लूका 4
4
शैतानकी येशूला खोक्पा ल्हावु
(मत्ती ४:१-११; मर्कूस १:१२-१३)
1येशू कोन्छ्योककी थु चाङ्माकी क्येङ्नी यर्दन चङ्बु नेमा लोक्नी फेप्सिमा कोन्छ्योककी थु चाङ्माकी राङ खोला दासा पाङ्थेरीला टिनी फेप्सुङ। 2ते ङ्यिमा खल ङ्यी सेक शैतानकी खोला खोक्पा ल्हासुङ। ती पेला सेक खोकी काङ साङ माशे, तमा ती ङ्यिमातिवा छेसिमा खोला ल्होवा लासुङ। 3तमा शैतानकी येशूला सिक्यासुङ, “दोजो ख्युरुङ कोन्छ्योककी सेवु यिन्सिन दी दोला शुब्ज्याङला डोशी सिनी सी।” 4येशूकी तीला सुङ्सुङ, “कोन्छ्योककी सुङला दुक सिनी टि वे, ‘शुब्ज्याङकी तिराङ मीला सेन्बु मुलुवी।’”#व्यवस्था ८:३
5येलुङ शैतानकी येशूला दासा थेन्बु यीला टि गल्नी उकुर च्यिकला जम्बुलिङकी तेरी ग्येल्खापतिवा छ्या तेन्सुङ। 6तमा तीकी खोला सिक्यासुङ, “ङ दी तेरी ओङ्ज्येन ताङ मोवा ति ख्युरुङला तेरिन। दी तेरी ङला थोप्नी वे। तुक क्यानी ङे सुला तेरुप नो वे, तीला राङ तेरिन। 7ख्योरे ङला शावा क्यासिन दी तेरी ख्युरुङला तेरिन।” 8तमा येशूकी तीला सुङ्सुङ, “कोन्छ्योककी सुङला दुक सिनी टि वे, ‘ख्योरो चोवो कोन्छ्योकला तिराङ सोवा तेक, तमा खोला तिराङ शब्ज्यी पुल।’”#व्यवस्था ६:१३
9येलुङ शैतानकी येशूला यरूशलेमला टि गल्नी खोला यहूदी ल्हङाङकी चेला दे च्यिनी दुक सिक्यासुङ, “दोजो ख्युरुङ चोवो कोन्छ्योककी सेवु यिन्सिन दे नेमा छ्योङ्बाल ग्योप। 10च्यिलासिसिन कोन्छ्योककी सुङला दुक सिनी टि वे,
‘खोकी देवाच्येनकी लेन क्योलुप थुतिवाला क नाङ्नी ख्युरुङला र्होक्टे कि ज्यिकिवी।
11तमा तिवी खोप्रे लाक्पा जेनी ख्योरो काङ्बा दोला दप मिज्यिवी।’”#भजन ९१:११-१२
12येशूकी तीला सुङ्सुङ, “कोन्छ्योककी सुङला दुक सिनी टि वे, ‘ख्योरो चोवो कोन्छ्योकला खोक्पा माल्हा।’”#व्यवस्था ६:१६ 13तमा शैतानकी येशूला ती तेरी खोक्पा ल्हा सिन्सिमा यम्बा च्यु माङ्येता सेक खोला क्युर ज्याक्नी गाल।
येशूकी गालील लुङ्बाला खोरे लाका गो चुवु
(मत्ती ४:१२-१७; मर्कूस १:१४-१५)
14ती ज्युक्ला येशू कोन्छ्योककी थु चाङ्माकी ङार थोप्नी गालील लुङ्बाला लोक्नी फेप्सुङ। तमा खोकी कोर्ला फार छुर तेरी दासाला ताम्ङे टाम्सुङ। 15खोकी यहूदी छ्योखाङतिवाला येन्देन नाङ्सुङ, तमा तेरी मीतिवी खोला सोवा तेक्सुङ।
नासरतकी मीतिवी येशूला तेपा माक्यावु
(मत्ती १३:५३-५८; मर्कूस ६:१-६)
16तमा येशू खुरुङ र्होलुप नासरतला फेप्नी नरी दोके क्यानी ङासोप ङ्यिमाला यहूदी छ्योखाङला फेप्सुङ। तमा खो कोन्छ्योककी सुङ लोपुपला खोक लानी 17कोन्छ्योककी लुङ्तेम्बा यशैयाकी टिवु टिलुप थेप लानी तीला पेसिमा ती नाङ्ला दुक सिनी टिवु ति छल्नी रासुङ,
18“चोवो कोन्छ्योककी थु चाङ्मा ङे खला ख्येल वे।
खोकी ङला पेराङ्बुतिवाला लेन ल्यामु ख्याप्टाक कितुपला चिनी वे।
तमा चोन्खाङला शोरुपतिवाला ताङ मिक मोथोङ्गुपतिवाला पि तोङ्गुपकी कोर्ला ख्याप्टाक कितुपला ङला ताङ्सुङ।
तमा मी ङ्यप्च्येला ख्येलुपतिवाला पि तोङ ज्यितुपला ताङ
19खोरो मीतिवाला थर्वा नङ्गुप तुजे लेपुप ति मीतिवाला ख्याप्टाक कि च्यिसुङ।”#यशैया ६१:१; ५८:६
20ती ज्युक्ला येशूकी ती थेप ति टिल्नी ते शब्ज्यी कितुप मीला तेनी खो ति ज्युसुङ। तमा यहूदी छ्योखाङ नाङ्ला वोतुपतिवा तेरीकी खोला छ्योर छ्योर्मे ल्हासुङ। 21तमा खोकी तिवाला सुङ्सुङ, “दी कोन्छ्योककी सुङ ति हारिङ ख्यिरा ङ्येनिन वोतुप पेला राङ छेसुङ।” 22तमा मीतिवा तेरीकी खोला चिताङ क्यानी खोकी सुङ्गुप कटिन वोतुप सुङ थोनी हलेवा क्यानी, “दी याङ योसेफकी पुज्युङ मिन?” सिनी टिसुङ। 23तमा येशूकी तिवाला सुङ्सुङ, “वुतुङ के ख्यिरे ङला ‘ओ आम्ज्यी, ख्योरो खुरुङला राङ टेक च्यी।’ सिरुप पे शेकिवी, तमा ‘कफर्नहुमला ख्योरो काङ क्यावु ति ङ्यिरे थो वे, ती ति दे ख्योरो युलला साङ की।’ सिनी सिवी।” 24येलुङ येशूकी तिवाला सुङ्सुङ, “ङ ख्यिराङला टेङ्बो सिरिन, चुका कोन्छ्योककी लुङ्तेम्बाला साङ खोरो युलकी मीतिवी ताङ्देन मिकिवी। 25वुतुङ के ङ ख्यिराङला सिरिन, एलियाकी ङोला लो सुम ताङ फेका यी सेक छ्यर्वा च्यिक साङ माग्यप्नी तेरी लुङ्बाला ङ्यिमा मर्वु शरुप पेला इस्राएलला युक्सिमतिवा बङी वोसिनाङ। 26कोन्छ्योककी एलियाला तिवी पर्ला सी ते साङ माताङ्नी सीदोन लुङ्बाला वोतुप सारपात युलकी युक्सिम यीकी ते ताङ्सुङ।#१ राजा १७:७-१६ 27तुक राङ क्यानी कोन्छ्योककी लुङ्तेम्बा एलीशाकी ङोला इस्राएलला जे ग्यपुप नेर्पुतिवा बङी वोसिनाङ तिवी नाङ्ला सुला साङ माटेक्सुङ, यिने सिरिया लुङ्बाकी नामान सिरुप मी च्यिक तिराङ टेक्सुङ।”#२ राजा ५:१-१४
28दी ताम्ङे थोसिमा यहूदी छ्योखाङ नाङ्ला वोतुपतिवा तेरी ङ्यिर्मु क्यासुङ। 29तमा तिवा लानी येशूला ग्येसा नेमा पाङ्ला तेन ताङ्सुङ। तिवी ग्येसा ति पम्दोकला नोक, तमा तिवी खोला पम्दोक लो नेमा थुला तला ताङ तोङ्गुप छाल्सुङ। 30यिने येशू ति तिवी पर नेसुर थेन्नी खोरे लाम शुसुङ।
येशूकी डेकी कुलुप मीला टेक च्यितुप
(मर्कूस १:२१-२८)
31ती ज्युक्ला येशू गालील लुङ्बाकी कफर्नहुम सिरुप ग्येसाला फेप्सुङ। ते खोकी ङासोप ङ्यिमाला यहूदी छ्योखाङला मीतिवाला येन्देन नङ्यिन नोक। 32मीतिवा खोकी सुङ थोनी हलेवा क्यासुङ, च्यिलासिसिन खोकी सुङ ति ओङ्ज्येन वोतुप नोक। 33ती पेला ते यहूदी छ्योखाङ नाङ्ला डेकी कुलुप मी यी नोक। तीकी च्यार ग्यकिन सिरा सिक्यासुङ, 34“ओ नासरतकी येशू, ख्युरुङ ङ्यिराङला काङ कितुप छोलुप यिन? काङ ख्युरुङ ङ्यिराङला ना तोङ्गुपला फेवु यिन? ङ ख्युरुङला ङो शेकिवी। ख्युरुङ ति कोन्छ्योककी चाङ्मा वोतुप मी यिन।” 35तमा येशूकी तीला वोरु तेन्नी, “खरक्पा दे! ती मी नाङ नेसुर थेन ग्युक!” सिनी सुङ्सुङ। खोकी तुक सुङ्लुङ्मे ती डे तीकी ती मीला तेरी मीतिवी दोङ्ला तला ताङ्सुङ, यिने तीला काङ साङ म मातेन्वा क्यानी थेन्नी गाल। 36ती थोङ्नी ते वोतुप मीतिवा तेरी हलेवा क्यानी च्यिककी च्यिकला सिक्यासुङ, “ओए! दी चुका परकी सुङ यिन? तीकी खोरो ओङ्ज्येन ताङ ङार नेमा डेतिवाला क बिन्सिन तिवा थेन्नी डिनोक।” 37तमा येशूकी क्या नङ्गुप हलेवु लाकाकी कोर्ला कफर्नहुम चाकी फार छुर तेरीला टाम्सुङ।
येशूकी मी बङीला टेक च्यितुप
(मत्ती ८:१४-१७; मर्कूस १:२९-३४)
38ती ज्युक्ला येशू यहूदी छ्योखाङ नेमा थेन्नी सिमोनकी खाङ्बा फेप्सुङ। ती पेला सिमोनकी यिवी ति छासे छा ग्यप्नी नानोक। तमा मीतिवी “तीला टेक च्यी।” सिनी येशूला गोङ्बा शुसुङ। 39तमा येशू तीकी चाला फेप्नी कुक क्या ल्हनी ती छा तीला वोरु तेन्सुङ, तमा ती छा ति थेन्नी गाल। ती ज्युक्ला ती ति शार्क्येक लानी खोतिवाला शब्ज्यी क्यासुङ। 40ङ्यिमा गातुछ्येप पेला मीतिवी नेजु नम्बा बङी वोतुप नेर्पुतिवाला येशूकी चाला टिनी वासुङ। खोकी तिवा रे रेकी खला खोरे छ्याक ज्याक्नी तिवाला टेक च्यिसुङ। 41डेतिवी साङ “ख्युरुङ कोन्छ्योककी सेवु यिन।” सिनी च्यार ग्यकिन सिरा मी बङीकी नाङ नेमा थेन्नी गाल। यिने येशूकी वोरु तेन्नी डेतिवाला काङ ताम्ङे लप माच्यी, च्यिलासिसिन तिवी खोला ख्रीष्ट यिन सिनी ङो शेकिनोक।
येशूकी ख्याप्टाक क्या क्यावा ज्युवु
(मर्कूस १:३५-३९)
42ती सला टेताङ नाम लालुङ्मे येशू मी सु साङ मेदेवु दासाला फेप्सुङ। तमा मी मङ्मु खोला छोलिन खोकी चाला वानी, “ङ्यिराङला क्युर्नी माफेप।” सिनी खोला ग्येकुप छाल्सुङ। 43यिने येशूकी तिवाला सुङ्सुङ, “ङे यम्बा दासाला साङ कोन्छ्योककी ग्येल्खापकी लेन ल्यामु ति ख्याप्टाक कि गोकिवी, च्यिलासिसिन कोन्छ्योककी ङला दी लाकाकी थोक्ला राङ तङ्गुप यिन।” 44तुक राङ क्यानी येशूकी यहूदिया लुङ्बाला वोतुप यहूदी छ्योखाङतिवाला फेप्नी कोन्छ्योककी लेन ल्यामु ख्याप्टाक क्या क्यावा ज्युसुङ।
Currently Selected:
लूका 4: xsrNT
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
