŵamungatweshe.’ 10Anyanchito ŵala eluta mu misewu noyita wonse ŵecifwana mu misewu, wonse aweme na ayipa. Tetyo, ngʼanda ya malyelelo yezula na ŵanthu woyitiwa.
11“Lomba mfumu peyeloŵa nowona ŵanthu woyitiwa, yewona munthu muyakine enzovwalelini va ukwati. 12Yemuwuzya kuti, ‘Waloŵa tyani muno uliyovwale va ukwati?’ Munthu wala esoŵa colaŵila.
13“Pamene apo, mfumu yewuzya anyanchito kuti, ‘Mumangeni manja na mendo, mumutaye panja pa mfinzi. Ku malo ŵala kukaŵe kulila nokukuta menu.’”
14Pa vuli pake Yesu elaŵila kuti, “Anyinji ni woyitiwa, koma osaluliwa ni atontho.”
Kusonkha msonkho kwa Kayisala
(Mk 12:13-17; Lk 20:20-26)
15Pamene apo Afalisi eciyopangana zotapa Yesu mu kamwa. 16Etuma asambili ŵawo ayakine pamo na ayakine ŵa mu cipani ca Helode kwa Yesu. Emuwuzya kuti, “Msambizyi, tuziŵa kuti mwewo mulaŵila vyendi, musambizya Matetulo ŵa Mulungu mu vyendi, nipo muyopalini munthu aliyense. Pala mwewo muloleshalini kuti uyu ni ŵani. 17Tiwuzyeni lomba vamulingilila: kansi ni cozomelezyewa kusonkha msonkho kwa Kayisala mfumu ya ku Roma, keno yayi?”
18Koma Yesu poziŵa malingililo ŵawo ayipa, elaŵila kuti, “Ni cinji kansi mwewo muniyesela lona, mwewo wolipazya? 19Niwonesheni ndalama ya msonkho.” Emuletela ndalama yala.
20Nipo Yesu eŵakonsha kuti, “Kansi cinso cili apa ni ca ŵani, nga zina iyi ni ya ŵani?”
21Ŵala emuyasuka kuti, “Ni va Kayisala, mfumu ikulu ya ku Roma.”
Yesu eŵawuzya kuti, “Mutwale ku mfumu va ufumu wake, na kwa Mulungu va Umulungu.” 22Pecimvwa tetyo, esila nzelu. Tetyo emusiya nofumapo.
Asaduki okonsha va kuwuka kwa akufwa
(Mk 12:18-27; Lk 20:27-40)
23Nsiku yala Asaduki ewela kwa Yesu. (Ŵeve enzolaŵila kuti akufwa owukalini.) Emukonsha kuti, 24“Msambizyi, Mose elaŵila kuti, ‘Keno mwanalume wamwalila aliye ŵana, mkwawo owamila kuloŵa cokolo kuti amuvyalile ŵana mkwawo wala.’ 25Lomba kwenze enekwawo asanu na aŵili analume pakati pasu. Wotatika elungula mwanakazi nomwalila, pakuti enzeve ŵana esiya mkazi wake ku mkwawo. 26Venze tetyo ku wa ciŵili na wa citatu kufwikila wa cisanu na aŵili. 27Pa vuli pake wala mwanakazi naye soti emwalila. 28Nga lomba pa nsiku yakuzowuka kwa akufwa, pa analume asanu na aŵili azeaŵe mwanakazi wa ŵani, pakuti wonse emulungulapo?”
29Koma Yesu eŵayasuka kuti, “Mupumvya cikomo muziŵalini Malembo, nipo soti mphamvu ya Mulungu. 30Pakuti powuka, kukaŵeve kulungula keno kulunguliwa, ngani angelo Kululu. 31Lomba vakuti ŵanthu akawuke kwa akufwa, kansi muliyoŵelenge vecikuwuzyani Mulungu, kuti: 32#Ek 3:6 ‘Newo nine Mulungu wa Abulahamu, nine Mulungu wa Isaki, nine Mulungu wa Yakobo’? Ni Mulungulini wa ŵanthu akufwa yayi, koma wa ŵanthu ŵa moyo.” 33Winji pawicimvwa ivi, wikanganishiwa na vosambizya vake.
Tetulo ikulu
(Mk 12:28-34; Lk 10:25-28)
34Koma Afalisi pecimvwa kuti Yesu wasusha Asaduki, ewungana. 35Lomba yumo mwa ŵeve, kaswili wa Matetulo, ekonsha Yesu kuti amutape mu kamwa. 36Elaŵila kuti, “Msambizyi, pa Matetulo wonse ŵa Mulungu, ikulu ni yotyani?”
37 #
Dt 6:5
Yesu elaŵila kuti, “Uwotemwa Leza Mulungu wako, na mtima wako wonse, na moyo wako wonse na nzelu zako zonse. 38Iyi niye tetulo ikulu na yotatika. 39#Lv 19:18 Ya ciŵili na yopalana nayo ni iyi: Uwotemwa muyako ngani mwaulitemwela wemwine. 40Matetulo wonse ŵa Mose na vonse vecilemba aneneli vankhazikika pa Matetulo aŵa aŵili.”
Kristu ni Mwana wa ŵani?
(Mk 12:35-37; Lk 20:41-44)
41Lomba Afalisi peciwungana pamo, Yesu eŵakonsha kuti, 42“Mulingililapo vinji pa va Mpulumushi Wolayizyiwa wala? Ni mwana wa ŵani?”
Ŵeve elaŵila kuti, “Ni mwana wa Davide.”
43Yesu ekonsha soti kuti, “Lomba cili tyani kuti Davide wala, na nzelu zofumila ku Mzimu Mtuŵa, otomola Mpulumushi Wolayizyiwa wala kuti Asikulu ŵake? Pala elaŵila kuti,
44 #
Ms 110:1
‘Leza ewuzya Asikulu ŵangu kuti,
“Nkhala ku kwanja kwangu kwendi,
mpaka nikayalushe alwani ŵako
kuti aŵe ngani cokandapo mendo ŵako.”’
45“Nga Davide pakumuyita ‘Asikulu,’ angaŵe tyani soti mwana wake?” 46Penzeve cukanga yumo womuyasuka, nipo kufuma nsiku yala penzeve aliyense enze na cikanga comukonsha makonsho ayakine.
Currently Selected:
Mat 22: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
Mat 22
22
Linganizyo ya malyelelo ŵa ukwati
(Lk 14:15-24)
1Yesu elaŵila nawo soti mu malinganizyo kuti, 2“Ufumu wa Kululu tingaulinganizye na mfumu icitila mwana wake malyelelo ŵa ukwati. 3Etuma anyanchito ŵake kuyoyita ŵala woyitiwa ku ukwati, koma ekana. 4Etuma soti anyanchito ayakine, noŵawuzya kuti, ‘Kaŵawuzyeni woyitiwa ku ukwati kuti awele, napaya ngʼombe, na nyama zoyina nipo vonse vili mu malo mwake. Welani ku malyelelo ŵa ukwati.’
5“Koma aliyoŵamvwile nipo efumapo; muyakine eciya ku munda, muyakine eciyositisha, 6nipo ayakine ekata anyanchito ŵala noŵapuŵisha noŵapaya. 7Mfumu yekalipa, nipo yetuma asilikali ŵake kuyoceneka ŵala epaya anyanchito ŵake noshoka mzinda wawo.
8“Mfumu yewuzya anyanchito ŵake kuti, ‘Malyelelo ŵa ukwati awamyiwa, koma ŵala eyitiwa enze osawamila. 9Nkhoyani mu misewu mukayite ŵanthu anyinji ŵamungatweshe.’ 10Anyanchito ŵala eluta mu misewu noyita wonse ŵecifwana mu misewu, wonse aweme na ayipa. Tetyo, ngʼanda ya malyelelo yezula na ŵanthu woyitiwa.
11“Lomba mfumu peyeloŵa nowona ŵanthu woyitiwa, yewona munthu muyakine enzovwalelini va ukwati. 12Yemuwuzya kuti, ‘Waloŵa tyani muno uliyovwale va ukwati?’ Munthu wala esoŵa colaŵila.
13“Pamene apo, mfumu yewuzya anyanchito kuti, ‘Mumangeni manja na mendo, mumutaye panja pa mfinzi. Ku malo ŵala kukaŵe kulila nokukuta menu.’”
14Pa vuli pake Yesu elaŵila kuti, “Anyinji ni woyitiwa, koma osaluliwa ni atontho.”
Kusonkha msonkho kwa Kayisala
(Mk 12:13-17; Lk 20:20-26)
15Pamene apo Afalisi eciyopangana zotapa Yesu mu kamwa. 16Etuma asambili ŵawo ayakine pamo na ayakine ŵa mu cipani ca Helode kwa Yesu. Emuwuzya kuti, “Msambizyi, tuziŵa kuti mwewo mulaŵila vyendi, musambizya Matetulo ŵa Mulungu mu vyendi, nipo muyopalini munthu aliyense. Pala mwewo muloleshalini kuti uyu ni ŵani. 17Tiwuzyeni lomba vamulingilila: kansi ni cozomelezyewa kusonkha msonkho kwa Kayisala mfumu ya ku Roma, keno yayi?”
18Koma Yesu poziŵa malingililo ŵawo ayipa, elaŵila kuti, “Ni cinji kansi mwewo muniyesela lona, mwewo wolipazya? 19Niwonesheni ndalama ya msonkho.” Emuletela ndalama yala.
20Nipo Yesu eŵakonsha kuti, “Kansi cinso cili apa ni ca ŵani, nga zina iyi ni ya ŵani?”
21Ŵala emuyasuka kuti, “Ni va Kayisala, mfumu ikulu ya ku Roma.”
Yesu eŵawuzya kuti, “Mutwale ku mfumu va ufumu wake, na kwa Mulungu va Umulungu.” 22Pecimvwa tetyo, esila nzelu. Tetyo emusiya nofumapo.
Asaduki okonsha va kuwuka kwa akufwa
(Mk 12:18-27; Lk 20:27-40)
23Nsiku yala Asaduki ewela kwa Yesu. (Ŵeve enzolaŵila kuti akufwa owukalini.) Emukonsha kuti, 24“Msambizyi, Mose elaŵila kuti, ‘Keno mwanalume wamwalila aliye ŵana, mkwawo owamila kuloŵa cokolo kuti amuvyalile ŵana mkwawo wala.’ 25Lomba kwenze enekwawo asanu na aŵili analume pakati pasu. Wotatika elungula mwanakazi nomwalila, pakuti enzeve ŵana esiya mkazi wake ku mkwawo. 26Venze tetyo ku wa ciŵili na wa citatu kufwikila wa cisanu na aŵili. 27Pa vuli pake wala mwanakazi naye soti emwalila. 28Nga lomba pa nsiku yakuzowuka kwa akufwa, pa analume asanu na aŵili azeaŵe mwanakazi wa ŵani, pakuti wonse emulungulapo?”
29Koma Yesu eŵayasuka kuti, “Mupumvya cikomo muziŵalini Malembo, nipo soti mphamvu ya Mulungu. 30Pakuti powuka, kukaŵeve kulungula keno kulunguliwa, ngani angelo Kululu. 31Lomba vakuti ŵanthu akawuke kwa akufwa, kansi muliyoŵelenge vecikuwuzyani Mulungu, kuti: 32#Ek 3:6 ‘Newo nine Mulungu wa Abulahamu, nine Mulungu wa Isaki, nine Mulungu wa Yakobo’? Ni Mulungulini wa ŵanthu akufwa yayi, koma wa ŵanthu ŵa moyo.” 33Winji pawicimvwa ivi, wikanganishiwa na vosambizya vake.
Tetulo ikulu
(Mk 12:28-34; Lk 10:25-28)
34Koma Afalisi pecimvwa kuti Yesu wasusha Asaduki, ewungana. 35Lomba yumo mwa ŵeve, kaswili wa Matetulo, ekonsha Yesu kuti amutape mu kamwa. 36Elaŵila kuti, “Msambizyi, pa Matetulo wonse ŵa Mulungu, ikulu ni yotyani?”
37 #
Dt 6:5
Yesu elaŵila kuti, “Uwotemwa Leza Mulungu wako, na mtima wako wonse, na moyo wako wonse na nzelu zako zonse. 38Iyi niye tetulo ikulu na yotatika. 39#Lv 19:18 Ya ciŵili na yopalana nayo ni iyi: Uwotemwa muyako ngani mwaulitemwela wemwine. 40Matetulo wonse ŵa Mose na vonse vecilemba aneneli vankhazikika pa Matetulo aŵa aŵili.”
Kristu ni Mwana wa ŵani?
(Mk 12:35-37; Lk 20:41-44)
41Lomba Afalisi peciwungana pamo, Yesu eŵakonsha kuti, 42“Mulingililapo vinji pa va Mpulumushi Wolayizyiwa wala? Ni mwana wa ŵani?”
Ŵeve elaŵila kuti, “Ni mwana wa Davide.”
43Yesu ekonsha soti kuti, “Lomba cili tyani kuti Davide wala, na nzelu zofumila ku Mzimu Mtuŵa, otomola Mpulumushi Wolayizyiwa wala kuti Asikulu ŵake? Pala elaŵila kuti,
44 #
Ms 110:1
‘Leza ewuzya Asikulu ŵangu kuti,
“Nkhala ku kwanja kwangu kwendi,
mpaka nikayalushe alwani ŵako
kuti aŵe ngani cokandapo mendo ŵako.”’
45“Nga Davide pakumuyita ‘Asikulu,’ angaŵe tyani soti mwana wake?” 46Penzeve cukanga yumo womuyasuka, nipo kufuma nsiku yala penzeve aliyense enze na cikanga comukonsha makonsho ayakine.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.