Kara Okovuri Nkanuka 3
3
Piita naankai Jooni Naning Kau' Doota Pakuvuretu'na'
1Nii'na'mung kamunoo' Piita ee'noko Jooni pava dootuu'nava pankava-koo beretu' kunsi-koong bateinang-koo, duaa' ave'arako. 2Ee'noko naning kau' doota ponto'aru'noo'keta te' otoko'. Tee ee'nung doong kante nkavai poroma sipaako'nung karanaang pava dootuu'nava pankava-koo, miring Tampa' Oro'navarong tampaako'navarong-koo, baka-eentavaramaatoo'naang dootuu'nava pankava-koo koinaako'ning-koo. 3Ee'nunge Piita naanka Jooni dootuu'nava pankava-koo bereko oovureta eentavuretu' kapoo' avuree'naang. 4Ee'noko Piita naankai Jooni naapu narung oovuresi Piitai aa'puu', “Nee' oomereai.” 5Ee'noko tee tenaanka-koo baroromparu' ee' noru'uma: Kapoo' amuree'naang anaankai. 6Teka Piitai aa'puu', “Aung ee, ning mooni' oto'memua', teka kapoo' ning oto'memuing aroma'naang. Jiisuu' Karistoo' bakaang miring-koo tee Nasareti'nung da' daa'darara naniai!” 7Ee'noko teie tampanaang-koo bireng-koo kompura deto i'ampuko namu'ke bakaang kau' ee'noko koposiina purimparu'. 8Bera tee deto dinkitoo'arara donkonui nanuu' ee'noko tumparu' dootuu'nava pankava-koo tenaanka ninka nari', nanuma ee'noko dinkitoo'arama Kumponing daangampuma. 9Kumponing daangampuma nanuko ookara nantoonge ooaara tee tasi'pau' tee ee'nara baka-eentavaramaung Tampa' Oro'navarong-koo ba'nanui dootuu'nava pankava-koo. 10Ee'noko tee teing aa'na' ta'nimpariru' asikovoroma tee-koo kapoo'koo tee-koo nkoaru'nung-koo.
Piita Dootuu'nava Pankava-koo Daankiaru'na'
11Tenang tee kau' doota taarevora Piita naanka-koo Jooni bi'antavari beio' ookara nantoong teing-anko nari' aivitu-navaro-koo˜ miring Solomoni' bakanavaro-koo kua'parira dooroi tavuru'. 12Ee'noko tenang Piitai oovurira teing tee teka daankivuru' aa'puma,
“Dii' nantoong Isireeli-nupoong, aming-koo ta'ninirimang aung-koo, ee'noko nee' aming-koo tuutuu'anta narung oomererimaang? Ai' ee' noru'erima aung neekaang purinto'ke ee'noko aarumo meeka'pari oto'ke kau' taare-antavampesing? 13Teie Kumponinge niikakatauro Eebaraami' dovang, Aisake', ee'noko Jeekopi' biikaange tee Jiisuu' bakaang muu' tarenung meenasi avuio' aung tamparu'antavuing. Tee ee'nung Jiisuu' dii'ke Pailati'anko be'antaveru', ee'noko Pailati'ke unaa-anta-koo tampuio' piaroriaruu'. 14Tee Jiisuu' naning meekung ee'noko koonto' tee tompimperira naning tavu'nko piaroru' Pailati'ke sing-antarerurii'naang. 15Ee'noko dii'ke tee Domaang Okonara dupisi'eru', teka tee ee'nung Kumponinge domang-antavuu' boo'keta. Nee'naanka tee-koong kara sira'ka. 16Ee'noko teie bakaang miring purinto'ke masika'antavampirio' aung naning puring-antavuing ooverima tasi'perimatomaung. Ee'noko teie ee'nunge masika'antai Jiisuu'ketainge aung naning ookutuario' taare-antavuing dii'koo ookara-koo dutakanoo'ka.
17“Emu' tee dii' mmarang, ninge noru'dampiring dii'ke tee noru'eria' tee' nkoveru'nung teing ninka diikaning ovontunanka ninka. 18Teka tee kapoo' Kumponinge tero sira'puu'nung bakaning nakaro-nupoong biikaang karange, tee ee'nung domamuriainoo'koo Pako'pari'nii'ke baike kune'uaing tee' nari' dupe-antavuieeng. 19Ee'noko enang tee Kumponing-koo bere'dariaing dii' teing diikaang oraka' nkonanka piu'deruriaina' ee'noko napo' unaa-anta Ovoring-eta komperiai batei makotuko. 20Tee' nari' bere'dariri otoriko botovuaing tee naning Pako'pari'nii' dii' domang-anta-koo miru'uu'nung, tee ee'nung Jiisuu'. 21Enang tee paning-koo otomatoo'naang bera tee batei Kumponinge ookara kapoo' neraka'antavuainoo'ke basi tee' maraka-antavuu'na' bakaning meekupoong nakaronuka biikaang karange uripo'keta. 22Aa'nung Moosesie tee minkuarama niikakatauro aa'puru',
‘Ovoring Kumponinge tee narung nakaronara donkong-antareruriaing dii'koo dama'navarang-koo meu'ke, tee' nari' ning donkong-antamuu'na', ee'noko dii'ke bakei taaraverimaatoaing teing kapoo' naururiaining. 23Ee'noko teing nantoong ookara naruna' naruna' tee ee'nung nakaronara taaravaavauka'ning bakaning nantoong-eta simpe'uriaing.’ (Boto 18:15,18,19)
24“Ee'noko Moosesi narung deea', napo' ookara nakaro-nupoonge Samuela'keta doompeto Kumponinge karantavuriko'ninge˜ kara e'munung doong-koong sira'pau'. 25Ooveriko, Ovoring bakaang maramaraka tee dii' diikaang, aa'ning teing bakaning nakaro-nupoong biurukaa', ee'noko teing oko'bosi'nuka diikakatauro bii'dompenku. Ee'noko tee kara maramaraka Kumponinge Eebaraami'koo naroompuu'naare Jiisuu' miru'uitaa' ee' minkuvuu',
‘Da'dompenge ookara kansi'nupoong amutemurii' nantoong biraankevuriaing.’ (Pupu' 22:18; 26:4)
26Kumponinge Jiisuu', bakaang muu' tarenung, tutung dii'koo botovuu' dii' ookara naruna' naruna' diikaang oraka' nkonanka-ita bere'antarurira biraanke-antarurii'naang.”
Currently Selected:
Kara Okovuri Nkanuka 3: nasNTpo
Highlight
Share
Copy
Want to have your highlights saved across all your devices? Sign up or sign in
© 1994, Wycliffe Bible Translators, Inc. All rights reserved.
