Maatiuꞌ 21
21
Jiisuu'ke Nantoong Asi'noo' Nau-antavuru'na' Jerusalema'
(21:1–25:46)
Jiisuu' Daurarong Deemparara Jerusalema' Tumparu'na'
(Kena 118:25-27; Mak 11:1-11; Luk 19:28-40; Jon 12:12-19)
1Tenang Jiisuu' bakaning ninka Jerusalema' duerue'aama Bepasi-namono-koo basiarima Olive'po'namii-koo otoinoo', Jiisuu'ke bakaning barevare-nupoong-koo kenaanka uro'ke botovuretu' aa'purema, 2“Temono-koo danto uro'kanoo'ke otoi-namono-koo du'dareai, ee'noko du'dareta namu'ke doonkii'navoro' mo'ming-koo bi'ari teke otoko ooveree'naang, bauring-navoro' kampia-navoro' nari'. Tevoro' dapa'ereta ookeng a' ning-anko po'antavereai. 3Nii'nung naninge tokoona' minkurureko nauerema aa'pereai, ‘Ovoring piavoing akong,’ ee'noko teie namu'ke botorureaing aa'puma, ‘Bokuvereri bereai.’”
4Aung tee kapoo' narunge temu'nunge nakaronunge tarampeearama˜ minkuvuu'nung dupearaa'naang tee' nkoaru', tee Daari Meekung-koo aa'puu'noo'ka minkuvuu'nung,
5“Bera naueriai teing Saioni-nupoong, aa'periaing, ‘Ooveriaing, diikaang daurarong˜ dii'anko dooroompari banainge pomaang, doonkii'nu#21:5 Nii'ning dauraronanka oosi pankenankai kare-koo datavoromainge nanaamaung nantoonge ankampaarii'naang. kampianu-koo dau ba'nanui, kau' karenaumo-nu dooroompari manki'nanka nkavumau-koo.’” (Aisaia' 62:11; Sekaraia 9:9)
6Teketa tenaanka Jiisuu' bakaning-koonaanka barevare-nupoong-naanka bereta tee' nauvuretu'na' nkoaretu'. 7Tenaankai teu doonkii'nu baurinu ninka po'antavuresio' teinge biikaang baarong dau tani'au', ee'noko Jiisuu' baaronanka-koo dau ba'namparu'. 8Teketa nantoong karingai biikaang baaronanka taunge danto tani'au', ee'noko nii'ninge uurung tovang napu'aama tani'au'.
9Ee'noko teing karinga Jiisuu'koo uro'kanoo'ke nanau'ninge ee'noko dama'du-eta porou'ninge eura bokiaama aa'paako', “Biraanke tee-koo Deevita' bauring! Biraanke-po'nung aung Ovoring bakaang miring-koo pomaang! Biraanke otoi otoaing a'dei'ke paning-koo nari'!” 10Teketa tenang Jiisuu' Jerusalema' tumparako ookara nantoong temono-koo-nupoonge irikung-antavarira nia'kaama aa'paako', “Aung baa?” 11Ee'noko nantoong karingai maku'aama aa'pau', “Aung tee nakaronara Jiisuu', Nasareti'nung, te' ee'noo' Kaaleli'koonoo'.”
Jiisuu'ke Dootuu'nava Pankava-koo Baave Nkonuka Bata'uru'na'
(Mak 11:15-19; Luk 19:45-48; Jon 2:13-22)
12Teketa Jiisuu' parang-koo tumparara pava dootuu'nava pankava-koong-koo nantoong sipisipi' dovang parekanumpo' baaveveeko'ning bata'uru'nung. Aa'noko batanananka mooni' aampari'aako'ning biikaning ee'noko napo' ba'nava'nananka kuukuu' baave-aariko'ning biikaning teka piakatu'uru'. 13Aa'puru' teing, “Kumponing bakaang kara Daari Meekung-koo tee ee' daariari otong,
‘Nkaang pava tee pava kunsinava tampari otoaing,’ (Aisaia' 56:7)
teka dii'ke ‘bakiaa' nkonuka biikanoo'’ deeng-antavering.” (Jeremaia 7:11)
14Teketa kaputu'nanka ee'noko dootananka tee-anko porou' te' dootuu'nava pankava-koo, ee'noko teka taare-antavuru' teing. 15Teka teing piristi'nuka-koo pankenge ee'noko boto naunukai tee' ooaara domang oraka' dee'orou' teie kapoo' tampeng ta'nimpaarii'nanka nkovuko ee'noko napo' toire'ke dootuu'nava pankava-koo parang-koo kuunga oovavaama aa'paako'nung-koo, “Daangampampimaatoaing tee Deevita' bauring.” 16Teinge nia'aama aa'pau', “Dake ee taaravemaang tee kapoo' toire'ke minkuaamatomaung?” Jiisuu'ke maku'urima aa'puu', “Ee'. Teka ee dii'ke tee Daari Meekung-koo deeruerima noru'eriaung aa'pumanoo'ka,
‘Toire' ee'noko nerakau'nuka biikaang be'duu'keta dake tee dangaraangang tavo'antaveaing?’” (Kena 8:2)
17Ee'noko teing teka temono-koo sipurira Beetani-navuntu'aape tenkenura teke aatuu'.
Tee Koi' Piiki' Mara'ou'na' Jiisuu'ke Barakosi'uio'
(Mak 11:12-14,20-24)
18Teketa dauna'mung tero maata Jerusalema'aape napo' bema Jiisuu' tee peeravou'. 19Teketa piiki'navari taung miiringa oovura te' tevari-anko beu'. Teka sinang tevari-koo oovua', para' narung otoko oovuu'. Teketa aa'puu' tevari, “Da'koo tee napo' sinang bi'duauka'nung.” Teketa namu'ke tevari mara'oi boo'paru'.
20Teketa tenang bakaning barevare-nupoonge tee ooaara teing bakei ta'ninau' ee'noko aa'pau', “Aung avari arekee' namu'ke mara'oi boo'paring?” 21Jiisuu'ke teing maku'urima aa'puru', “Masika' naurampimang ninge, dii' masika'anta oto'deruri deeko', keekoo'daria', aung avari-koo nkoaring-pina' oro' dau basina' nkoveriaing, aa'noko aunteto iu' dii'ke aa'periko, ‘Bita'darara pirung-koo dua'daravai,’ tee' nkoarapeu'. 22Masika'antaveri nia'kiriaing deeko' tee nkaveriaing kapoo' eentarariaing diikaang kunsi-koo.”
Jiisuu' Bakaang Purinto'koong Okora' Nia'au'na'
(Mak 11:27-33; Luk 20:1-8)
23Teketa tee Jiisuu' pava dootuu'nava pankava-koong-koo parang-koo kuung tumparu', ee'noko teke nau-antavarako piristi'koo ovontung ee'noko nantoong urang-antanuka tee-anko porou'. Porora tana'aama aa'pau', “Tee aung aremurii' taura' otoko dake aing kapoo'nanka nkovemaatoing? Ee'noko napo' baie aruu'nunge tee taura'?” 24Jiisuu'ke maku'urima aa'puru', “Ninge dii' napo' tana'dampiaing, ee'noko ning maku'meriko ninge naurampiaing tee taura' ning oto'memuko teing aing kapoo'nanka nkoamaung okora'noo'. 25Jooni Minkinara-koo nia'dampii'naang: baie taura'puio' nantoong ntong-koo minkivurima meeka'antavuriko'? Kumponinge, ai' tamung nantoonge?” Teketa teing bii'ka nia'eema aa'peeko', “Are'pampii'naang? Aa'pampiko deeko', ‘Kumponinge,’ teie aa'murii'naang, ‘Teka dii'ke aming-koo Jooni masika'antaveriaruko'?’ 26Napo' aa'pampiko deeko', ‘Tamung nantoong-etaing,’ nantoonge tamaari'neenga, ai' teinge tee ookarai Jooni nakaronara Kumponing-etaing tasi'pai otong.” 27Teketa Jiisuu' maku'aama aa'pau', “Nii'ke aa' noru'ampia'.” Teketa Jiisuu'ke aa'puru' teing, “Ee', ninge tee'ke dii' naurampiaroo'naang baa tee ning taura' amuu'nung aing kapoo'nanka nko-koo.”
Tee Mirumiru' Naning-namainta Kemaintara-koong
28“Aung minkunaa arekee' pa noru'erii'naang dii'ke? Naning narung baurinketa kenaanka otoko'nung. Tutuna'nung bauring-anko bera aa'puu' tee, ‘E'mung da' bera mintoonau-koo mintoontaravai.’ 29Ee'noko teie maku'uma aa'puu', ‘Ning aa' mearoo'naang,’ teka dama'ke noru' paariarara mintoong-koo nanuu'. 30Teketa tee bauma napo' nii'nung-anko bauring-anko bera tee' nari' minkuvuu', ee'noko teie aa'puu', ‘Mera mintoomaraa'naang,’ teka dama'ke bearuu' mintoong-koo. 31Temainta-koo arerai beuma bakaang pia siompuu'?” Teinge maku'aama aa'pau', “Teie tutuna'nunge.” Teketa Jiisuu'ke aa'puru' teing, “Masika' naurampimang ninge dii', teinge taakisi nkanukai ee'noko teing maniku' auning nkonuka teinge tee dii' divu'daari muu' Kumponing bakaang-koo beroaing. 32Ai' Jooni tee dii'anko pora taung koonto'navung naururiko dii'ke masika'antaveriaruu', teka teinge taakisi nkanukai ee'noko maniku' auning nkonukai masika'antavaamaung, ee'noko bane bere'ariko ooverira, dii'ke tee masika'antaverima bere'daria' otong.”
Kara Dikito' Teing Nantoong Oreng Mintoong Tanata-koo Sipuru'ning-koong
(Mak 12:1-12; Luk 20:9-19)
33“Napo' nii'nung mirumiru'koo taarakiriai. Aung aa' tee naning narung ovoring otoko'nung bakaang kansi'koo mintoonau uaininau keempura. Ee'noko parampuu' tenau, dinkung nenke'uu' uaini mii'doma tenau-koong. Ee'noko pava tarenava siarua' kanivuu'. Teketa nii'ning nantoong tenau tare-antavurira nii'nameensi'koo tenkenuu'. 34Teketa batei sinang kavu'koong due'uko teie bakaning botovotonaa'nuka botovuru' teing-anko uaini tarenuka-anko bakaang baarauni˜ tenau-koong nkaevaava'naang. 35Teketa teinge tenau tarenukai teing bakaning botovotonaa'nuka moo'aarima dai'aaru', narung murasiavaama nii'nung dupisi'au', teketa beenaumo-nung kapange tavaama dupisi'au'. 36Teketa napo' teie ovoringe nii'ning mmau' botovotonaa'nuka napo' teing-anko botovuru' tutuna'namu'koo botovuru'ning-koo dau basining, teketa teinge tenau tare-antavuru'ninge tee' nari' tutuna'ning nkoaaru'na' nkoaaru'. 37Asi'na'moo masika'moo teie bauring botovuu' teing tarenuka-anko, ee' noru'ura, teing tee nnuring-koo amaiaa'oroaing. 38Teka teing tare nkonukai tee bauring ooaara teinge bii'ka kareaama aa'paako', ‘Tee aung ee'nung barenku okovuaing. Aia' dupisi'ampiaing tee, barenku okomuriaina'.’ 39Teketa teinge kompaara tee uaininau-eta dama'du dua'aara teka dupisi'au' tee. 40Ee'noko tenau okonarai pora teing tenau tarenuka arekee' nkovuriaing?” 41Teinge aa'pau', “Teie aa' teing maarekusi'nuka bakei maremaarenoo' basi-antavuri dupisi'uriaing, ee'noko tee tenau teie nii'ning napo' tare-antavuriaing baarauni˜ tenau-koong avaamatoaining sinang kavaama.” 42Teketa Jiisuu'ke aa'puru' teing, “Dii'ke ee tee Daari Meekung-koong kara deeruerima dama' nkoaravaina' tasi'periaung aa'pui otoinoo'ka,
‘Tere' ee'nare' kapanare' pava kaninukai poore'aama dua'au'nare' ookutunava-koo e'manianare' tumanare' deempario' tasi'pau' dama'ke. Ovoringe tee' ee'na' nko-antavuu' ee'noko bakei ta'nimpaarii' niikaang duta-koo.’ (Kena 118:22-23)
43Tee'koo ninge naurampimang, tee muu' Kumponing bakaang tee dii' pari'duriaing bera teing nantoong sinang tampara tavo'antavaavaining avuriai. 44Ee'noko ookara nantoong tere'koo tasi'paava' tupampariaining tee bii'ka pisira'ariaing, bera baa tee naning tere' dau dua'aravaing tee tere'ke puutuvuaing.” 45Teketa tenang teinge piristi'koo ovontunge ee'noko Boto Keperuu'navitue Jiisuu' bakaang kara mirumiru' taaravaara tee teing tasi'pariru' teing ee'ning minkuvuru'nung Jiisuu'ke. 46Teka tee dai'aava'naang taung besi'aama nantoong karinga-koo avoreaako', nantoonge tee ee'nung nakaronung noru'ai otoinoo'koo.
Currently Selected:
Maatiuꞌ 21: nasNTpo
Highlight
Share
Copy
Want to have your highlights saved across all your devices? Sign up or sign in
© 1994, Wycliffe Bible Translators, Inc. All rights reserved.
Maatiuꞌ 21
21
Jiisuu'ke Nantoong Asi'noo' Nau-antavuru'na' Jerusalema'
(21:1–25:46)
Jiisuu' Daurarong Deemparara Jerusalema' Tumparu'na'
(Kena 118:25-27; Mak 11:1-11; Luk 19:28-40; Jon 12:12-19)
1Tenang Jiisuu' bakaning ninka Jerusalema' duerue'aama Bepasi-namono-koo basiarima Olive'po'namii-koo otoinoo', Jiisuu'ke bakaning barevare-nupoong-koo kenaanka uro'ke botovuretu' aa'purema, 2“Temono-koo danto uro'kanoo'ke otoi-namono-koo du'dareai, ee'noko du'dareta namu'ke doonkii'navoro' mo'ming-koo bi'ari teke otoko ooveree'naang, bauring-navoro' kampia-navoro' nari'. Tevoro' dapa'ereta ookeng a' ning-anko po'antavereai. 3Nii'nung naninge tokoona' minkurureko nauerema aa'pereai, ‘Ovoring piavoing akong,’ ee'noko teie namu'ke botorureaing aa'puma, ‘Bokuvereri bereai.’”
4Aung tee kapoo' narunge temu'nunge nakaronunge tarampeearama˜ minkuvuu'nung dupearaa'naang tee' nkoaru', tee Daari Meekung-koo aa'puu'noo'ka minkuvuu'nung,
5“Bera naueriai teing Saioni-nupoong, aa'periaing, ‘Ooveriaing, diikaang daurarong˜ dii'anko dooroompari banainge pomaang, doonkii'nu#21:5 Nii'ning dauraronanka oosi pankenankai kare-koo datavoromainge nanaamaung nantoonge ankampaarii'naang. kampianu-koo dau ba'nanui, kau' karenaumo-nu dooroompari manki'nanka nkavumau-koo.’” (Aisaia' 62:11; Sekaraia 9:9)
6Teketa tenaanka Jiisuu' bakaning-koonaanka barevare-nupoong-naanka bereta tee' nauvuretu'na' nkoaretu'. 7Tenaankai teu doonkii'nu baurinu ninka po'antavuresio' teinge biikaang baarong dau tani'au', ee'noko Jiisuu' baaronanka-koo dau ba'namparu'. 8Teketa nantoong karingai biikaang baaronanka taunge danto tani'au', ee'noko nii'ninge uurung tovang napu'aama tani'au'.
9Ee'noko teing karinga Jiisuu'koo uro'kanoo'ke nanau'ninge ee'noko dama'du-eta porou'ninge eura bokiaama aa'paako', “Biraanke tee-koo Deevita' bauring! Biraanke-po'nung aung Ovoring bakaang miring-koo pomaang! Biraanke otoi otoaing a'dei'ke paning-koo nari'!” 10Teketa tenang Jiisuu' Jerusalema' tumparako ookara nantoong temono-koo-nupoonge irikung-antavarira nia'kaama aa'paako', “Aung baa?” 11Ee'noko nantoong karingai maku'aama aa'pau', “Aung tee nakaronara Jiisuu', Nasareti'nung, te' ee'noo' Kaaleli'koonoo'.”
Jiisuu'ke Dootuu'nava Pankava-koo Baave Nkonuka Bata'uru'na'
(Mak 11:15-19; Luk 19:45-48; Jon 2:13-22)
12Teketa Jiisuu' parang-koo tumparara pava dootuu'nava pankava-koong-koo nantoong sipisipi' dovang parekanumpo' baaveveeko'ning bata'uru'nung. Aa'noko batanananka mooni' aampari'aako'ning biikaning ee'noko napo' ba'nava'nananka kuukuu' baave-aariko'ning biikaning teka piakatu'uru'. 13Aa'puru' teing, “Kumponing bakaang kara Daari Meekung-koo tee ee' daariari otong,
‘Nkaang pava tee pava kunsinava tampari otoaing,’ (Aisaia' 56:7)
teka dii'ke ‘bakiaa' nkonuka biikanoo'’ deeng-antavering.” (Jeremaia 7:11)
14Teketa kaputu'nanka ee'noko dootananka tee-anko porou' te' dootuu'nava pankava-koo, ee'noko teka taare-antavuru' teing. 15Teka teing piristi'nuka-koo pankenge ee'noko boto naunukai tee' ooaara domang oraka' dee'orou' teie kapoo' tampeng ta'nimpaarii'nanka nkovuko ee'noko napo' toire'ke dootuu'nava pankava-koo parang-koo kuunga oovavaama aa'paako'nung-koo, “Daangampampimaatoaing tee Deevita' bauring.” 16Teinge nia'aama aa'pau', “Dake ee taaravemaang tee kapoo' toire'ke minkuaamatomaung?” Jiisuu'ke maku'urima aa'puu', “Ee'. Teka ee dii'ke tee Daari Meekung-koo deeruerima noru'eriaung aa'pumanoo'ka,
‘Toire' ee'noko nerakau'nuka biikaang be'duu'keta dake tee dangaraangang tavo'antaveaing?’” (Kena 8:2)
17Ee'noko teing teka temono-koo sipurira Beetani-navuntu'aape tenkenura teke aatuu'.
Tee Koi' Piiki' Mara'ou'na' Jiisuu'ke Barakosi'uio'
(Mak 11:12-14,20-24)
18Teketa dauna'mung tero maata Jerusalema'aape napo' bema Jiisuu' tee peeravou'. 19Teketa piiki'navari taung miiringa oovura te' tevari-anko beu'. Teka sinang tevari-koo oovua', para' narung otoko oovuu'. Teketa aa'puu' tevari, “Da'koo tee napo' sinang bi'duauka'nung.” Teketa namu'ke tevari mara'oi boo'paru'.
20Teketa tenang bakaning barevare-nupoonge tee ooaara teing bakei ta'ninau' ee'noko aa'pau', “Aung avari arekee' namu'ke mara'oi boo'paring?” 21Jiisuu'ke teing maku'urima aa'puru', “Masika' naurampimang ninge, dii' masika'anta oto'deruri deeko', keekoo'daria', aung avari-koo nkoaring-pina' oro' dau basina' nkoveriaing, aa'noko aunteto iu' dii'ke aa'periko, ‘Bita'darara pirung-koo dua'daravai,’ tee' nkoarapeu'. 22Masika'antaveri nia'kiriaing deeko' tee nkaveriaing kapoo' eentarariaing diikaang kunsi-koo.”
Jiisuu' Bakaang Purinto'koong Okora' Nia'au'na'
(Mak 11:27-33; Luk 20:1-8)
23Teketa tee Jiisuu' pava dootuu'nava pankava-koong-koo parang-koo kuung tumparu', ee'noko teke nau-antavarako piristi'koo ovontung ee'noko nantoong urang-antanuka tee-anko porou'. Porora tana'aama aa'pau', “Tee aung aremurii' taura' otoko dake aing kapoo'nanka nkovemaatoing? Ee'noko napo' baie aruu'nunge tee taura'?” 24Jiisuu'ke maku'urima aa'puru', “Ninge dii' napo' tana'dampiaing, ee'noko ning maku'meriko ninge naurampiaing tee taura' ning oto'memuko teing aing kapoo'nanka nkoamaung okora'noo'. 25Jooni Minkinara-koo nia'dampii'naang: baie taura'puio' nantoong ntong-koo minkivurima meeka'antavuriko'? Kumponinge, ai' tamung nantoonge?” Teketa teing bii'ka nia'eema aa'peeko', “Are'pampii'naang? Aa'pampiko deeko', ‘Kumponinge,’ teie aa'murii'naang, ‘Teka dii'ke aming-koo Jooni masika'antaveriaruko'?’ 26Napo' aa'pampiko deeko', ‘Tamung nantoong-etaing,’ nantoonge tamaari'neenga, ai' teinge tee ookarai Jooni nakaronara Kumponing-etaing tasi'pai otong.” 27Teketa Jiisuu' maku'aama aa'pau', “Nii'ke aa' noru'ampia'.” Teketa Jiisuu'ke aa'puru' teing, “Ee', ninge tee'ke dii' naurampiaroo'naang baa tee ning taura' amuu'nung aing kapoo'nanka nko-koo.”
Tee Mirumiru' Naning-namainta Kemaintara-koong
28“Aung minkunaa arekee' pa noru'erii'naang dii'ke? Naning narung baurinketa kenaanka otoko'nung. Tutuna'nung bauring-anko bera aa'puu' tee, ‘E'mung da' bera mintoonau-koo mintoontaravai.’ 29Ee'noko teie maku'uma aa'puu', ‘Ning aa' mearoo'naang,’ teka dama'ke noru' paariarara mintoong-koo nanuu'. 30Teketa tee bauma napo' nii'nung-anko bauring-anko bera tee' nari' minkuvuu', ee'noko teie aa'puu', ‘Mera mintoomaraa'naang,’ teka dama'ke bearuu' mintoong-koo. 31Temainta-koo arerai beuma bakaang pia siompuu'?” Teinge maku'aama aa'pau', “Teie tutuna'nunge.” Teketa Jiisuu'ke aa'puru' teing, “Masika' naurampimang ninge dii', teinge taakisi nkanukai ee'noko teing maniku' auning nkonuka teinge tee dii' divu'daari muu' Kumponing bakaang-koo beroaing. 32Ai' Jooni tee dii'anko pora taung koonto'navung naururiko dii'ke masika'antaveriaruu', teka teinge taakisi nkanukai ee'noko maniku' auning nkonukai masika'antavaamaung, ee'noko bane bere'ariko ooverira, dii'ke tee masika'antaverima bere'daria' otong.”
Kara Dikito' Teing Nantoong Oreng Mintoong Tanata-koo Sipuru'ning-koong
(Mak 12:1-12; Luk 20:9-19)
33“Napo' nii'nung mirumiru'koo taarakiriai. Aung aa' tee naning narung ovoring otoko'nung bakaang kansi'koo mintoonau uaininau keempura. Ee'noko parampuu' tenau, dinkung nenke'uu' uaini mii'doma tenau-koong. Ee'noko pava tarenava siarua' kanivuu'. Teketa nii'ning nantoong tenau tare-antavurira nii'nameensi'koo tenkenuu'. 34Teketa batei sinang kavu'koong due'uko teie bakaning botovotonaa'nuka botovuru' teing-anko uaini tarenuka-anko bakaang baarauni˜ tenau-koong nkaevaava'naang. 35Teketa teinge tenau tarenukai teing bakaning botovotonaa'nuka moo'aarima dai'aaru', narung murasiavaama nii'nung dupisi'au', teketa beenaumo-nung kapange tavaama dupisi'au'. 36Teketa napo' teie ovoringe nii'ning mmau' botovotonaa'nuka napo' teing-anko botovuru' tutuna'namu'koo botovuru'ning-koo dau basining, teketa teinge tenau tare-antavuru'ninge tee' nari' tutuna'ning nkoaaru'na' nkoaaru'. 37Asi'na'moo masika'moo teie bauring botovuu' teing tarenuka-anko, ee' noru'ura, teing tee nnuring-koo amaiaa'oroaing. 38Teka teing tare nkonukai tee bauring ooaara teinge bii'ka kareaama aa'paako', ‘Tee aung ee'nung barenku okovuaing. Aia' dupisi'ampiaing tee, barenku okomuriaina'.’ 39Teketa teinge kompaara tee uaininau-eta dama'du dua'aara teka dupisi'au' tee. 40Ee'noko tenau okonarai pora teing tenau tarenuka arekee' nkovuriaing?” 41Teinge aa'pau', “Teie aa' teing maarekusi'nuka bakei maremaarenoo' basi-antavuri dupisi'uriaing, ee'noko tee tenau teie nii'ning napo' tare-antavuriaing baarauni˜ tenau-koong avaamatoaining sinang kavaama.” 42Teketa Jiisuu'ke aa'puru' teing, “Dii'ke ee tee Daari Meekung-koong kara deeruerima dama' nkoaravaina' tasi'periaung aa'pui otoinoo'ka,
‘Tere' ee'nare' kapanare' pava kaninukai poore'aama dua'au'nare' ookutunava-koo e'manianare' tumanare' deempario' tasi'pau' dama'ke. Ovoringe tee' ee'na' nko-antavuu' ee'noko bakei ta'nimpaarii' niikaang duta-koo.’ (Kena 118:22-23)
43Tee'koo ninge naurampimang, tee muu' Kumponing bakaang tee dii' pari'duriaing bera teing nantoong sinang tampara tavo'antavaavaining avuriai. 44Ee'noko ookara nantoong tere'koo tasi'paava' tupampariaining tee bii'ka pisira'ariaing, bera baa tee naning tere' dau dua'aravaing tee tere'ke puutuvuaing.” 45Teketa tenang teinge piristi'koo ovontunge ee'noko Boto Keperuu'navitue Jiisuu' bakaang kara mirumiru' taaravaara tee teing tasi'pariru' teing ee'ning minkuvuru'nung Jiisuu'ke. 46Teka tee dai'aava'naang taung besi'aama nantoong karinga-koo avoreaako', nantoonge tee ee'nung nakaronung noru'ai otoinoo'koo.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 1994, Wycliffe Bible Translators, Inc. All rights reserved.