Aluki 10

Azezi tõm a karẽnbiisi pisyopɔɩ la ayi tɩ ba sẽŋɛ ka mõolɛ Nawẽnnɛ kõ-yẽlga

1Bɛla poorʋm, Azezi looge la karẽnbiisi basɛba pisyopɔɩ la ayi tɩ a tõm ba bayi bayi tɩ ba dẽŋɛ nẽŋa sẽŋɛ tẽn-sɛba, la zẽ'e-sɛba wuu tɩ ẽŋa mẽŋa wʋn sẽŋɛ la. 2A yele ba yetɩ: «Va'am na bõnkɔɔla lagsgɔ zo'oge mɛ, la tõntõnɩba n wʋn lagsɛ bõnkɔɔla la pɔ'ɔrɩ mɛ. Bɛla ĩyã sose-ya va'am na dãana tɩ a tõm tõntõnɩba pa'asɛ tɩ ba lagsɛ bõnkɔɔla la.» 3Dee yãŋa yele ba yetɩ: «Sẽŋɛ-ya, yãma ãn wʋ piisi tɩ mam tõm saasaadõma tẽŋasʋka. 4Da dɩkɛ-ya pʋtmãanɛ, bɩɩ tãmpɔkɔ, la da dɩkɛ-ya tagra pa'asɛ, da ze'ele-ya sore bɔ nẽra gã'a. 5La ya sãn yetɩ ya kẽ yire pʋam, ya dẽŋɛ pʋ'ʋsɛ yire la dõma yetɩ: ‹Nawẽnnɛ wʋn bɔ ya sũ-mã'asʋm.› 6Nẽra sãn bɔna mĩ bɔɔra sũ-mã'asʋm, ya sũ-mã'asʋm wʋn bɔna la ẽ. La nẽra sãn ka bɔna mĩ bɔɔra sũ-mã'asʋm, ya sũ-mã'asʋm wʋn leme ya mẽŋa zẽ'am. 7Da lɔsna-ya yiɛ, bɔna-ya yire ayɩla pʋam, yũura dee dita bõn-sɛba tɩ ba bɔ ya la, se'ere n soe la, la masɛ mɛ tɩ tõntõnna to'oge a yɔɔrɔ. 8Ya sãn paagɛ tẽn-sɛka woo pʋam tɩ ba to'oge ya, di-ya bõn-sɛba tɩ ba bɔ ya la, 9la ya botɩ tẽn-ẽŋa bã'adõma yẽ ĩmã'asʋm, dee yele nẽrba la yetɩ: ‹Wakatɛ lɛm mɛ tɩ Nawẽnnɛ wʋn di na'am ya tẽŋasʋka.› 10La tẽn-sɛka woo pʋam tɩ ya kẽ tɩ ba ka to'oge ya, ya yese sore dee yele tẽŋa la nẽrba wuu yetɩ: 11‹Tõma pɩɩsrɩ la ya tẽŋa tẽntõnnɔ n tabɛ tõma nãma la, tɩ la pa'alɛ tɩ ya ka ẽŋɛ sõŋa. La bãŋɛ-ya tɩ wakatɛ lɛm mɛ tɩ Nawẽnnɛ wʋn di na'am nẽrba tẽŋasʋka.› 12Mam yetɩ ya mɛ tɩ sarɩyadia daarɛ, Sodom nẽrba kãn ba yẽ toogo wʋ tẽn-ẽŋa nẽrba n wʋn yẽ toogo se'em na.

13Korazẽ dõma, ya wʋn yẽ toogo! Betisayida dõma, ya wʋn yẽ toogo! Se'ere n soe la, tõon-yãlma sɛba n tõm ya tẽnsɩ pʋam na, daan sãn tõm nɩ na Tiiri, la Sidõ tẽnsɩ pʋam, ba wʋn teege nɩ yɛm basɛ tõon-be'ero halɩ kʋrʋm kʋrʋm, yɛ bɔra futo ẽŋɛ tãmpɛglʋm ẽŋɛ ba zuto tɩ la pa'alɛ tɩ ba teege yɛm. 14La sarɩyadia daarɛ, la wʋn dɛna toogo bɔ yãma gãnna Tiiri, la Sidõ dõma. 15La yãma Kapɛrnaʋm dõma, yãma tẽ'esɛ tɩ ya wʋn zẽkɛ mɛ ka paagɛ saazuum bɩɩ? Ayɛɩ, ya wʋn sige mɛ ka paagɛ bug-tẽŋa.»

16La Azezi le yele a karẽnbiisi la yetɩ: «Sɛka n selsrɩ ya yetɔga, a selsrɩ la mam yetɔga, la sɛka n zagsɛ ya, a zagsɛ la mam. La sɛka n zagsɛ mam, a zagsɛ la sɛka n tõm mam na.»

17La karẽnbiisi pisyopɔɩ la ayi la sẽŋɛ mɛ dee leme wa'am la sũ-yẽlga wa yetɩ: «Zuudãana, baa la kʋlkã'arsɩ sakrɩ tõma nõorɛ mɛ, ban zotɩ fõn yʋ'ʋrɛ la ĩyã.» 18Tɩ Azezi yele ba yetɩ: «Mam yẽ la Asũtãana n ze'ele saazuum lui tẽŋa wʋ saaga n yãkɛ la. 19Bãŋɛ-ya tɩ mam bɔ ya pãŋa mɛ tɩ ya nẽ bõnsɛ'ɛdõma, la nãnsɩ, dee yãŋɛ Asũtãana la a pãŋa wuu, la sɛla sɛla ka tã wʋn ẽŋɛ ya be'em. 20La da ɩta-ya sũ-yẽlga kʋlkã'arsɩ n sakrɩ ya nõorɛ la ĩyã, ɩta-ya sũ-yẽlga ya yʋ'ʋra n gʋlsɛ Nawẽnnɛ yire vɔm gõŋɔ pʋam na ĩyã.»

Azezi ɩtɩ sũ-yẽlga

(Amatie 11:25-27;13:16-17)

21Wakat-ẽŋa tɩ Nawẽnnɛ Sɩa botɩ Azezi sũure ẽŋɛ yẽlʋm, tɩ a yetɩ: «Mam Sɔ Nawẽnnɛ n de saazuum la tẽŋa wã Zuudãana, mam pẽgrɩ fɔ, se'ere n soe la, fõn sʋgɛ bõn-bãna wã mɛ tɩ yɛm dõma la bãŋrɩba ka mina, dee pa'alɛ nẽr-sɛba n ãn wʋ kɔm-pɩgsɩ la. Ẽe, mam Sɔ, la de la fõn boorɩ bɛla la ĩyã.»

22«Mam Sɔ dɩkɛ sɛla woo ẽŋɛ la mam nu'usum. La nẽra ka mi mam n de Nawẽnnɛ Dayʋa la n de sɛka, sãn dagna mam Sɔ la, la nẽra mẽ ka mi mam Sɔ la n de se'em, sãn dagna mam n de a Dayʋa la, la sɛba tɩ mam wʋn botɩ ba bãŋɛ ẽ na.»

23Azezi yele bɛla dee wẽrgɛ la a karẽnbiisi la bɔba, yele bãma mã'a yetɩ: «Yãma sɛba n yẽtɩ sɛla tɩ ya yẽtɩ wã, tarɩ zu-yẽlga. 24La mam yetɩ ya tɩ Nawẽnnɛ nõtɔ'ɔsrɩba, la na'adõma zozo'e yʋʋn boorɩ tɩ ba yẽ yãma n yẽ sɛla la mɛ, la ba ka yẽ, ba yʋʋn boorɩ tɩ ba wõm sɛla tɩ yãma wõm na mɛ, la ba ka wõm.»

Samaari nẽra n sõŋɛ a tadãana makrɛ

25Tɩ lɔɔ karẽnsãama isge tɩ a di Azezi yɛm bɩsɛ, soke ẽ yetɩ: «Karẽnsãama, mam wʋn ẽŋɛ la wãne yẽ vɔm n ka ba'asrɩ?» 26Tɩ Azezi lerge ẽ yetɩ: «La gʋlsɛ Nawẽnnɛ lɔɔ gõŋɔ la pʋam yetɩ bẽm? Fõn karẽŋrɩ ẽ na, a yetɩ bẽm?» 27Tɩ a lerge yetɩ: «La yetɩ: Nõŋɛ fʋ Zuudãana Nawẽnnɛ la fʋ sũure wuu, la fʋ sɩa wuu, la fʋ pãŋa wuu, la fʋ yɛm wuu, dee nõŋɛ fʋ tadãana wʋ fõn nõŋɛ fʋ mẽŋa se'em na.» 28Tɩ Azezi yele ẽ yetɩ: «Fʋ yele sõŋa. Ẽŋɛ bɛla tɩ fʋ wʋn yẽ vɔm na.»

29La ẽŋa n boorɩ tɩ a bɔ a mẽŋa bʋʋrɔ la, tɩ a soke Azezi yetɩ: «Ãne n de mam tadãana?» 30Tɩ Azezi lerge ẽ yetɩ: «Nẽra n daan yese Zerizalɛm wɛ Zeriko, tɩ fãarba yõkɛ ẽ fã a lɔgrɔ wuu, dee wẽ ẽ tɩ a dee la a ki, tɩ ba basɛ ẽ dee fõrgɛ. 31Tɩ Nawẽnnɛ kãabgɔ kẽema ayɩla dɔla so-ẽŋa tɔlla, yẽ ẽ, lɔkɛ tole dee basɛ ẽ. 32Tɩ Leviti nẽra mẽ wa'am tɔlla, yẽ ẽ, bʋrgɛ tole dee basɛ ẽ. 33La Samaari nẽra n mẽ daan dolɩ so-ẽŋa tɔlla yẽ ẽ, tɩ a ninbãalga yõkɛ ẽ. 34Tɩ a paagɛ a zẽ'am dɩkɛ dãam peege a nõtɔ la, ẽŋɛ kaam ĩmĩ vile. Yãŋa yõkɛ ẽ bã a bõŋa zuo, tarɩ ẽ sẽŋɛ sãama yire ka bɩsɛ a yelle. 35Tɩ beere wiige tɩ a dɩkɛ lig-kõba bayi bɔ nẽr-sɛka n bɩsrɩ sãama yire yelle la, dee yele ẽ yetɩ: ‹Bɩsra a yelle, ligri la sãn pɔ'ɔgɛ, mam sãn leme, mam wʋn yɔ fɔ.› » 36Azezi tɔgɛ bɛla kɩ'ɩlɩm dee soke ẽ yetɩ: «Nẽrba batã wã, fõn tẽ'esɛ tɩ ãne n de nẽra la tɩ fãarba yõkɛ la tadãana?» 37Tɩ lɔɔ karẽnsãama la lerge yetɩ: «Sɛka n zoe a ninbãalga sõŋɛ ẽ na.» Tɩ Azezi yele ẽ yetɩ: «Sẽŋɛ mẽ ka ẽŋɛ bɛla.»

Amartɩ la Amaari yelle

38Azezi la a karẽnbiisi daan sẽnnɩ mɛ ka kẽ tẽŋa ayɩla pʋam. Tɩ pɔka yʋ'ʋrɛ n de Amartɩ bɔna tẽn-ẽŋa pʋam to'oge ẽ a yire. 39Amartɩ tarɩ la yɩbga tɩ a yʋ'ʋrɛ dɛna Amaari. Tɩ Amaari zẽa Zuudãana Azezi nãma bɔba sɛlsra a yetɔga.

40La Amartɩ tõoma yelle n daan mõ'ogɛ a nini, tɩ a sẽŋɛ ka yele Azezi yetɩ: «Mam Zuudãana, mam yɩbga la n basɛ tɩ mam m yɩla mã'a tõnna la, fõn yetɩ bẽm? Yele ẽ tɩ a wa'am wa sõŋɛ ma.» 41Tɩ Zuudãana Azezi lerge ẽ yetɩ: «Amartɩ, Amartɩ, fõn botɩ fʋ yɛm n yɔɔra la yɛla zozo'e yelle. 42La bõnɔ ayɩla mã'a n de yel-kãŋkãŋɛ. Amaari looge la bõn-sõŋɔ, la nẽra nẽra kãn tã'agɛ to'oge bõn-ẽŋa a zẽ'am.»

Currently Selected:

Aluki 10: gurDBL

Highlight

Copy