Aluki 2

Azezi dɔka yelle

(Amatie 1:18-25)

1Ban daan dɔgɛ Azã la, wakat-ẽŋa tɩ na-keko A'ogisti daan bɔ nõorɛ yetɩ, ba kãalɛ a tẽŋa la wuu nẽrba. 2La daan de la pɔspɔsɩ n bɛla tɩ ba kãalɛ nẽrba la, wakat-sɛka tɩ Akirinusi daan de Siiri tẽnsɩ gɔmna la. 3Tɩ nẽrba wuu kule ba mẽnsɩ tẽnsʋm tɩ ba kãalɛ ba.

4Tɩ Azozɛfʋ mẽ yese Nazarɛtɩ n boe Galile so'olʋm sẽŋɛ Bɛtelɛm n boe Zude so'olʋm pʋam, zẽ'e-ẽŋa tɩ ba yʋʋn dɔgɛ naba Adavidi. Se'ere n soe tɩ a sẽŋɛ bilam na, a de la naba Adavidi buuri. 5Ẽŋa la Amaari n de pɔg-sɛka n yetɩ a ele ẽ na sẽŋɛ mɛ tɩ ba kãalɛ ba, wakat-ẽŋa Amaari tarɩ la pʋʋrɛ. 6La ban nãn boe Bɛtelɛm la, tɩ a dɔka daarɛ paagɛ. 7Tɩ a dɔgɛ a budib-kẽema, vile ẽ na fuugo gã'arɛ dũnsi yɔnnɔ daka pʋam. Se'ere n soe la, zẽ'a n ka boe sãama yire la pʋam tɩ ba wʋn gã'arɛ.

Dũnsĩima la malɛkadõma yelle

8La tẽn-ẽŋa dũnsĩima daan boe la sẽkam gu'ura ba dũnsi yʋ'ʋŋɔ. 9Tɩ Nawẽnnɛ malɛka sige ba zẽ'am. Tɩ Nawẽnnɛ na'am pãŋa peelem nẽegɛ gilge ba. Tɩ dabeem ba kẽ ba halɩ. 10Tɩ malɛka la yele ba yetɩ: «Da zoe-ya dabeem, tɩ mam tarɩ la kõ-yẽlga tɩ m yele ya, n wʋn basɛ tɩ nẽrba wuu sũure ẽŋɛ yẽlʋm. 11La de la yʋ'ʋŋ-ẽna tɩ ba dɔgɛ ya Fãagra la Adavidi tẽŋa pʋam, ẽŋa n de Zuudãana Krisi la. 12La bõn-ẽna n wʋn botɩ ya bãŋɛ tɩ la de la sɩra, ya wʋn yẽ bilɩa tɩ ba vile ẽ na fuugo gã'arɛ dũnsi yɔnnɔ daka pʋam.»

13Tɩ Nawẽnnɛ malɛkadõma kʋʋŋ-kʋʋŋɔ darɛ wa'am wa naagɛ la ayɩla la. Tɩ ba pẽgra Nawẽnnɛ yetɩ: 14«Nawẽnnɛ n boe saazuum n soe pẽka, la nẽr-sɛba tɩ a nõŋɛ la tarɩ sũ-mã'asʋm dũnia zuo.» 15La malɛkadõma la lebe la Nawẽnnɛ yire, dee tɩ dũnsĩima la yele taaba yetɩ: «Basɛ-ya tɩ tɩ sẽŋɛ Bɛtelɛm ka bɩsɛ sɛla n ẽŋɛ tɩ Nawẽnnɛ yele tɩ la.»

16La ba isge mɛ tɔtɔ sẽŋɛ ka paagɛ yẽ Amaari, la Azozɛfʋ, la bilɩa la tɩ a gã dũnsi yɔnnɔ daka pʋam. 17La dũnsĩima la n yẽ ẽ na, ba tɔgɛ bia la yelle wʋ malɛka la n yele ba se'em na. 18Tɩ sɛba wuu n wõm dũnsĩima la n yele se'em na, la di'ige ba mɛ. 19La Amaari tẽ'esrɩ yɛla wã wuu mɛ a sũure pʋam. 20Dee tɩ dũnsĩima la daan lɛbra dee pẽgra Nawẽnnɛ yʋ'ʋrɛ zozo'e, se'ere n soe la, ba wõm dee yẽ malɛka la n yele ba se'em na.

Azezi yʋ'ʋrɛ sɩa yelle

21La dabsa anii la daarɛ n daan paagɛ, tɩ ba botɩ ba wã bia la wʋ Amoyisi gõŋɔ n pa'alɛ tɩ ba wã ba budimto se'em na. Tɩ ba sɩ a yʋ'ʋrɛ tɩ Azezi, yʋ'ʋr-sɛka tɩ malɛka daan yele ba tɩ ba sɩ ẽ na, wakat-sɛka tɩ Amaari daan nãn ka yõkɛ a pʋʋrɛ la.

Ba tarɩ Azezi ka bɔ Nawẽnnɛ

22La wakatɛ la n paagɛ tɩ Amaari malgɛ a mẽŋa Nawẽnnɛ zẽ'am wʋ Amoyisi lɔɔ gõŋɔ n yele se'em na. Tɩ Azozɛfʋ la Amaari tarɩ bia la sẽŋɛ Zerizalɛm Wẽnde-kãtʋm tɩ ba dɩkɛ ẽ bɔ Nawẽnnɛ. 23Se'ere n soe la, la gʋlsɛ Nawẽnnɛ lɔɔ gõŋɔ la pʋam tɩ budib-kẽema woo wʋn dɛna la Nawẽnnɛ bõnɔ. 24Ba daan sẽŋɛ tɩ ba kãabɛ la sɛla bɔ Nawẽnnɛ wʋ Nawẽnnɛ lɔɔ la n yele se'em na. La yetɩ, ba bɔ mõom dawɛma bayi bɩɩ na'adawen-biɛ bayi.

25Wakat-ẽŋa tɩ bʋraa daan boe Zerizalɛm tɩ a yʋ'ʋrɛ dɛna Asimeyõ. A de la nẽr-sõŋɔ dee sakra Nawẽnnɛ sõŋa, dee gu'ura Ɩsrayɛlɩ Fãagra la n sẽm na. Tɩ Nawẽnnɛ Sɩa bɔna la ẽ. 26La Nawẽnnɛ Sɩa la daan põn yele ẽ tɩ a kãn ki, sãn dagna tɩ a yẽ la Krisi tɩ Zuudãana Nawẽnnɛ wʋn tõm tɩ a wa'am na. 27Tɩ Nawẽnnɛ Sɩa la botɩ a sẽŋɛ Wẽnde-kãtʋm na, la wakat-ẽŋa tɩ Azezi sɔ, la a ma daan tarɩ ẽ sẽŋɛ tɩ ba ẽŋɛ Nawẽnnɛ lɔɔ n yele se'em na. 28Tɩ Asimeyõ to'oge bia la a nu'usum, pʋ'ʋsɛ Nawẽnnɛ yetɩ:

29«Zuudãana, lɛɛlɛ wã, fõn bĩŋe nõorɛ se'em na ẽŋɛ mɛ.

Fʋ yãŋa tã basɛ mam n de fõn tõntõnna sore

tɩ m basɛ dũnia dee wa'am fõn yire la sũ-mã'asʋm.

30Se'ere n soe la, m nini yẽ Fãagra la tɩ fʋ tõm na,

31ẽŋa tɩ fʋ mãasʋm bɔ tɩ dũnia nẽrba wuu yẽ.

32Ẽŋa n de peelem n wʋn botɩ la nẽegɛ bɔ buuri wuu tɩ ba bãŋɛ fõn,

dee wʋn botɩ tõma Ɩsrayɛlɩ dõma n de fõn nẽrba yẽ pẽka.»

33La Asimeyõ n tɔgɛ bia la yɛla la, la daan di'ige bia la sɔ, la a ma mɛ. 34Tɩ Asimeyõ kã kã'a-sõma bɔ ba, dee yele bia la ma Amaari tɩ Nawẽnnɛ looge bi-ẽna tɩ a botɩ Ɩsrayɛlɩ dõma zozo'e lui mɛ, dee tɩ zozo'e mẽ isge. Ẽŋa n wʋn pa'alɛ Nawẽnnɛ tõoma, dee tɩ nẽrba zozo'e wʋn zagsɛ ẽ. 35Ẽŋa n wʋn nẽegɛ pa'alɛ sɛla n sʋgɛ ba pʋtẽ'era pʋam na. Dee yetɩ, Amaari mẽŋa wʋn yẽ sũ-sã'aŋɔ wʋ sʋ'a tɩ ba sɩɩsɛ lʋ nẽra sũure la.

36Wakat-ẽŋa Nawẽnnɛ nõtɔ'ɔs-pɔka n mẽ daan boe tɩ a yʋ'ʋrɛ dɛna A'annɩ. Tɩ a sɔ yʋ'ʋrɛ dɛna Afanuyɛlɩ, a de la Azɛɛrɩ buuri nẽra. Ẽŋa daan de la pug-sa'arɛ dee ele sɩra paagɛ yʋʋma ayopɔɩ tɩ a sɩra la ki. 37La a sɩra la n ki la, a yãŋa de la pɔkõorɛ kʋrgɛ halɩ ka paagɛ yʋʋma pinii la anaasɩ. A daan boe la Wẽnde-kãtʋm na wakatɛ wuu, tõnna bɔ'ɔra Nawẽnnɛ wʋntɛɛŋa la yʋ'ʋŋɔ wuu ka basra, dee lʋta nõorɛ sɔsra Nawẽnnɛ. 38Wakat-ẽŋa tɩ a paagɛ ba zẽ'am, pʋ'ʋsɛ Nawẽnnɛ a yel-sõnnɛ, dee tɔgra bia la yelle bɔ'ɔra sɛba wuu n gu'uri wakat-sɛka tɩ Nawẽnnɛ wʋn le fãagɛ Zerizalɛm nẽrba la basɛ.

39La ban ẽŋɛ sɛla woo ba'asɛ wʋ Nawẽnnɛ lɔɔ la n yele se'em na, tɩ Azozɛfʋ la Amaari lebe kule Nazarɛtɩ n boe Galile so'olʋm na. 40Tɩ bia la bɩta tara pãŋa la yɛm, dee tɩ Nawẽnnɛ yel-sõnnɛ bɔna la ẽ.

Azezi daan de la bia, dee weege Zerizalɛm

41Yʋʋnɛ woo Azezi sɔ, la a ma sẽnnɩ la Zerizalɛm dita Zɔɔg-basɛ kibsa. 42La Azezi daan tarɩ la yʋʋma pia la ayi, dee tɩ ba sẽŋɛ kibsa la wʋ ban ẽn ɩta se'em na. 43La kibsa la dabsa n ba'asɛ la, tɩ ba lebe kulla. Dee tɩ Azezi weege Zerizalɛm, tɩ a sɔ la a ma daan ka bãŋɛ tɩ a weege ya. 44Ba daan tẽ'esɛ tɩ a dolɩ la ba tẽŋa dõma, dee sẽŋɛ dabsrɛ mõonɛ sẽnnɛ. La ban ɛ ẽ ba nẽrba la, la ba sɩrdõma zẽ'am dee ka yẽ ẽ na, 45ba daan lebe la Zerizalɛm ka ɛɛra ẽ. 46La dabsa atã daarɛ tɩ ba yẽ ẽ Wẽnde-kãtʋm na, tɩ a zĩ la karẽnsãandõma sɛlsra, dee sɔkra ba sokrɩsɩ. 47Azezi n daan tarɩ yɛm la ẽn lergrɩ se'em na, di'ige sɛba wuu n daan wõm na mɛ. 48La a dɔgrɩba la n yẽ ẽ na, la ba di'ige ba mɛ. Tɩ a ma soke ẽ yetɩ: «M bia, bẽm tɩ fʋ ẽŋɛ tɩ wãna? Mam la fʋ sɔ ɛ fʋ mɛ halɩ la sũ-sã'aŋɔ.» 49Tɩ a lerge ba yetɩ: «Bẽm tɩ ya ɛɛra ma? Yãma ka mi tɩ la masɛ mɛ tɩ mam bɔna m Sɔ yire wã bɩɩ?» 50Tɩ ba ka bãŋɛ Azezi yetɔga la võorɛ.

51Tɩ Azezi doose ba kule Nazarɛtɩ, dee sakɛ ba nõorɛ. Tɩ a ma tẽ'esra yel-bãma wuu a sũurum. 52Tɩ Azezi bɩta, tɩ a yɛm pa'asra, tɩ Nawẽnnɛ la nẽrba nõŋɛ ẽ.

Currently Selected:

Aluki 2: gurDBL

Highlight

Copy