San Lucas 17
17
Jioptuahuamta bétana jïojteri
(Mt. 18:6-7, 21-22; Mr. 9:42)
1Jesús jume ä discíipulommeu ínel jiaahua:
—Jíba ayunake huaka genteta jioptuaka kaa türiu bíchaa ä núnume. ¡Të jiokochia hua yoremta béchïbo jábeta jioptuame! 2Chë tüisi áu huée éiyey, juka téta át tutujhuamta kutänaapo át súmahuaka bahuéu kóm jímmaahuako, të kaa am jioptua éiyey ímëi ili uusim. 3¡Emem emo suaya!
’Juka em saila kaa tüisi émomak tahuak kuttilasë áu nooka; áu ä jíapsi kúaktek éntok, Akë ä jiokore. 4Senu táapo guoy búsanisi kaa tüisi émomak ä tahuako, guoy búsanisi émou ä nótteko: “Kanne júchä yáanake tä jíay”, Akë ä jiokore.
Huaka jita súalhuamta jáchin machisi úttiakähui
5Jume apóstolim Señortau ínel jiaahua:
—Diosta súalhuamtë itot büruria.
6Huanäi jü Señor ínel jiaahua:
—Tua lútüriapem Dios ehuamta súalëtek, kía mostaaza báchiata beletchisi junne, arem ínel jiäu éiyey jü júya sicómoro téamtahui: “Emoë póponaka bahuepo emo kétcha”, huanäi jü júya enchim nésahuepo áman ayu éiyey.
Sáyhuamta yä éähui
7’Jábesu eme, senu enchim sáhuemta möitemta o chë animaalim suayamta, huasa bétana ä yepsayo, ¿sep ínel áu jiaunake: “Binë huéiye, mesahuë yejte”? 8Ëe, ál‑la ínel áu jiaunake: “Buähuamtë yáuhua, täbui sánkompë kóbate. Huanärë nee miika. Nee jïbuäsuko éntok nee jita jïsuko, béjë jïbuä, éntoke jita jëye.” 9¿Jachu ä Dios buánianake, huaka ä sáhuëhui ä nésahui ä yák tíaka? Jíba tua ëe. 10Júnëli két eme sïme juka Diosta nésahui enchim át sáyhuä chúpak, ínëlem jiaunake: “Ítapo nésauta joame kaita béchïbo türi; itom át sáyhuäu jíbate yáuhuak.”
Guoj mamni leprosom
11Jü Jesús jum buere joära Jerusaléniu bíchaa huéeka, jü Samaria éntok Galiléa buíärata náu násuk áman siika. 12Senu pueblou yebisiseka ä huéiyo, guojmamni yoremem sähua leprä téamta kökoaka ä nankirika yeu sájjak. Huanärim ili mékka jápteka, 13kusisi chayekam ínel jiaahua:
—¡Jesús, Maestro, itomë jiokore!
14Áapo éntok am bíchaka ínel ámeu jiaahua:
—Ámanem tiöpopo tékiakammeu kaate.
Huanärim katekasu türiak. 15Huanäi huépülaka áu bíchaka éntok áu türi jüneriaka, tüisi kusisi chayeka éntok Diosta úttileka áu nóttek. 16Jesústau tónommia kíkteka, ä pújba buíau kóm yúmariak, ä Dios buaníaka. Ï yoreme éntok huam Samariapo jometukay. 17Huanäi Jesús ínel jiaahua:
—¿Jachum kaa guojmamniakay jume türiakame? ¿Jáksum aane, jume huate bátan yoremem türiakame? 18¿Jachu ïri huépülaika kaa itom pueblopo jomesu nóttek, Diosta baysahueka?
19Huanäi ínel áu jiaahua:
—Diosta em súalëu enchi jínëuk. Yejtekë siime. Türiläe.
Jächin juka Diosta reytaka nésahuëhui itou yebijnakëhui
(Mt. 24:23-28, 36-41)
20Jume pariseerom juka Jesústa temajek, jauhuey juka Diosta reytaka ä nésahueu yebijnake bétana. Huanäi áapo ínel ámeu jiaahua:
—Juka Diosta reytaka ä nésahueu yepsay kaachinte itom pusimmea ä bínnake. 21Kaabe ínel jiauna: “Ímï aane”, o “Júmü aane”; bueïtuk jü Diosta reytaka ä nésahuepo én ímï enchim násuk aane.
22Huanäi jume ä discíipulommeu ínel jiaahua:
—Të tiempo yúmanake ínapo Yoremta Üusi kía huépül taahuata júne enchim bít peenakëhui, të katem ä bínnake. 23Huanäi ínëlim enchimmeu jiaunake: “Ím aane”, o “Áman aane.” Të katem áman sásaka, éntok katem áme sáu rejte. 24Bueïtuk juka yúku béroktita téhueka bétana sejchúkti ániata nahuau tájti ä machiriakäpo bénasi, junëline bíttunake ínapo jü Yoremta Üusi taahuarita yepsayo. 25Të úttia ketune juebena jiokot máchiraata ín bínnakëhui, éntok huaka génte én huémta nee omoutenakëhui. 26Noéta taahuarimpo bénasi, ánëli két huéenake, jü Yoremta Üusi yepsayo. 27Jïbuähuay, éntok vino jïhuay, emo jubiahuay éntok emo kunahuay, Noéta arcau kibakeu tájti. Huanäi béja yepsak, jü buere bánia diluuvio. Huanäi sïmetaka kókkok. 28Ánëli két siika, jume Lotta taahuarimmet: jïbuähuay, jita jïhuay, jita jínnuhuay, jita nénkihuay, éntok ethuay, éntok káatehuay; 29të juka Lotta jum Sodoomapo yeu ä sik jíbba, táji yúkkuk, éntok azufre téhueka bétana. Huanäi sïmetaka kókkok. 30Júnëli huéenake júnakoy táapo Yoremta Üusi yepsayo.
31’Huäri taahuarit hua jábe kárit jikat aneme, entok juka áttiahuata káapo jípurëtek, katem kóm sika áman kibakeka ä nü báanake; senu éntok áman huajpo anëtek, kaa ä jóau nótti báanake. 32Huä Lotta jubiabeu yeu sikamtahuem huáate. 33Sïme jume ä jíapsi jínëu báareme ä tärunake. Éntok sïme jume ä tärukame ä jínëunake.
34’Énne enchimmeu ínel jiaahua, huäri tukaariachi guoyikam jípetampo náu tönake. Huépülaka núk sákana; senu éntok áma tö sákana. 35Guoy jáamuchim nanahuit jäbueka tujnake. Huépülaka núk sákana; senu éntok áma tö sákana. 36Guoy yoremem huajpo annake; huépülaka núk sákana; senu éntok áma tö sákana.
37Huanärim ä yómmiaka, ínel áu jiaahua:
—¿Jákusu huéenake jäni ïri, Señor?
Huanäi áapo am yómmiak:
—Jum mukirata bökäpo, huämïrim náu yáijnake, jume tekuem.
Currently Selected:
San Lucas 17: mfy
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved
