Génesis 24
24
Abrahampa chi warra Isaac–itꞌee wẽra jɨrɨda
1Sara jai–idaada tꞌẽepai, Abraham taarã chonaa baji, mãikꞌaapa Tachi Akꞌõrepa iru bendiciaji ne–inaa jõmaade.
2Ewari aba Abrahampa tꞌɨ̃ji ichi mimiapataarã poro waibɨa mãikꞌaapa mãgaji:
—Mɨ warra Isaac–itꞌee na Canaán eujãdepema wẽra kꞌinia–e bɨda aji. Pɨchi jua bɨ́ji mɨ makꞌarade 3mãikꞌaapa Tachi Akꞌõre, ɨtꞌaripemaarã Akꞌõre Waibɨa, na eujãdepemaarã Akꞌõre Waibɨa kꞌĩrapite juráaji pɨa Canaandepema wẽra atapi–e paitꞌee mɨ warramaa. 4Ma kꞌãyaara wã́ji mɨ ëreerã eujãdee mãikꞌaapa mama wẽra jɨrɨpáde aji.
5Mãpai ma mimiapataarã poro waibɨapa mãgaji:
—Mamĩda wẽra mɨa unuru che kꞌinia–e pɨrã, mɨa ¿sãga ooyama? aji. Mãgara ¿pɨ warra mamaa ateeikꞌã? aji.
6Abrahampa mãgaji:
—Mãga–eda aji. 7Tachi Akꞌõre Waibɨa, chi ɨtꞌari baparipa mɨ uchiapiji mɨ akꞌõreerã eujãdeepa mãikꞌaapa mɨ aneeji na eujãde mɨ, mɨchideerã ome nama pꞌanapataadamerã irua jaradakꞌa. Iruata pɨ kꞌaripaitꞌee. Irua ángel pëiitꞌeeda aji, pɨ naa, pɨa wẽra unumerã mãikꞌaapa ãpɨtee aneemerã. 8Chi wẽra pɨ ome che kꞌinia–e bɨ pɨrã, pꞌoyaa oo–e mɨa oopi bɨkꞌa. Mɨa pɨ ɨtrɨa–e paitꞌee. Mamĩda mɨa kꞌinia–e bɨ mɨ warra mamaa wãmerã.
9Mãpai ma mimiapataarã poro waibɨapa ichi jua Abraham makꞌarade bɨji mãikꞌaapa Tachi Akꞌõre kꞌĩrapite juraaji ooitꞌee Abrahampa jaradakꞌa. 10Maapꞌeda Abraham netꞌaa iru badadepema netꞌaa pi–ia pꞌe ataji. Camello diez ɨ̃rɨ bɨpꞌeda, wãji Abraham ɨ̃pema Najor pꞌuurudee. Mãgɨ́ pꞌuuru Mesopotamia eujãde bɨ. 11Kꞌewara panaji pꞌuuru kꞌidaa pania tꞌɨpatamãi. Mama ma hora wẽraarã pania tꞌɨde chepachida. Pozo kꞌaitꞌa ichi camello ɨ̃ipipꞌeda, 12Tachi Akꞌõremaa ɨtꞌaa iidimaa beeji: “Tachi Akꞌõre Waibɨa, pɨ mɨ chipari Abraham Akꞌõre Waibɨa. Mɨ, mɨ chipari ome chupɨria kꞌawaapáde aji. Akꞌɨpipáde aji, pɨa mɨ chipari Abraham kꞌinia iru bapari mãikꞌaapa mɨ kꞌaripapáde aji, chi warra–itꞌee wẽra unu atamerã. 13Mɨ nãpai pozo kꞌaitꞌa beeitꞌee nãpema wẽraarã pania tꞌɨde cheruta misa. 14Mɨa wẽramaa jarakꞌãri: ‘Mɨ chupɨria kꞌawáaji mãikꞌaapa pania topíji pɨa chokꞌode ateerudepema’ nãga pꞌanaupíji: ‘Tóji mãikꞌaapa mɨa pania teeitꞌee pɨ camelloorãmaa.’ Mãgapɨ mɨa kꞌawaitꞌee chisãgɨ́ wẽrata pɨa kꞌinia bɨ. Ma awara mãgá kꞌawaitꞌeeda aji, pɨa wãara mɨ chipari kꞌaripamaa bɨ.”
15Ɨtꞌaa tꞌɨ̃maa bɨ misa, unuji wẽra chewã chokꞌo ome pania tꞌɨde. Mãgɨ́ tꞌɨ̃jarapachida Rebeca. Iru Betuel kꞌau paji. Mãgɨ́ Betuel Abraham ɨ̃pema Najorpa ooda paji chi wẽra Milca ome. 16Rebeca kꞌĩra wãree baji. Waide ɨmɨkꞌĩra ome kꞌãi–e baji. Iru pozode pakꞌãri, chi chokꞌo ipuruji mãikꞌaapa ãpɨtee wãitꞌee paji.
17Mamĩda ma mimiapataarã poro waibɨa iru tꞌẽe pꞌiraji mãikꞌaapa pania iidiji:
—Mɨ chupɨria kꞌawaapáde aji. Pɨ chokꞌodepema pania ma–ãri topipáde aji.
18Ma wẽrapa mãgaji:
—Topáde aji.
Aramata ma chokꞌo ikꞌiadeepa edaa jirapꞌeda, topiji.
19To aupakꞌãri, Rebecapa ma mimiapataarã poromaa mãgaji:
—Mɨa pɨ camelloorãmaa pania teeitꞌeeda aji, ãchia to kꞌiniata todamerã.
20Aramata ichi chokꞌo weeji ne–animalaarã topatamãi. Mãpai pania waibɨa uaji ma camello jõmaarãmaa topiitꞌee.
21Mãga bɨde ma mimiaparipa kꞌĩupꞌee akꞌɨmaa baji. Pia kꞌawa kꞌinia baji nata wãara chi wẽra jɨrɨ bada; Tachi Akꞌõrepa unupida.
22Ma topida tꞌẽepai, Abraham mimiaparipa ma wẽramaa kꞌɨ̃depema nẽedee teeji. Mãgɨ́ perá seis gramos iru baji. Jɨ̃ bɨji ma wẽra kꞌɨ̃de. Ichiaba pulsera omé nẽedee teeji. Mãgɨ́ cien gramos waa iru baji. 23Mãpai ma mimiaparipa iidiji:
—¿Pɨ akꞌõre, kꞌasaa tꞌɨ̃jarapatama? aji. ¿Paraakꞌã aji, pɨmãi sãma kꞌãiitꞌee mɨ, mɨ kꞌõpꞌãyoorã jida?
24Ma wẽrapa pꞌanauji:
—Mɨ Betuel kꞌauda aji. Ma Betuel Najorpa ooda chi wẽra Milca ome. 25Paraada aji, pꞌũajara pꞌooda camelloorã aɨde jẽra pꞌaneedamerã mãikꞌaapa netꞌa tau kꞌodamerã. Ichiaba parã kꞌãidamerã paraada aji.
26Mãpai Abraham mimiapari bedabaidachi mãikꞌaapa Tachi Akꞌõremaa nãga ɨtꞌaa tꞌɨ̃ji: 27“¡Wãara pɨ mɨ chipari Abraham Akꞌõre Waibɨa! Pɨ ichita tꞌãri pia bapari iru ome. Pɨa mɨ pia akꞌɨ bajida aji, Abraham ëreerãmaa aneeda perã.”
28Rebeca pꞌiradachi teedaa chi nawemaa jarade.
29Chi ɨ̃pema Labán teeda bada perã, pꞌira wãji ma pania tꞌɨpatamaa Abraham mimiapari kꞌĩrachuude. 30Mãga ooji ma kꞌɨ̃depema, pulsera omé nẽedee teeda chi ɨ̃pewẽramaa unuda perã mãikꞌaapa ũrida perã chi ɨ̃pewẽrapa nepɨrɨda. Labanpa Abraham mimiapari ununaji ma pania tꞌɨpata kꞌaitꞌa chi camelloorã ome. 31Labanpa mãgaji:
—Temaa chepáde aji. Tachi Akꞌõrepa pɨ bendiciapari. Nama taawa beenaapáde aji, mɨa nekꞌopari, kꞌãipari iru bairã pɨ–itꞌee, pɨ camelloorã–itꞌee.
32Mãpai teedaa wãjida. Labanpa camelloorã ɨ̃rɨɨpa netꞌaa ɨrabai atapꞌeda, nekꞌopiji mãikꞌaapa pania aneeji ma mimiapari chi kꞌõpꞌãyoorã ome jĩru sɨɨdamerã. 33Ichiaba chikꞌo aneeji ãra–itꞌee.
Mamĩda Abraham mimiaparipa mãgaji:
—Ne–inaa parãmaa jara–emaa pꞌoyaa chikꞌo kꞌo–eda aji.
Labanpa pꞌanauji:
—Jarapáde aji.
34Mãpai ma mimiaparipa nãga nepɨrɨji:
—Mɨ Abraham mimiaparida aji. 35Tachi Akꞌõrepa Abraham bendiciapari perã irua iru bɨ ovejaarã, pꞌakꞌaarã, nẽe, pꞌaratꞌa, mimiapataarã, camelloorã, burroorã. 36Ma awara Abraham wẽra Sarapa warra aba tꞌoji chõtrãa baji mĩda. Mãgɨpa ichi netꞌaa jõmaweda jɨ̃aitꞌee. 37Abrahampa mɨ pëiji wẽra jɨrɨde chi warra–itꞌee. Irua kꞌinia–e bɨ ichi bapari Canaán eujãdepema wẽra atamerã. Mapa Tachi Akꞌõre kꞌĩrapite mɨmaa juraapiji Canaandepema wẽra atapi–e paitꞌee chi warramaa. 38Ma kꞌãyaara mɨ pëiji namaa, ichi akꞌõre eujãde, ichi ëreerã tꞌãide wẽra jɨrɨmerã chi warra–itꞌee. 39Mãga jarakꞌãri, mɨa irumaa iidiji: “Mamĩda Mɨchi Waibɨa, chi wẽra mɨ ome che kꞌinia–e bɨ pɨrã, ¿sãgapɨ ooyama?” aji. 40Mãpai irua pꞌanauji: “Mɨ Tachi Akꞌõre ode nipaparida aji. Iruata pɨ kꞌaripaitꞌee. Irua ángel pëiitꞌee pɨ ome pia wãmerã ode wãde mãikꞌaapa wẽra unumerã mɨ akꞌõre ëreerã tꞌãide. 41Chi wẽra ëreerãpa iru pëi kꞌiniada–e pꞌanɨ pɨrã pɨ ome, pꞌoyaa oo–e paitꞌeeda aji, Tachi Akꞌõre kꞌĩrapite pɨa juraadakꞌa.”
42’Mãgá idi kꞌewara mɨ paji ma pania tꞌɨpatamãi. Mɨ pachekꞌãri, nãga ɨtꞌaa tꞌɨ̃maa beeji mɨ chipari Abraham Akꞌõre Waibɨamaa: “Pɨa wãara mɨ kꞌaripa bɨ pɨrã na wã nide, 43mɨ nama bɨ misa na pania tꞌɨpatamãi, wẽra chepíji. Mãgɨmaa mɨa pania iidiitꞌee. Jaraitꞌee: ‘Chupɨria kꞌawáaji mãikꞌaapa pɨchi chokꞌodepema pania ma–ãri mɨmaa topíji.’ 44Mãga bɨde ma wẽramaa jarapíji: ‘Topáde aji, mãikꞌaapa mɨa pɨ camelloorãmaa ichiaba pania teeitꞌeeda aji, ãchia to kꞌiniata todamerã.’ Mãgapɨ mɨa kꞌawayada aji, chisãgɨ́ wẽra pɨa jɨrɨtꞌerada mɨ chipari warra–itꞌee.”
45’Mɨa ma ɨtꞌaa tꞌɨ̃maa bada waide aupa–e baji unukꞌãri Rebeca cheru chokꞌo ome. Irua pania atapꞌeda, mɨa iidiji: “Chupɨria kꞌawáaji. Mɨmaa pania teepáde” aji. 46Aramata ma chokꞌo ichi ikꞌiadeepa edaa jiraji mãikꞌaapa mãgaji: “Tóji mãikꞌaapa pɨ camelloorãmaa ichiaba pania teeitꞌeeda aji, ãchia to kꞌiniata todamerã.” Maapꞌeda mɨmaa mãikꞌaapa mɨ camelloorãmaa pania topiji. 47Tꞌẽepai mɨa iidiji irumaa: “¿Pɨ, kꞌai kꞌauma?” aji. Mãpai irua pꞌanauji: “Mɨ Betuel kꞌauda aji. Betuel uchiajida aji, Najordeepa chi wẽra Milca ome.” Mɨa mãga ũrikꞌãri, kꞌɨ̃depema, pulsera omé jɨ̃ bɨji. 48Mãpai bedabaidachi gracias jaraitꞌee mɨ chipari Abraham Akꞌõre Waibɨamaa, iruata mɨ ode chewãde pia akꞌɨda perã mãikꞌaapa nama aneeda perã, ma awara wẽra Abraham ëreerãdepema mɨmaa akꞌɨpida perã. 49Ɨ̃rá kꞌĩra jĩpꞌa jarátɨ parãpa kꞌĩsia pꞌanɨ mɨa kꞌawamerã. ¿Tꞌãri pia oodaikꞌã aji, mɨ chiparipa kꞌinia bɨkꞌa wa mãga–e?
50Mãpai Labanpa Betuel ome pꞌanaujida:
—¿Na jõma Tachi Akꞌõrepa oopida–ekꞌã? ajida. Taipa pꞌoyaa jarada–e. 51Nama bɨ Rebeca. Atéeji pɨ chipari warra–itꞌee, Tachi Akꞌõrepa mãga kꞌinia bairã.
52Abraham mimiaparipa mãga ũrikꞌãri, bedabaidachi ichi tau bɨɨrɨ te jãde tꞌõbairumaa mãikꞌaapa gracias jaraji Tachi Akꞌõremaa. 53Mãpai ne–inaa aneedapꞌedaa ẽtꞌa ataji Rebecamaa teeitꞌee. Teeji ne–inaa nẽedee ooda, pꞌaratꞌadee ooda, pꞌaru paara. Ichiaba netꞌaa pia teeji chi ɨ̃pemamaa mãikꞌaapa chi nawemaa. 54Ma tꞌẽepai Abraham mimiapari chi kꞌõpꞌãyoorã ome nekꞌojida mãikꞌaapa kꞌãijida. Aɨ norema iidiji Rebeca ateeitꞌee.
55Mamĩda chi nawepa chi ɨ̃pema ome mãgajida:
—Atꞌãri kꞌãima diez pꞌaneedapáde ajida. Maapꞌeda iru pɨ ome wãyada ajida.
56Mamĩda ma mimiaparipa mãgaji:
—Mãga–eda aji. Tachi Akꞌõrepa mɨ kꞌaripaji wẽra unu atamerã mɨ chipari warra–itꞌee. Ɨ̃raweda mɨ chiparimaa pëidapáde aji.
57Pꞌanaujida:
—Ma wẽramaa iididáma ajida.
58Rebeca tꞌɨ̃ pëijida.
Mãpai irumaa iidijida:
—¿Na eperã ome wã kꞌinia bɨkꞌã? ajida.
Irua pꞌanauji:
—Wãitꞌeeda aji.
59Mãgá pëijida Rebeca chi akꞌɨpari ome, Abraham mimiapari ome mãikꞌaapa chi kꞌõpꞌãyoorã ome. 60Rebeca uchiai naaweda, irumaa nãgɨ́ pedee pia jarajida:
—Tai ɨ̃pewẽra, kꞌinia pꞌanɨda ajida, pɨa warra chokꞌara tꞌomerã mãikꞌaapa pɨdeepa uchiadaitꞌeerãpa ãchi kꞌĩra unuamaa iru pꞌanapataarã pꞌuuru pꞌoyaadamerã.
61Mãpai Rebeca ichi mimiapataarã ome camello ɨ̃rɨ bataudapꞌeda, wãjida Abraham mimiapari ome. Mãga paji Abraham mimiaparipa Rebeca ateeda mamãikꞌaapa.
62Maapai Isaac Néguev eujãde bapachi. Waya che baji pania tꞌɨpatamãiipa. Mãgɨ́ pozo tꞌɨ̃jarapachida Lajay Roí.#24.62 Hebreo pedeede Lajay Roí jara kꞌinia bɨ “chi ichita baparipa mɨ akꞌɨpari”. 63Mama bɨde kꞌeupodopa pꞌasiade uchiakꞌãri, camelloorã chewãda unuji.
64Rebecapa ichiaba akꞌɨkꞌãri, Isaac unuji mãikꞌaapa ɨrabaidachi camello ɨ̃rɨɨpa. 65Mãpai Abraham mimiaparimaa iidiji:
—¿Kꞌaima aji, jã eperã pꞌũajarade chewã tachimaa?
Mãpai Abraham mimiaparipa pꞌanauji:
—Jãgɨ́ mɨ chiparida aji.
Mãpai Israeldepema wẽraarãpa oopatapꞌedaakꞌa ãchi ɨmɨkꞌĩra ome naa unudakꞌãri, Rebecapa ichi kꞌĩra wãkꞌaji pꞌaru nãusaapa.
66Mãpai Abraham mimiaparipa ichia ooda jõmaweda nepɨrɨji Isaacmaa.
67Maapꞌeda Isaacpa Rebeca ateeji ichi nawe te ne–edee ooda badamaa chi wẽra papiitꞌee. Isaacpa chi wẽra kꞌinia iru baji. Mãgá wẽpaji ichi tꞌãri pꞌua bada chi nawe jai–idaada perã.
Currently Selected:
Génesis 24: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.
