Génesis 32
32
Jacob ichi eujãdee chewãde Esaú ome unuda
1Mãgá Jacob ichi tedepemaarã ome chejida. Chewãdade angeleerãpa ãchi unupijida Jacobmaa.
2Jacobpa ãchi unukꞌãri, mãgaji:
—Nãgɨɨrã ɨtꞌaripema soldaorãda aji, chedapꞌedaa tachi kꞌaripadaitꞌee.
Mapa ma unudamãi tꞌɨ̃ bɨji Majanayin; jara kꞌinia bɨ “ejército omé”.
3Canaán eujã kꞌaitꞌa pachedakꞌãri, Jacobpa ichi mimiapataarã pëiji Seirdee, mãgɨ́ Edom eujãde bɨ, ichi cheru jaradamerã chi ɨ̃pema Esaumaa. Mãgaji:
4—Mɨchi waibɨa Esaumaa nãga jaradapáde aji: “Pɨ mimiapari Jacobpa pɨmaa nãga jara pëi bɨ: ‘Mɨ Labán ome taarã baji. 5Iru bɨ pꞌakꞌaarã, burroorã, ovejaarã, esclavoorã. Mɨa pɨmaa nãga jara pëiru tachi omeeweda pia pꞌanadamerã.’ ”
6Irua jaradakꞌa jaranajida.
Maapꞌeda pachedakꞌãri, mãgajida:
—Wãjidada ajida, jarade pɨ ɨ̃pema Esaumaa. Ɨ̃raweda cheruda ajida, cuatrocientos ɨmɨkꞌĩraarã ome.
7Mãga ũrikꞌãri, Jacob ãchobeedachi, Esaú chõode cheru jĩakꞌaapa. Kꞌĩsia nɨ̃bapꞌeda, tꞌookꞌooji chi wẽraarã ãchi warrarã ome, ne–animalaarã ome, awara–awaraa para bamerã. 8Kꞌĩsiaji: “Esaú chõo cheru pɨrã, tꞌooda abaadepemaarã ome chõo bɨ misa, tꞌooda awaraadepemaarã erreu wãdai.”
9Maapꞌeda Tachi Akꞌõremaa nãga ɨtꞌaa tꞌɨ̃ji:
—Aai, Tachi Akꞌõre, pɨta mɨ akꞌõchona Abraham, mɨ akꞌõre Isaac Akꞌõre Waibɨa. Pɨata jaraji mɨchi eujãdee mãikꞌaapa mɨchi temaa wãmerã. Pɨta mɨ ome baitꞌeeda aji, mãikꞌaapa mɨ pia akꞌɨitꞌeeda aji. 10¿Kꞌaima mɨ, pɨa mɨ nãgá kꞌaripamerã? Mɨ pɨ mimiapari. Pɨa oopi bɨkꞌa oopariitꞌee. Na to sĩakꞌãri Jarandee wãde, mɨ oveja akꞌɨpari pakꞌuru aupai ateeji. Mamĩda ɨ̃rá pɨ kꞌaurepa mɨa eperãarã chokꞌara iru bɨ, netꞌaa, ne–animalaarã paara. 11Mɨ chupɨria kꞌawáaji. Mɨ ɨ̃pema Esaú juadeepa kꞌaripáji waawee bairã mɨ ome chõo cheru pɨrã, tai jõmaweda, mɨ, mɨchi wẽraarã warrarã ome peekꞌoodai. 12Pɨa jarajida aji, mɨ pia akꞌɨ bapariitꞌee mãikꞌaapa mɨdeepa uchiadaitꞌeerã cho–kꞌara ĩwapiitꞌee. Pꞌoyaa juasiada–e paitꞌeeda aji, ipu tau nãusaakꞌa pꞌanadaitꞌee perã.
13Ma pꞌãrikꞌua Jacob mama kꞌãiji mãikꞌaapa ichi ne–animalaarãdepema nãgɨɨrã jɨrɨtꞌeraji chi ɨ̃pemamaa tee pëiitꞌee: 14cabra doscientos, chivo veinte, oveja wẽra doscientos, oveja ɨmɨkꞌĩra veinte, 15camello wẽra treinta chi chakꞌeerã ome, pꞌakꞌa wẽra cuarenta, pꞌakꞌa ɨmɨkꞌĩra diez, burro wẽra veinte, burro ɨmɨkꞌĩra diez. 16Ma tꞌẽepai ma ne–animalaarã teeji chi mimiapataarãmaa, awara–awaraa ichi naa ateedamerã. Mãgaji:
—Mɨ naa wãdapáde aji, mãikꞌaapa ne–animalaarã awara–awaraa ateedapáde aji.
17Jacobpa mãgaji chi mimiapari naapɨara pëidamaa:
—Mɨ ɨ̃pema Esaú ome unukꞌãri, irua pɨ chipari tꞌɨ̃ iidiitꞌeeda aji. Ichiaba iidiitꞌee kꞌaide na ne–animalaarã mãikꞌaapa sãmaa wãru nãgɨ́ ome. 18Mãga iidikꞌãri, nãga pꞌanauipia bɨ: “Mɨchi poro waibɨa Esaú, pɨchi mimiapari Jacobpa na ne–animalaarã pɨmaa tee pëiji. Iru tai tꞌẽe cheru.”
19Apema mimiapataarã tꞌẽe wãdaitꞌeerãmaa mãgaji:
—Esaú ome unudakꞌãri, aukꞌa jaradapáde aji, 20mɨa naapɨara pëidamaa jaradakꞌa: “Pɨchi mimiapari Jacob tai tꞌẽe cheru.”
Mãga ookꞌãri, Jacobpa kꞌĩsiaji: “Mɨa pëida akꞌɨkꞌãri, iru audú kꞌĩrau–e paitꞌee. Mãpai mɨ ome unukꞌãri, ¿mɨ auteebai–epaa?” 21Mãga ooji. Ma ne–animalaarã iru naa pëiji. Jõdee iru mama beeji kꞌãiitꞌee.
Jacob chõoda Tachi Akꞌõrepa ángel pëida ome
22-23Ma pꞌãrikꞌua Jacobpa pëiji chi wẽraarã ãchi warrarã ome mãikꞌaapa ichi netꞌaa iru bada paara Jaboc to kꞌĩraikꞌa eere. 24Ichi ituaba tꞌẽe beeji. Mãga nɨde eperã aba chepꞌeda, Jacob ome chõomaa beeji tapꞌeda parumaa. 25Mamĩda Jacobpa pꞌoyaa wãkꞌãri, ma eperãpa Jacob makꞌara golpe sĩtꞌaaji. Mãgá Jacob bɨɨrɨ nɨkꞌanɨkꞌaadachi.
26Mãpai ma eperãpa mãgaji:
—Mɨ kꞌena pëipáde aji, tapꞌeda paru perã.
Mamĩda Jacobpa pꞌanauji:
—Mɨa pɨ kꞌena pëi–eda aji, pɨa mɨmaa pedee pia jara–emãi.
27Mãpai ma eperãpa iidiji:
—Pɨ ¿kꞌasaa tꞌɨ̃jarapatama? aji.
Jacobpa pꞌanauji:
—Mɨ tꞌɨ̃jarapatada aji, Jacob.
28Mãpai ma eperãpa mãgaji:
—Idideepa waa pɨ tꞌɨ̃jarada–e paitꞌeeda aji, Jacob. Tꞌɨ̃jarapataadaitꞌeeda aji, Israel#32.28 Hebreo pedeede Israel jara kꞌinia bɨ “Tachi Akꞌõre ome chõoda”. nama Tachi Akꞌõre ome chõoda perã mãikꞌaapa eperãarã pꞌoyaada perã.
29Mãpai Jacobpa iidiji:
—¿Pɨ́rama? ¿Kꞌasaa tꞌɨ̃jarapatama? aji.
Mamĩda ma eperãpa pꞌanauji:
—¿Sãapꞌeda mɨ tꞌɨ̃ iidi bɨma? aji.
Mãpai ma eperãpa Jacobmaa pedee pia jaraji. 30Mãgá Jacobpa kꞌawaji Tachi Akꞌõre ome chõoda mãikꞌaapa ma chõo pꞌanadapꞌedaamãi tꞌɨ̃ bɨji Penuel#32.30 Hebreo pedeede “Penuel” jara kꞌinia bɨ “Tachi Akꞌõre kꞌĩra unuda”. mama ichia jarada perã: “Mɨa Tachi Akꞌõre unuji mɨ kꞌĩrapite. Mamĩda piu–e paji.”
31Akꞌõrejĩru ewaa uchiakꞌãri, Jacob wãji. Mamĩda piakꞌãa nipaji, ichi makꞌara pꞌua bada perã.
32Maperã Israeldeepa uchiadapꞌedaarãpa ne–animalaarã makꞌaradepema kꞌĩu kꞌodakꞌaa, Tachi Akꞌõrepa mama Jacob kꞌapꞌɨa pꞌua ooda perã.
Currently Selected:
Génesis 32: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.
