Maatiuꞌ 22

Kara Mirumiru' Nampeesi-koong Paroro-koo

(Luk 14:16-24)

1Napo' Jiisuu'ke kara mirumiru'po'nung nauvurima aa'puru', 2“Tee muu' paninung napo' tee tee' oro' narung dauraronge˜ bauring nampeesiaraa'naang paroro pankaing maamu-antavuu'nung-pina'. 3Teie tee bakaning botovotonaa'nuka botovuru' teing nantoong paroro-koo para' avaaru'ning bokuaariko poroo'naang, teka teing kupi'orora poroaruu'. 4Teketa teie napo' nii'ning botovotonaa'nuka botovurima aa'puru', ‘Berira nauereriaing teing ninge para' avorontu'ning tee nkaang taamang emu' maamuari otong. Aa'noing boromaka' pankeng bi'aransi, kampianing nunkemparamaing nari'. Enang tee ookara kapoo'nanka tee maamu-antavari otong. Poroaing enang nampeesi-koong paroro-koo.’

5“Teka teinge taaravaava' tenkenau', aa'nou' narung bakanoo' mintoong-koo nanuu', nii'nung mooni' besi'koong-koo nko-nko-koo nanuu'. 6Ee'noko nii'ninge teing bakaning botovotonaa'nuka moo'aarima poore'aarima tavaarira dupisi'aaru'. 7Ee'noko tee daurarong bakei iiravou' bera teie bakaning piatooronuka˜ botovurio' berora piniaaru' teing dupisi' nkonuka, ee'noko biikaang osi tai-antavau'. 8Teketa aa'puru' teing bakaning botovotonaa'nuka, ‘Paroro tee nampeesi-koong maamuari otong, teka teing nantoong para' avorontu'ning teing makosinuka deempariarura poroaruining. 9Berira nantoong kunekune'nairu-koo naniriaing ee'noko baata teka meu'pereriaining ookara paroro-koo para' averereriai.’ 10Teketa teing botovotonaa'nuka taung sionairue nanaama ookara nantoong bokuaaru' meu'paaru'ning ookamurii'ka nantoong, oreng ee'noko tampeng. Ee'noko teketa tee teva' nampeesinava baranee'ke aa'na' maanto'au'.

11“Teketa tenang daurarong kuung poma baranee' oovurii'naang teka naning narung nampeesi-koong paroro-koo mononopa' kurumparavaruu'nung oovuu'. 12Teketa nia'uma aa'puu' tee, ‘Mmaiko' ee, da' arekee' a' poi nampeesi-koong paroro-koo mononopa' kuruntaravaung?’ Teka tee naning karoa'. 13Teketa dauraronge teing bakaning pakupaku-nupoong nauvurima aa'puru', ‘Dai'eriai tee aung ookeng kau' ee'noko bireng. Teketa a'dang dama'du dua'eriai mutaananoo', te' ee'noo' nantoong biromparima si'da' dovang kakirinkuarimatoainoo' sisikeera-koo otoroi.’ 14Tee' nari' nantoong mmau' para' avu'nii'nuka otorong, teka oki'ning naing miru'uriaing paninung muu'koo.”

Taakisi Moo'koo Jiisuu' Nia'au'na'

(Mak 12:13-17; Luk 20:20-26)

15Teketa teing Boto Keperuu'navitu tenkenaara taung besi'au' Jiisuu' daua'koo. 16Teketa biikaning barevare-nupoong Jiisuu'anko botoaaru'. Ee'noko Eeroti' bakanavitu ninka nari' berora aa'pau', “Nau-anta ee, nii'ke da' noru'dampiri otong naning masikung narung minku. Kumponing bakanavung taung nau-antaverimaung miru'ari otoina' masika'. Tankaang-anta-pina' oro'daravaunge, ai' nantoong-koo amaiaa'doaunge biikaang miring noru'ema. 17Enang naumeriaing nii' dake noru'emana': Arekee', nii'ke Ju'nupoonge ee daurarong˜ pankaing, Siisa'˜, Rooma'nung, taakisi avu'koo makosi, ai' makosi deea'?” 18Teka Jiisuu'ke tee biikaang noru' orara noru'ura aa'puru', “Dii'ke ampirinunukai ning aming-koo daua'merimaang? 19Io' mooni'nu naumeriai teu taakisi-koo dua'erimaung.” Ee'noko teinge mooni'nu nau tavo'au' tee-anko. 20Ee'noko Jiisuu'ke nia'urima aa'puru' teing, “Au-koo aung bore' uu'aa' baa-koong aa'nung miring daariari otong?” 21Teinge aa'pau', “Siisa'koong.” Teketa teie aa'puru' teing, “Tee tee averiaing teing kapoo' Siisa' bakaning tee-anko, ee'noko Kumponing bakaning Kumponing-aape averiai.” 22Teketa tenang tee' taaravaara teing bakei ta'ninaara tee teka sipaara tenkenau'.

Dama'ke Nampeesi-koo Nkoaravaina' Nia'au'na'

(Mak 12:18-27; Luk 20:27-40)

23Te'mung ee'na'mung napo' noru' pitunavitu-koo nii'ning Jiisuu'anko niania' ninka porou', boo'keta napo' daa' masika'antavaava'navitu. 24Porora avakareaama aa'pau', “Nau-anta, Moosesie ee' naumurima daarivuu',

‘Naning narung booko ba'aang otoko toire' otoa' tee donkaani baara'ma'nunge nampuaing teni naaro tee ninka bataata boo'paru'nung tooto' paraevuree'naang.’ (Boto 25:5)

25Urikamu' tee namaia' naro'ka pa'noko'keta kenaanka nii'koo otoroko'nung. Ee'noko tutuna'nung nampeesiarara boo'paru' bauring otoa'. Ee'noko baara'ma'nunge teni manikuma nampura tee' nari' boo'paru' bauring otoa'. 26Teketa beenaumo-nunge. Tee' nari' temaia'koo ookara-koo pa'noko'keta kenaanka-koo nkoaru'. Ookara boorou' biurukaa' otoroa'. 27Ee'noko asi'na'moo teni nani manikuma boo'paru'. 28Enang te'mung asirana'mung boo'nuka daa'ariaina'mung teni ani arera temaia'koo pa'noko'keta kenaanka-koo ba'aang deemparavainani? Ai' teinge tee ookarai nampau'nanie teni.”

29Jiisuu'ke maku'uma aa'puru' teing, “Dii' bakei papaarararimaung tee Daari Meekung-koong kara ee'noko Kumponing bakaang purinto' noru'eriaruma. 30Dama'ke nantoong boo'keta daa'arira teing nampeesiaria' otoroaing Kumponing bakaning koosinunanka paning-etaning-pina'. 31Teka tenaare-koo boo'keta napo' daa'naare-koo dii'ke ee deeruerima tasi'periaung aung Kumponinge Daari Meekung-koo aa'duru'nung,

32‘Ning tee Kumponing teing aing aa'ning temu'nupoong biikaang: Eebaraami', Aisake', Jeekopi'. Teing ninka komeeri O'noi O'nomaung ning.’? (Toro 3:6)

Tee' minkuvuu'nung-koo tasi'pampiri otong ookara bakaning deempariri domantoo'nuka otorong Kumponing bakaang duta-koo, boo'nuka deea'.”

33Teketa nantoong karingai tee bakaang nau-anta taaravaara bakei ta'ninau'.

Botonanka-koo Dau Basi Masikung Boto

(Mak 12:28-31; Luk 10:25-28)

34Jiisuu'ke noru' pitunavitu karantavuriaruio' taaravaara Boto Keperuu'navitu bii'ka naro'ariru'. 35Ee'noko teketa narunge teing-koo boto-koo norukasi'ke Jiisuu' paaravuma niania' nia'uma aa'puu', 36“Nau-anta, botonanka-koo arera pankaing masikung boto?” 37Jiisuu'ke maku'uma aa'puu' tee, “Aung boto pankaing masikung:

‘Dake pankaruntoompeaing Ovoring dakaang Kumponing ootukunung dakaang domang-eta ee'noko ootukunung dakaang uraang-eta˜ ee'noko ootukunung dakaang onou-eta.’ (Boto 6:5)

38Aung tee ookara-koo boto-koo tutuna'nung ee'noko pankaing masikung. 39Ee'noko tee kenaanka-nung boto tee tee-pina' nari' oro' aung:

‘Dake tee naning da'koo due'nung daka piaararamana' nari' tee' piaaveaing.’ (Boontu 19:18)

40Ookara botonanka ee'noko nakaro-nupoong biikaning kara aing-koo kenaanka-koo boto-koo bi'ariri otorong.”

Karistoo' Baa Bauring Deempari Poaing?

(Mak 12:35-37; Luk 10:25-28)

41Tenang ee'nang teing Boto Keperuu'navitu naro'arira otoroko Jiisuu'ke biikaang noru' tante-anta-koo nia'urima aa'puru', 42“Tee naning Kumponinge Pako'pari'uu'nung˜ nantoong domampuri tarevuriainoo'koo arekee' noru'erimaung, baa bakanaving-koong deempari tavo'aravainge?” Teinge maku'aama aa'pau', “Deevita' bakanaving-koong deempari tavo'aravaing.”

43Ee'noko teie aa'puru' teing, “Nka Deevita' arekee'koo Tanuaang Meekunge karantavuko tee Ovoring tampuu' Daari Meekung-koo aa'pumanoo'ka,

44‘Teie Ovoringe nkaang Ovoring aa'puu', “A', ning-koo tampavine-koo ba'naniai bera ninge dakaning kare-nupoong dakaang kau'koo boonavete-koo siparampainoo'ke basi.” ’ (Kena 110:1)

45Tee' minkuvuma Deevita'ke tee Pako'pari'nii' Ovoring Kumponing-pina' basi tampuu'nung. Enang Kumponing deemparako arekee' napo' Deevita' bakanaving-koong tampaapeu'?” 46Tee' minkuvuio' naninge maku'uma kapoo' minkuvua', ee'noko te'mung-eta deto teing ookara nantoong avoreau' Jiisuu' nii'ning niania' nia'koo.

Currently Selected:

Maatiuꞌ 22: nasNTpo

Highlight

Copy