Mateo 12
12
Is Ebayàbayà te Andew te Kedhimeley
(Mateo 12:1-8; Marcos 2:23-28; Lucas 6:1-5)
1Ne wazà utew meug̵et dutun, ne andew he Sebadu. Ne iyan haazà he andew, insug̵ù dengan te Megbevayà te menge Hudiyu he wazà etew he ibpevaal zutun te andew su iyan Andew te Kedhimeley. Ne zutun he andew ingkevayà eni Jesus is pemuleey. Ne zutun egkengevitil is menge sumusundan din ne mibpengetu zan te menge trigu ne migkaan dan is beg̵as dutun. 2Ne naahà haazà te menge Perisiyu ne migkeg̵iyan dan si Jesus te, “Ahaa nu is menge sumusundan nu su edsupaken dan is insug̵ù kenitew te Megbevayà su maan is midlegtey zan kayi te Andew te Kedhimeley.” 3Ne midtavak si Jesus te, “Kenà egkehimu he wazè niw mevasa ziyà te ingkesurat dengan kes mid-ulaula ni Hadì David. Sikandin wey is menge sundaru zin, nengevitil zan. 4Ne wazà sikandin mekesalà minsan te midseled diyà te Valey te Megbevayà ne sikandin wey is menge sakup din, migkaan dan is egkeenen he insavuk diyà te etuvangan te Megbevayà. Ne supak te kesug̵uan haazà is kegkeena zan dutun su iyan dà ebpekekaan dutun he egkeenen is menge memumuhat. 5Kenà daan egkehimu he wazè niw mevasa ziyà te ingkesurat ni Moises he is menge memumuhat diyà te Valey te Megbevayà, emun Andew te Kedhimeley kenè dan edhimeley, ne minsan pa zutun kenè dan ebpekesalà. 6Tutuu heini is egkeg̵iyen ku keniyu he zuen nekeuma kayi te keniyu he lavew pa kenà is Baley te Megbevayà. 7Duen daan insurat he Lalag te Megbevayà he egkag̵i te, ‘Kenà iyan mahal zini te g̵ehinawa ku is menge pemuhat niw, kekenà, iyan is kegkehizu niw te zuma niw.’ ” Ne mid-uman megkag̵i si Jesus te, “Ke hustu is kedsevuta niw kayi te ingkesurat, wazè niw g̵eina mesewayi is wazè din salà. 8Su siak is migeraran he Kakey te Menusiyà, iyan a zuen keg̵ehem te egkag̵i ke hengkey is hustu he ed-ul-ulahan te etew emun Andew te Kedhimeley.”
Is Kebewii Zuen te Minatey is Menge Ug̵at Diyà te Zivaluy he Velad Din
(Mateo 12:9-14; Marcos 3:1-6; Lucas 6:6-11)
9Ne mid-awà si Jesus dutun, ne midhendiyà te sevaha he simbahan. 10Ne zutun te seled te simbahan, duen etew he minatey is menge ug̵at te zivaluy he velad din. Duen daan dutun menge etew he ebpen-ahà te paag̵i he ikesumbung dan si Jesus he nekesupak te kesug̵uan. Ne mid-insaan dan sikandin te, “Emun Andew te Kedhimeley, ke ebewian ta is egkezeruwan wey meulii, ebpekesupak ki ve te kesug̵uan?” 11Ne midtavak si Jesus te, “Ke zuen kerehidu te minsan hentei kenitew ne egkeulug diyà te vitu te Andew te Kedhimeley, kenà egkehimu he kenè din igaun puun dutun te vitu minsan ke Andew te Kedhimeley. 12Ne is etew, lavew pa he mahal kenà te kerehidu. Ne tenged dutun kenè ki ebpekesupak te kesug̵uan ke edtevangan ta is etew minsan ke Andew te Kedhimeley.” 13Ne zutun migkeg̵iyan ni Jesus haazà is etew he minatey is menge ug̵at te zivaluy he velad din te, “Ketenga nu, Mama, is belad nu.” Ne migketeng dutun te etew is belad din ne zutundutun neulian haazà he wazà pigeyanan din iring dutun te zivaluy he velad din. 14Ne mid-awà dutun is menge Perisiyu ne mibpelelelag̵è dan ke hengkey is paag̵i he mehimu zan he mepatey si Jesus.
Si Jesus is Pinilì te Megbevayà
15Ne hein netuenan ni Jesus is ed-isipen dutun te menge Perisiyu, mid-awà sikandin dutun, ne zuen mezakel he menge etew he nemenduma kandin. Ne neulian din is langun dutun he nengezeruwan, 16ne migkeg̵iyan din sikandan he kenè dan tudtula te zuma haazà is mid-ulaula zin. 17Umba nekag̵i zin heini su egketuman sikan is Lalag te Megbevayà he netagnà dengan ni Esaias he edhenduen te,
18“Iyan heini sulug̵uen he pinilì ku.
Iyan sikandin utew ku minahal ne utew ku egkesuati is menge vaal zin.
Ebpeulinan ku sikandin te Wag̵as he Mulin-ulin,
ne is metazeng he kukuman ku,
edtudtulen din diyà te tivuuk he menusiyà.
19Ne kenà sikandin ebpekidlawan;
kenà daan ebpemensag;
kenà daan egkezineg sikandin he edikursu ziyà te menge kersada te inged.
20Kenè din edlekaan is meluya is kedtuu zin kandin.
Su edtevangan din is minsan hentei,
minsan sikan is deisek is kedsarig din kandin.
Kenà ed-engked ebpenudtul taman te ebpekeeneb diyà te minsan hendei is metazeng he ulaula.
21Ne ebpekesarig kandin is menge etew
ziyà te langun he menge nasud.”
Is Lavew ki Setanas
(Mateo 12:22-32; Marcos 3:20-30; Lucas 11:14-23)
22Ne zutun duen nemekeuma he menge etew he zuen miduma zan he maama he nelakap wey neemew tenged te midsuukan sikandin te mezaat he mulin-ulin. Ne mibewian haazà ni Jesus ne segugunà nekekag̵i wey nekeahà. 23Nengeinuinu is mezakel he menge etew zutun ne ke sikandan te, “Kela ke iyan sikandin kes netagnà he kevuwazan ni Hadì David.” 24Ne zuen menge Perisiyu zutun ne hein nezineg dan haazà migkag̵i zan te, “Umba zuen gehem din he ebpekeulì te edlelungen te mezaat he mulin-ulin su iyan mibeg̵ey kandin te g̵ehem si Endedaman, sikan is egalen te menge mezaat he mulin-ulin.” 25Iyan, nesavut ni Jesus is diyà te isip dan, ne ke sikandin diyà te kandan te, “Ke zuen hadì, ne ebpetebtebekà is menge sakup din, meg̵aan egkeawà is gehem din te kedhadì. Ne ke zuen edlingahaan te sengevelayan ne emun kenà ne sengezetuan, ne ebpekungkuntedahà haazà is menge sakup dutun ne egkevengkag haazà is edetuan din. 26Umba, ke pinaag̵i te g̵ehem ni Setanas egkezaag ku is gehem ni Setanas, egketebek din bes is menge sakup din ne egkezezeetan din is gehem din. 27Emun iyan ibpenegseg ku te menge mezaat he mulin-ulin is gehem he ebpuun diyà te ki Setanas ne hendei ves ebpuun is gehem te menge zuma niw he ebpenegseg te mezaat he mulin-ulin? Pinaag̵i te menge ulaula te menge sumusundan niw egketuusan he nengesayep kew. 28Su heini is gehem ku te kebpemug̵ew te mezaat he mulin-ulin, ne ziyà ebpuun te Wag̵as he Mulin-ulin he Megbevayà. Ne pinaag̵i kayi egketuusan he iyan en heini sikan is timpu te kedhadì te Megbevayà.
29 Nezaag ku en si Setanas umba igkepaawè ku is menge sakup din, su wazà minsan hentei he ebpekeseled te valey te mezesen he etew wey zin maag̵ew is menge azen dutun te mezesen he etew, emun kenè din egkehunà egkevakus haazà is mezesen he etew. Kinahanglan he ebekusen din edhunai, ne human din egkeag̵ew is menge azen dutun te mezesen he etew.
30Sikan is kenè ku zuma, kuntada ku; sikan is kenà edtavang kedì, edsanggen kediey. 31Umba, egkeg̵iyen ku keniyu he egkepesaylu pa is etew te minsan hengkey he salè din wey minsan hengkey he mezaat he egkeg̵iyen din, iyan, sikan is edsumpalit te Wag̵as he Mulin-ulin, kenà egkepesaylu. 32Sikan is edsumpalit kedì te Kakey te Menusiyà, egkepesaylu pa; iyan, sikan is edsumpalit te Wag̵as he Mulin-ulin, kenè en egkepesaylu te wazè din pidtemanan.
Is Beg̵as te Pinemula
(Mateo 12:33-37; Lucas 6:43-45)
33Is kayu he wazè din erat, ne meupiya is beg̵as din. Ne is kayu he zuen din erat, ne mezaat is beg̵as din. Egkekilala is kayu pinaag̵i te veg̵as din. 34Iring din ded daan kayi te keniyu. Wazà meupiya he egkekag̵i niw su memezaat is ulaula niw. Iring kew te menge uled su ebpekekaid kew! Is diyà te g̵ehinawa te etew, iyan edlepew ziyà te vèbè din. 35Is etew he meupiya is ulaula zin, ne meupiya zaan is kebpemèbè din. Is etew he mezaat is ulaula zin, ne mezaat daan is kebpemèbè din.
36Egkeg̵iyen ku keniyu he zutun keuzemà te andew te kedsusi, ed-insaan te Megbevayà is minsan hentei, ke maan is nekekag̵i sikandin te wazà pulus he menge lalag. 37Su pinaag̵i te menge lalag he nenggawas diyà te vèbè niw ne zutun egkeahà keuzemà ke egkesilutan kew ve wey ke kenà.”
Is Ebpen-ahà te Egkein-inuwan
(Mateo 12:38-42; Marcos 8:11,12; Lucas 11:29-32)
38Ne zutun migkag̵i ziyà te ki Jesus is menge menunudlù te kesug̵uan wey menge Perisiyu te, “He Menunudlù, ipeehè key kenikew te singyal.” 39Ne midtavak si Jesus te, “Sikiyu is menge etew g̵untaan, utew mezaat is menge ulaula niw. Wazè en diyà te gehinawa niw is kebmahala te Megbevayà. Maan is ed-ehè kew te singyal? Iyan dà singyal he ibpaahà keniyu is iring duen te singyal he impeulaula zuen te tipehuna he ebpeneuven he si Jonas. 40Su nekeseled si Jonas diyà te g̵etek te zekelà he pait seled te tetelu he andew. Ne iring din ded daan, siak is Kakey te Menusiyà, ebpekeseled a ziyà te zizalem te tanà seled te tetelu he andew. 41Keuzemà te andew te kedhukum te Megbevayà, edsewayen kew is menge etew g̵untaan te menge tigNinivi zengan su hein nezineg dan is penurù ni Jonas, mid-iniyug̵an dan is memezaat he ulaula zan. Ne g̵untaan duen ebpeneuven he lavew pa kenà si Jonas dini te keniyu, ne sikiyu mulà, wazè niw zewata is penurù din. 42Keuzemà te andew te kedhukum edsewayen kew zaan duen te singyuda zengan he ziyà ebpuun te inged he Siba su utew meziyù is midhipenawan din te kebpemineg dà te penurù ni Hadì Sulumun te utew metau. Ne g̵untaan duen ebpenurù he lavew pa kenà si Sulumun dini te keniyu ne sikiyu mulà, wazè niw zewata is penurù din.
43Ke ed-awà is mezaat he mulin-ulin he ebpuun diyà te etew he edlelungen din, diyà ebayà te memaza he tanà su ebpen-ahà te egkeubpaan din. Ne emun wazè din egkaahà, 44egkag̵i si kandin te, ‘Edlikù a nasì diyà te neubpaan ku.’ Ne edlikù ne egkeehè din haazà is neubpaan din he wazà tag̵ù ne midtines en is menge vutang dutun ne nepurung melumpiyuwi. 45Ne zutun edlikù edhipanew su ebpengakat te pitu he zuma zin he menge mezaat he mulin-ulin he tuwas pa he memezaat kenà sikandin. Ne ed-ahuk dan ne ed-ubpè dan dutun te etew. Ne zutun ed-iseg pa ebmezaat is kebpekesavuk dutun te etew kenà te nehuna he kebpekesavuk din. Iring dutun is egkeulaula te menge etew g̵untaan su ed-iseg ebmezaat is kebpekesavuk dan.”
Is Mesipeg Diyà te ki Jesus
(Mateo 12:46-50; Marcos 3:31-35; Lucas 8:19-21)
46Ne te kemulu pa ebpekidlalag si Jesus dutun te menge etew, nekeuma is iney zin wey menge hazi zin he maama. Ne edtag̵ad dan ki Jesus diyà te g̵awas su zuen egkeg̵iyen dan kandin. 47Ne migkeg̵iyan si Jesus te etew zutun te, “Ahaa nu is iney nu wey menge hazi nu zutun su zuen dan kun egkeg̵iyen kenikew.” 48Ne migkag̵i si Jesus te, “Duen ku pa ibpaahà keniyu he iney ku wey menge suled ku.” 49Ne zutun intezù din is menge sumusundan din te migkag̵i te, “Heini zed is iney ku wey menge suled ku. 50Su is minsan hentei he edtuman te egkesuatan te Amey tew he ziyà te langit, iyan daan iney ku, menge suled ku he maama, wey suled ku he vahi.”
Currently Selected:
Mateo 12: mbbNT
Highlight
Share
Copy
Want to have your highlights saved across all your devices? Sign up or sign in
© 2001, Wycliffe Bible Translators, Inc., All rights reserved.
