Maatiuꞌ 28

Tee Jiisuu' Boo'keta Daa'aru'na'

(Mak 16:1-10; Luk 24:1-10; Jon 20:1-18)

1Doong Uaana'mung tankinuio' Saandei-na'mung siraka'puma nanuko Meeri' Ma'dala-nani ee'noko teni nii'nani Meeri' beretu' tee kuvi dako'doma oovuree'naang. 2Tenaanka te' basiareko u'mi' pankaing nkoaru'. Narung koosinung˜ Ovoring bakaang paning-eta te' siarara kuvi-aape bera tee kapang kaavororii' kato korimpuu' ee'noko tee-koo dau ba'namparu'. 3Bakaang oo'oo-koo piping-pina' oro'paritaa', ee'noko bakaang mononopa' aa'na' kakaara sinou-pina'. 4Ee'noko teing te' tareaako'ning tee-koo aa'na' avoro'ke dai'urio' dankuranku'arima boo'pina' otorou'. 5Ee'noko teie koosinunge tenaanka manikumaara aa'puretu', “Dee' arorereauka'. Noru'ansi o'nong dee'ke Jiisuu' besi'eremang, tee ee'nung aa'barata'koo taakavaieeng. 6Tee tee a' otoa', domamparing tee' minkuvuu'na'. Poreta oovereaing a' bempaieenoo'. 7Teketa namu'ke bereta bakaning barevare-nupoong aung kara nauereriai, aa'pereriaing, ‘Tee tee boo'keta domamparing, ee'noko Kaaleli'aape dii'koo uroi bemaang. Teka berira ooveriaing.’ Tee' ee'na' masika' ninge naurampesina'.”

8Teketa tenaanka manikumaara namu'ke tenkenuretu' teketa kuvi dako'doma-ita avororema, nka tee domang dotue maanto'uresi. Ee'noko kua'paretu' teing bakaning barevare-nupoong nauaaree'naang. 9Teketa Jiisuu'ke tenaanka teka taunga ta'nina' oro'pari kune'ureta aa'puretu', “Dee'ke ee!” Ee'noko tenaanka tee-anko poreta bakaang kau' boko'ureta pankaing-antavuretu' tee. 10Teketa Jiisuu'ke aa'puretu' tenaanka, “Arorerea' bereta teing mmaikori' nauereriko Kaaleli'nameensi'aape beroai teka kune'maavaing ning.”

Teinge Kuvi Dako'doma Tarenukai Jiisuu' Domamparu'nung Sira'pau'na'

11Tenang tenaanka manikumaara taunge nanuresi otoreko nii'ning teing-koo kuvi dako'doma tanatavaako'ning-koo Jerusalema' duparira sira'pau' teing piristi'nuka-koo pankenanka nauaarima ookara kapoo'nanka nkoaru'ning. 12Teketa teinge piristi'nuka-koo pankenge teing ninka nantoong-koo pankenanka ninka naro'ke minkunaavarira teinge narung taung matauau'. Ee'noko teing piatooronuka mooni' pankainge moo'aaru' aa'paarima teing, 13“Aa'periaing, ‘Bakaning barevare-nupoonge muunga aatumpirio' bakiaa'aara nkavaing.’ 14Teka tee aung kara aasirieeng-koong ovo'ma'ke taaravuko deeko' nii'ke boing-antavampiaing tee, ee'noko dii' tee-koo kara-koo kiimatarariauka'.” 15Teketa teinge piatooronukai teing mooni'nanka kompaara tee' nari' nauaaru'na' minkuako'. Ee'noko biikaang minkunaa tee avitoitoi beremparu' Ju'nupoong-koo meu'ke bera e'mung doong-koo basinoo'koo.

Jiisuu'ke Bakaning Avitoitoi Nanaama Kara Nau-anta-koo Boto Sipuu'na'

(Mak 16:14-18; Luk 24:36-49; Jon 20:19-23)

16Teketa tenang teing nanai'keta narung barevare-nupoong Kaaleli'aape berou' te' mii-koo Jiisuu'ke beroo'naang nauvuru'noo'. 17Ee'noko teinge ooaara kinkinaama pankaing-antavau', teka nii'ning keekoo'ariru'. 18Ee'noko Jiisuu' teing-anko pora aa'puru', “Ookara iri'nanka paning-kooning ee'noko kansi'kooning tee ning oko-antamuining. 19Tee'koo berira ookara nantoong amutemuu' ning-koo barevare-nupoong deeng-antavereriaing aing aa'ning miring-koo ntong-koo minkiererima meeka'antaverererima: tee Mma' ee'noko ning Bauring ee'noko tee Tanuaang Meekung. 20Ee'noko nau-antavereriaing ookara kapoo'nanka ninge dii'ke nko-koo botorampiru'ning siompaava'naang, ee'noko ning tee bakei masika' dii' ninka nari' o'noaing ookara batei-koo bera doong asi'noo'ke basi.”

Currently Selected:

Maatiuꞌ 28: nasNTpo

Highlight

Copy