Lucas 2

Jesús tꞌoda

(Mateo 1.18-25)

1-2Juan atꞌãri ma–ãri bakꞌãri, César Augusto Romadepema reyrã poro waibɨa paji Romadepemaarã eujãde, ichiaba awaraa eujã iru jua ekꞌari badade. Cirenio ichi jua ekꞌari baji. Mãgɨpa Siria eujã akꞌɨpachi. Maapai eperãarã ichi truadepema jõmaweda tꞌɨ̃ pꞌãpiji kꞌawaaitꞌee jõmasaa pꞌanɨ. Mãgɨ́ chi naapema tꞌɨ̃ pꞌãpida paji. 3Mãgá eperãarã juasiadakꞌãri, jõmaweda wãpijida ãchi chonaarã pꞌuurudee tꞌɨ̃ pꞌãpide.

4Maperã José uchiaji Galilea eujãdepema Nazaret pꞌuurudeepa wãitꞌee Judea eujãdee. Ichi chonaarãwedapema Rey Daviddeepa uchiada perã, wãji David tꞌoda pꞌuuru Belendee. 5Mamaa wãji ichi tꞌɨ̃ pꞌãpide María ome, ichi wẽra paitꞌee bada perã. Uchiadakꞌãri, María warra tꞌoyama baji. 6Belende panadakꞌãri, María bi pꞌira nɨ̃beeji chi warra tꞌoitꞌee. 7Mamĩda te unuda–e paji, araada–e pada perã jõmaweda tꞌɨ̃ pꞌãpi chedapꞌedaarã–itꞌee. Mapa mama Belende chi warra naapema tꞌoji, ne–animalaarã nekꞌopata tede. Chi warra pꞌarude pɨra atapꞌeda, bɨji ne–animalaarã nekꞌopatade kꞌãimerã.

Angelpa oveja akꞌɨpataarãmaa unupida

8Ma pꞌãrikꞌua Belén#2.8 Belén pꞌuuru Judea eujãde bɨ. Ma pꞌuurude Jesucristo tꞌoji mĩda, wariji Nazaret pꞌuurude. Mãgɨ́ pꞌuuru Galilea eujãde bɨ (Mt 2.23). kꞌaitꞌa pꞌũajara paraamãi eperãarãpa ãchi ovejaarã akꞌɨmaa pꞌanajida. 9Mãga nɨde angelpa ichi unupiji mãikꞌaapa Tachi Akꞌõre kꞌĩra wãree ɨ̃daadachi ãchi ikꞌaawa. Mapa pꞌeradachida. 10Mamĩda ma angelpa mãgaji:

—Pꞌeranaadapáde aji, mɨa pedee pia jara cheru perã. Mɨa nepɨrɨru kꞌaurepa eperãarã jõmaweda audú o–ĩa pꞌaneedaitꞌee. 11Idi pꞌãrikꞌua Rey David tꞌoda pꞌuurude tꞌoji eperãarã o kꞌachiadeepa kꞌaripa atapari. Iru Tachi Waibɨa, Tachi Akꞌõrepa pëida eperãarã rey pamerã. 12Jɨrɨnadapáde aji. Ununadakꞌãri ɨmɨkꞌĩra warra pꞌarude pɨra bɨ ne–animalaarã nekꞌopatade, kꞌawadayada aji, mɨa wãarata jarada.

13Aramata unujida ɨtꞌaripema angeleerã cho–kꞌara chi apema ikꞌaawa para bɨ. Jõmaarãpa o–ĩa ɨtꞌaa tꞌɨ̃ para beeji. Mãgapachida:

14—¡Tachi Akꞌõre ɨtꞌari bɨta jõmaarã kꞌãyaara waibɨara bɨ! ¡Irua pia akꞌɨ bɨɨrã tꞌãri o–ĩa pꞌanapata mãikꞌaapa kꞌãiwee pꞌanapata!

15Ma angeleerã jõmaweda wãdakꞌãri Akꞌõre eujãdee, ma oveja akꞌɨpataarãpa mãga jõnapachida:

—Wãdáma apachida Belendee, Akꞌõrepa jara pëida akꞌɨde.

16Mãpai isapai wãjida. Wãara ununajida María José ome mãikꞌaapa María warra kꞌãi bɨ ne–animalaarã nekꞌopatade. 17Mãga unudapꞌeda, nepɨrɨnajida ma angelpa jarada ma warrade. 18Jõmaweda ãra pedee ũridapꞌedaarã akꞌɨtrua para beeji. 19Mamĩda ma jõmaade Mariapa ichi tꞌãridepai kꞌĩsiaji. Kꞌĩra atuakꞌaa paji ãrapa jaradapꞌedaa. 20Jõdee ma oveja akꞌɨpataarã o–ĩa wãjida ãchi pꞌanadapꞌedaamaa. Wãkꞌãtɨ wãdapa mãgapachida:

—Tachi Akꞌõre jõmaarã kꞌãyaara waibɨara bɨ. Iru tꞌãri pia bɨ. Jõma unujida irua jara pëidakꞌa.

Jesús akꞌõreerãpa iru ateedapꞌedaa Tachi Akꞌõre te waibɨade

21Ma warra tꞌopꞌeda, ewari ochomaa iru kꞌapꞌɨade tauchaa bɨjida mãikꞌaapa tꞌɨ̃ bɨjida Jesús, María biakꞌoo beei naaweda, angelpa jaradakꞌa.

22-24Ewari cuarenta wãyaakꞌãri, wãjida Jerusalendee oodaitꞌee Moisepa pꞌãdade jara bɨkꞌa, tꞌĩu pia pꞌaneedaitꞌee Akꞌõre te waibɨade. María kꞌapꞌɨa pari oojida Akꞌõre Ũraa pꞌãdade jara bɨkꞌa wẽraarãpa oodamerã warra tꞌopꞌeda:

‘Peepidapꞌeda, paapidaipia bɨ tortola omé maa–e pɨrã paloma chakꞌeerã omé.’ (Levítico 12.6-8)

Ichiaba chi warra awara bɨjida Tachi Akꞌõre–itꞌee Moisepa pꞌãdade jara bɨkꞌa:

‘Israel pidaarãpa ãchi warrarã naapemaarã awara bɨdaipia bɨ Tachi Akꞌõre–itꞌee.’ (Éxodo 13.2, 12)

25Maapai Jerusalende bapachi chonaa aba tꞌɨ̃jarapatapꞌedaa Simeón. Iru Tachi Akꞌõrede ijãapachi mãikꞌaapa oopachi irua oopi bɨkꞌa. Ijãapachi Tachi Akꞌõrepa Israel pidaarã kꞌaripaitꞌee ãchi kꞌĩra unuamaa iru pꞌanapatapꞌedaarã juadeepa. Tachi Akꞌõre Jaure bapachi Simeón ome. 26Iruata kꞌawapiji Simeón piu–e paitꞌee unui naaweda Cristo, Tachi Akꞌõrepa pëida eperãarã rey pamerã. 27Ma ewate Akꞌõre Jaurepa iru wãpiji Tachi Akꞌõre te waibɨadee. Mãga nɨde Jesús akꞌõreerã wãjida mamaa. Oomaa pꞌanajida Moisepa pꞌãdade jara bɨkꞌa oodamerã ãchi warra ewaa tꞌoda ome. 28Simeónpa ãra unukꞌãri, ma warra chai jira ataji mãikꞌaapa tꞌãri o–ĩa mãgaji Tachi Akꞌõremaa:

29—Akꞌõre, jõmaarã Akꞌõre Waibɨa, ɨ̃rá mɨ, pɨ mimiapari, kꞌãiwee piutꞌee, pɨa eperã jaradakꞌa unuru perã.

30Mɨchi taupa unuru Tachi Kꞌaripapari.

31Pɨa na ɨmɨkꞌĩra warra pëiji pɨ o akꞌɨpimerã na pꞌekꞌau eujãdepemaarãmaa.

32Iru ɨ̃daa pɨkꞌa bɨ kꞌaurepa judio–eerãpa paara pɨ o kꞌawaadaitꞌee mãikꞌaapa iru kꞌaurepa eperãarãpa Israel pidaarã tꞌo pꞌanadaitꞌee.

33Simeón pedee ũridakꞌãri, Jesús akꞌõreerã pꞌera pɨkꞌa pꞌaneejida. 34Mãpai Simeónpa iidiji Akꞌõrepa ãra pia akꞌɨ bapariimerã mãikꞌaapa Mariamaa mãgaji:

—Pɨ warra kꞌaurepa Israel eujãdepemaarã chokꞌara ɨtꞌaa wãdaitꞌee mãikꞌaapa chokꞌara atuadaitꞌee. Ichiaba chokꞌaraarãpa jaradaitꞌee Tachi Akꞌõrepa iru pëi–e paji. 35Mãgá Tachi Akꞌõrepa kꞌawaapiitꞌee eperãarãpa kꞌĩsiapata ãchi tꞌãridepai; wãara irude ijãa pꞌanɨ maa–e pɨrã ijãada–e pꞌanɨ. Mamĩda ma jõmaade pɨ tꞌãri pꞌua nɨ̃baitꞌee, espadapa#2.35 Espada nekꞌo choma bɨkꞌa bɨ, mamĩda kꞌĩraichaa weda pꞌewedee bapari. pɨ tꞌãride su atarutakꞌa.

36Pꞌẽtrãa tꞌɨ̃jarapatapꞌedaa Ana ichiaba mama baji. Tachi Akꞌõre pedee jarapari paji. Chi akꞌõre Aser ëreerãdepema paji. Tꞌɨ̃jarapachida Penuel. Awẽra weda Ana miakꞌãiji. Mamĩda siete añopai baji chi ɨmɨkꞌĩra ome. 37Mamãikꞌaapa pꞌẽtrãa beeji ochenta y cuatro años parumaa. Akꞌõre te waibɨade bapachi. Ewari chaa ɨtꞌaa tꞌɨ̃pachi. Edaare nekꞌokꞌaa paji ɨtꞌaa tꞌɨ̃ kꞌiniapa. 38Simeón pedee auparude Ana uchiaji. José mãikꞌaapa María unukꞌãri ma warra ome, Tachi Akꞌõremaa gracias jaraji iru pari. Mãpai arii pꞌanadapꞌedaarãmaa jarapachi:

—Na warrata tachi Jerusalén#2.38 Jesucristo na pꞌekꞌau eujãde bapariikꞌãri, Jerusalén Judea eujãdepema pꞌuuru waibɨara baji. Mama Tachi Akꞌõre te waibɨa baji. pidaarãpa nɨ pꞌanɨ tachi kꞌaripaitꞌee.

Waya chedapꞌedaa Nazaret pꞌuurudee

39José María ome ne–inaa jõma oo aupadakꞌãri Moisepa pꞌãdade jara bɨkꞌa, waya chejida Galilea eujãdee ãchi pꞌuuru Nazaretde. 40Ãchi warra juatau chaareera wari wãpachi mãikꞌaapa kꞌĩsia kꞌawaara wãpachi. Ichiaba Tachi Akꞌõre o–ĩa baji iru ome.

Jesús warra weda Akꞌõre te waibɨade

41Año chaa Jesús akꞌõreerã wãpachida Jerusalén pꞌuurudee Pascua fiesta oode. 42Jesús doce años iru bakꞌãri, mãga oojida mãikꞌaapa iru aukꞌa wãji ãra ome. 43Ma fiesta jõdaikꞌãri, eperãarã erreujida ãchi te chaa. Mamĩda Jesús Jerusalende beeji, chi akꞌõreerãpa kꞌawada–ee. 44Ode wãdade chi akꞌõreerãpa kꞌawada–e paji, chokꞌara cheepuru wãdapꞌedaa perã. Kꞌĩsia pꞌanajida Jesús cheru apemaarã ome. Mapa kꞌewara iidipachida ãchi ëreerãmaa mãikꞌaapa kꞌĩra kꞌawaarãmaa. 45Mamĩda unuda–e pakꞌãri, ãpɨtee jɨrɨnajida Jerusalende.

46Kꞌãima õpeemaa ãchi warra unu atajida Akꞌõre te waibɨade. Su–akꞌɨ baji Moisepa pꞌãda jarateepataarã esajĩakꞌa. Mãɨrãpa jaratee pꞌanɨ ũrii bapꞌeda, iidipachi. 47Arii pꞌanadapꞌedaarã jõmaarãpa iru pedee ũridakꞌãri, akꞌɨtrua para beepachi, poro wẽsaa bada perã mãikꞌaapa pia pꞌanaupata perã. 48Mamĩda chi akꞌõreerãpa iru mãgá unudakꞌãri, pꞌera pɨkꞌa pꞌaneejida. Mãpai chi nawepa mãgaji:

—Warra, ¿sãapꞌeda nãga oojima? aji. Taipa pɨ unuda–e pakꞌãri, kꞌĩsia pꞌua jõnajida.

49Mãpai Jesupa mãgaji:

—¿Sãapꞌeda mɨ jɨrɨ pꞌanɨma? aji. ¿Kꞌawada–eta pꞌanɨkꞌã aji, mɨ Akꞌõre tede ichita baitꞌee?

50Mamĩda ãrapa kꞌawada–e paji ma pedee kꞌãata jara kꞌinia baji.

51Mãpai iru wãji ãra ome Nazaret pꞌuurudee. Mama ãra ome chokꞌekꞌee bapachi. Mamĩda Mariapa irua ooda kꞌĩra atuakꞌaa paji. Ichi tꞌãridepai ma ne–inaa jõmaweda audú kꞌĩsiapachi. 52Mãgá Jesús wari wãpachi. Ichiaba kꞌĩsia kꞌawaapɨara wãpachi, Tachi Akꞌõrepa iru pia akꞌɨ bada perã, eperãarãpa pida ichiaba.

Currently Selected:

Lucas 2: sjaB

Highlight

Copy