San Lucas 10

Setenta nasatx Jesus kaahni

1Txãa e'su' vxite setenta txhitxhçxa, e'z e'zku yaçte kaah, txajx pa'jwa'j çxhabsu mteewa jxuka. 2Sa' na'jĩk:

—Isa mjĩiwa'ja' wala yuh ũsa', nawa mjĩisa yu' kuhmeeta'. Aça' mjĩi namu's pxthaa we'wena mpẽjxwe nasa mjĩiwa'jsa txajx mjĩitewe'sx. 3I'kwe'sxa' jxpa'yakx me'jwe, piisxakuẽtx alum ksxavxysu na'wẽ kajaçthu naa pa'ga. 4Ya'ja, vxyu, pelgatxi txã'wẽsa jxũmée me'jwe. Sa' dxi'the nasa pu'jykhẽw yuhçxawa weçxana jxthẽeyuumeene'kwe. 5Kiim yatte pa'jçxawa, ewçxáa we'wena weçxana pa'jane'kwe. 6Aça' txãa yattewe'sx açesameeçxa', txã'wẽ weçxana pa'jni's ewçxáa jxpa'gatxna. Nawa jxpa'gameete', txajũ ki' u'jwene'kwe. 7Sa' mtee ew jxpa'gatxna, txãa yatte paadejene'kwe, txãawe'sx kĩh sã'jĩni'swa ũ'na, txãa pa'gatey mjĩisa' ũ'wa'ja's jxpa'gawa'j ji'pha'. Aça' i'kwe'sxa' yat iisa paadehna pekũhnuwe. 8Maa çxhabtewe'sx i'kwe'sxtxi jxpa'gate', kxtee ũsune'kwe kĩh puuçtewa wa'lmée jxpa'gana. 9Sa' kxtee ãçã'satxwa nuykatxhiçxa na'wẽ pta'sxine'kwe: Dxus jxkaahna pa'jwa'j ena' i'kwe'sx yakh utxa ũsa'. 10Nawa maa çxhabtewa i'kwe'sxtxi jxpa'gameete', txãa çxhabte jxuka na'jĩne'kwe: 11I'kwe'sxa' jxpa'gameeçxawa yuuwesa yuukahn i'kwe'sx çxhabte kxtã'tuhd yuhnawa sakweekweçxa u'jweçtha'w kwe'sx çxidate uweni's. Sa' makwe jxpa'gameeçxawa, jiyuçxa neeyũuçi'kwe: i'kwe'sxtxi Dxus jxkaahna pa'jwa'j ena' utxa ũsa' jĩne'kwe. 12Na'jĩ'th na': Dxus kastigãywa'j ente', txãa çxhabtewe'sxa' Sodoma çxhabtewe'sxte jxthaakwe nxus ya'kastigaĩtxna.

Çxhab nwẽese'jsamée yakh ũukhũukhsa

(Mt 11.20-24)

13Korazín çxhabte nasa, Beçaidatewe'sx yã'jçxa, seena' yuh nxuste neeyũuwa'ji'kwe. Ayte i'kwe'sx dxi'pte na'wẽth ãçã'satx nuykatxhina uusáatx fxĩtxna yũu na' Tiro vxite' Sidon çxhabtewa txã'wẽy yũuwaça', txãawe'sxa' pkaltxi nvxihtçxa Dxus tasxte sxawedni txaçxyã'j yuuna. 14Dxus kastigãywa'j ente', Tiro vxite' Sidon çxhabte nasate jxthaakwe i'kwe'sxa' nxus kastigo's knayuune'kwe. 15Aça' Kapernaum çxhabtewe'sxa' cielute u'jwa'jsath sũhna i'kwe yaaki', nawa infxiernote khẽeya' u'jwa'jsai'kwe.

16Txãa çxhabtxi' txã'wẽ we'weçxa', setentasawe'sxtxi' na'jĩk:

—Maa nasawa i'kwe'sx pta'sxni's wẽsẽ'jçxa', adxa'swa nwẽesẽ'jsa yuutxna. Sa' maawa i'kwe'sxtxi açesa', adxa'swa açesa yuutxna. Sa' adxa's açesa' adxçxáana ahçemée adxa's kaahsanawa açesa yuutxna jĩnak jxkaah.

Setentasawe'sx ki' sxawedni

17Txajũ' setentasawe'sxa' wala weçxana ki' sxawedtxi na'jĩna:

—Eçx luuku vxit-sa yuhwa idx pu'çxte', kwe'sxtxi' nwẽesẽ'je'tx jĩna pta'sxte', 18Jesusa' na'jĩk:

—Isa yuh pta'sxi'i'kwe adxa' uythu eçxthẽ'ja' cieluju kpi'sx kwehneni na'wẽ wetena kĩjaçte. 19I'kwe'sx txã'wẽ yũukahn íiçxáath adxa' kĩhtewa jxuka ãjãwa'ja's ũs, ul weeswée usmitx kĩjkĩh eçx seena'sawa i'kwe'sxtxi kpã'vxit-ya' ãjãkahmén. 20Nawa eçx luuku vxit-sa i'kwe'sxtxi nwẽesẽ'pha'gaçxáa yu', weçxweçxa yaakxnuwe. Naasáa cielute i'kwe'sx yase fxi'jni ũsa' txãa pa'ga yuuçxáa weçxweçxa myajkxwe jĩçxa', 21Jesusa' txajx ũuste wala weçxak txã'wẽ Dxus Espiritu pu'çxpa'ga. Sa' na'jĩk:

Jesus ũuste wala weçxweçxa yaakxni

(Mt 11.25-27; 13.16-17)

—Tata, idxa's wala weçxa'th, idxa' cielute vxite' naa kiwete jxuka Namug. Txãasag naa kiwete wala jxtuhtesa yuutxi's kaajiyu'jmeeçxawa, ãhmeekwesa yuutxi's jiyuwa'ja's ũsgu. Iidx jxthãasni' txã'wẽne' yu' aça' txã'sa' kxtey yuug.

22Adx Tata' kĩjkĩhtewa jiyuwa'ja's adxçxaçxá'sku dukh. Txãa pa'ga kim yuhwa jiyu'çmeeta' Dxus Nçxi'ka's, naasáa Ney yuuçxáa jiia'. Txã'wẽy Tata'swa kim yuhwa jiyu'çmeeta', naasáa Nçxi'k yuuçxáa jiia', sa' maatxwa Nçxi'k íi khiyu'theçxáa jiyuya' ãjãtxna adx Tata's.

23Txã'jĩçxa' txãa yakh u'jusawe'sxtxi thegçxa', na'jĩk txãawe'sxçxáatx:

—Ãçxh i'kwe'sx uyna ũsi'kwe txã'sna txãawe'sx yafxju uysá' wala yuh weçxawa'j ji'phta'. Txãa pa'gatey ãçxh i'kwe'sx uyna ũsi'kwe txã'sa' 24nyafxiitey Dxus yuwe pta'sxsawe'sx vxite' jxkaahsawe'sxwa wala yuh uy wẽetx, nawa uyya' ãjãmeeta'. Txã'wẽy zhiçxkwe pta'sxni's ãçxh i'kwe'sx wẽsẽ'jna ũsi'kwe txã'snawa wala yuh wẽsẽ'j wẽetx, nawa wẽsẽ'jya' ãjãmeeta' jĩk.

Teeçx Samaritano ew yũusa

25Txajũ' ley kaapiya'jsa teeçxsa Jesus tasxte utxaaçxa', ewmée vxit wẽeçxa na'wẽk paapẽjx:

—Adxa' ¿ma'wẽ yũuçxa pçumée ĩtxĩ fxi'zewa'ja's ji'phuki'th? jĩte', 26Jesus pasçxa':

—Dxus leyte' ¿ma'wẽ fxi'jni ũsna açga lẽeyçxa jiyu'çmée? jĩte', 27ley kaapiya'jsa' na'wẽk pas:

—Idxna jxpe'jsa Dxusa's ũusuh jxuka yajkxçxa bagaçxte yuhwa peena yu' txuteeya'mée utxaaçxa txãa yuuçxá's selpiina mfxi'ze. Sa' idx ma'wẽga ya'peeygãja', txã'wẽy vxite nasatxwa mpeeygãh jĩ'k jĩte', 28Jesus we'weçxa':

—Ew yuh pasgu. Txã'sa' kxtey yuuçxa', pçumée ĩtxĩ fxi'zewa'ja's ji'phune'ga jĩk.

29Nawa ley kaapiya'jsa yu', txajx yuweteyçxáa ewmeete neeyũuyã'jçxa', na'wẽk pẽjx:

—Txãa vxite nasa jĩ'k txãa yu' ¿kimtxna? jĩte', 30Jesus pasçxa' na'wẽk kwentu'j:

—Teeçx piçthẽ'j Jerusalenu kasehçxa' Jerikon u'jni dxi'jkhẽ u'jweçte', peswée dxi'the yupxa' kasehtx. Sa' kĩjkĩhne' jxũna u'jweç yu', txã's jxuka peswéetx. Sa' kpã'vxitçxa', uuwa'jçxáa yã'jtx nvxiht. 31Peswée u'jni txaçxmeyna, teeçx sacerdote kĩhçxa' uyku txãa kpã'vxitnisa's, nawa pu'çxmée dxi'j skhẽwku. 32Txã'wẽy Levxi ji'thewe'sxwa kĩhçxa' uyku, nawa txãawa pu'çxmée dxi'j skhẽwku. 33Txajũ' teeçx piçthẽ'j Samariatewe'sx txãa dxi'khẽy kĩhçxa', kpã'vxitnisa's uyçxa', wala peeygãjk. 34Sa' kpã'yũusa tasxte utxaaçxa', kpã'su aceite vxino yakh awna yu'çe'kh. Txajũ' txajx a'jni jibate yakhçxa ka'ja'kh, sa' paadee yatna pe'jna u'jçxa, kxte' kĩjkĩhwa peejxmeek sã'jĩ. 35Kuskuus enkhẽ', txãa Samariatewe'sxa' u'jweççxa', e'z vxyu kutxi'jçxa, yat namu's dewek. Sa' na'wẽk neewe'we: Naa piçthẽ'j kpã'vxitnisa's meen sã'jĩ. Meeçxa' vxyu nvxiituçthu txãa ãhmeewáana nawa ki' sxawedna pa'jçxa, dukhe'nja txãa yuuluni's jĩk. 36Jesusa' txã'wẽ pta'sxçxa na'wẽk pẽjx:

—Idx ũus myajkx. Txãa tekhtewe'sxa' ¿maasaga ew yũusana' thegu'? jĩte', 37ley kaapiya'jsa pasçxa':

—Kpã'vxitnisa's peeygãasa jĩte', Jesus pasçxa':

—Idxwa txã'wẽy pu'çxna peeygãhna me'ju jĩnak jxkaah.

Maria Martawe'sx yatte Jesus pa'jni

38Txajũ' Jesusa' teeçx çxhab le'çxkuẽtek pa'jya' u'j. Txãa çxhabte teeçx u'y Marta yaasesa' txajx yatte jxpa'gak. 39Sa' Marta' teeçx nyakhku ji'phu' Maria yaasesa. Aça' Maria yu', Jesus pta'sxniçxá's wẽsẽ'jya' txajx tasxte kaçxku. 40Naapkaçxha' Marta yu', mjĩiniçxá's wala pa'pçxuna ũsçxa', Jesusa's utxaaçxa na'jĩk:

—¿Uyu'çmeegá' na'wẽ ũ'kweçxáa wala mjĩina ũste', ũ'kwe nyakh yu' pu'çxhiçme'. Aça' mpu'çxkaah jĩte', 41Jesus pasçxa':

—Marta, i'kwe' wala yuh kuh jwed mjĩina tudumée ũsi'kwe. 42Nawa jxthaakwe peejxsa yu' teeçx jwed yuuçxá'. Aça' Maria' wejx jxthaakwe peejxsa's wẽsẽ'je'ça' txã'sa' kim yuhwa kusa'jmeetxna jĩnak we'w e.

Currently Selected:

San Lucas 10: pbbNNT

Highlight

Copy