Maku 1

1[Maku remikusiwarerà.] Janejare'e ayvu e'eay akusiwatà tapekuwa, Ta'yry Jesu Kiristu rewarà. A'e rekokwerà akusiwatà tapekuwa.

Juwão poromojãmorĩ mã'ẽ rewarà

(Mateusi 3.1-12; Rukasi 3.1-18; Juwão 1.19-28)

2[Janejare'e omuutà Wa'yry jane kõ pytery pè remẽ, ivãea rã mojenuarà omuu amãtejẽ enone rupi, ãwisõ jane kõ toãrõ amãtejẽ Jesu kupa. Juwão eu ivãea rã mojenuarà pè.] Juwão rewarà Janejare'e omome'u amãtejẽ karamoeve wayvu mojenuarà Isajasi pè. Kee e'i amãtejẽ Wa'yry pè maekwerà omojenu Isajasi pè tokusiwa:

“Eayvu mojenuarà mõ amonookatà amãtejẽ nerenoneve, oromonotà remẽ”, e'i.

“Nevãea rã omojenu amãtejẽtà jane kõ pè erokwa, tanerãrõ jẽ kupa”, e'i.#Marak. 3.1

3Kee e'i teve Janejare'e ayvu mojenuarà Juwão pewarà mõ:

“Tekoe'ãma rupi ava mõ Janerõvijã ywete rewarà omojenutà erokwa.

Wapukai tesõtà ivãea rã mojenu erokwa. Kee e'ità imojenu:

‘Janerõvijã ywete ovãerĩ!’ e'ità.

‘Peaiwererà ikõ tapeitypypyipaoka amãtejẽ Janejare'e pè enoneve nẽ!’ e'ità.

‘Ãwitõ pee nikatui remẽ, jamokatu amãtejẽ imoterẽ gatu mõropãrà kõ renone ipi.

Ãwĩvo ve tapejipy'amokatuoka amãtejẽ Janejare'e pè, Janerõvijã ywete renoneve,’ e'ità imojenu”, e'i amãtejẽ maekwerà.#Isa. 40.3

Aekwerà rupi katu tè a'evo ajaire Juwão ekoi. 4A'evo tè Juwão uu tekoe'ãma pè. Tena pè rõwã uu. Kee e'i imojenu jenu Juwão:

– [Pejipy'amogeta ikõ peneko rè age'e nẽ, e'i.] Pejimosĩoka ikõ peaiwererà rè nẽ. Pejimome'u ikõ Janejare'e pè peaiwererà reitypypyipaoka nẽ. Peporijauesatà ãmẽ ky'y. “Awyjepa” e'ità peaiwererà kõ pè. Ajare pejo ekoty toporomojãmorĩ ãmẽ ky'y, e'i Juwão jane kõ pè.

5A'evo remẽ jane kõ mõa'ãrõwã oo oo tekoe'ãma kyty. Ojimoaty ipyri ijayvu renu kupa. Juteja yvy rupi wyi oo oo kupa. Ãmõ, Jerusarẽ taa pe wyi oo kupa. A'e kõ “aje ywete” e'i ijayvu renu kupa. Ojimome'u Janejare'e rovake ãmẽ kupa ky'y. A'evo ekoi mãe kõ Juwão omojãmorĩ yy Jotão pupe ãmẽ ky'y.

6Kee Juwão ekoi. Teima raawerà jimõjãgwerà tè opypy oyru rõmõ ipi, kameru eu mã'ẽ raawerà tè. Oku'ayru rõmõ teima pirerà sikãgwerà tè opypy teve. Emi'õ rõmõ taparara kõrijõ tè o'u ipi. Ãmõ, eirà ryapirà o'u ipi. A'e kõ kõrijõ o'u ipi.#1.6 Janejare'e ayvu mojenuarà Eriasi a'evo karamoe remẽ. Aekwerà rupi katu Juwão ekoi. 2To. 1.8; Mak. 9.11-13

7Kee e'i Juwão imojenu jane kõ pè ipi:

– Janejare'e Remimuurerà tẽ tesõ uutà erakypy rupi, e'i. A'e sõsi e'arà kytywarà rõmõtà tè ekoi ky'y. Ije ãmẽ emĩgwai rõmõgà tè aiko. 8Ije, yy pupe kõrijõ tè poromojãmorĩ, [peaiwererà reitya mojikuwaparà rõmõ!] Janejare'e Remimuurerà sõsi Janejare'e 'Ãg tẽ tesõ omoigeokatà pepy'a pupe! e'i erokwa.#J.K.R. 1.4; 2.1-4

Jesu ojimojãmorĩoka Juwão pè remẽwarà

(Mateusi 3.13-17; Rukasi 3.21-22)

9Ãmẽ Jesu oposiko ypytà Janejare'e ayvu rè poromo'e remẽ, Nasare taa miti pe wyi rã'ĩ uu. Karireja yvy kyty wyi. Yy Jotão gyty uu, Juwão tui mã'ẽ gyty.

– Emojãmorĩ rejupa, e'i Juwão pè Jesu.

Ãmẽ Juwão omojãmorĩ. 10Ãmẽ yy pupe wyi Jesu oẽtà remeve, 'arà ojiovapyjavo yva kyty wyi. A'evoa rè Jesu omã'ẽ. Janejare'e 'Ãg rè tẽ tesõ omã'ẽ. A'e pykau vo 'ejẽ owyjy uu i'aryvo. 11Ãmẽ yva pe wyi Janejare'e oporegeta ijupe imuu. Kee e'i imuu:

– Era'yry tè ene, e'i. Eremiauvay tè ene. Epy'a rupi katuwarà tè ene. Eroryvay nere, e'i imuu.#Jinõ. 22.2; Jĩg. 2.7; Mat. 12.18; Mak. 9.7

Ãjãgai rõvijã omoãkwa'ã tarepe Jesu remẽwarà

(Mateusi 4.1-11; Rukasi 4.1-13)

12Ameve Janejare'e 'Ãg omono Jesu tekoe'ãma kyty. A'e rupi Jesu ekoi rã'ĩ. 13Opyta puku sa'u rã'ĩ a'e rupi iko. 40 'arà rõmõ tesõ ipõ a'e rupi ekoi Jesu.

A'evo ekoi remẽ, ãjãgai rõvijã oo ipe ikoty, Satanasi eu mã'ẽ. A'e omoãkwa'ã tarepe Jesu ereko. [Opota ipe ojimojõvijãoka Jesu pè mijã. Ajamã'ẽ Jesu nomojõvijã'ãi.] Uve teve moma'e ojãrõ mãe kõ a'e rupi. Ajamã'ẽ Janejare'e remĩgwai yvapewarà kõ uu Jesu kyty ipãtavõ. Oja'a ee kupa ipi.

[Ãmẽ ajaire Jesu ojivy oo wena kyty.]

Jesu poromo'e ypy remẽwarà

(Mateusi 4.12-17; Rukasi 4.14-15)

14Ãmẽ ajaire kovenatu Eroti omopã'ãoka Juwão poromojãmorĩ mã'ẽ. A'evoa ojenu Jesu pè. A'evo paire Karireja yvy kyty ojivy oo, [ke'ĩrõwã sa'u jõvijã rena pe wyi].#Mak. 6.17-20 A'e yvy rupi Jesu ekoi ãmẽ. Janejare'e ayvu e'eay rè poromo'e iko ipi. 15Kee e'i imojenu:

– Age'e si Janejare'e pepytery pè ekoi ky'y, e'i. Opota penereko katu penõvijã rõmõ, e'i. [Ajawyi tapejipy'amogeta amãtejẽ peneko rè age'e, e'i.] Tapejimosĩoka peaiwererà rè. Tapejimome'u amãtejẽ Janejare'e pè peaiwererà reitypypyipaoka. Janejare'e ayvu e'eay ikõ tapeenu katu nẽ. “Aje” tapejẽ ijupe, e'i Jesu imojenu ijupe kõ.#Mat. 3.2

Jesu opyteporo ypy wemimo'earà rã kõ remẽwarà

(Mateusi 4.18-22; Rukasi 5.1-11)

16Ãmẽ ãmõ 'ary pè Jesu wata iko pãranã reme rupi. Karireja eu pãranã rerà pè. A'e rupi wata iko remẽ, opyteporo ypy wemimo'earà rã kõ. Kwaima'e kõ mõ wesa. Mõrijõ wesa, teke'yry revejẽ. A'e kõ pira mo'auta omomo momo ereko mãe kõ. A'e teke'yry pè Simão eu. Imõmirĩ pè Aãtere eu.

17Kee e'i Jesu ijupe kõ ãmẽ:

– Ja'e jẽsi erupi! e'i. Poropyteporopa eremimo'earà kõ rõmõ tapeiko, e'i ijupe kõ. Ajaire poromonookatà Janejare'e ayvu tapemome'u jane kõ pè, e'i Jesu ijupe kõ.

18Ameve pira mo'auta oity tepe'yte oo Jesu rupi kupa. Awyje oo upi kupa.

19Ajaire a'e pe wyi oo jẽ Jesu. Ãmõ kõ wesa mijẽ. Teke'yry wesa, imõmirĩ reve. A'e kõ yarà pupe wapy upa. Pira mo'auta omokatu kupa upa. Tiaku eu teke'yry pè. Imõmirĩ pè Juwão eu. Uu reve tui kupa. Semeneu eu tuu pè. [Ãmõ, tuu remĩgwai kõ ve ipyri kõ tui.] 20Ameve Jesu e'i Tiaku pè. Imõmirĩ pè ve e'i:

– Ja'e tuve erupi! e'i.

“Hoõ” e'i kupa. Ameve ojisyry oo upi kupa. Awyje oo kupa. Tuu ãmẽ opyta, wemĩgwai kõ reve. [A'evo Jesu opyteporo ypy wemimo'earà rã kõ remẽ.]

Jesu omokatu ãjãgai omo'ãgai mã'ẽ remẽwarà

(Rukasi 4.31-37)

21Ãmẽ Jesu oo jẽ iko, wemimo'earà kõ reve. [Kejõ oo upi mãe kõ: Aãtere. Simão. Tiaku. Juwão. Mokopejõ oo upi kupa.] Oo ovãe Kapanão taa kyty kupa. A'e pè opyta rã'ĩ kupa. Ãmẽ jimoava 'arà mẽ Jesu oo Janejare'e ayvu rè jimo'ea retã wyry pè. A'e pè poromo'e ypy Jesu. 22Ãmẽ ijayvu rè ojapyaka mãe kõ wenu takatu ijayvu. Omoãgyo kõ tesõ enu. Kee e'i kupa:

– Haa! Ãwĩ ywesõ otekokuwavay Janejare'e ayvu rè poromo'e! Nãwĩvoi tãmõ Moisesi remikusiwarerà rè poromo'e mãe kõ poromo'e remẽ ipi! Jesu ywesõ ijayvukasiay iwyi kõ! e'i kupa.#Mat. 7.28-29

23Ãmẽ jakatu a'e tetã wyry pè kwaima'e mõ uu oike. Ãjãgaiwerà omo'ãgai mã'ẽ tè a'e kwaima'e. A'e Jesu rè omã'ẽ remeve ãjãgai wapuka pukai ipupe upa. Kee e'i wapuka pukai rõmõ:

24– Jesu, Nasare taa wãnà! e'i. Manyvotà põ orerereko nejupa? e'i. Oremoma tè sipõ nejo? e'i. Orokuwapa ava põ ene! Janejare'e Remimuurerà ivo katu teãmã mã'ẽ tè ene! e'i wapukai rõmõ Jesu pè kupa.

25Ãmẽ Jesu ijayvukasi ijupe kõ:

– Tapepu e'ã ikõ ije nẽ, e'i. Py'ajẽ ikõ pejisyry aã kwaima'e pupe wyi peo nẽ! e'i Jesu ijupe kõ.

26Ameve ãjãgaiwerà omoapapyu tesõ kwaima'e ity yvy pè tomãnõ mãnõ rã'ĩ tesõ. Ameve eamamai oẽ oo iwyi ky'y.

27Ojimonyi tesõ jane kõ omãjã a'e rè. Ãmẽ ojimogeta ee kupa. Kee e'i ojiupe kupa:

– Manyvo põ wereko imokatu? e'i kupa. Emã'ẽ! Ijayvukasiay wete Jesu. Oẽ ãjãg kõ 'arà kyty. “Eẽ” e'i remeve oẽ oo kupa, ijayvu rupive, e'i kupa. Nijamã'ẽi apijarà rè ipi, e'i e'i ojimopirai rõmõ iko kupa.

28Ãmẽ a'evoa py'awarà mõ Jesu rewarà omojenu jenu erokwa kupa, Karireja yvy rupi. [Ke'ĩ ke'ĩrõwã omojenu jenu kupa.]

Jesu omokatu Simão tija remẽwarà

(Mateusi 8.14-15; Rukasi 4.38-39)

29Aja paire Jesu ojisyry a'e tetã pupe wyi, Janejare'e ayvu rè jimo'ea retã mè wyi oo. Wemimo'earà kõ reve ojisyry oo. Tiaku reve. Ãmõ, Juwão reve. Ameve Simão kõ retã gyty oo oike kupa. 30A'e pè Simão tija ikaray sikaepo upa. Okea pè o'au upa. Ãmẽ Jesu ovãe remẽ, a'evoa ojenu ijupe. 31Ajawyi Jesu oo ikoty remẽ. Opopyy imopõ'ã. Ameve py'awarà mõ ikaray okwapa iwyi. Opoera katu ajaire. A'e ajaire Jesu kõ rè oja'a. [Oo oposiko emi'õ rã rè to'u kupa ky'y.]

Jesu poromokatu iko remẽwarà

(Mateusi 8.16-17; Rukasi 4.40-41)

32Ajaire pãtõma remẽ, a'e taa wãnà kõ weru eru itekorã mãe kõ Jesu pè tomokatu kõ. Ãjãgai kõ ojimoemija ee mãe kõ ve weru eru kupa. Pirujẽ weru eru kupa. 33Ojimoaty tesõ Simão retã rova pè kupa. 34Ãmẽ Jesu omokatu kõ, ijãvijõ kõ jẽ. Iteetejẽ itekorã mãe kõ omokatu Jesu. Ãjãgai ojimoemija ee mãe kõ omokatu teve. A'evo remẽ Jesu nomomoregetaokari ãjãgai kõ imono, a'e kõ okuwa Janejare'e Ra'yry tè Jesu rewarà mõ.#1.34 Jesu nopotai ãjãg kõ omomewarà kõ rõmõ, nivoi kupa rewarà mõ.

Jesu oporegeta Uu pè remẽwarà

(Rukasi 4.42-44)

35Ãmẽ ji'iveay Jesu opõ'ã oẽ Simão retã pupe wyi oo. Tekoe'ãma kyty oo. A'e pè oporegeta rã'ĩ Uu pè, Janejare'e pè. 36Oo remẽ, Simão kõ oke jẽ upa. Ajaire omã'ẽ kupa remẽ, nomã'ẽi ee kupa. Ajawyi oo eka kupa. 37Ajaate wesa kupa ky'y. Kee e'i ijupe ãmẽ kupa:

– Pirujẽ jane kõ nereka tite iko kupa, e'i kupa.

38Ãmẽ Jesu e'i ijupe kõ:

– Akuwa! e'i. Aã tena wãnà kõ kõrijõ rõwã ajamã'ẽ amo'età Janejare'e ayvu e'eay rè. Ãmõ ãmõ tena wãnà kõ amo'e tevetà aiko, e'i. A'evoa rõmõ tè ajo ike! Ja'e jẽsi ajawyi ãmõ tena kõ gyty age'e ky'y! e'i ijupe kõ.

[“Hoõ” e'i oo upi ãmẽ kupa.] 39Ãmẽ Jesu oo jẽ Karireja yvy rupi iko. A'e rupi poromo'e Janejare'e ayvu rè jimo'ea retã kõ wyry rupi ipi. Ãjãgai kõ omoẽ moẽ teve jane kõ pupe wyi imono wayvukasia rupi ipi. A'evo Jesu ekoi ipi.#Mat. 4.23; 9.35

Jesu omokatu ipisĩsĩma mã'ẽ remẽwarà

(Mateusi 8.1-4; Rukasi 5.12-16)

40Ãmẽ ajaire kwaima'e mõ ovãe Jesu pyri. Ipisĩsĩma mã'ẽ a'e.#1.40 Ipojy ai tè ipisĩsĩma ipi. Nokwapai 'ete iwyi mã'ẽ tè. A'e ojimoenãpa'ã Jesu rovake ojiporijauesaoka. Kee e'i Jesu pè:

– Jõvijã, akuwa emokatu kuwa nekasia rupi rejupa nepota remẽ, e'i Jesu pè.

41Ãmẽ aepo e'i remẽ Jesu oporijauesavay. Opojai ikoty ojipy ee. Kee e'i ijupe:

– Hoõ! Apota. Tanekatupa awi nepirà rupi, e'i ijupe.

42Ameve okwapa ipisĩsĩma iwyi ky'y. Ikatupa ky'y. 43-44A'evo paire kee e'i Jesu ijupe:

– Teremome'u e'ã rã'ĩ nemokatuawerà erokwa, e'i. Ekwa rã'ĩ Janejare'e pè oporegeta mã'ẽ gyty, tomã'ẽ nere, e'i. Ãmõ, nemokatuawerà repy eraa ime'ẽ teve ijupe, e'i. Ma'e, tãmõ Moisesi remikusiwarerà rupi katu ikõ neky'a'oa repy eme'ẽ ikõ ãmẽ ijupe nẽ. A'e tè, “Niky'ai ãwĩ ky'y”, e'ità neupe, ãmõ kõ ve tokuwa, e'i Jesu ijupe.#Tek. 14.1-32

45Aepo e'i epe Jesu ipisĩsĩma maekwerà pè. Ajamã'ẽ omome'u jẽ omokatuawerà. Ojisyry Jesu wyi remeve omome'u jẽ erokwa. Maipe oo remẽ omome'u me'u jẽ erokwa. Pirujẽ jane kõ pè omome'u erokwa. Ajawyi aepo jaa wenu kupa remẽ ywesõ itekorã mãe kõ oo oo Jesu kyty ojiporijauesaoka ijupe ky'y. A'evo remẽ manyvo ne'i'ãi tesõ Jesu poromo'e ky'y. Ajawyi nojikuwai tè katu oo tena kõ pè ky'y. Tena kõ kupei rupi tè ekoi ipi. A'e pè poromo'e ipi. Ajamã'ẽ jane kõ oo oo jẽ tesõ esa ipi. Pirujẽ taa taa kõ pe wyi oo esa kupa ipi.

Currently Selected:

Maku 1: oymNT

Highlight

Copy