Maakaꞌ 1

Jiisuu' Pou'na' Kumponing Bakaang Muu' Sira'koo

(1:1–3:6)

Jooni Minkinara Bakaang Daankinang

(Mat 3:1-12; Luk 3:1-9,15-17; Jon 1:19-28)

1Aung doorenang tampara Jiisuu' Karistoo', Kumponing Bauring-koong. 2Ee' tutumparu', Kumponinge urikamu' Aisaia' karantavuma˜ Karistoo' nauvuu'na' nari', Daari Meekung-koo aa'pumanoo'ka,

3“Ee aung, ninge botoampaing nkaang kara-nka da'koo uro'ke tee taung maamu-antareruaing uroitaa'. Tee ee' pina' otoaing, aurong narung naning-koong mee'bora' sirakamaa'koo bokuma aa'pumaang, ‘Maamu-antaveriaing tee taung Ovoring bakaang. Koompevuriai poainavung.’” (Malakai 3:1; Aisaia' 40:3)

4Ee'noko dama'ke tee Jooni Minkinara tavo'kuu' teke mee'bora' sirakamaa'koo nantoong ntong-koo minkivurima meeka'antavurima, minkunaa daankivurima. Aa'puriko', “Bere'darira ntong-koo minkirarima meeka'antarariaing ee'noko Kumponinge diikaning oraka' nkonanka tonta'deruriai.” 5Ee'noko ookara Judia'nameng-nupoong ee'noko Jerusalema'navuntu'nupoong beroko' Jooni bakaang kara taara-koo. Ee'noko biikaning orarananka sira'pariko ntong-koo minkivurima meeka'antavuriko' teie Joo'dani-nari-koo. 6Tee Jooni Minkinara tee tamung mononopa' kaameli'koong dapo-koo nkonii' kurumparako' ee'noko dopa'noo'ke tokoarako'.#1:6 Teing nakaro-nupoong urikupoong tee' kurumpariko' Eliasi kurumparako'na', aarumo baka kirokai kontevoma. Ntaa' maa'uriko' ee'noko davainta pora'kooning naivuko'. 7Ee'noko doorenampurima aa'puriko', “Naning ning-koo dama'due poaing aa'na' apoo'mui otoing iirakuta, doonge-taara˜. Tee ee'nara poko aa'na' tampa' taaraveriai! 8Ninge tamung ntong-koo minkirampima meeka'antarampimaang, teka teie deeko' Tanuaang Meekung ninka meeka'antaruriaing.”

Joonie Jiisuu' Ntong-koo Minkie Meeka'antavuio' Sietani'ke Daua'uu'na'

(Mat 3:13-17; 4:1-11; Luk 3:21-22; 4:1-13)

9Ee'noko teing doong-koo kuunge Jiisuu' nanuu' Nasareti'keta, Kaaleli'nameng-koonoo'keta. Ee'noko Joonie ntong-koo minkivura meeka'antavuu' teka Joo'dani-koo. 10Ee'noko Joonie oovuio' Jiisuu' ntong-eta doompeto daa'arako paning daate'aru', ee'noko Tanuaang Meekung kuukuu'pina' siarara pou' Jiisuu'koo dau. 11Ee'noko kara auromparu' paning-eta aa'puma, “Da' tee nnuring ninge piaaramaung, ee'noko ning aung-koo aa'na' dotumaramaung.” 12Ee'noko teketa namu'ke Tanuaang Meekunge Jiisuu' mee'bora' sirakamaa'koo tukovuu'. 13Teke otoko, karenaumo kivora doong tankinuu' Sietani'ke teka daua'uko. Ee'noko kau'karenaumo biikonanka ninka nari' otoroko', bera tee batei oparako koosinunankai porora puring-antavau'.

Jiisuu' Pora Tavi' Kapa'nuka Karenaumo Bokuvuru'na' Tee Siompaava'naang

(Mat 4:12-22; Luk 4:14-15; 5:1-11)

14Teketa' Eeroti'ke Jooni Minkinara kiimata-nava-koo dai'uio' Jiisuu' Kaaleli'nameng-koo#1:14 Temeng Eeroti' tarevuko'nameng. doorenang tampara daankivurima nanuu', 15Aa'purima, “Batei enang dupearing ee'noko Kumponing bakaang muu' tee enang due' poing. Orara aarumo siperira Kumponing narung bakaang doorenang tampara masika'antaveriai.”

16Jiisuu' Kaaleli'naru'koo miiringe nanuma Saimoni' namainta Aanduru' oovuretu' sionung dua'ureko teru'koo, ai' temainta tee tavi' baranka. 17Ee'noko Jiisuu'ke aa'puretu', “Poreta ning siomereai, nantoong baranka deeng-antarampeaina'.” 18Ee'noko namu'ke tee beekaang sionung sipureta Jiisuu' siompuretu'. 19Teketa napo' oki'noo' nanura Jeemisi namainta Jooni, Siebedi baurinketa, oovuretu' bakaasi-koo otoroko sionung pate'aama. 20Ee'noko namu'ke bokuvuretu'. Ee'noko beuma Siebedi sipureta bakaasi-koo pakupaku-nupoong ninka otoroko Jiisuu' siompuretu'.

Jiisuu' Pankaing Pina' Karoma Ma'naang Bata'uu'na'

(Luk 4:31-37)

21Ee'noko Kapaneume'navuntu'koo nanau'. Ee'noko Doong Uaana'mung Jiisuu' pava dootuu'nava-koo koinura teka kara nau-antavuru'. 22Ee'noko nantoong aa'na' ta'nimpariru' tee-koo bakaang nau-anta-koo, kara bakaang purinto' deempario', teing-pina' boto naunuka-pina' deea'. 23Ee'noko teke biikaang pava dootuu'koo naning ma'naang orara-po'nung otoko'. 24Teie uiarama aa'puu', “Jiisuu', Nasareti'nung, arekee' nkomerii'naang? Da' ee nii' orari-anta-koo poing? Ninge noru'dansi o'nong da' Kumponing-etaing Naning Meekung.” 25Teka Jiisuu'ke tee aka'puma aa'puu', “Kareauka' ee'noko da' teieta bakoraravai.” 26Ee'noko teie ma'naange tee naning aa'na' bokuma nuanua-antavura teieta bakoaru'. 27Ee'noko ookara aa'na' ta'nimpariru' ee'noko tana'eema aa'paako', “Aing ee, aming tavo'kui? Aung pa nerakung kara! Pankaing-pina' karomaung. Bakei, ma'narie bakaang kara taaravaakoo'.” 28Ee'noko Jiisuu'nung miring namu'ke beremparu' ookarai osi Kaaleli'namenge.

Jiisuu'ke Piita Ba'doraa Taare-antavuu'na'

(Mat 8:14-17; Luk 4:38-41)

29Enang teva pava dootuu'nava-ita Saimoni' namainta Aanduru' beekanava'koo koinau' Jeemisi namainta ninka Jooni, Saimoni' ba'doraa uipaarii' ninka siipavora bempari otoko. 30Jiisuu' poko namu'ke nauau' teni. 31Teni-anko pora bireng-koo kompura deto teni daa'uu'. Ee'noko uipaarii' namu'ke boimpuu'. Ee'noko tenie bau'uru' teing. 32Ee'noko duaa' tumpario' ookara siipa-po'nupoong ee'noko ma'narie koriaariko'ning tavo'aaru' Jiisuu'anko. 33Ee'noko ookara temono-nupoong aarentokai naro'arira otorou'. 34Ee'noko amutemurii' siipa-po'nupoong taare-antavuru', ee'noko ma'nari mmau' bata'uru' kara potevurima Jiisuu' tasi'paio'.

Jiisuu'ke Daankinampuru'na' Kaaleli'nameng

(Luk 4:42-44)

35Ee'noko tane' mme' siimpoorovuaruko˜ daa'arara Jiisuu' tenkenuu', bera naning otoa'noo' basiarara teke kunsiaru'. 36Teke otoko Saimoni' ba'maikori' ninka porou' besi'aama. 37Ee'noko teka pe'numpaarai'nange aa'pau', “Ookarai da' besi'daamang.” 38Ee'noko Jiisuu'ke bari'urima aa'puru', “Meriai ainge kato nii'ning osinankai teing-koo napo' daankimaravaina', ai' ning tee tee'koo simaring.” 39Ee'noko avitoitoi nanuu' Kaaleli' namenge pava dootuu'nairu-koo daankivurima, ee'noko ma'nari bata'uru'.

Jiisuu'ke Oramuu'po'nung Taare-antavuu'na'

(Mat 8:1-4; Luk 5:12-16)

40Naning narung oramuu'po'nung bata'au'noo'keta Jiisuu'anko pora miinge keemparu' ee'noko pakuvuu'naang eentavarama aa'puu', “Da' piarora deeko' ning kuimepeu'nung.” 41Ee'noko Jiisuu' bakaang domang aa'na' piaavora tee-koo, ee'noko birenge kompuma aa'puu', “Piamoi o'nong. Enang kuiraring!” 42Ee'noko namu'ke teie oramuu'ke sipuko kiiroraa'aru'. 43Ee'noko Jiisuu'ke botovuu' tenkeng-koo. Ee'noko aa'na' potevuma aa'puu', 44“Tarerari naning naueauka', teka koonto' bera piristi'koo sira'antararavaing. Ee'noko tampa' ooruko Kumponing-koo boontunang nkoveai nantoonge tee taa'ni'anta ooaara da' teing ninka nari' oto'koo taura'nii' tasi'daavaina', tee' Moosesi bakaang botoi minkuvumana'.” 45Teka tee avitoitoi nanuu' kara bereng-antavuma. Ee'noko baru' berempuio' Jiisuu' osi-koo sirapo'ke daa'umparavaruko'. Ee'noko baka oovue bire'ari otoko nantoonge teka beero'aako' osinanka-ita beroma.

Currently Selected:

Maakaꞌ 1: nasNTpo

Highlight

Copy