Juan 5

Betzatá pozode Jesupa chiwa bɨ jɨpada

1Ma tꞌẽepai Jesús cheji Jerusalendee judiorã fiesta oode. 2Jerusalén pꞌuuru#5.2 Jesucristo na pꞌekꞌau eujãde bapariikꞌãri, Jerusalén Judea eujãdepema pꞌuuru waibɨara baji. Mama Tachi Akꞌõre te waibɨa baji. murallade tꞌĩupata aba Ovejaarã Tꞌĩupata apachida. Mãgɨ́ kꞌaitꞌa baji eperãarã kꞌuipatamãi, hebreo pedeede tꞌɨ̃jarapata Betzatá. Mãgɨ́ pozo wapꞌɨra baji joisomaa tarimbakꞌa bɨpa. Mãgɨ́ wãkꞌa beeji te kꞌirupa. 3Mama eujãde kꞌayaa beerã chokꞌara pꞌaneepachida: tau pꞌãriu beerã, nɨkꞌanɨkꞌaa tꞌɨa beerã mãikꞌaapa chiwa beerã. [Nɨpachida pania pꞌërebai jira beerumaa. 4Mãga oopachida edaare angelpa pania pꞌërebai jira beepikꞌãri, chi naa tꞌĩuru aɨde jɨpa beepachi perã.] 5Mama baji eperã treinta y ocho años kꞌayaa bada. 6Jesupa iru mama jẽra bɨ unukꞌãri mãikꞌaapa kꞌawaa atakꞌãri taarã weda ichi mãgá che bapachi, irumaa iidiji:

—¿Jɨpa bee kꞌinia bɨkꞌã? aji.

7Chi kꞌayaa bɨpa pꞌanauji:

—Eperã wẽ–eda aji, mɨ toida ata bɨmerã jã pozode pania pꞌërebai jira beekꞌãri. Mɨ tꞌĩudariitꞌee pakꞌãri, awaraata mɨ naa tꞌĩudaiparida aji.

8Mãpai Jesupa mãgaji:

—¡Pꞌirabáiji! Pɨchi pꞌaru atáji mãikꞌaapa wã́ji pɨchi temaa.

9Aramata ma eperã jɨpa beeji. Bainɨ̃ beepꞌeda mãikꞌaapa ichi pꞌaru atapꞌeda, tꞌɨa wãji. Mamĩda ɨ̃ipata ewate pada perã, 10arii pꞌanadapꞌedaa judiorã poro waibɨarãpa chi jɨpa beedamaa mãgajida:

—Idi tachi ɨ̃ipata ewate. Tachi Akꞌõre Ũraa pꞌãdade jara bɨ ɨ̃ipata ewate mimia oodaikꞌaraa bɨ. Jã pꞌaru pɨa ateeikꞌaraa bɨda ajida.

11Mãpai mãgɨ́ eperãpa pꞌanauji:

—Mɨ jɨpadapa jarajida aji: “Pɨchi pꞌaru atáji mãikꞌaapa wã́ji.”

12Ãchia iidijida:

—¿Kꞌaipata pɨmaa mãga jarajima? ajida.

13Mamĩda ma kꞌayaa badapa kꞌawa–e paji kꞌaipata ichi jɨpatꞌaada, Jesús tau atuatꞌaada perã tꞌĩukꞌãri eperãarã chokꞌara see nɨ̃bɨde.

14Ma tꞌẽepai, Tachi Akꞌõre te waibɨade Jesupa ma eperã unukꞌãri, irumaa mãgaji:

—¡Ũríji! Ɨ̃rá pɨ jɨpa bɨda aji. Pꞌekꞌau kꞌachia oo amáaji ne–inaa kꞌachiara pꞌasanaamerã.

15Maapꞌeda mãgɨ́ eperãpa judiorã poroorãmaa nepɨrɨnaji Jesupa ichi jɨpada. 16Ɨ̃ipata ewate Jesupa mãgá jɨpapachi perã, judiorã poro waibɨarãpa iru jɨrɨpachida peedaitꞌee. 17Mamĩda Jesupa pꞌanaupachi ichi ɨmɨatee pꞌanadapꞌedaarãmaa:

—Mɨ Akꞌõre ichita mimiapari mãikꞌaapa ɨ̃raweda mimiamaa bɨ. Mɨ jida mãgá mimiaparida aji.

18Mãga ũridakꞌãri, ma judiorãpa audupɨara peetꞌaa kꞌinia pꞌanapachida, ɨ̃ipata ewate mimiapachi perã mãikꞌaapa Tachi Akꞌõre ome aukꞌa bɨda ada perã. Mãga jaraji Tachi Akꞌõre ichi Akꞌõreda akꞌãri.

Tachi Akꞌõre Warrapa oopari Tachi Akꞌõrepa ooparikꞌa

19Ãchia ɨmɨateeda ũrikꞌãri, Jesupa mãgaji:

—Mɨa wãarata jararu. Tachi Akꞌõre Warrapa ne–inaa pꞌoyaa oo–eda aji, ichi kꞌĩradoopa. Ma kꞌãyaara irua unupari chi Akꞌõrepa oo bɨ mãikꞌaapa aukꞌa oopari. Jõmaweda chi Akꞌõrepa oo bɨ ichiaba oopari chi Warrapa. 20Mãga bɨ chi Akꞌõrepa ichi Warra kꞌinia iru bapari perã. Mapa jõma ichia oo bɨ akꞌɨpipari chi Warramaa. Wãara na ewari ne–inaa pi–iara akꞌɨpiitꞌee chi warramaa. Mãga unudakꞌãri, parã pꞌera pɨkꞌa para beeitꞌee. 21Chi Akꞌõrepa piu beerã pꞌirabaipiparikꞌa ichita chokꞌai pꞌanapataadamerã, chi Warrapa aukꞌa ichia kꞌinia bɨɨrã pꞌirabaipiparida aji, ichita chokꞌai pꞌanapataadamerã. 22Chi Akꞌõrepa jara–e chisãgɨ́ na pꞌekꞌau eujãdepemaarã ichita chokꞌai pꞌanapataadaitꞌee mãikꞌaapa chisãgɨ́ atuadaitꞌee. Ma–itꞌee chi Warra pëiji. 23Kꞌinia baji jõmaarãpa ichi Warra waaweedamerã iru waaweepatakꞌa. Eperã iru Warra waawee–ee bɨpa ichiaba waawee–e Tachi Akꞌõre, chi Warra pëida.

24ʼMɨa wãarata jararu. Tachi Akꞌõre Waibɨapa mɨ pëiji. Mɨ pedee ũri bɨpa mãikꞌaapa irude ijãa bɨpa ɨtꞌaa wãitꞌeeda aji. Mãgɨ́ eperã atua–e paitꞌee. Irua ijãadakꞌãriipa ichita bapariitꞌee Tachi Akꞌõre ome. 25Mɨa wãarata jararu. Ewari paitꞌee mãikꞌaapa ɨ̃raweda paru piu pɨkꞌa beerãpa ũridaitꞌee Tachi Akꞌõre Warra pedee. Chi ma pedee ijãarutaarã ichita pꞌanapataadaitꞌee Tachi Akꞌõre ome. 26Tachi Akꞌõrepa eperãarã ichita chokꞌai pꞌanapiparikꞌa, ichi Warra bɨji aukꞌa oomerã. 27Ma awara ichi Warra bɨji ichikꞌa jõmaarã kꞌãyaara waibɨara bamerã. Mãgá irua jarai chisãgɨ́ eperãarã ichita chokꞌai pꞌanapataadaitꞌee mãikꞌaapa chisãgɨ́ atuadaitꞌee. Tachi Akꞌõrepa iru mãga bɨji iru Eperã Akꞌõre Truadepema perã. 28Pꞌera pɨkꞌa pꞌananáatɨ mɨa jararu ũridakꞌãri. Ewari cherude jõmaweda jãɨrade pꞌanɨɨrãpa mɨ pedee ũridaitꞌee. 29Chokꞌai pꞌirabaidaitꞌee mãikꞌaapa jãɨradeepa uchiadaitꞌee. Ne–inaa pia oopatapꞌedaarã ichita pꞌanapataadaitꞌee Tachi Akꞌõre ome. Mamĩda chi ne–inaa kꞌachia oopatapꞌedaarã atuadaitꞌee.

Jesús jõmaarã kꞌãyaara waibɨara bɨ

30—Mɨa ne–inaa pꞌoyaa oo–eda aji, mɨchi kꞌĩradoopa. Mɨa ũripari mɨ Akꞌõrepa jara bɨ mãikꞌaapa irua jara bɨkꞌa oopari. Mapa mɨa eperãarãpa oopata akꞌɨpari jaraitꞌee pia wa kꞌachia. Mɨa mãga jarakꞌãri, wãarata jarapari, mɨchia oo kꞌiniata oo kꞌiniakꞌaa perã. Jĩpꞌa oo kꞌinia bɨ mɨ pëidapa kꞌinia bɨkꞌa. 31Mɨchi kꞌĩsiadoopapai na pedee jarada paara, mãgara eperãarãpa wãarata jara–e bɨda akꞌajida. 32Mamĩda awaraapa jara bɨ mɨ ichi Warra. Mɨa kꞌawa bɨ irua ichita wãarata jarapari. 33Parãpa eperãarã pëidakꞌãri Juan Bautistamaa iidide, irua pꞌanauda wãarata paji. 34Mɨa pꞌua–e bɨda aji, eperãpa jarada. Mamĩda mãga jaraji parãpa kꞌirãpadamerã Juanpa jarada mãikꞌaapa mɨde ijãadamerã. Mãgá mɨa parã o kꞌachiadeepa kꞌaripa atai. 35Juan urua pɨkꞌa bapachi lamparakꞌa na pꞌekꞌau eujã pꞌãriu pɨkꞌa bɨde. Maapai parã o–ĩa pꞌanapachida iru ome ma urua pɨkꞌa bɨde. 36Mamĩda ne–inaa piara paraa Juanpa jarada kꞌãyaara. Mɨa ne–inaa jõma oopari mɨ Akꞌõrepa kꞌĩsia iru bɨkꞌa. Mãga ookꞌãri, akꞌɨpipari wãara irua mɨ pëiji. 37Irua pida akꞌɨpidoo mɨ pëiji, parãpa jara pꞌanɨ mĩda waide iru pedee ũridakꞌaa mãikꞌaapa iru kꞌĩra unudakꞌaa. 38Ma awara parãpa akꞌɨpipata iru pedee jara pëida wãara ijãadakꞌaa, irua pëidade ijãada–e pꞌanadairã. 39Parãpa Tachi Akꞌõre Ũraa pꞌãda pi–ia akꞌɨpata, ijãapata perã ma kꞌaurepa ɨtꞌaa wãdaitꞌee. Mãgɨ́ ũraade mɨdeta jara bɨ. 40Mamĩda parãpa mɨde ijãa kꞌiniada–e pꞌanɨ, mɨa parã ɨtꞌaa wãpimerã.

41ʼMɨa mãga jara–e paji kꞌinia bairã eperãarãpa mɨ akꞌɨdamerã eperã tꞌãri piakꞌa. 42Ma awara mɨa parã kꞌawa bɨda aji. Wãara Tachi Akꞌõre kꞌinia iru pꞌanada–e. 43Mɨ chejida aji, mɨ Akꞌõre pari. Mamĩda parãpa mɨ auteebaida–e paji. Jõdee awaraa eperã ichi kꞌinia cheru pɨrã, mata parãpa auteebaipata. 44¿Sãga mɨde ijãadayama? aji. Jɨrɨpata eperãarãpa parã akꞌɨdamerã judiorã pia beerãkꞌa, jɨrɨdai kꞌãyaara Tachi Akꞌõrepa parã akꞌɨmerã ichideerãkꞌa. ¡Iru aupaita Akꞌõre Waibɨa! 45Kꞌĩsianáatɨ mɨa parã ɨmɨateeitꞌee mɨ Akꞌõre kꞌĩrapite. Ma kꞌãyaara Moisepa pꞌãdapa parã ɨmɨateepari, ma ũraade ijãa pꞌanɨ mĩda. 46Parãpa wãara Moisepa pꞌãda ijãadapꞌedaa paara, ichiaba mɨde ijãakꞌajida, irua mɨde pꞌãda perã. 47Mamĩda wãara irua pꞌãda ijãada–e pꞌanadairã, audupɨara mɨ pedee ijãada–e pai.

Currently Selected:

Juan 5: sjaB

Highlight

Copy