Mateusi 5

Janejare'e poromoryoka mã'ẽ rewarà

(Rukasi 6.20-23)

1Ãmẽ Jesu aty wasu kõ rè omã'ẽ erokwa. Ajaire omo'e ypy kõ ky'y. Yvytyry yke pè wapy imo'e kõ. Ãmẽ emimo'earà kõ uu ipyri'ĩje'ẽ ojapyaka. 2Kee e'i Jesu poromo'e:

3– [Janejare'e opota katu owaray poroerekooka.] Kee pejẽ remẽ, owaray peikotà:

“Apota ipe Janejare'e remimota rupi aiko. Ajamã'ẽ evote ivo naiko kuwa'ãi”, pejẽ remẽ.

Aepo pejẽ remẽ tè kuwa Janejare'e owaray penerekotà penõvijã e'eay rõmõ penerekotà.

4Ãmõ, peja'o tesõ [peaiwererà rewarà mõ] remẽ,

ãmẽ sõsi Janejare'e pemopyte'utà wemimory kõ rõmõ.

5Ãmõ, Janejare'e rè penako'i penerekoarà rõmõ remẽ, owaray peikotà.

Penena emime'ẽgwerà pè peiko jẽtà ãmẽ.#Jĩg. 37.11

6Ãmõ, pepota katu Janejare'e remimota rupi ywesõ peiko remẽ,

emimory kõ rõmõ peikotà teve.#Isa. 55.1-2

7Ãmõ, poroporijauesa peiko ipi remẽ,

ãmẽ sõsi Janejare'e peporijauesa tary ve, owaray tapeiko.

8Ãmõ, pepy'a katu peiko ipi remẽ,

Janejare'e rè pemã'ẽtà kãramõ ãmẽ ky'y, emimory kõ rõmõ, e'i.#Jĩg. 24.3-4

9Ãmõ, ojikõ'õ ojeeve mãe kõ pemojimoryoka mijẽ ojeeve remẽ,

“Eãkarã kõ tè pejẽ, evo peiko rewarà mõ”, e'ità pejẽ wemimory kõ rõmõ.

10Ãmõ, Janejare'e remimota rupi peiko rewarà mõ pemomorijau kupa remẽ.

A'evo ipe remẽ tapenory jẽ peiko.

Janejare'e penereko katu jẽtà penõvijã e'eay rõmõ. Ajaate penereko karuarutà opyri wena pè. #1Pe. 3.14

11– Kee penereko ipe kupa remẽ, Janejare'e remimory kõ rõmõ peiko jẽtà. Penesa katu pejai erewarà mõ kupa remẽ. Ãmõ, pemomijarĩ sõ penereko erewarà mõ kupa remẽ. Ãmõ, iteetejẽ nivoi mã'ẽ omo'y teywete pene erewarà mõ kupa remẽ.#1Pe. 4.14 12A'evo penereko ai epe kupa remẽ, tapenory jẽ kõrijõ peiko ipi. Kee jaa rè tapeja'a. Ãwitõ karamoe remẽwarà kõ omomorijau ywete Janejare'e ayvu mojenuarà kõ ipi, aekwery vo ywete penereko kupa age'e remẽ. Ajawyi tapenory jẽ peiko. Janejare'e omokatupa amãtejẽ penena rã penenone. Ikatuay wete Janejare'e penerekotà, e'i Jesu poromo'e.#Mat. 23.34,37; J.K.R. 7.52

Sautu rè tè Jesu poromosã'ãga remẽwarà

(Maku 9.50; Rukasi 14.34-35)

13Jesu poromotekokuwa jẽ. Kee e'i:

– Janejare'e reruparà mõ peiko remẽ, ikatuay wete peikotà jane kõ pè ipi. Sautu rè tè poromosã'ãgatà tapekuwa sa'u. Ãwitõ sautu eekatu ja'umã'ẽ pupe jainõ ipi remẽ. Ãwĩvo ve jane kõ pè ikatuay wete tijaiko ipi. Ajamã'ẽ sautu nomoeei sõ janeremi'õ ky'y remẽ, manyvoa rã rõmõ rõwã kuwa sautu ãmẽ. Jamomo kõrijõ kuwa imono. Japãrõ pãrõ kuwa teve i'aryvo jakwa remẽ. Ãwĩvo kuwa pejẽ, Janejare'e reruparà mõ napeikoi sõ remẽ, e'i Jesu ijupe kõ.

14– Ãmõ, Janejare'e rekoa rupi peiko remẽ, poroyape mã'ẽ votà maevo sõ tite pejẽ. Penupi Janejare'e rekoa okuwatà kupa.#Juw. 8.12; 9.5

– Ãmõ, taa wasu vo sõ tite pejẽ. Ãwitõ taa wasu yvytyrapyte 'aryvo tui remẽ, jamã'ẽ gatu ee. Ke'ĩrõwã ojisa, ikujaukwerà pè tè tui rewarà mõ. Ãwĩvo ve pejẽ. Tapejikuwa Janejare'e koty rewarà kõ rõmõ peiko. 15“Tajikuwa e'ã”, tapejẽ tite e'ã. Nikatu'ãi kuwa ãwĩvo sõ remẽ. Ãwitõ poroyapea jamoeny remẽ, “Tojisa e'ã”, nija'ei ipi. Moma'e wyry pè rõwã jainõ ipi. Ena pè tè katu jainõ tojisa katu, toyape pirujẽ tetã wyry pè tui mãe kõ pè. Ãwĩvo ve pejẽ Janejare'e koty rewarà kõ rõmõ, tapejikuwa tè.#Mak. 4.21; Ruk. 8.16; 11.33 16Ãwĩvo remẽ owaray tapeiko jane kõ pè. Janejare'e rekoa rupi peikoa rè omã'ẽtà ãmẽ kupa. Oryvaytà ãmẽ pene omãjã kupa remẽ. Kee e'ità pene omãjã kupa: “Ãwĩvo kuwasi jane! Janejare'e ayvu rupi si jaiko teve mijã!” e'ità pene omãjã kupa, e'i Jesu ijupe kõ.#1Pe. 2.12

Ayvu ivo tekoua rewarà

17Jesu e'i jẽ poromo'e:

– Karamoe remẽ itõkõ Janejare'e oporegeta tãmõ Moisesi pè tomotekokuwa janerãmõi kõ ivo tekoua rewarà rè. Wayvu mojenuarà kõ pè ve e'i. Ajawyi, “Nikasi ijayvukwerà kõ janeupe ky'y”, na'ei. “Tamoma ijayvukwerà kõ”, na'ei. Aepo javo rõwã ajo. Janejare'e ayvu rè tè ajo pemotekokuwa, tapekuwa manyvo jaa põ. 18Tapeenu katu ikõ eayvu nẽ. Janejare'e okusiwaoka wayvu ivo tekoua rewarà tãmõ Moisesi pè mã'ẽ. Ajawyi mã jẽ rõwã jamoje'otà. Nijamotee ra'y'ãi teve. Yvy oiko jẽ remẽ, ãmõ, yva oiko jẽ remẽ, emikusiwarerà ikasi jẽtà. Nopa'ãi ikasia, ajaate yvy opa remẽ, e'i. Aje ywete aepo a'e, e'i.#Ruk. 16.17

19– Ajawyi Janejare'e ayvu ivo tekoua rewarà rupi ikõ peiko ipi nẽ, a'e pejẽ. Ãmõ kõ pè taperovijaoka teve. Ãmẽ sõsi Janejare'e orytà pene. “Aã kõ ywesõ eremĩgwai e'eay kõ rõmõ erena pè”, e'ità pejẽ. Ajamã'ẽ ayvu ivo tekoua rewarà rupi napeiko ywe'ei remẽ, Janejare'e naory'ãi pene. Peayvu rupi ãmõ kõ noiko ywe'ei ijayvu rupi remẽ teve. “Eremĩgwai e'eay” ne'i'ãi pejẽ a'evo peiko sõ remẽ. Napemoe'eoka'ãi ãmẽ. 20A'evo tãmõ Moisesi remikusiwarerà rè poromo'e mãe kõ ekoi ipi. Werovija maevo sõ tite tè kupa ipi. Ãwĩvo ve Pariseu kõ ekoi. Omovyvy ijayvukwerà kupa ipi. Ajamã'ẽ upi katu rõwã ekoi kupa. Ajawyi a'e kõ vo peiko remẽ, napeike'ãi Janejare'e pyri peiko, e'i.

“Tijajikõ'õ e'ã”, e'i Jesu mã'ẽ

(Rukasi 12.58-59)

21Jesu e'i jẽ poromo'e:

– Peenupa itõkõ manyvo eu penãmõi kõ pè maekwerà: “Tapejimijajuka e'ã ikenẽ. Porojuka mã'ẽ tijaraa jõvijã kõ po pè, tomomorijau ãmẽ kupa”, eu mã'ẽ, e'i.

[– Õ'õ, aje. Oroenu aepo jaa, e'i kupa.]

22– Ajare kee a'e teve, e'i Jesu. Tapejikõ'õ e'ã ojee, a'e pejẽ. Ipojy ai mã'ẽ tè ãwĩvoa. Ãwitõ ojimijajuka mãe kõ ipojy tè, ãwĩvo ve ojikõ'õ mã'ẽ. Ava mõ sõ janere ojikõ'õ teywete upa remẽ, jaraa tõvijã kõ po pè ime'ẽ teve rõnõ, a'e pejẽ.

– Ãmõ, poroerõarõ rã'ãga mã'ẽ ipojy ai tè. “Tekokuwa e'ã rõmõ tè rõwã ipõ neiko rõnõ!” e'i mã'ẽ. Ãmõ, “Moma'e rõmõ rõwã ene!” e'i mã'ẽ. Apijarà ywesõ ipojy ai tè. Aepo e'i mã'ẽ maevo Janejare'e omonotà tata wasu pupe tojimomorijau wasu,#5.22 Wayvu ai rupi porojuka mã'ẽ vo ãwĩ rapijarà rewarà mõ aepo e'i. e'i Jesu ijupe kõ.

23– Ajawyi kee a'e a'evoa rè. Penemime'ẽ rã Janejare'e pè temiapy rena pè peraa remẽ, kee tapejẽ rã'ĩ pejipy'amogeta: “Ava põkõ amojimõarõoka age'e?” tapejẽ rã'ĩ. 24Ãmẽ, “Õ'õ! A'e sipõkõ ere ojikõ'õ age'e”, pejẽtà. A'evo sõ remẽ, “Eremime'ẽ rã taity rã'ĩ aa ajimory mijẽ ee”, tapejẽ. Ãmẽ pevãe ipyri remẽ, kee tapejẽ ijupe: “Ojimorypa katu rõmõ jaikotà ojee ky'y”, tapejẽ. Ãmẽ tè kuwa pejivy penemime'ẽ rã me'ẽ Janejare'e pè ky'y. Pejimo'ãgatutà ime'ẽ ãmẽ ky'y, e'i.

25– Ãmõ, ma'e remẽ ava mõ ojikõ'õtà nere. Ajawyi uutà nereraa jõvijã kõ rovake, nivoi mã'ẽ tomo'y nere. A'evo remẽ terejimory amãtejẽ ee, jõvijã kõ pyri napevãeive remeve. A'evo remẽ tè maevo neporijauesatà. Nanereraa'ãi maevo ãmẽ ky'y, pejimorypa ojee rewarà mõ. Ajamã'ẽ napejimoryi amãtejẽ rã'ĩ sõ ojee remẽ, nereraatà neme'ẽ jõvijã kõ po pè. A'e kõ ãmẽ sota kõ po pè neme'ẽtà tanemopã'ã ky'y, e'i. 26A'evo sõ remẽ, neiko pukutà jimopã'ãga pupe. Nerejisyry'ãi a'e pupe wyi, ajaate nemoepypa katu nivoi neiko maekwerà. Aje ywete a'evotà. Ajawyi ikõ tapejimory amãtejẽ rã'ĩ ojee peiko ipi nẽ, a'e pejẽ, e'i Jesu ijupe kõ.

Jitupia rewarà

27E'i jẽ Jesu ijupe kõ:

– Kee itõkõ tãmõ Moisesi e'i maekwerà ojenupa pejẽ: “Tapejimomy'a e'ã. Penevewarà rè kõrijõ tè tapeiko tapejapakyry”, e'i maekwerà, e'i.#Jisyry. 20.14; T.M. 5.18

[– Õ'õ, oroenupa teve aepo, e'i epe kupa.]

28– Ãmẽ kee a'e ve pejẽ aepo jaa rè, e'i Jesu. Ãmõ wãivĩ rè pejitupi jẽ pemãjã remẽ, nikatui ãmẽ Janejare'e pè. Pejipy'amogetaa rupi peikopa ee. 29[Ajawyi kee a'e eayvukasi rõmõ pejẽ. Pepy'a pupe tè ojinõ ypy my'aa.] Ma'e remẽ wãivĩ mõ rè pemã'ẽ remẽ, pejitupità ee. Penea pupe pemã'ẽ ee remẽ a'evotà. Ajawyi nivoi peikotà penea rewarà mõ. A'evo sõ peiko remẽ, ikatu sa'u kuwa pejieakwaro amãtejẽ. Janejare'e rekoa napejavy ywe'e'ãi tite ãmẽ. A'evo remẽ tè kuwa napeo'ãi penea jeovai revejẽ jimomorijau wasua rena kyty, a'e pejẽ.#Mat. 18.9; Mak. 9.47

30– Ãwĩvo ve kee a'e pejẽ. Ma'e remẽ pepy'a ai rewarà mõ pepo pè nivoi peikotà. A'evo sõ peiko remẽ, ikatu sa'u kuwa pejipoeta amãtejẽ ity. Janejare'e rekoa napejavy ywe'e'ãi tite ãmẽ. A'evo remẽ tè kuwa napeo'ãi pepo revejẽ jimomorijau wasua rena kyty, e'i Jesu ijupe kõ.#Mat. 18.8; Mak. 9.43

Werekwarà wyi opoi mã'ẽ rewarà

(Mateusi 19.1-9; Maku 10.1-12; Rukasi 16.18)

31Jesu e'i jẽ poromo'e:

– Kee itõkõ eu teve maekwerà: “Ava mõ werekwarà wyi opoità remẽ, kareta tome'ẽ rã'ĩ ijupe opoia mojikuwaparà rõmõ”, eu maekwerà, e'i.#T.M. 24.1-4; Mat. 19.7; Mak. 10.4

[– Õ'õ, aepo jaa oroenupa ve, e'i epe kupa.]

32– Kee a'e aepo jaa rè, e'i Jesu ijupe kõ. Tapepoi te'ĩte e'ã ikõ penerekwarà wyi nẽ, a'e pejẽ. Ãmõ kwaima'e rè tui remẽ tè katu pepoi kuwa iwyi. Na'evoi remẽ, terepoi e'ã iwyi. [Tereau jẽ, e'i. “Ererekwarerà” ere ipe ijupe remẽ, Janejare'e pè nererekwarà rõmõ ekoi jẽ. Ajawyi] ajaire ãmõ kwaima'e wereko mijẽ sõ remẽ, Janejare'e naory'ãi ee. “Werekwarà rè rõwã ãwĩ ekoi mã'ẽ tè”, e'ità kõrijõ. Nepoi te'ĩte iwyi rewarà mõ a'evo kuwa, e'i Jesu ijupe kõ.#1Kor. 7.10-11

[ – A'evo si! e'i ãmẽ kupa.]

“Aje ywete mã'ẽ tijaporegeta ipi”, e'i Jesu mã'ẽ

33Ãmẽ e'i jẽ Jesu poromotekokuwa:

– Tãmõ kõ pè kee jaa ojenu mã'ẽ pekuwa teve: “Ava mõ Janejare'e pè, ‘Aje ywete a'evo arekotà’, e'i sõ remẽ, aje sikõ wayvu rupi toereko nẽ”, e'i maekwerà, e'i.#P.Moirõ. 30.2; T.M. 23.21

[– Õ'õ, aepo oroenu teve, e'i epe kupa.]

34– Ije kee a'e teve aepo jaa 'aryvo, e'i Jesu. [Peenu katu ikõ eayvu nẽ.] Nijamovy teywetei kuwa Janejare'e rerà janeayvu mokasia rõmõ mijã. Aje ywete mã'ẽ tija'e teãmã jane kõ pè, Janejare'e pè teve. Nijamovy teywete'ãi Janejare'e rerà a'evo jaiko remẽ.#Tku. 5.12; Mat. 23.22

– Peporegeta peikoa rã rè remẽ, aje tapeporegeta ipi. Tapewari e'ã. Tapemovy ipe e'ã peayvu mokasia mõ. Uve mirà kõ mõ, Janejare'e rerà omovy teywete mãe kõ. Kee e'i epe wayvu mokasia rõmõ: “Aje ywete aepo a'e Janejare'e reminu rõmõ”, e'i epe. Ajamã'ẽ pejẽ aepo tapejẽ e'ã. Janejare'e rerà tapemovy teywete e'ã. Ãmõ, Janejare'e rena, yva. 35Ãmõ, ipy rena, yvy. Ãmõ, Jerusarẽ rerà tapemovy teywete e'ã teve. A'e taa ojikuwa Janejare'e Remimuurerà rena rã rõmõ, Jõvijã wasu rõmõ uu remẽ.#Jĩg. 48.2 36Ãmõ, peapira ve tapemovy teywete e'ã teve peayvu mokasia rõmõ. Kee rewarà mõ. Peapira napemotee'ãi kuwa, e'i. Isĩ remẽ, napemopijõ mijẽ'ãi kuwa. Ipijõ remẽ, napemosuky'ãi kuwa teve, e'i.

37– Ajawyi kee a'e pejẽ. Aje mã'ẽ rupi kõrijõ tè tapeporegeta ipi.#5.37 Nijanewari remẽ, jane kõ werovijatà teãmã janeayvu ipi. Nijaeka tite'ãi janeayvu mokasia mõ ãmẽ. Ajawyi kee tapejẽ kõrijõ ikenẽ: “Aje, ainõtà”, tapejẽ kõrijõ. Ãmõ, “Aje, nainõ'ãi”, tapejẽ kõrijõ teve ipi. Pe'ĩ'yte tapeporegeta ipi. [Tapeporegeta aty e'ã ipi, e'i.] A'evo peporegeta aty ipi remẽ, nivoi mã'ẽ rõvijã votà tè pejẽ ãmẽ. Ãjãgai rõvijã votà tè pejẽ, e'i Jesu.

“Tijajiovaja e'ã janemoaiarà”, e'i Jesu mã'ẽ

(Rukasi 6.29-30)

38E'i jẽ Jesu ijupe kõ:

– Karamoe wãnà kõ ayvukwerà itõkõ peenupa: “Ava mõ sõ peneakwaro remẽ, peovajarĩ eakwaro. Penãimotoro remẽ, peovajarĩ ãimotoro”, e'i teve, e'i maekwerà.#Jisyry. 21.24; T.M. 19.21

[– Õ'õ, aje, orokuwa, e'i kupa.]

39– Ajamã'ẽ kee a'e pejẽ. Ava mõ sõ pemoai remẽ, tapeovaja e'ã apijarerà ipi. Ma'e remẽ ava mõ uu teywete penovapete remẽ, tapeovaja e'ã ãmẽ. Tapejirova kõrijõ ikõ penova rovajarà topete teve nẽ, a'e pejẽ. 40Ãmõ, ma'e remẽ ava mõ kee e'ità neupe: “Eme'ẽ ikõ neyru ije nẽ”, e'i. “Nereme'ẽi remẽ, nivoi mã'ẽ amo'ytà nere jõvijã rovake ãmẽ”, e'ità. Aepo e'i pejẽ remẽ, “Hoõ, eraa ãmẽ”, pejẽ kõrijõ ãmẽ ijupe. “Mõrijõ eyru eraa”, pejẽ ime'ẽ ijupe. 41Ãmõ, ma'e remẽ ava mõ kee e'i peupe remẽ: “Aã erepãnakõ ipowyijay mã'ẽ emovy eraa pe'ĩ kirometuru rõmõ”, e'ità pejẽ. Aepo e'i pejẽ remẽ, “hoõ” pejẽ kõrijõ ãmẽ ijupe. “A'e kupei kyty araatà nepota remẽ. Mõrijõ kirometuru rõmõ tesõ araatà nepota remẽ”, pejẽ eraa, a'e pejẽ. 42Ãmõ, kee tapeiko teve. Ava mõ [nimoma'ei mã'ẽ], “Nemoma'e mõ eme'ẽ ije”, e'i pejẽ remẽ, “hoõ” pejẽ kõrijõ ãmẽ ijupe. “Nema'e eme'ẽ rã'ĩ ije kuise'ẽ warà mõ rã'ĩ”, e'i remẽ, “hoõ” tapejẽ kõrijõ apijarerà pè. Ãwĩvo tapeiko ipi, e'i Jesu.

“Peãpã kõ tapeauvay ipi”, e'i mã'ẽ

(Rukasi 6.27-28,32-36)

43E'i jẽ Jesu poromo'e:

– Kee eu mã'ẽ itõkõ peenu, karamoe wãnà kõ ayvukwerà: “Penetãrã pejimorypa kõ tapeauvay. Ãpã kõ ãmẽ tapeau e'ã”, e'i mã'ẽ.

[– Õ'õ, aepo jaa oroenupa teve, e'i epe kupa.]

E'i Jesu ãmẽ:

44– Ajamã'ẽ kee a'e pejẽ, e'i Jesu. Peãpã kõ ve tapeauvay, a'e pejẽ. #Rom. 12.20 Ãmõ, tapeporijauesaoka kõ Janejare'e pè, a'e pejẽ. 45A'evo peiko remẽ, pejikuwatà Papa yvapewarà ãkarã rõmõ peiko. Emã'ẽ! Kwaray Janejare'e oinõ pirujẽ jane kõ pewarà mõ tojisa. Ivo mãe kõ pè kõrijõ tè rõwã oinõ. Pirujẽ nivoi mãe kõ pè teve. Ãwĩvo ve ãmãnà omogyoka teve pirujẽ jane kõ pewarà mõ. Ivo katu mãe kõ pewarà mõ. Ãmõ, noerovijari mãe kõ pè teve. Oja'a katu Janejare'e jane kõ rè ipi. Ajawyi eruparà kõ rõmõ tapeiko.

46– Penauparà kõ kõrijõ tè rõwã tapeau. Peãpã kõ teve tapeau. Penau mãe kõ kõrijõ tè peau remẽ, manyvoa rã mõ rõwã kuwa Janejare'e pemoe'e ãmẽ. Nivoi mãe kõ wau teve wauparà kõ ipi. 47Ãwĩvo ve pejimorypa kõ pè kõrijõ tè peporegeta katu ipi remẽ, ni'ei! Janejare'e rupi tekoua nokuwai mãe kõ ve tesõ ojimorypa pè oporegeta katu ipi, e'i. Ajamã'ẽ Janejare'e opota pejimory ojee, pirujẽ. Ãmẽ sõsi Janejare'e orytà pene ky'y, e'i. 48Ikatuay wete Papa yvapewarà. Owaray poroereko ipi. Ajawyi eruparà mõ tè ijãkarãgwerà kõ rõmõ tapeiko, a'e pejẽ, e'i Jesu.

Currently Selected:

Mateusi 5: oymNT

Highlight

Copy