Aluki 23

Ba tarɩ Azezi sẽŋɛ gɔmna Apilatɩ zẽ'am

(Amatie 27:1-2,11-14, Amarkɩ 15:1-5, Azã 18:28-38)

1Tɩ ba wuu tarɩ Azezi sẽŋɛ Apilatɩ zẽ'am 2ka dõrɛ ẽ yetɩ: «Tõma yẽ bʋra-ẽna tɩ a boe mĩ dãmna la tɩ tẽŋa wã dee yetɩ ba da yɔɔra lampo bɔ'ɔra Rom na-keko, dee ken yetɩ ẽŋa de la Krisi, ẽŋa de la naba.» 3Tɩ Apilatɩ soke ẽ yetɩ: «Fõn de la Zifdõma naba?» Tɩ Azezi lerge ẽ yetɩ: «La de la fõn yele se'em na.» 4Tɩ Apilatɩ yele kãabgɔ kẽma nẽŋadõma la, la nẽr-kʋʋŋɔ la yetɩ: «Mam ka yẽ bʋraaga wã yel-sɛka n wʋn botɩ tɩ di a sarɩya.» 5Tɩ ba sĩna dee bʋla yetɩ: «A zãsŋɔ la tɩ a pɔsɛ zãsʋm Galile la Zude wa paam kalam na, tarɩ la dãmŋɔ sẽna nẽrba pʋam.»

Ba tarɩ Azezi sẽŋɛ A'erɔdɩ zẽ'am

6Apilatɩ n wõm bɛla la, a soke mɛ tɩ a bãŋɛ, bʋra-ẽna sãn dɛna Galile nẽra. 7La ẽn bãŋɛ tɩ a ze'ele la Galile n de naba A'erɔdɩ so'olʋm pʋam na, tɩ a botɩ ba tarɩ ẽ sẽŋɛ ka bɔ naba A'erɔdɩ. A'erɔdɩ mẽ daan boe la Zerizalɛm wakat-ẽŋa. 8La A'erɔdɩ n yẽ Azezi la, a sũure ẽŋɛ yẽlʋm mɛ halɩ, se'ere n soe la, a wõm Azezi yelle tɩ la yuuge mɛ, tɩ a bɔɔra tɩ a yẽ ẽ. A tarɩ pʋtẽ'erɛ tɩ a wʋn tõm na tõon-yãlma tɩ a yẽ. 9A'erɔdɩ daan soke Azezi la sokrɩsɩ zozo'e, tɩ a ka lerge ẽ. 10Tɩ kãabgɔ kẽma nẽŋadõma, la lɔɔ karẽnsãandõma n boe mĩ na dõrɛ ẽ zozo'e yetɩ, a tõm na be'em. 11Tɩ A'erɔdɩ la a sʋdaasɩ yaalɛ ẽ, dɩkɛ fu-sõŋɔ yɛ ẽ, tɩ ba la ẽ, dee tarɩ ẽ lebe ka bɔ Apilatɩ. 12Daar-ẽŋa, A'erɔdɩ la Apilatɩ n de bɛ'ɛba la taaba la, lebge la sɩtɔ.

Apilatɩ di Azezi sarɩya tɩ ba kʋ ẽ

(Amatie 27:15-26, Amarkɩ 15:6-15, Azã 18:39—19:16)

13Tɩ Apilatɩ wi kãabgɔ kẽma nẽŋadõma, la tẽŋa la kẽma, la nẽrba wuu 14yele ba yetɩ: «Yãma tarɩ bʋra-ẽna wa'am wa bɔ mam yetɩ a tarɩ la dãmŋɔ sẽna nẽrba pʋam. La mam n soke ẽ yãma nẽŋam kalam wã, mam ka yẽ a yel-sɛka n botɩ yãma dõrɛ ẽ na. 15La A'erɔdɩ mẽ ka yẽ a yelle, bɛla tɩ a tarɩ ẽ leme wa'am wa bɔ tõma. Bʋraaga wã ka tõm be'em n masɛ tɩ ba kʋ ẽ. 16Mam wʋn botɩ ba wẽ ẽ mɛ la ka'asa dee basɛ ẽ tɩ a fõrgɛ.» [ 17Zɔɔg-basɛ kibsa wakatɛ woo dẽnɩ tɩ Apilatɩ yese sɛba n boe yʋ'a deem nẽra ayɩla basɛ.] 18Tɩ ba wuu kɔ'ɔn lagɩm tãsra yetɩ: «Kʋ bʋra-ẽna, dee yese Abarabasɩ bɔ tɔ.» 19Abarabasɩ daan dãmɛ na tẽŋa, kʋ nẽra, tɩ ba yõkɛ ẽ yʋ. 20Tɩ Apilatɩ le tɔgra la nẽr-kʋʋŋɔ la bɔɔra tɩ a basɛ Azezi. 21Tɩ ba zagsɛ, dee kaasra yetɩ: «Ka ẽ dɔ-puurŋa zuo, ka ẽ dɔ-puurŋa zuo.» 22Tɩ Apilatɩ le yele ba nõor-atã pʋam yetɩ: «Bẽm be'em tɩ a tõm? Mam ka yẽ yel-sɛka tɩ a tõm tɩ la masɛ tɩ ba kʋ ẽ. Mam wʋn botɩ ba wẽ ẽ na ka'asa dee basɛ ẽ.» 23Tɩ ba ken kaasra ke'enke'em yetɩ: «Ka ẽ dɔ-puurŋa zuo.» Tɩ ba kaasga la zo'oge gãŋɛ. 24Tɩ Apilatɩ sakɛ ẽŋɛ ban boorɩ se'em na, 25yese bʋra-sɛka n daan dãmɛ tẽŋa kʋ nẽra la basɛ, ẽŋa tɩ nẽrba la boorɩ tɩ a basɛ, dee dɩkɛ Azezi bɔ sʋdaasɩ tɩ ba ẽŋɛ ẽ nẽrba la n boorɩ se'em na.

Ba ka Azezi dɔ-puurŋa zuo

(Amatie 27:32-44, Amarkɩ 15:21-32, Azã 19:17-27)

26Ban tarɩ Azezi wɛ'ɛsa la, ba tʋ'ʋsɛ la Sirɛnɩ tẽŋa bʋraaga yʋ'ʋrɛ n de Asimõ n ze'ele va'am lɛmna, tɩ ba yõkɛ ẽ botɩ a to'oge dɔ-puurŋa la buke dɔla Azezi poore. 27La nẽr-kʋʋŋɔ n dolɩ ẽ, tɩ pɔgsɩ kɛlla fabla wẽ'era nupʋ'ʋrɔ a ĩyã. 28Tɩ Azezi wẽrgɛ ba bɔba yele ba yetɩ: «Zerizalɛm pɔgsɩ, da kɛlla-ya mam ĩyã, kɛlla-ya ya mẽŋa la ya kɔma ĩyã. 29Se'ere n soe la, dabsa sẽna tɩ ba wʋn yetɩ: ‹Pɔg-kõndɔgrɩba, la sɛba n ka dɔgɛ, sɛba tɩ kɔma ka mõgɛ ba bĩ'isum tarɩ zu-yẽlga.› 30La nẽrba wʋn wa yele tãnsɩ tɩ ba lui dĩ ba, dee yele kũnkũma yetɩ, ba lile ba. 31Se'ere n soe la, ba sãn ɩta dɔ-mã'asa wãna, la wʋn ẽŋɛ dɔ-kɛ'ɛsɩ la wãne?»

32La ba tarɩ la tõon-be'ero dõma bayi sẽŋɛ tɩ ba lagɩm ba la Azezi kʋ. 33La ba paagɛ la zẽ'a tɩ ba wi'iri tɩ Zuwaŋrɛ, bilam tɩ ba ka Azezi dɔ-puurŋa zuo, dee ka tõon-be'ero dõma bayi la dɔ-puursi zuto, ayɩla a zʋʋgɔ bɔba, ayɩla a gɔbga bɔba. 34Tɩ Azezi yetɩ: «M Sɔ, basɛ ba tõon-be'ero taalɛ, tɩ ba ka mi ban ɩtɩ sɛla.» Tɩ ba dɩkɛ a futo tɩ ba pʋɩ taaba, pɔsɛ tɩ ba bãŋɛ nẽra woo n wʋn to'oge fu-sɛka. 35La nẽrba la ze la bilam bɩsra ẽ, tɩ Zifdõma kẽma la la'ara ẽ yetɩ: «A fãagɛ nẽrba basɛba mɛ, a sãn sɩrɩ dɛna la Krisi tɩ Nawẽnnɛ looge la, a fãagɛ a mẽŋa.» 36Tɩ sʋdaasɩ la mẽ la'ara ẽ, lɛm dɩkɛ dã-mĩ'isgo bɔ ẽ 37yetɩ: «Fʋ sãn dɛna Zifdõma naba, fãagɛ fʋ mẽŋa.» 38La ba gʋlsɛ la gʋlsgɔ lablɛ a zuum yetɩ:

«Ẽna wã de la

Zifdõma naba la.»

39Tɩ tõon-be'ero dõma la n boe dɔ-puursi zuto la ayɩla tʋ Azezi yetɩ: «Dagɩ fõn de Krisi la? Fãagɛ fʋ mẽŋa dee fãagɛ tõma.» 40Tɩ ayẽma la tãsɛ a tadãana la yetɩ: «Fõn ka zotɩ Nawẽnnɛ? Ba wʋn kʋ tõma wuu mɛ. 41La sãn dɛna tõma, tõma n tõm tõon-be'ero la, la masɛ mɛ tɩ ba kʋ tõma, la nẽr-ẽna wã ka ẽŋɛ sɛla n de be'em.» 42Dee yele Azezi yetɩ: «Fʋ sãn wa dita fʋ na'am na, fʋ tẽegɛ m yelle.» 43Tɩ Azezi yele ẽ yetɩ: «Mam yetɩ fʋ la sɩra, tɩ zĩna nõo fʋ wʋn bɔna la mam Nawẽnnɛ yire.»

Azezi kũm

(Amatie 27:45-56, Amarkɩ 15:33-41, Azã 19:28-30)

44-45La daan de wʋ wʋntɛɛŋa zuu-tẽŋasʋka, tɩ tẽŋa la wuu lebge lika, tɩ wʋntɛɛŋa ka le yẽkɛ halɩ ka paagɛ zaanõorɛ karf-atã. Tɩ fuugo la n yuli Wẽnde-kãtɛ la pʋam beŋe zẽ'e-sõŋɔ la ãagɛ pʋsʋka. 46Tɩ Azezi tɔgɛ ke'enke'em yetɩ: «M Sɔ, mam basrɩ m sɩa la fõn nu'usum.» A yele la bɛla dee ki.

47Tɩ Rom sʋdaasɩ kɛ'ɛma yẽ lan ẽŋɛ se'em na, nã'asra Nawẽnnɛ yetɩ: «Asɩra, bʋraaga wã de la nẽr-sõŋɔ.» 48La nẽr-kʋʋŋɔ la wuu n wa'am tɩ ba bɩsɛ lan wʋn ẽŋɛ se'em na, yẽ lan ẽŋɛ se'em na mɛ. Tɩ ba lebe kulla, dee wẽ'era nupʋ'ʋrɔ. 49La nẽr-sɛba wuu n mi Azezi, la pɔg-sɛba n doose ẽ halɩ Galile wa'am na, ze la kẽnkɛrŋa bɩsra lan ɩtɩ se'em na.

Azezi laarɛ

(Amatie 27:57-61, Amarkɩ 15:42-47, Azã 19:38-42)

50Bʋraaga ayɩla yʋ'ʋrɛ n daan de Azozɛfʋ. A de la Arimate tẽŋa nẽra, dee dɛna Zifdõma sarɩyaditba nẽra ayɩla. A de la nẽr-sõŋɔ tɩ a ɩrgɔ wuu masɛ, 51la a daan gu'uri mɛ tɩ Nawẽnnɛ wa'am wa di na'am nẽrba tẽŋasʋka. La ba sarɩyaditba la n daan looge yɛm tɩ ba ẽŋɛ se'em na, a daan ka sakɛ. 52Azezi n ki la, ẽŋa n sẽŋɛ Apilatɩ zẽ'am ka sose Azezi kũm na, tɩ Apilatɩ sakɛ. 53Tɩ a sike kũm na vile ẽ na tãnnɛ tarɩ ka bĩŋe yɔɔgɔ tɩ ba tũ tãmpĩa ĩyã nãn ka laagɛ nẽra mĩ pʋam. 54La de la daar-ẽŋa tɩ Zifdõma mãasnɩ ba vo'osgo daarɛ. Wẽnnɛ sãn kẽ tɩ ba vo'osgo daarɛ wʋn pɔsɛ.

55Tɩ pɔg-sɛba n doose Azezi Galile wa'am na, doose Azozɛfʋ sẽŋɛ ka yẽ yɔɔgɔ la, dee yẽ ban bĩŋe Azezi kũm na se'em, 56dee lebe kule ka mãasʋm tɩdarɛ kaam buuri to'oto'ore tɩ ba tarɩ wa ẽŋɛ kũm na. La vo'osgo daarɛ la ba vo'ose wʋ Amoyisi lɔɔ la n bɔ nõorɛ se'em na.

Currently Selected:

Aluki 23: gurDBL

Highlight

Copy