Kara Okovuri Nkanuka 7
7
Sitivenie Noru'antavuru'na' Kumponing Eebaraami' Tampa' Biraankevu'na' Dootuu'nava Pankava Mme' Otoaruko
1Ee'noko piristi' deto basie aa'puu', “Tee' ee masika' minkuaamang?” 2Ee'noko Sitivenie aa'puu',
“Dii' mmataraang ee'noko mmarang, io' taarameriaing ning. Tee Kumponing meenasi-po'nung Eebaraami'koo niuma-koo oro'paru' Mesopotemia' otoko Aarani'aape mme' tenkenuaruko. 3Kumponinge aa'puu' tee,
‘Tenkeniaing anketa dakanoo'keta kansi'keta, dakanamuiaang-ankoita, ee'noko ninge naurampainameensi'koo beaing kansi'koo.’ (Pupu' 12:1)
4“Teketa Kaldea-nupoong biikanameensi'keta tenkenura tee bera Aarani'namono-koo otoko'. Ee'noko teketa bauma boo'pario' dama'ke Kumponinge botovuu' teketa aa' ee'noo' ameensi'koo nii' enang o'norinoo' poo'naang. 5Teka ameensi'koo navaro oko-antavua', oki'noo' aa'noo' muku'noo' otoa'. Teka tamung maraka-antavuu'nung dama'ke teing ninka ba'dompenku ninka doompeto dama'ke tavo'kaavaining ninka nari' kompaava'naang bane bauring mme' otoaruko. 6Ee'noko Kumponinge ee'pina' nauvuu',
‘Daurukaa' teing dama'ke tavora-nupoong otoroaining oovuning biikanoo'ke, teke teing-koo dai'nisinuka deempariri otoromaatoaing oraka' nkoaariko karenaumo daaku' mare'koo. 7Teka ninge kiimatavarampaing teing tevitu da'dompenku tang moo'dopa-koo mintoong-antavaariainavitu. Ee'noko teketa tenkenaarai'nange ning anke ameensi'koo porora dootuu'maamatoaing.’ (Pupu' 15:13,14)
8“Kumponinge tee'purai'nange teie napo' kara naroong-antaevuu' dopa' toto'naveu-koong. Ee'noko tee'koo Eebaraami' Aisake' bauma deemparara dopa' napu'uu' bakaning doong ˜beenang-taa basiarako. Ee'noko Aisake' tee Jeekopi' bauma deemparu' ee'noko Jeekopi' tee temaia' nanai'keta kenaanka muu'koo oko'bosi'namaia' biuma deemparu'.”
Sitivenie Noru'antavuru'na' Biikakatauroi Josepa' Tompimpau'nung-koo
9“Ee'noko temaia' oko'bosi-namaia' Josepa'koo mamairoarira baaveau' tee Iisipi'aape, teka Kumponing tee tee ninka nari' otoko'. 10Ee'noko tee unaa-antavuko' teing-eta bakaning arikananka-ita. Ee'noko Kumponinge Josepa' aa'na' matau deeng-antavuio' Peero'ke, teie Iisipi'nunge dauraronge˜, tampa' oovura ovo'ma' deeng-antavuu' Iisipi'nameensi'koo ee'noko bakanava'koo ookutunava-koo.
11“Enang tee peera pankaing tavo'kuu' Iisipi'nameng-koo ee'noko Keenani-nameng-koo, ee'noko aa'na' tora'pau'. Ee'noko niumaraange taamang besi'aama ooaava'. 12Bera Jeekopi'ke taamang Iisipi'ka taaravura teie botovuru' teing niumaraang Iisipi' beero'aava'naang tutuna'namu'koo.
13“Ee'noko kemu'kanamu' berou'nang-koo Josepa' baka sira'paru' batatakaampi-koo, ee'noko Josepa' baumaraang tenang Peero'ke noru'uru'. 14Ee'noko Josepa' botoaru' bauma Jeekopi' boku-koo tee-anko ee'noko ookara bakanamuiaang, nantoong-koong deerunoo' ˜kenaanka-taa kivora-ita pa'noko' [75]. 15Ee'noko Jeekopi' temaia' ninka, niikaang muu'nanka-koo oko'bosi'namaia' ninka, nari' danto Iisipi'aape berora teke otoroitaa' nari' boorou'. 16Ee'noko Siekama'aape nkavaarira te' kuvi dako'doma bempaaru' Eebaraami'ke moo'uu'noo' nii'ninge mooni'ke Aamoo baurukaa'koo teka Siekama'ka.”
Sitivenie Noru'antavuru'na' Napo' Moosesi Tompimpaako'na'koo
17-18“Teka tee maraka-anta Kumponinge Eebaraami' nauvuu'nung dupearavaing-koong batei due'uma nanuko nantoong tee deto berempariru' teke Iisipi'ke bera nii'nung daurarong tavo'kuu'noo'ke basi Iisipi'nameensi'koo, Josepa' noru'uaung. 19Teie niikanamuiaang aavavurima oraka' nkovurima niikakatauro etuvuriko' tootoia oko dua'aariko booroo'naang. 20Ee'noko tenang ee'nang Moosesi tee tooto' kirokai ponto'aru'. Ee'noko beekuri kaara-koo baumaraange pava-koo kuunga tareau'. 21Bera tenang baku'koo makotuaruio' taapo' sipau', ee'noko Peero' baurange nkavura bauring deempura tarevuko panka'paru'. 22Ee'noko Moosesi tee bare-antavaako' ookara mataunanka Iisipi'nupoong biikaning, ee'noko tee iirakuta deemparu' kara-koo ee'noko nko-nkonanka-koo.
23“Tenang tee mare' karenaumo kivora deemparara ba'marang beero'koo piavoko', Isireeli baurukaa' tampaariko'ning. 24Ee'noko teie oovuu' narung ba'marang-koong narunge Iisipi'koonge oraka' nkovuko, ee'noko tee Iisipi'koong tavura tee si'antavuu'. 25Ee' noru'ui, ‘Ainge mmarange tasi'pai otong Kumponinge nkaang birenge moo'uriaina'.’ Teka teinge tasi'paava'. 26Ee'noko dauna'mung napo' Moosesie ba'marang-koonaanka taveereko oovuretu'. Ee'noko navu-anta-koo piavou' aa'puma, ‘Anaanka, dee' namainta. Aming-koo dee'ka oraka' nkoreeremaang?’ 27Teka teie narunge ba'maiko' oraka' nkovuko'nunge nimpa'uma aa'puu', ‘Da' baie tarenung ee'noko kara simpe'nara˜ nee'koo deeng-antaruing? 28Ai' dake ning dupisi'mee'naang piaromaang tee' narung Iisipi'koong ke'maaki' dupisi'eieena' nari'?’ 29Ee'noko tee Moosesi tenaarei naari-antavuio' Iisipi'keta tenkenui koo'aru' bera Midian-nameensi'nung deemparu', teke ee'noo'ke baurinketa kenaankara nkoaretu'.
30“Teketa tee mare' karenaumo kivora tankinuio' narung koosinung˜ tee-anko pou' teka mee'bora' sirakamaa'koo Sainai-namii-ankoa, nta'koo urung-koo meu'ke tuu'doi'navari-koo. 31Tenang Moosesie oovura tee ta'ninuu' temurii'koo, ee'noko tenang due' poko tee oovuu'naang tee aurong Ovoring-etaing karou' aa'puma,
32‘Ning tee Kumponing dakakatauro biikaang ee'noko tee Eebaraami' bakaang, ee'noko Aisake' ee'noko Jeekopi'.’ (Toro 3:6)
Ee'noko Moosesi dankuranku'aru' teke, oo-koo avorou'. 33Ee'noko Ovoringe aa'puu' tee,
‘Tee boonamante˜ basi'daravai kau'keta. Te' kansi' da' donkonii otoinoo' meepo'. 34Ninge tee bakei ooansing Iisipi'nupoonge nkaning nantoong oraka' nkoaariko, ee'noko tee biikaang bairooto ninka birong taaravansing, ee'noko ning depeto simaring teing moo'koo. Enang aroo'meko da' Iisipi'aape botorampaing.’ (Toro 3:5,7,8,10)
35“Tee ee'nara Moosesi tero tompimpaama ee' minkuau'nung, ‘Da' baie tarenung ee'noko kara simpe'nara˜ deeng-antaruing?’ – tee ee'nara narung Kumponinge botovuu' tarenung ee'noko domang-anta deeng-antavura teie koosinunge pakuvuio', tee-ankoi oro'paru'nunge tuu'doi'navari-koo. 36Teie ee'narai tee' teing barampuru' taa'ni'anta ta'nimpaarii'nanka nkovuma Iisipi'ke ee'noko teke Pirung Urung-koo ee'noko teke mee'bora' sirakamaa'koo mare' karenaumo kivora-koo.
37“Tee aung tee teie Moosesie aa'puru'nung teing Isireeli-nupoong,
‘Ovoring Kumponinge tee narung nakaronara donkong-antareruriaing dii'koo dama'navarang-koo meu'ke, tee' nari' ning donkong-antamuu'na'.’ (Boto 18:15)
38Bakei masika' siraka'pari otong, tee Moosesi tee teke mee'bora' sirakamaa'koo tee kara pare' deempari otoko'nung teing nantoong Isireeli-nupoong ee'noko tee koosinung aa'ning-koo meu'ke tee ee'nara boto nkavuu'nung Kumponing bakaang kara domang-anta teka Sainai-namii-koo.
39-40“Nka niumaraange tee taara-koo piavoroaruko' dimpa'aama. Biikaang domang Iisipi'aape bere'ariko' Eeroni aa'paama, ‘Narung kumponing ta'namemuriaing nii'ke siompampiaing, ai' tee aung Moosesi nii' Iisipi'keta baramuru'nung tee noru'ampia' are' beu'nunge.’ 41Tenang ee'nang teinge boromaka' kampianu paaravaitaa' ta'nampau'nang, ee'noko ako' boontunampariko' teu-koo, dotuarima biikaang nko-nko birenge nkoau'nung-koo. 42Teka Kumponinge teing-eta bere'arama teka sipuru' ako' dootuu'arii'naang aa'ning-koo: duaa', kaara ee'noko beento'nanka-koo, tee' ee'na' Kumponinge Daari Meekung-koo minkuvuu'na' nari' bakaning nakaro-nupoong karantavurima ee'pina',
‘Dii' Isireeli-nupoong, tero tee diikakatauro mee'bora' sirakamaa'koo otoroko'ning karenaumo kivora mare'koo, ee'noko teinge boromaka' dovang sipisipi'nanka tavaarima dootuu'koo boontunampaariko'. Tee' nkoarima ee masika' ning-koo dootuu'ariko'? Otoa'. 43Tee aa' teva oki'nava dooponava nkavai nanaako'nava ning Kumponing nkanava deea', daang-koonaanka kumponinka beekanava deeng-antavau'nung, tenaanka aa'noko Moloko' ee'noko tee beento' miring Reepani, tenaanka tamunsi'naanka daangampaaree'naang teka'paaretu'naanka. Ee'noko tee'koo diikakatauro-pina' nari' nkorariko dii' isipo' Babiloni'keta kato bata'dampiaing.’” (Eimos 5:25-27)
Sitivenie Noru'antavuru'na' Dootuu'nava Pankava Biraanke Okora' Deea'
44“Teinge niikakatauroi teva dooponava Kumponing ninka karanava kunu'ai nanaako'nung teke mee'bora' sirakamaa'koo. Teva ee'nava Kumponinge Moosesi paaranang nau-antavuu'na' kaninii'nava. 45Napo' teinge dama'navarange niikakatauroi teie, teva dooponava kunu'aitaa' Josiua' ninka berou'nunge temeensi'koo akovitu pari'aarira tenang Kumponinge teing kare-nupoong bata'uriko uro'kanoo'ke nanuma. Bera teva teva dooponava pankaroong otou'nava bera Deevita' bakaang batei-koo basinoo'. 46Ee'noko teie Kumponinge Jeekopi' bakaange tee Deevita' aa'na' biraankevuko'nung, ee'noko tee'koo Kumponing bakanava' masikava' kanievuu'naang tana'uu' Deevita'ke. 47Teka Solomoni'ke deeko' dama'ke kanievuu'nung teva. 48Nka tee bane teva pankava kanievuio', Kumponing tee deto basi, nantoonge kaniaamaing-koo pavananka-koo pinka'ari otoaung. Tee' Kumponinge Daari Meekung-koo nakaronung karantavuma aa'puu'na',
49‘Paning te' nkanoo' ba'namari ookara tareroma, ee'noko kansi' te' nkanoo' kau' patu'doma. Tee'koo dake ning pava aremurii' kanimemuaing? Nii'noo' are'ka nkanoo' uaaroma daa'memuu'naang? 50Ninge ee nkoampa' nkaange birenge aing ookara kapoo'nanka? Ovoringe tee'puu'.’ (Aisaia' 66:1,2)
51“Dii' bakei nantoong kontenuka, mutaananuka noru'koo ee'noko tasi'koo. Doong kante dii'ke Tanuaang Meekung bei'bei'erimaung diikakatauro nkoariko'na' nari' nkorarima. 52Baa arera Kumponing-etaing nakaro-nupoong-koo diikakatauroi oraka' nkoaavaruu'nung? Aa'noma teing tee Naning Koonto' poainoo' uro'ke sira'paako'ning tavaariko', tee ee'nara dii'ke kare-nupoong-anko sierira nari' dupisi'eru'; 53Dii'ke ee'ninge boto koosinunge po'antavuio' nkaverira siomperiarukoo'.”
Sitiveni Dupisi'au'na'
54Enang tee Sitivenie teing kara nau-antavurio' taaravaara tee aa'na' iiravoroma si'da' kakirinkuariko'. 55Teka tee Tanuaang Meekunge maanto'ui Sitiveni deto paning-aape ankamparama oovuu' tee meenasi Kumponing bakaang, ee'noko Jiisuu' Kumponing-koo tampavine-koo donkonuio' oovuu'. 56Ee'noko aa'puu' teie, “Ee aing, ninge ooansi o'nong paning daate'ario' ee'noko Tee Naning-naumpo' Paning-etaing donkonuio' a'dei'ke Kumponing-koo tampavine-koo.”
57Teka teing punkang pinka'arima aa'na' bokiaama tee-koo na'moong kokoroariru'. 58Teketa osi pankamono-ita dama'du baransi'aara teka kapange too'pau' tee. Ee'noko teinge bakaang kara oraka' masika' taaravau'ninge biikaang mononopa'nanka kiru'arira narung nemaka-koo kau'kanoo' miring Soolo-koo sipau' kapange tampa' too'paava'naang tee.
59Ee'noko tenang too'paako tee Sitiveni tee kunsiarama aa'puu', “Ovoring Jiisuu', nkaang tanuaang nkaveai.” 60Ee'noko kinkinura aa'na' bokuma aa'puu', “Ovoring, aing aung orara nko-nko-koo tonta'antaveriaing.” Ee'noko tee' minkuvura tenang boo'paru'.
Currently Selected:
Kara Okovuri Nkanuka 7: nasNTpo
Highlight
Share
Copy
Want to have your highlights saved across all your devices? Sign up or sign in
© 1994, Wycliffe Bible Translators, Inc. All rights reserved.
Kara Okovuri Nkanuka 7
7
Sitivenie Noru'antavuru'na' Kumponing Eebaraami' Tampa' Biraankevu'na' Dootuu'nava Pankava Mme' Otoaruko
1Ee'noko piristi' deto basie aa'puu', “Tee' ee masika' minkuaamang?” 2Ee'noko Sitivenie aa'puu',
“Dii' mmataraang ee'noko mmarang, io' taarameriaing ning. Tee Kumponing meenasi-po'nung Eebaraami'koo niuma-koo oro'paru' Mesopotemia' otoko Aarani'aape mme' tenkenuaruko. 3Kumponinge aa'puu' tee,
‘Tenkeniaing anketa dakanoo'keta kansi'keta, dakanamuiaang-ankoita, ee'noko ninge naurampainameensi'koo beaing kansi'koo.’ (Pupu' 12:1)
4“Teketa Kaldea-nupoong biikanameensi'keta tenkenura tee bera Aarani'namono-koo otoko'. Ee'noko teketa bauma boo'pario' dama'ke Kumponinge botovuu' teketa aa' ee'noo' ameensi'koo nii' enang o'norinoo' poo'naang. 5Teka ameensi'koo navaro oko-antavua', oki'noo' aa'noo' muku'noo' otoa'. Teka tamung maraka-antavuu'nung dama'ke teing ninka ba'dompenku ninka doompeto dama'ke tavo'kaavaining ninka nari' kompaava'naang bane bauring mme' otoaruko. 6Ee'noko Kumponinge ee'pina' nauvuu',
‘Daurukaa' teing dama'ke tavora-nupoong otoroaining oovuning biikanoo'ke, teke teing-koo dai'nisinuka deempariri otoromaatoaing oraka' nkoaariko karenaumo daaku' mare'koo. 7Teka ninge kiimatavarampaing teing tevitu da'dompenku tang moo'dopa-koo mintoong-antavaariainavitu. Ee'noko teketa tenkenaarai'nange ning anke ameensi'koo porora dootuu'maamatoaing.’ (Pupu' 15:13,14)
8“Kumponinge tee'purai'nange teie napo' kara naroong-antaevuu' dopa' toto'naveu-koong. Ee'noko tee'koo Eebaraami' Aisake' bauma deemparara dopa' napu'uu' bakaning doong ˜beenang-taa basiarako. Ee'noko Aisake' tee Jeekopi' bauma deemparu' ee'noko Jeekopi' tee temaia' nanai'keta kenaanka muu'koo oko'bosi'namaia' biuma deemparu'.”
Sitivenie Noru'antavuru'na' Biikakatauroi Josepa' Tompimpau'nung-koo
9“Ee'noko temaia' oko'bosi-namaia' Josepa'koo mamairoarira baaveau' tee Iisipi'aape, teka Kumponing tee tee ninka nari' otoko'. 10Ee'noko tee unaa-antavuko' teing-eta bakaning arikananka-ita. Ee'noko Kumponinge Josepa' aa'na' matau deeng-antavuio' Peero'ke, teie Iisipi'nunge dauraronge˜, tampa' oovura ovo'ma' deeng-antavuu' Iisipi'nameensi'koo ee'noko bakanava'koo ookutunava-koo.
11“Enang tee peera pankaing tavo'kuu' Iisipi'nameng-koo ee'noko Keenani-nameng-koo, ee'noko aa'na' tora'pau'. Ee'noko niumaraange taamang besi'aama ooaava'. 12Bera Jeekopi'ke taamang Iisipi'ka taaravura teie botovuru' teing niumaraang Iisipi' beero'aava'naang tutuna'namu'koo.
13“Ee'noko kemu'kanamu' berou'nang-koo Josepa' baka sira'paru' batatakaampi-koo, ee'noko Josepa' baumaraang tenang Peero'ke noru'uru'. 14Ee'noko Josepa' botoaru' bauma Jeekopi' boku-koo tee-anko ee'noko ookara bakanamuiaang, nantoong-koong deerunoo' ˜kenaanka-taa kivora-ita pa'noko' [75]. 15Ee'noko Jeekopi' temaia' ninka, niikaang muu'nanka-koo oko'bosi'namaia' ninka, nari' danto Iisipi'aape berora teke otoroitaa' nari' boorou'. 16Ee'noko Siekama'aape nkavaarira te' kuvi dako'doma bempaaru' Eebaraami'ke moo'uu'noo' nii'ninge mooni'ke Aamoo baurukaa'koo teka Siekama'ka.”
Sitivenie Noru'antavuru'na' Napo' Moosesi Tompimpaako'na'koo
17-18“Teka tee maraka-anta Kumponinge Eebaraami' nauvuu'nung dupearavaing-koong batei due'uma nanuko nantoong tee deto berempariru' teke Iisipi'ke bera nii'nung daurarong tavo'kuu'noo'ke basi Iisipi'nameensi'koo, Josepa' noru'uaung. 19Teie niikanamuiaang aavavurima oraka' nkovurima niikakatauro etuvuriko' tootoia oko dua'aariko booroo'naang. 20Ee'noko tenang ee'nang Moosesi tee tooto' kirokai ponto'aru'. Ee'noko beekuri kaara-koo baumaraange pava-koo kuunga tareau'. 21Bera tenang baku'koo makotuaruio' taapo' sipau', ee'noko Peero' baurange nkavura bauring deempura tarevuko panka'paru'. 22Ee'noko Moosesi tee bare-antavaako' ookara mataunanka Iisipi'nupoong biikaning, ee'noko tee iirakuta deemparu' kara-koo ee'noko nko-nkonanka-koo.
23“Tenang tee mare' karenaumo kivora deemparara ba'marang beero'koo piavoko', Isireeli baurukaa' tampaariko'ning. 24Ee'noko teie oovuu' narung ba'marang-koong narunge Iisipi'koonge oraka' nkovuko, ee'noko tee Iisipi'koong tavura tee si'antavuu'. 25Ee' noru'ui, ‘Ainge mmarange tasi'pai otong Kumponinge nkaang birenge moo'uriaina'.’ Teka teinge tasi'paava'. 26Ee'noko dauna'mung napo' Moosesie ba'marang-koonaanka taveereko oovuretu'. Ee'noko navu-anta-koo piavou' aa'puma, ‘Anaanka, dee' namainta. Aming-koo dee'ka oraka' nkoreeremaang?’ 27Teka teie narunge ba'maiko' oraka' nkovuko'nunge nimpa'uma aa'puu', ‘Da' baie tarenung ee'noko kara simpe'nara˜ nee'koo deeng-antaruing? 28Ai' dake ning dupisi'mee'naang piaromaang tee' narung Iisipi'koong ke'maaki' dupisi'eieena' nari'?’ 29Ee'noko tee Moosesi tenaarei naari-antavuio' Iisipi'keta tenkenui koo'aru' bera Midian-nameensi'nung deemparu', teke ee'noo'ke baurinketa kenaankara nkoaretu'.
30“Teketa tee mare' karenaumo kivora tankinuio' narung koosinung˜ tee-anko pou' teka mee'bora' sirakamaa'koo Sainai-namii-ankoa, nta'koo urung-koo meu'ke tuu'doi'navari-koo. 31Tenang Moosesie oovura tee ta'ninuu' temurii'koo, ee'noko tenang due' poko tee oovuu'naang tee aurong Ovoring-etaing karou' aa'puma,
32‘Ning tee Kumponing dakakatauro biikaang ee'noko tee Eebaraami' bakaang, ee'noko Aisake' ee'noko Jeekopi'.’ (Toro 3:6)
Ee'noko Moosesi dankuranku'aru' teke, oo-koo avorou'. 33Ee'noko Ovoringe aa'puu' tee,
‘Tee boonamante˜ basi'daravai kau'keta. Te' kansi' da' donkonii otoinoo' meepo'. 34Ninge tee bakei ooansing Iisipi'nupoonge nkaning nantoong oraka' nkoaariko, ee'noko tee biikaang bairooto ninka birong taaravansing, ee'noko ning depeto simaring teing moo'koo. Enang aroo'meko da' Iisipi'aape botorampaing.’ (Toro 3:5,7,8,10)
35“Tee ee'nara Moosesi tero tompimpaama ee' minkuau'nung, ‘Da' baie tarenung ee'noko kara simpe'nara˜ deeng-antaruing?’ – tee ee'nara narung Kumponinge botovuu' tarenung ee'noko domang-anta deeng-antavura teie koosinunge pakuvuio', tee-ankoi oro'paru'nunge tuu'doi'navari-koo. 36Teie ee'narai tee' teing barampuru' taa'ni'anta ta'nimpaarii'nanka nkovuma Iisipi'ke ee'noko teke Pirung Urung-koo ee'noko teke mee'bora' sirakamaa'koo mare' karenaumo kivora-koo.
37“Tee aung tee teie Moosesie aa'puru'nung teing Isireeli-nupoong,
‘Ovoring Kumponinge tee narung nakaronara donkong-antareruriaing dii'koo dama'navarang-koo meu'ke, tee' nari' ning donkong-antamuu'na'.’ (Boto 18:15)
38Bakei masika' siraka'pari otong, tee Moosesi tee teke mee'bora' sirakamaa'koo tee kara pare' deempari otoko'nung teing nantoong Isireeli-nupoong ee'noko tee koosinung aa'ning-koo meu'ke tee ee'nara boto nkavuu'nung Kumponing bakaang kara domang-anta teka Sainai-namii-koo.
39-40“Nka niumaraange tee taara-koo piavoroaruko' dimpa'aama. Biikaang domang Iisipi'aape bere'ariko' Eeroni aa'paama, ‘Narung kumponing ta'namemuriaing nii'ke siompampiaing, ai' tee aung Moosesi nii' Iisipi'keta baramuru'nung tee noru'ampia' are' beu'nunge.’ 41Tenang ee'nang teinge boromaka' kampianu paaravaitaa' ta'nampau'nang, ee'noko ako' boontunampariko' teu-koo, dotuarima biikaang nko-nko birenge nkoau'nung-koo. 42Teka Kumponinge teing-eta bere'arama teka sipuru' ako' dootuu'arii'naang aa'ning-koo: duaa', kaara ee'noko beento'nanka-koo, tee' ee'na' Kumponinge Daari Meekung-koo minkuvuu'na' nari' bakaning nakaro-nupoong karantavurima ee'pina',
‘Dii' Isireeli-nupoong, tero tee diikakatauro mee'bora' sirakamaa'koo otoroko'ning karenaumo kivora mare'koo, ee'noko teinge boromaka' dovang sipisipi'nanka tavaarima dootuu'koo boontunampaariko'. Tee' nkoarima ee masika' ning-koo dootuu'ariko'? Otoa'. 43Tee aa' teva oki'nava dooponava nkavai nanaako'nava ning Kumponing nkanava deea', daang-koonaanka kumponinka beekanava deeng-antavau'nung, tenaanka aa'noko Moloko' ee'noko tee beento' miring Reepani, tenaanka tamunsi'naanka daangampaaree'naang teka'paaretu'naanka. Ee'noko tee'koo diikakatauro-pina' nari' nkorariko dii' isipo' Babiloni'keta kato bata'dampiaing.’” (Eimos 5:25-27)
Sitivenie Noru'antavuru'na' Dootuu'nava Pankava Biraanke Okora' Deea'
44“Teinge niikakatauroi teva dooponava Kumponing ninka karanava kunu'ai nanaako'nung teke mee'bora' sirakamaa'koo. Teva ee'nava Kumponinge Moosesi paaranang nau-antavuu'na' kaninii'nava. 45Napo' teinge dama'navarange niikakatauroi teie, teva dooponava kunu'aitaa' Josiua' ninka berou'nunge temeensi'koo akovitu pari'aarira tenang Kumponinge teing kare-nupoong bata'uriko uro'kanoo'ke nanuma. Bera teva teva dooponava pankaroong otou'nava bera Deevita' bakaang batei-koo basinoo'. 46Ee'noko teie Kumponinge Jeekopi' bakaange tee Deevita' aa'na' biraankevuko'nung, ee'noko tee'koo Kumponing bakanava' masikava' kanievuu'naang tana'uu' Deevita'ke. 47Teka Solomoni'ke deeko' dama'ke kanievuu'nung teva. 48Nka tee bane teva pankava kanievuio', Kumponing tee deto basi, nantoonge kaniaamaing-koo pavananka-koo pinka'ari otoaung. Tee' Kumponinge Daari Meekung-koo nakaronung karantavuma aa'puu'na',
49‘Paning te' nkanoo' ba'namari ookara tareroma, ee'noko kansi' te' nkanoo' kau' patu'doma. Tee'koo dake ning pava aremurii' kanimemuaing? Nii'noo' are'ka nkanoo' uaaroma daa'memuu'naang? 50Ninge ee nkoampa' nkaange birenge aing ookara kapoo'nanka? Ovoringe tee'puu'.’ (Aisaia' 66:1,2)
51“Dii' bakei nantoong kontenuka, mutaananuka noru'koo ee'noko tasi'koo. Doong kante dii'ke Tanuaang Meekung bei'bei'erimaung diikakatauro nkoariko'na' nari' nkorarima. 52Baa arera Kumponing-etaing nakaro-nupoong-koo diikakatauroi oraka' nkoaavaruu'nung? Aa'noma teing tee Naning Koonto' poainoo' uro'ke sira'paako'ning tavaariko', tee ee'nara dii'ke kare-nupoong-anko sierira nari' dupisi'eru'; 53Dii'ke ee'ninge boto koosinunge po'antavuio' nkaverira siomperiarukoo'.”
Sitiveni Dupisi'au'na'
54Enang tee Sitivenie teing kara nau-antavurio' taaravaara tee aa'na' iiravoroma si'da' kakirinkuariko'. 55Teka tee Tanuaang Meekunge maanto'ui Sitiveni deto paning-aape ankamparama oovuu' tee meenasi Kumponing bakaang, ee'noko Jiisuu' Kumponing-koo tampavine-koo donkonuio' oovuu'. 56Ee'noko aa'puu' teie, “Ee aing, ninge ooansi o'nong paning daate'ario' ee'noko Tee Naning-naumpo' Paning-etaing donkonuio' a'dei'ke Kumponing-koo tampavine-koo.”
57Teka teing punkang pinka'arima aa'na' bokiaama tee-koo na'moong kokoroariru'. 58Teketa osi pankamono-ita dama'du baransi'aara teka kapange too'pau' tee. Ee'noko teinge bakaang kara oraka' masika' taaravau'ninge biikaang mononopa'nanka kiru'arira narung nemaka-koo kau'kanoo' miring Soolo-koo sipau' kapange tampa' too'paava'naang tee.
59Ee'noko tenang too'paako tee Sitiveni tee kunsiarama aa'puu', “Ovoring Jiisuu', nkaang tanuaang nkaveai.” 60Ee'noko kinkinura aa'na' bokuma aa'puu', “Ovoring, aing aung orara nko-nko-koo tonta'antaveriaing.” Ee'noko tee' minkuvura tenang boo'paru'.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 1994, Wycliffe Bible Translators, Inc. All rights reserved.