YouVersion Logo
Search Icon

San Marcos 15

15
Jesús‑ni biso due arlo Pilato‑ni
(Mt. 27:1-2, 11-14; Lc. 23:1-5; Jn. 18:28-38)
1Dila tteba bitupa ka nu loni ge ka bixxudiha lhe ka benneola ge ka nu Israel‑ni lhe, anágaba ka nu rule'ekinna ka benne nu ra lo bia bennabi bodha'an Moisés‑ni lhe adíru ka nu ruinkana elhuxtisi gekaniha lhe, nianna beda'a ro'okani nna bexxigakana Jesús‑ni nna chekane gwaga'akane lo Pilato‑ni. 2Pilato‑ni nna unnaba tisane, rane:
―¿Si lu nuní ankalu nu rinnabia ge ka benne Israel‑ni?
Labie nna bekabie geni, ree na:
―Luba chi ra deki nuná ankaa xa.
3Kumu ka nu loni ge ka bixxudiha ixeba nu rusiakana ikie, 4de nuha nna bedennaba tisa Pilato‑nie attu libe, rane:
―¿Si lagwa gwekabilu? Biyúruga ixeba nu rusia ka nuní ikilu.
5Ttaka Jesús‑ni nna labí bekabie geni. De nuha nna Pilato‑ni rugía ya'abana de labí rekabie.
Beda'a ro'okani uttikana Jesús‑ni
(Mt. 27:15-31; Lc. 23:13-25; Jn. 18:38–19:16)
6Kua risiaba laní Pascua rodilaa Pilato‑ni ttu ka nu tee lisiyya. Nu rakaba le ka benne olhána. 7La'aniagaba tee ttu nubiyú lisiyya lána Barrabás. Tena lisiyya len adí ka luesini. Lakana bese'e disakana lo ka uxtisi nna benkana elhutti. 8Nianna ixeru ka benne bisinke ata do Pilato‑ni nna unnabake lenna kini odilána ttu nu tee lhe'e lisiyya attiba labinna ruinna ttu ttu ida. 9Nianna tti bekabi Pilato‑ni gekani, rana kana:
―Lebi'i benne Israel, ¿si gwa raka lele odiláya nu rinnabia gele‑ni?
10Aníha ra Pilato‑ni kumu rite dábinna deki ka nu loni ge ka bixxudiha, de ritisibakinna Jesús‑ni nna gwaga'akane loni. 11-12Nianna tti redea Pilato‑ni kana attu libe:
―Nianna, ¿bí raka lele udhakaa nu tenle láni nu rinnabia gele?
13Lakana nna ribesi'akana idisa, rákana:
―¡Betá nuná lo ya kurusi!
14Ttaka Pilato‑ni nna rana kana:
―¿Beaka? ¿Bí nu satsa ben nuní?
Ttaka lakana nna adíla idisa ribesi'akana, rákana:
―¡Betá nuná lo ya kurusi!
15Ttaka Pilato‑ni, de ruinna kini eya'an tsena len ka benne, aníoka nna bolhána Barrabás‑ni beria nuha lisiyya. Nianna tti udhelha Pilato‑ni bekulhakana Jesús‑ni. Iki de nuha nna botene lasi nákani kini utákane lo ya kurusi.
16Nianna che ka soldaduha bie lali'a guskadu ata do nu rinnabia ge Roma‑ni. Niha bottupakana iyá xea ka soldaduha 17nna tti begukukane ttu lari xiná chulha. Nianna benkana ttu corona yetsi nna ulu'ukana ikie 18nna udulo ttebakana delo tisaba rinnekana idisa, rákane:
―¡Xxeni ra lelu xa nu rinnabia ge ka nu Israel!
19Nianna tti riginkana ikie len ttu vara ge nu rinnabia lhe ruttuttu xxenkani loe nna tti riyettakana rudú xibikani arloe. 20Iki de chi bedhaka xiikaneha, nianna tti bebeakana latie lari xináha nna bogukukane ka xoeha, nianna tti uleakane ki utákane lo ya kurusiha.
Jesús‑ni betákane lo ya kurusiha
(Mt. 27:32-44; Lc. 23:26-43; Jn. 19:17-27)
21Ka soldaduha nujakinna Jesús‑ni ya kurusiha. Lo neda dia lenkaneha, niha beti'akana Simón ge lhe'esi Cirene, xxudi ka Alejandro‑ni lhe Rufo‑ni lhe. Benneha dedábie ugíe lhe'exxi. Nianna bedo doelha ka soldaduha bie kini uje kurusi ge Jesús‑ni. 22Nianna tti dia lenkana Jesús‑ni nna bisin lenkane ttu latti ata tee láni Gólgota. (“Gólgota” dienna innána: Bega Iki Nu Yatti.) 23Niha begwekane vinu chixxina nu xixxi tee láni mirra, ttaka lee nna labí uka lebie i'iye vinuha. 24Nianna tti betákane lo ya kurusiha. Ka soldaduha nna bedelhakana suerti kini elha'akana ka xo Jesús‑ni kini ula'ana nú ka xoeha eche ttu ttukana.
25Retin jaa dila nuha betákane lo ya kurusiha. 26Nianna tti betákana ttu breta xekie ata rigixxi'a bí lo ni'a ge betákane lo ya kurusiha. Lo bretaha dia ra: “Nuní ankana nu rinnabia ge ka benne Israel.” 27Betágabakana a chupa ka nubiyú lo ka ya kurusi. Ka nuha benkana ubana. Ttúna betákana daka ná banie nna attuna nna betákana daka ná yattie. 28[Aníha ki gwado tisa ge nu ra lo ka yetsi ge Tata Do Yebáha, ata dia ra: “Betselabakane len ka nu ruin tulhaha.”]
29Ka nu rite ata taabieha nna ruttába ikikani rulisa xxattakane, rákana:
―¡Kaxa! ¡Lu ralu deki ottampalu yotu‑na nna delo tsunna ubisaba chi elhidhalu na! 30¡Ganna gwalíginlu nna titúbalu benchu ki lhaalu lo ya kurusi‑na nna beyadichu!
31Aníha‑gaba ruin ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni, rulisa xiikane nna ra luesikani:
―Ki ka benne subi gwa bodilána, ttaka lana nna a raka geni lhaa titúbana lo ya kurusi‑na. 32¡Ki rana deki ankana Cristu nu rinnabia ge ka benne Israel‑ni, gwelha eyadichuna ki ilenri'i, kini anáchu nna ri'i tsia leri'i!
Anágaba axtagaba ka nu taa len Jesús‑ni lo ka ya kurusiha rulisagabakane.
Jesús‑ni uxíbie elhutti lo ya kurusiha
(Mt. 27:45-56; Lc. 23:44-49; Jn. 19:28-30)
33Tti chi begwena retin tsi'inuha (12) itúba yiesi lo yu‑ni bechulha nna axtaliba retin tsunnaha beyani. 34La uraha‑gaba nna uresi'a Jesús‑ni itú lebie, ree:
―Eloi, Eloi, ¿lama sabactani? ―Tisa‑ni dienna innána: Tata Do Yebaa kia, Tata Do Yebaa kia, ¿beaka rudhá ikilu neti?
35Adí ka nu se'e niha, tti biyienkinna nu unneeha, nianna ra luesikani:
―Gwaludoruga nagale, chi raxina profeta Elías‑ni.
36Nianna tti biresu tteba ttu nubiyú du niha gwaxxína ttu xunu nna bodibidhana nuha len vinu idí, nna tti bexxikana nuha lo ttu iyyaxtila nna bedona nuha ro'o Jesús‑ni ki i'iye. Nianna rana:
―Naa la taana. Ulannichuri'i si gwita Elías‑ni echidana na lo ya kurusi‑na.
37Jesús‑ni nna uresi'e idisa, nianna utti ttebe. 38Looraha nna bireda lari daa lhe'e yotuha, chubaa tí uka nuha biredana. Udulo xekini nna axtaba xani'ani bireda. 39Soldadu nu baninna ttu gayua (100) ka soldadu ge Roma‑ni, nuha duna gaxxaba arlo Jesús‑ni nna tti biyieninna uresi'e lhe tti bilenna gasina uttie, nianna tti unnena, rana:
―Nubiyú‑ni gwalíba anka nuní Xi'in Tata Do Yebáha.
40Se'egaba ttu chupa ka benne nuila, idittuliba se'eke rulannike. Lhe'e ka benneha sela María Magdalena lhe Salomé lhe. Niha‑gaba du María nan ge José‑ni lhe Jacobo nu gwexxaha lhe. 41Ka benne nuila‑ni nuha gwanalhake Jesús‑ni lhe bete náke lenbie tti rekie daka Galilea‑ni. Ata se'eke gwelanniha, niha‑gaba se'eru ixe ka nuila ka benne ugía lenke bie Jerusalén‑ni.
Jesús‑ni bekatsike bie
(Mt. 27:57-61; Lc. 23:50-56; Jn. 19:38-42)
42Tti chi ulha sá viarna, la sáha nuha chi rese'e tse ka benne Israel‑ni ki udaxxuke sá reyaka lekeha, 43la'ania nna ugía José benne lhe'esi Arimatea, benneha labí usinie gwatte'e lo Pilato‑ni kini rennabe echide Jesús‑ni lo ya kurusiha. José‑ni anke ttu ka nu resá lagwi ge ka nu runi elhuxtisi ge ka benne Israel‑ni lhe anágaba dogabe ribede isia sá innabia Tata Do Yebáha. 44Pilato‑ni uka ttebinna tti binana deki chiba utti Jesús‑ni. Nianna uxi ttebana soldadu nu baninna adí ka soldaduha ki unnaba tisana nuha ganna si gwalí chi uttie. 45Tti utixxi'en soldaduha na deki gwalíba chi utti Jesús‑ni, nianna bote ttebane len José‑ni.
46José‑ni nna uyo'ona ttu lari sibi nna tti bechidana Jesús‑ni nna bottesine lhe'e lariha, nianna gwakatsine lhe'e ttu baa uche'enna lhe'e ttu íyya daa niha. Nianna tti bottulhuna ttu íyya nna gwadheana ro'o yieru baaha. 47María Magdalena‑ni lhe María nan ge José‑ni lhe, lake bilákanie ata bigatsi Jesús‑ni.

Currently Selected:

San Marcos 15: zae

Highlight

Share

Copy

None

Want to have your highlights saved across all your devices? Sign up or sign in