Mateusi 11

Juwão omono wemĩgwai kõ Jesu resa remẽwarà

(Rukasi 7.18-23)

1Ãmẽ ajaire, wemimo'ekwerà 12 mãe kõ omotekokuwa paire, Jesu ojisyry oo a'e taa pe wyi, eeve kõ. Oo jẽ Juteu kõ rena kõ rupi poromo'e iko, taa ike'ĩje'ẽwarà kõ rupi. A'e wãnà kõ pè Janejare'e ayvu omojenu jenu erokwa.

2A'evo remẽ jakatu Juwão poromojãmorĩ mã'ẽ jimopã'ãga pè tui. Ãmẽ, “Janejare'e Remimuurerà teipõ Jesu”, ejaa ojenu ijupe. Manyvo ekoi maekwerà ojenu. Ajawyi wemimo'earà kõ mõ omono Jesu resa, 3kee te'i kupa:

– Juwão oremuu nekoty. Kee e'i imuu ene: “Janejare'e Remimuurerà uutà mã'ẽ rõmõ põ ene? Ãnĩ? A'e rõwã põkõ ma'e remẽ? A'e rõwã ene remẽ, ãmõ tè põ oromoa'utà ky'y?” te'i Jesu pè kupa.

4Ãmẽ aepo e'i kupa remẽ, e'i Jesu ijupe kõ:

– Manyvo nyvo jẽ aiko mã'ẽ rè pemã'ẽma. Pekwa awi peneminuwerà momewa Juwão pè. Ãmõ, penemisakwerà pemome'u ijupe. 5Emã'ẽ. Naeapyoi maekwerà eapyo ky'y. Ãmõ, etãmã jeapa maekwerà watapa ky'y. Ãmõ, itekorãnay ipisĩsĩma maekwerà kõ ikatupa. Ipisukyrĩ tesõ kupa ky'y. Ãmõ, nijapyai maekwerà kõ ijapya katu ky'y. Ãmõ, okãjã maekwerà kõ opoerapa mijẽ. Ãmõ, nimoma'ei mãe kõ pè Janejare'e ayvu e'eay ojenu okwa.#Isa. 61.1 6“Aje ywete” e'i eupe mãe kõ, owaray Janejare'e werekotà. [Pejivy peo ãmẽ aepo jaa momewa ijupe,] e'i Jesu.

Juwão rè Jesu oporegeta remẽwarà

(Rukasi 7.24-35)

7Ãmẽ Juwão remimo'earà kõ ojivy oo oõvijã pè aepo jaa momewa. Ãmẽ ojivy oo kupa ire, Jesu oporegeta aty wasu pè Juwão pewarà mõ. Kee e'i ijupe kõ:

– Tekoe'ãma kyty itõkõ peo [Juwão poromojãmorĩ mã'ẽ resa] ipi, e'i. Manyvo rã põ peo esa ipi? Manyvo e'i põkõ pejẽ ipi, tapejivy jivy tekoe'ãma kyty esa ipi? Iteetejẽ põ ijayvu ipi? Ãnĩ! Wayvu omotee remẽ, nijajapyakai ee ipi! e'i. Manyvore sipõ peo esa ipi? e'i ijupe kõ. 8Manyvo pejẽ põ ijupewarà mõ? “Tyru e'eay opypy mã'ẽ tè Juwão. A'e resa aatà”, pejẽ põkõ ipi? Ãnĩ! Naikoi a'evo mã'ẽ tekoe'ãma pè ipi! e'i. Wetã wasu pupe tè tui apijarerà ipi! e'i. A'evo rõwã Juwão. 9Manyvo rewarà mõ põ peo esa ipi? Janejare'e ayvu mojenuarà tè Juwão. Aja rewarà mõ tè peo esa ipi! [Aje, Emimuurerà vãea mojenuarà tè Juwão, e'i.] Ajawyi a'e ywesõ pirujẽ Janejare'e ayvu mojenuarà kõ wyi, e'i. 10A'e pewarà mõ tè Janejare'e kee e'ipa amãtejẽ Wemimuurerà rã pè wayvu mojenuarà rupi karamoe remẽ:

“Eayvu mojenuarà amono amãtejẽtà nerenone rupi, oromonotà remẽ.

A'e nevãea rã omojenu amãtejẽtà jane kõ pè erokwa, tanerãrõ kupa.

Tojipy'amokatupa amãtejẽ nerenone kupa”, e'i maekwerà.#Marak. 3.1

Aekwerà rupi katu tè Juwão uu. Janejare'e tè omuroka wayvu mojenuarà rõmõ peupe, e'i Jesu.

11E'i jẽ:

– Eenu rã'ĩ jẽsi eayvu aje ywete mã'ẽ rè, e'i. Nuvei 'ete Juwão poromojãmorĩ mã'ẽ rapijarà mõ pepõ'õ mè Janejare'e ayvu mojenuarà rõmõ mijã. Juwão ywesõ ijayvukasiay wete pirujẽ Janejare'e ayvu mojenuarà kõ wyi, ajaate age'e remẽ, e'i. Ajamã'ẽ kãramõ ekoty rewarà kõ erewarà omojenu tary ve kupa. Pirujẽ erewarà okuwa katutà ãmẽ kupa ky'y. Ajawyi a'e kõ remimojenu rã ywesõ ikasità Juwão remimojenuwerà wyi ky'y, e'i.

12– Juwão poromojãmorĩ mã'ẽ ypy pemotekokuwa, ajaate age'e remẽ. Emimojenu rupi ijatyray opota ywete Janejare'e koty rewarà kõ rõmõ ekoi kupa ky'y. Ajamã'ẽ age'e remẽ, jane kõ ovote opota ywete Janejare'e omoẽoka o'arà kyty, e'i Jesu. 13Karamoe remẽ itõkõ tãmõ Moisesi omome'u amãtejẽ Janejare'e Remimuurerà rã rewarà ikusiwa. Janejare'e ayvu mojenuarà kõ ve omome'u amãtejẽ ikusiwa. Ajaate Juwão ovãe. “Kuise'ẽ jẽ ovãetà”, e'i eupewarà mõ kupa, e'i Jesu.#Ruk. 16.16 14Juwão poromojãmorĩ mã'ẽ rè oporegeta teve Janejare'e ayvu mojenuarà kõ. “Tãmõ Eriasi vo mã'ẽ uu tarà mijẽ”, e'i itõkõ imojenuarà kõ karamoe remẽ. Juwão pewarà mõ aepo e'i. Ãwitõ Janejare'e ayvu mojenuarà tè Eriasi karamoe remẽ, ãwĩvo Juwão. Aje ywete aepo a'e.#Mat. 17.10-13; Mak. 9.11-13 15Tapeenu katu ikõ eayvu nẽ rõnõ, e'i.

16-17– Juteu age'ewarà kõ ojimotee tee mãe kõ tè. Ãwitõ ja'yrerà ojimorara remẽ, omotee tee wayvu kupa ipi. Ojiayvuvaja vaja kupa. Ãwĩvo age'ewarà kõ ekoi. Kee e'i ja'yrerà. [Poromoryoka mã'ẽ jajĩga ipe remẽ, ja'yrerà nopota'ãi.] “Jĩgarà poromoãgyo mã'ẽ tè oropota”, e'i titetà. [Poromoãgyo mã'ẽ jajĩga ipe remẽ, ajamã'ẽ ja'yrerà nopotai teve a'evoa.] “Jĩgarà poromoryoka mã'ẽ tè apota ky'y”, e'i tarà mijẽ. Ajawyi ãwitõ ja'yrerà omotee tee wayvu ipi, ãwĩvo ve Juteu kõ age'e remẽ. 18Kee e'i kupa. Juwão uu remẽ, nopotai kupa. “Orepy'a rupi katuwarà rõwã Juwão. Nojimi'ui rã'ĩ ipi”, e'i ijupewarà mõ kupa. Ãmõ, “Uvary aisiriri katu mã'ẽ ve no'ui ipi”, e'i ve kupa. “[Janejare'e Remimuurerà rõwã maevo Juwão.] Ãjãg ipy'a pupe mã'ẽ teipõ”, e'i tite ijupewarà mõ kupa. 19Ajaire ije yva pe wyi ajo ajimojane mã'ẽ rõmõ. Ajimi'u katu ipe ipi, Juwão vo rõwã. Ãmõ, uvary aisiriri katu mã'ẽ a'u ipe ipi, e'i. Pirujẽ ajimi'u ipe ipi. Ajamã'ẽ nivoi tekoua kõrijõ tè omo'y ere kupa ipi. Kee e'i kupa: “Janejare'e Remimuurerà rõwã ãwĩ. Emã'ẽ ee. Ojimi'u te'ĩte ipi. Ojimi'u ywete ity'aru teve ipi”, e'i ije kupa. Ãmõ, “Opota katu uvary aisiriri katu mã'ẽ o'u ipi”, e'i tite ve ije kupa, e'i. “Nivoi mãe kõ rè tẽ tesõ ojimory ipi. Tekoua repy moatyarà kõ rè tẽ tesõ teve ojimory”, e'i teve kupa. Noenu tari Janejare'e ayvu oromojenu remẽ kupa. Ajawyi aepo e'i kupa. Ore, orojikuwa katu Janejare'e ayvu mojenuarà kõ rõmõ oroiko. Oromojenu remẽ, jane kõ opota Janejare'e remimota rõmõ ekoi. A'evoa kõ rupi orojikuwa Janejare'e ayvu mojenuare'e kõ rõmõ tè ije, Juwão reve, e'i Jesu ijupe kõ.

Jesu “mokoi” e'i noerovija tari mãe kõ remẽwarà

(Rukasi 10.13-15)

20Oiko taa kõ mõ a'e pè. A'e pè ywesõ Jesu okasia omojisaoka ywete ipe. Ajamã'ẽ a'e wãnà kõ nojimosĩokai waiwererà rè. Ojimoane'e jẽ ee kupa. [Kapanão taa wãnà kõ a'evo ekoi. Ãmõ, Petesaita wãnà kõ. Ãmõ, Korasĩ wãnà kõ. Mokopejõ.] Ajawyi Jesu oporegeta kasi ijupe kõ. Kee e'i ijupewarà kõ mõ:

21– Mokoi Korasĩ taa wãnà kõ! Mokoi teve Petesaita taa wãnà kõ! Pepõ'õ mè ywesõ ainõ mãrãnà jikuwa e'ã kõ Janejare'e kasia rupi erokwa mijã. Ajamã'ẽ napeenui 'ete eayvu peiko. Janejare'e reminõ pemã'ẽ ipe. Peitypypyipa kuwasi peaiwererà mijã. Ekasia amojisaoka sõ Juteu rõwã mãe kõ pyterà rupi remẽ, “aje” e'i kuwa eayvu pè kupa mijã. Tiru wãnà kõ a'evo kuwa mijã. Ãmõ, Sitõ wãnà kõ a'evo kuwa mijã. Jypy remeve kuwasi ojimosĩoka kuwa waiwererà rè kupa mijã. Ojimome'u kuwasi Janejare'e rovake ee itypypyipaoka kupa mijã. Ãmẽ wãgyoa mojikuwapa mõ yvyu wapy kuwa kupa mijã. Tumujukwerà 'aryvo wapy kuwa kupa mijã. Ãmõ, tanemu 'aryvo. “Ma'e, janeaiwererà oitypypyipaokatà põ Janejare'e janewyi”? e'i kuwa wãgyo mõ kupa mijã.#Isa. 23.1-18

22– Ajawyi kee a'e pejẽ. Kãramõ Janejare'e poromoe'yi remẽ, pejẽ ywesõ pemomorijauokatà iwyi kõ, Sitõ wãnà kõ wyi, Tiru wãnà kõ wyi, e'i.

23– Mokoi a'e teve pejẽ, Kapanão wãnà kõ. Pejimoe'e teywete pekupa ipi. “Janejare'e pyri jaẽtà jaa”, pejẽ tite peiko. Niĩ, napeo ra'y'ãi. Jimomorijau wasua rena kyty tè peotà. Mokoi! Age'e pemotee ekojẽ kuwasi peneko mijã. Pejẽ ywesõ ekasia rè pemã'ẽ ipe. “Aje” napejẽi eayvu pè ajamã'ẽ. Sotoma taa wãnerà kõ sõ omã'ẽ penemimã'ẽgwerà rè remẽ, “aje” e'i kuwa kupa mijã.#11.23 Karamoe remẽ Janejare'e omoma Sotoma wãnà kõ tata wasu pè jimo'yjẽ, ijaiwererà kõ rewarà mõ. Jinõ. 19.24-28; Mat. 10.15; 11.24 Janejare'e nomoma kõ'ãi kuwa ãmẽ mijã, e'i. Oiko jẽ kuwa Sotoma taa age'e mijã. 24Ajawyi kee a'e eayvukasi rõmõ pejẽ. Ivoay wete kãramõ Janejare'e poromoe'yi remẽ, pejẽ ywesõ pejimomorijautà Sotoma taa wãnerà kõ wyi, e'i. A'e kõ ywesõ emiporijauesa rõmõtà pewyi, e'i Jesu ijupe kõ.#Ruk. 10.12

“Pejo ekoty pekane'õyo rõmõ”, e'i Jesu mã'ẽ

(Rukasi 10.21-22)

25Ameve Jesu oporegeta Uu Janejare'e pè. Kee e'i ijupe:

– Papa. Oromoe'e katu ipi, e'i. Yva pewarà kõ jarà tè ene. Ãmõ, yvy pewarà kõ jarà teve. Ovote ojimotekokuwavay ywe'e tite mãe kõ pè rõwã nerekoa nemojikuwaoka ipi. Notekokuwa ywe'ei mãe kõ pè tè nemojikuwaoka. Nepota tè a'evo neiko rewarà mõ a'evo nereko. 26“Ãwĩvotà areko kõ”, erepa. Ajawyi ãwĩvo nereko kõ, Papa, e'i Jesu Uu pè.

27Ãmẽ ajaire kee e'i wemimo'ekwerà kõ pè:

– Pirujẽ Papa ome'ẽ epo pè, eayvukasiay rõmõ taiko, e'i. Wekoa ve omojikuwaokapa teve eupe. A'e kõrijõ tè ekuwa katu Wa'yry rõmõ ipi, e'i. Ãwĩvo ve ije rõmõ'ĩte akuwa katu Papa, Ta'yry rõmõ. Ãmõ, amojikuwaoka ijupe mãe kõ ve okuwa ky'y, e'i.#Juw. 3.35; 1.18; 10.15

28E'i jẽ Jesu:

– Pãnakõ ipowyijay mã'ẽ vo 'ejẽ peikoa peupe. Peaivaray wete ee. Ajawyi, pejo ekoty pekane'õyo rõmõ, a'e pejẽ, e'i. 29Mãerã erupi tapeiko. Oromotekokuwavaytà ãmẽ. Ikatua rupi aiko mã'ẽ tè ije. Noporoerõarõi mã'ẽ tè ije. Poropãtavõ gatutà. Poropy'amopiryvypy katutà tè ky'y. 30Niwasu'ãi tekoua ãmẽ pejẽ, erekoa rupi peiko remẽ. Ãwitõ pãnakõ ivevujay mã'ẽ niwaypei jaupi ipi, ãwĩvotà, e'i Jesu.

Currently Selected:

Mateusi 11: oymNT

Highlight

Copy