Aluki 18

Pɔkõorɛ, la sarɩyadita makrɛ

1Tɩ Azezi makɛ makrɛ pa'alɛ ba tɩ ba sɔsra Nawẽnnɛ wakatɛ wuu da basɛ, 2yele ba yetɩ: «Sarɩyadita n daan boe tẽŋa ayɩla ka zɔta Nawẽnnɛ, dee ka nanna nẽrba. 3Tɩ pɔkõorɛ mẽ bɔna tẽŋa la pʋam sẽnna a zẽ'am wakatɛ wuu yɛta ẽ tɩ: ‹Sõŋɛ ma tɩ m yẽ bʋʋrɔ m bɛ zẽ'am.› 4La pɔkõorɛ la sẽŋɛ ka sose ẽ na nõor-faa, tɩ sarɩyadita la ka sõŋɛ ẽ. La pɔkõorɛ la ẽn ken sẽnna sɔsra ẽ na, sarɩyadita la wa yele a pʋtẽ'erʋm mɛ yetɩ: ‹Baa mam ka zotɩ Nawẽnnɛ, dee ka nanna nẽrba la, 5pɔkõ-ẽna n sẽnnɩ dãana mam se'em wã, mam wʋn isge mɛ sõŋɛ ẽ. La sãn dagna bɛla, a wʋn sẽnna mɛ nãmsra mam, a kãn basɛ.› »

6Tɩ Zuudãana Azezi le yetɩ: «Bɩsɛ-ya sarɩyadita la n de nẽr-be'ego la n yele se'em. 7La sãn dɛna bɛla, Nawẽnnɛ kãn sõŋɛ nẽr-sɛba tɩ a looge la n sosrɩ ẽ wʋntɛɛŋa la yʋ'ʋŋɔ la, bɔ ba bʋʋrɔ gãnna bɛla? A wʋn yuuge mɛ dee sõŋɛ ba bɩɩ? 8Mam yetɩ ya mɛ tɩ a wʋn wa sõŋɛ ba mɛ tɔtɔ. La Nẽrsaala Dayʋa la sãn wa leme dũnia zuo, a wʋn yẽ nẽrba n bɔ ẽ sɩra mɛ bɩɩ?»

Farisi nẽra, la lampo-tɔ'ɔsa makrɛ

9Azezi le makɛ la makrɛ ayẽma bɔ nẽr-sɛba n tẽ'esrɩ tɩ bãma de la nẽr-sõma nẽ'esra nẽrba basɛba la, yetɩ: 10«Bʋraasɩ bayi n sẽŋɛ Wẽnde-kãtʋm na tɩ ba ka pʋ'ʋsɛ Nawẽnnɛ, ayɩla de la Farisi nẽra, tɩ ayẽma dɛna lampo-tɔ'ɔsa. 11Tɩ Farisi nẽra la zɛ saazuo pʋ'ʋsra a sũurum yetɩ: ‹Nawẽnnɛ, mam pʋ'ʋsrɩ fʋ, mam n ka wõn na nẽrba basɛba la n ãn se'em na, n de nayigba, bɩɩ nẽr-be'ero, bɩɩ nẽrba n tõnnɩ yalsɩ, la mam n ka wõn na lampo-tɔ'ɔs-ẽna wã la ĩyã. 12Dabsa ayopɔɩ woo pʋam, mam lʋtɩ nõorɛ la bʋyi, la bõn-sɛba wuu tɩ mam yẽtɩ la, pia pʋam woo mam loorɩ ayɩla bɔ'ɔra fõn mɛ.› 13La lampo-tɔ'ɔsa la ze'ele la kẽnkɛrŋa põn ka gorge a nẽŋa saazuum, dee wẽ nupʋ'ʋgɔ yetɩ: ‹Nawẽnnɛ, zoe m ninbãalga, mam de la tõon-be'ero dãana.› »

14Azezi yele bɛla dee yetɩ: «Mam yetɩ ya mɛ tɩ bʋra-ẽna wã n kule la, a yelle masɛ mɛ Nawẽnnɛ zẽ'am, dee tɩ Farisi nẽra la yelle ka masɛ. Se'ere n soe la, nẽr-sɛka woo n zẽkrɩ a mẽŋa, Nawẽnnɛ wʋn sike ẽ mɛ, la nẽr-sɛka n sikri a mẽŋa, Nawẽnnɛ wʋn zẽkɛ ẽ.»

Tɩ ãna wʋ kɔm-pɩgsɩ tɩ tɩ tã'agɛ kẽ Nawẽnnɛ so'olʋm

(Amatie 19:13-15, Amarkɩ 10:13-16)

15Nẽrba basɛba n daan tarɩ kɔm-pɩgsɩ wa'am Azezi zẽ'am tɩ a dɩkɛ a nu'usi paglɛ ba zuto. La a karẽnbiisi la n yẽ bɛla la, ba zɛbɛ nẽrba la mɛ. 16Tɩ Azezi wi a karẽnbiisi la yele ba yetɩ: «Basɛ-ya kɔma la tɩ ba wa'am mam zẽ'am, da gu'ura-ya ba, se'ere n soe la, Nawẽnnɛ so'olʋm de la nẽr-sɛba n ãn wʋ kɔma wã bõnɔ. 17Mam yetɩ ya la sɩra, tɩ nẽr-sɛka woo n ka sakɛ tɩ Nawẽnnɛ sɔna ẽ wʋ bia la, a kãn kẽ Nawẽnnɛ so'olʋm pʋam.»

Bõntarsa yelle

(Amatie 19:16-30, Amarkɩ 10:17-31)

18Zifdõma nẽrzuo ayɩla n daan soke Azezi yetɩ: «Karẽnsãama, fõn de la nẽr-sõŋɔ, mam wʋn ẽŋɛ la wãne yẽ vɔm n ka ba'asrɩ?» 19Tɩ Azezi yele ẽ yetɩ: «Bẽm tɩ fõn wi mam tɩ nẽr-sõŋɔ? Nẽra ka boe n ãn sõŋa, sãn dagna Nawẽnnɛ mã'a. 20Fõn mi Nawẽnnɛ n bɔ nõorɛ tɩ ba ɩta se'em na: ‹Da gã'arɛ la fʋ tadãana pɔga, da kʋ nẽra, da zũ, da tɔgɛ põmpɔrŋɔ kaseto, nanna fʋ sɔ la fʋ ma.› » 21Tɩ a lerge yetɩ: «Halɩ mam bõnbɩ'ɩlʋm tɩ mam põn sakra bõn-bãma wuu.» 22Azezi n wõm ẽn yele bɛla la, tɩ a yele ẽ yetɩ: «Sɛla ayɩla n deege dɛna fʋ ẽŋɛ: Koose fõn tarɩ sɛla la wuu dɩkɛ ligri la pʋɩ nasdõma, tɩ fʋ wʋn yẽ bõntarsõm Nawẽnnɛ yire, dee wa'am wa dɔla mam.» 23La bʋraa la n wõm bɛla la, tɩ a sũure ba sã'am, se'ere n soe la, a daan ba dɛna la bõntarsa.

24Azezi n yẽ tɩ a sũure sã'am bɛla la, tɩ a yetɩ: «La tɔ mɛ bɔ bõntatba tɩ ba kẽ Nawẽnnɛ so'olʋm pʋam. 25La de la nãana tɩ yʋgnɛ doose fupĩim yoko pʋam yese, gãnna bõntarsa n wʋn kẽ Nawẽnnɛ so'olʋm pʋam.» 26Tɩ sɛba n wõm bɛla la yele yetɩ: «La sãn dɛna bɛla, ãne n wʋn tã'agɛ yẽ fãarɛ?» 27Tɩ a yele ba yetɩ: «Bõn-sɛka tɩ nẽrsaalba ka tã wʋn ẽŋɛ la, Nawẽnnɛ tã wʋn ẽŋɛ mɛ.»

28Tɩ Apɩyɛɛrɩ yele ẽ yetɩ: «Tõma basɛ tõma n tarɩ sɛla mɛ dee dɔla fõn.» 29Tɩ Azezi yele ba yetɩ: «Mam yetɩ ya la sɩra, tɩ nẽr-sɛka n basɛ a yire, bɩɩ a pɔga, bɩɩ a sɔbiisi, bɩɩ a sɔ la a ma, bɩɩ a kɔma, Nawẽnnɛ so'olʋm na ĩyã, 30a wʋn to'oge zo'oge gãnna ẽn basɛ sɛla la dũnia wã zuo, dee wʋn yẽ vɔm n ka ba'asrɩ wakat-sɛka n sẽm na.»

Azezi le tɔgɛ a kũm, la a vo'ore yelle

(Amatie 20:17-19, Amarkɩ 10:32-34)

31Azezi daan tarɩ a karẽnbiisi pia la ayi la mɛ yese kẽnkɛrŋa, ka yele ba yetɩ: «Ya yẽ ya, tɩ we'esɩ la Zerizalɛm, la bõn-sɛba wuu tɩ Nawẽnnɛ nõtɔ'ɔsrɩba yʋʋn gʋlsɛ Nawẽnnɛ gõŋɔ pʋam Nẽrsaala Dayʋa la yelle la, wʋn sɩrɩ ẽŋɛ mɛ. 32Ba wʋn yõkɛ ẽ mɛ ka ẽŋɛ bu-zãŋsɩ nu'usum, tɩ ba la ẽ, yaalɛ ẽ, tʋbsɛ nõtõorʋm mĩ ẽ, 33wẽ ẽ na ka'asa, dee kʋ ẽ. La dabsa atã daarɛ a wʋn vo'oge.» 34La ba ka bãŋɛ ẽn yele se'em na võorɛ baa fẽe, yetɔga la daan sʋgɛ mɛ, tɩ ba ka tã'agɛ bãŋɛ yetɔga la võorɛ n boorɩ tɩ la yele se'em.

Azezi botɩ fʋa yẽta

(Amatie 20:29-34, Amarkɩ 10:46-52)

35Azezi daan we'esɩ ka lɛm na Zeriko, tɩ fʋa zẽa sore kẽnkɛrŋa sɔsra, 36wõm nẽr-kʋʋŋɔ la n tollɩ la dãmnɛ, soke yetɩ: «Bẽm ẽŋɛ?» 37Tɩ ba yele ẽ yetɩ: «Azezi n de Nazarɛtɩ nẽra la n tollɩ.» 38Tɩ a tĩi tɔgra yetɩ: «Adavidi yɩɩŋa Azezi, zoe m ninbãalga.» 39Tɩ nẽr-sɛba n boe a nẽŋam na tãsɛ ẽ yetɩ a sĩna. Tɩ a malɩn tĩi tɔgɛ yetɩ: «Adavidi yɩɩŋa, zoe m ninbãalga.» 40Tɩ Azezi ze'ele, yetɩ ba tarɩ ẽ wa'am. La ẽn lɛm Azezi la, tɩ Azezi soke ẽ yetɩ: 41«Fõn boorɩ tɩ m ẽŋɛ la bẽm bɔ fɔ?» Tɩ a lerge ẽ yetɩ: «Zuudãana, mam boorɩ tɩ m le yẽta mɛ.» 42Tɩ Azezi yele ẽ yetɩ: «Le yẽta, fõn bɔ mam sɩra la ĩyã n botɩ fʋ yẽ laafɛ.» 43Bilam mẽŋa tɩ a le yẽta dɔla Azezi pẽgra Nawẽnnɛ. Tɩ nẽrba la wuu n yẽ bɛla la, mẽ nã'asra Nawẽnnɛ.

Currently Selected:

Aluki 18: gurDBL

Highlight

Copy

Want to have your highlights saved across all your devices? Sign up or sign in

Learn More About Farefare, Ninkaré