Mateo 25

Ke Sempità ni Hisus te Sepulù ne Menge Raha ne In-upama rin dut te Menge Etew ne Egkiyug ne Eduma te Edetuan te Eleteala

1Ne mibpenempità pà maa si Hisus te, “Ketà te edlived ku kayi te ampew te dunya, ne ke menge etew ne egkiyug ne ebpekiduma dut te menge etew ne Edetuan te Eleteala ne iring kayi. Ruen sepulù ne etew ne menge raha ne ebpengemkem te sulù dan su edtelevuken dan ini se kenakan ne ibpengesawa. 2Lelima kandan se lengab wey lelima red maa se bereitungan ebpenehana. 3Ini se lelima ne lengab ne migkuwa ran te sulù, ugaid ne warà lana ne mid-ewit dan ke egkeibperan ke sulù dan. 4Ugaid ke lelima ne bereitungan ne mid-ewit dan mulà te edtehuan te lana. 5Ne nelangan se kebpekeuma rut te kenakan ne ibpengesawa, ne edtureturen en ke menge raha ne edtahad ne nekelipereng dan en.

6“Ne ketà te edluuk en ke kerukileman ne ruen migkerag te, ‘Ini en ke kenakan ne ibpengesawa! Pengkayi kew en su sinuhunga niyu en sikandin!

7“Nekehimerat ini se sepulù ne menge raha ne mibpengumbayaan dan ke sulù dan. 8Na, neibperan en te lana ini se sulù dut te lelima ne lengab ne migkahi ran en diyà te menge ruma ran te, ‘Behayi key pà te lana su egkeevukan en ini se sulù dey.’

9“‘Kenà egkepakey,’ ke se bereitungan ne menge raha, ‘su kenà ebpekegaga kenitew ini. Pendiyà kew te tindà ne pemasa kew.’

10“Ketà ne mibpendiyan en te tindà ke lelima ne menge lengab. Ne lius dan dà ne nekeuma en ke kenakan ne ibpengesawa. Tembù be ke lelima rà ne etew ke nekepenehana ne nekeruma dut te kenakan diyà te baley ne egkewingan. Guna su nekepemenayik dan en ne mibpintuan en ke gumawan.

11“Ne iseg-iseg ne nekeuma en ini se lelima ne menge raha ne lengab ne mibpenehetiat dan en se egkahi te, ‘E, Mama, pelusura key.’

12“Ugaid ne migkahi ke kenakan ne ibpengesawa te, ‘Kenà, su kenà ku egketuenan sikiyu.’

13“Iring kayi,” ke si Hisus, “ke ed-ul-ulaan te menge etew ketà te kedlived ku kayi, tembù be layun kew pempenehana su warà niyu metueni ke hewii etawa endei egketahù ke andew te kebpekeuma ku.”

Ke Sempità ni Hisus Mekeatag te Menge Edsugsuhuen ne midserihan te kureta su Ebpeisehen ne In-upama rin dut te Menge Etew ne Egkiyug ne Eduma te Edetuan te Eleteala

(Lucas 19:11-27)

14Ne mibpenempità pà maa si Hisus te, “Ini se kedlived ku kayi te ampew te dunya ne ebpekeiring te senge etew ne mibpendiyà te meriyù ne inged. Ne ketà te warà pà mekehenat ne midtawag din ke menge edsugsuhuen din ne insarig din kandan ke kearen din. 15Uman senge etew kandan ne mibehayan din te endei se taman ne egkegaga rin. Kayi te senge etew ne dekelà se egkegaga rin, ne mibehayan din te lelima nengivu. Kayi te ruma ne mibehayan din te deruwa nengivu su arà se egkegaga rin. Ne ketà te iketelu ne mibehayan din te sengivu su arà dema ke egkegaga rin. Ne ketà ne mid-ipanew en sikandin. 16Ini se edsugsuhuen ne nekekuwa te lelima nengivu, ne midahewrahew en migkuwa te dehangan din ne netaman ne nekeuntung en sikandin te lelima pà nengivu. 17Ne engketà ded dema ke edsugsuhuen ne nekekuwa te deruwa nengivu, su nekeuntung sikandin te deruwa pà nengivu. 18Ugaid ne ini se edsugsuhuen ne migkuwa te sengivu, ne migkekalut dà ne inleveng din ke kureta ne insarig kandin.

19“Guna su neuhet en ne mid-ulì en ke ebpengemuney kayi te menge edsugsuhuen. Ne midtawag din sikandan su ed-intengan din ini se insarig din kandan. 20Nekeuma ini se edsugsuhuen ne midserihan te lelima nengivu ne migkahi te, ‘Kerenan, ini en ke lelima nengivu ne insarig nu kedì, ne ruen pà ini lelima nengivu ne neuntung ku keniyan te kureta nu ne impemuunan ku te kedtitindàtindà ku.’

21“Migkahi ini se ebpengemuney te, ‘Ara be! Meupiya ka su mibpegelep ke ves su midtinidtuwanan nu ini se insarig ku keykew. Geina te egkeserihan ka te deisek ne kureta, ne ed-umanan ku pà ke idsarig ku kenikew te rekelà pà. Pengkayi ka su apey ka ebpekeamung te kegkehalew ku!

22“Ne midlusud en maa ke edsugsuhuen ne midserihan te deruwa nengivu ne migkahi te, ‘Kerenan, ini en ke deruwa nengivu ne insarig nu kedì, ne ruen pà ini deruwa nengivu ne neuntung ku keniyan te kureta nu ne impemuunan ku te kedtitindàtindà ku.’

23“Migkahi ini se ebpengemuney te, ‘Arà be! Meupiya ka su mibpegelep ke ves su midtinidtuwanan nu ini se insarig ku keykew. Geina te egkeserihan ka te deisek ne kureta, ne ed-umanan ku pà ke idsarig ku kenikew te rekelà pà. Pengkayi ka su apey ka ebpekeamung te kegkahalew ku!’

24“Ne midlusud en maa ke edsugsuhuen ne midserihan te sengivu ne migkahi te, ‘Kerenan, warà ku ipemuunan ke kureta nu te kedtitindàtindà su netuenan ku te mepasang ka ne etew. Ebpepemulaan nu ke menge edsugsuhuen nu su apey ka ebpekekuwa kayi te helevek dan. Ne ed-untung ka te kenà keykew ne helevek ke midtitindàtindà. 25Neandek a kenikew ne inleveng ku rà ini se kureta nu. Ini red ke kureta ne insarig nu kediey.’

26“ ‘Warà rantek nu ne pehulen ne edsugsuhuen!’ ke se ebpengemuney. ‘Netuenan nu ves te ebpepemulaan ku ke menge edsugsuhuen ku su apey a ebpekekuwa te helevek dan, ne ed-untung a te kenà kedì ne helevek te edtitindàtindà. 27Ne meambe ke warà nu intahù diyà te bangkù ini se kureta ne insarig ku kenikew su apey ketà te kedlived ku ne egketelimà ku ke kureta ku te ruen iseg din?’

28“Ne migkahi ke pengemuney kayi te ruma ne edsugsuhuen din te, ‘Kua niyu arà se kureta ne keniyan te kandin ne ivehey niyu ketà te edsugsuhuen ne mibpeiseg te sepulù nengivu ini se kureta rin. 29Su ke etew,’ ke si Hisus, ‘ne egkeserihan dut te insarig kandin, ne ed-umanan pà apey edsawadsawad pà ke kandin. Ugaid ke etew ne kenà egkeserihan, ne ed-ewien pà misan ke reisek ne insarig kandin. 30Ne ini se edsugsuhuen ne warà rantek din ne iantug niyu ipekeriyù diyà te merusirem, ne ketà ebpekependerawit wey ebpekengingitel.’ ”

Kedenà ni Hisus te Kukuman Dut Impeanak te Menusiyà ketà te Kedlived Din Kayi te Ampew te Dunya

31“Ketà te edlived kayi te ampew te dunya,” ke si Hisus, “ke Impeanak te Menusiyà ne edumaan te langun ne menge suluhuen din, ne ebpinuu sikandin ketà te ebpinuuwan te punggus ne ratù su edatù te langun ne menusiyà. 32Ne eburunen din ke langun ne menusiyà diyà te etuvangan din, ne ketà ne ebpedsivayen din te deruwa ne puntuk ne ebpekeiring dut te tumetuganur ne ebpemilien din ke bilibili ne idsivey rin ke kambing. 33Ne ke menge etew ne ebpekeiring te bilibili su metidtu ne kayi rin idtahù te egkekewanan din, ne ke menge etew ne ebpekeiring te kambing ne kayi rin te egkehivang din.

34“Ne egkahi en ini se punggus ne ratù kayi te menge etew te egkekewanan din te, ‘Sikiyu ne mibehayan te keupianan dut te Eleteala ne Amey ku, ne lusud kew dut te Kedetuan te Eleteala ne impenehana keniyu igenat dut te kinelimbaha te kelibutan. 35Su ketà te nevitil a ne mibehayan a niyu te egkekaan, ne nemeraan a ne pineinum a niyu. Ne ketà te nekeuma a riyà te keniyu ne misan kenà a niyu egkekilala ne pinepemenayik a niyu. 36Ne ketà te warà belegkas ku, ne mibehayan a niyu te belegkas. Ne nekedaru a, ne midtuganur a nikiyu. Ne nevilanggù a, ne midlauy a nikiyu.’

37“Ne egkahi ini se menge metidtu kayi te egkekewanan te, ‘Kerenan, keenu ka nevitil ne pinekaan dey sikuna, etawa nemeraan ka ne pineinum dey sikuna? 38Keenu ka mibpengkayi te kenami ne misan warà dey mekilala sikuna ne pinepemenayik dey sikew? Ne keenu ka mewerai te belegkas ne mibehayan day sikuna? 39Keenu ka medaru etawa nevilanggù ne midlauy rey sikuna?’

40“Ne egkahi ke punggus ne ratù te, ‘Sebenarvenar ne ini se egkehiyen ku, ketà te mid-ulaula niyu ini diyà te misan engkey dut te kevevaan en ne eduma kedì ne iring te mid-ulaula niyu ini kayi te kediey!’

41“Ne ketà ne egkehiyan din ke menge etew kayi te egkehivang din te, ‘Sikiyu ne mibpenrewakan te Eleteala su nesuhat kew te sakit te hinawa rin, awà kew kayi te kediey! Pendiyà kew te apuy nerakà ne kenà egkeevukan ne impenehana ki Setanas ke datù te pekaid wey ke menge sakup din. 42Su nevitil a ne warà a niyu behayi te egkekaan, ne nemeraan a ne warà a niyu peinuma. 43Ne ketà te nekeuma a riyà te keniyu, ne warà a niyu pepemenayika. Ne warà belegkas ku, ne warà a niyu behayi. Nekedaru a, ne warà a niyu tugenura. Nevilanggù a, ne warà a niyu leuya.’

44“Ne ketà ne egkahi ini se menge etew kayi te egkegivang te, ‘Kerenan, keenu ka nevitil etawa nemaaran, etawa nekeuma ka kayi te kenami, etawa warà velegkas nu, etawa nekedaru ka, etawa nevilanggù ka ne warà key medtavang keykew?’

45“Ne egkahi ke punggus ne ratù te, ‘Sebenarvenar ne ini se egkehiyen ku keniyu, uman kew warà medtavang dut te kevevaan en ne eduma kedì ne iring te mid-ulaula niyu ini kayi te kediey!’

46“Tembù be,” ke si Hisus, “ini se menge etew ne ibpependiyà te apuy nerakà su edusaan te warà edtemanan din. Ne ini se menge metidtu ne ibpependiyà te surugà su ruen umur dan ne warà edtemanan din.”

Currently Selected:

Mateo 25: mbi

Highlight

Copy