Amatie 8

Azezi botɩ kõnkonne yẽ ĩmã'asʋm

(Amarkɩ 1:40-45, Aluki 5:12-16)

1Azezi daan ze'ele la tãŋa la zuo sige, tɩ nẽr-kʋʋŋɔ zozo'e dɔla ẽ. 2Tɩ kõnkonne wa'am a zẽ'am wa ka dũma tẽŋa a nẽŋam yele ẽ yetɩ: «Zuudãana, fʋ sãn bɔɔra, fʋ tã wʋn basɛ tɩ m yẽ ĩmã'asʋm mɛ le ãna sõŋa.» 3Tɩ Azezi tẽegɛ a nu'ugo kalʋm ẽ, dee yetɩ: «Mam bɔɔra, yẽ ĩmã'asʋm le ãna sõŋa.» Bilam mẽŋa tɩ kõnkɔm na basɛ ẽ, tɩ a le ãna sõŋa. 4Tɩ Azezi yele ẽ yetɩ: «Da yele nẽra nẽra. La sẽŋɛ Nawẽnnɛ kãabgɔ kẽema zẽ'am ka pa'alɛ ẽ fɔ mẽŋa tɩ a bɩsɛ, dee bɔ bõn-sɛba tɩ Amoyisi yʋʋn gʋlsɛ yetɩ ba bɔ la, tɩ la pa'alɛ ba tɩ fʋ sɩrɩ yẽ ĩmã'asʋm.»

Azezi botɩ sʋda-kɛ'ɛma tõntõnna yẽ ĩmã'asʋm

(Aluki 7:1-10)

5Azezi daan sẽŋɛ ka paagɛ kẽ'era la Kapɛrnaʋm tẽŋa pʋam, tɩ Rom dõma sʋda-kɛ'ɛma wa'am a zẽ'am wa sose ẽ 6yetɩ: «Zuudãana, mam tõntõnna n bẽ'erɩ kɔɔrʋm gã yire, a ba nãmsra mɛ zozo'e.» 7Tɩ Azezi yele ẽ yetɩ: «Mam wʋn wa'am wa botɩ a yẽ ĩmã'asʋm.» 8Tɩ sʋda-kɛ'ɛma la lebse yele ẽ yetɩ: «Mam ka narɩ tɩ fõn wa'am mam yire. Wen tɔgɛ yetɔga mã'a, tɩ mam tõntõnna la wʋn yẽ ĩmã'asʋm. 9Se'ere n soe la, nẽrba n soe mam, la mam mẽ soe la sʋdaasɩ basɛba. Mam sãn yele sʋda-sɛka yetɩ: ‹Sẽŋɛ›, a we'esɩ mɛ. La mam sãn yele ayẽma yetɩ: ‹Wa'am›, a sẽm mɛ. Mam sãn yele m tõntõnna yetɩ: ‹Ẽŋɛ wãna›, a ɩtɩ mɛ.» 10Azezi n wõm bɛla la, la di'ige ẽ mɛ. Tɩ a yele nẽr-sɛba n dolɩ ẽ na yetɩ: «Mam yetɩ ya la asɩra, tɩ mam nãn ka yẽ nẽra n bɔ mam sɩra wʋ bʋra-ẽna wã, baa Ɩsrayɛlɩ buuri la pʋam mam ka yẽ. 11Mam yetɩ ya tɩ, nẽrba zozo'e wʋn ze'ele zanõ-bɔba, la dapɔ-bɔba wa'am wa zĩ'ire la Abraham, la A'izakɩ, la Azakɔbɩ di Nawẽnnɛ so'olʋm pʋam. 12La ba wʋn lobge Ɩsrayɛlɩ dõma n wʋn soe nɩ Nawẽnnɛ so'olʋm na basɛ la yẽŋa lika pʋam, bilam ba wʋn kaasra, dee dɩkɛ ba nu'usi gɩ nõorʋm.»

13A yele bɛla, dee yele sʋda-kɛ'ɛma la yetɩ: «Kule, tɩ la wʋn ẽŋɛ wʋ fõn bɔ mam sɩra se'em na.» La wakat-ẽŋa mẽŋa tɩ a tõntõnna la yẽ ĩmã'asʋm.

Azezi botɩ nẽrba zozo'e yẽ ĩmã'asʋm

(Amarkɩ 1:29-34, Aluki 4:38-41)

14Bɛla poorʋm, Azezi sẽŋɛ la Apɩyɛɛrɩ yire ka yẽ Apɩyɛɛrɩ dɛɛm-pɔka n bẽ'erɩ gã, tɩ a ĩyã tʋlgɛ. 15Tɩ Azezi kalʋm pɔka la nu'ugo, tɩ bã'aga la basɛ ẽ. Tɩ a isge ẽŋɛ Azezi sãanɛ. 16Tɩ zaanõorɛ paagɛ, tɩ ba tarɩ nẽrba zozo'e tɩ kʋlkã'arsɩ tarɩ ba wa'am Azezi zẽ'am. Tɩ a tɔgɛ yetɔga dige kʋlkã'arsɩ la, dee botɩ sɛba wuu n de bã'adõma yẽ ĩmã'asʋm. 17La de la bɛla tɩ Nawẽnnɛ nõtɔ'ɔsa A'ezayi n yʋʋn yele se'em na ẽŋɛ. A yʋʋn yetɩ: «Ẽŋa n to'oge tõma tooro, la tɩ bã'asɩ basɛ.»

Azezi doosgo yelle

(Aluki 9:57-62)

18Azezi n yẽ nẽr-kʋʋŋɔ n kaagɛ ẽ na, tɩ a yele a karẽnbiisi la yetɩ: «Tɩ dooge-ya mõgrɛ la doone ke bɔba.» 19Tɩ lɔɔ karẽnsãama ayɩla wa'am a zẽ'am wa yele ẽ yetɩ: «Karẽnsãama, mam wʋn dɔla fʋ sẽnna zẽ'e-sɛba wuu tɩ fʋ wʋn sẽnna.» 20Tɩ Azezi yele ẽ yetɩ: «Pɩɩna tarɩ yogro mɛ, tɩ niinto tara tʋgrɔ, la Nẽrsaala Dayʋa la ka tarɩ zẽ'a wʋn gã'arɛ vo'ose.» 21Tɩ a karẽnbia ayɩla yele ẽ yetɩ: «Zuudãana, basɛ tɩ m dẽŋɛ sẽŋɛ ka laagɛ m sɔ dee wa'am wa dɔla fɔ.» 22Tɩ Azezi yele ẽ yetɩ: «Dɔla mam dee basɛ sɛba n ka tarɩ vɔm Nawẽnnɛ zẽ'am tɩ ba laagɛ ba kũm.»

Azezi botɩ kʋsebgo yõkɛ

(Amarkɩ 4:35-41, Aluki 8:22-25)

23Azezi daan kẽ la õorŋɔ, tɩ a karẽnbiisi la doose ẽ. 24Tɩ kʋseb-kãtɛ wa'am wa vugra mõgrɛ la zuo. Tɩ ko-mĩ'isi botɩ õorŋɔ la zɩgra la a mise. La Azezi daan gĩsri mɛ. 25Tɩ a karẽnbiisi la paagɛ nẽegɛ ẽ yetɩ: «Zuudãana, fãagɛ tɔ, tõma yetɩ ki mɛ.» 26Tɩ Azezi yele ba yetɩ: «Bẽm tɩ ya zɔta dabeem, ya ka bɔ mam sɩra zo'oge.» Azezi yele bɛla, dee isge tãsɛ kʋsebgo, la ko'om na mɛ, tɩ ba ãna sĩm. 27Tɩ ba wuu palẽŋa ẽkɛ, tɩ ba yetɩ: «Bẽm nẽra n de ẽna tɩ kʋsebgo, la ko'om sakra a nõorɛ?»

Kʋlkã'arsɩ n dolɩ bʋraasɩ bayi, tɩ Azezi dige ba

(Amarkɩ 5:1-20, Aluki 8:26-39)

28Ba daan dooge mõgrɛ la doone ke bɔba paagɛ la Gadara dõma tẽŋa pʋam, tɩ bʋraasɩ bayi tɩ kʋlkã'arsɩ dolɩ ba ze'ele yɔɔrɔ zẽ'a sẽnna tʋ'ʋsra ẽ. Ba daan de la zɔl-wẽensɩ, tɩ nẽrba zɔta ka sakra dɔla bilam tɔlla. 29Tɩ ba kaasra tagursi yetɩ: «Nawẽnnɛ Dayʋa, bẽm boe tõma la fõn tẽŋasʋka? Fõn wa'am tɩ fʋ nãmsɛ tõma mɛ dee tɩ wakatɛ la nãn ka paagɛ?» 30La kurkurdõma n daan zo'oge lɛm bilam ɔbra. 31Tɩ kʋlkã'arsɩ la sose Azezi yetɩ: «Fʋ sãn yetɩ fʋ dige to tɩ tɩ yese, fʋ basɛ tɩ tɩ sẽŋɛ ka kẽ kurkurdõma la.» 32Tɩ Azezi yele ba yetɩ: «Sẽŋɛ-ya.» Tɩ ba yese sẽŋɛ ka kẽ kurkurdõma la. Tɩ kurkurdõma la ze'ele tãŋa zuo zoe sige ka lui mõgrɛ la pʋam ki. 33Tɩ sɛba n gu'uri kurkurdõma la zoe sẽŋɛ tẽŋa pʋam ka yele lan ẽŋɛ se'em na wuu, la bõn-sɛka n ẽŋɛ sɛba tɩ kʋlkã'arsɩ la daan dolɩ la. 34Tɩ tẽŋa la dõma wuu yese tʋ'ʋsra Azezi, la ban yẽ ẽ na, ba sose ẽ yetɩ, a fõrgɛ dee basɛ ba tẽŋa.

Currently Selected:

Amatie 8: gurDBL

Highlight

Copy