Luka 22
22
Mawɓe Yahuudu'en ndarvii nanngugo Yeesu
(Matta 26.1-5 ; Markus 14.1-2 ; Yahayya 11.45-53)
1Too, wakkaci *Juulɗe buroodi ɗum walaa ƴuufnirɗum, bi'eteeɗe *juulɗe Kuultol ɓadake. 2*Mawɓe aardiiɓe diina e moodiɓɓe *Tawreeta e ndaara laawol no mbardata Yeesu, ammaa eɓe kula yimɓe.
Yahuuda jaɓii nyaamgo amaana Yeesu
(Matta 26.14-16 ; Markus 14.10-11)
3Sey *Ceyɗaan natti ɓernde Yahuuda bi'eteeɗo Iskariyooti, go'oto nder almaajiri'en Yeesu sappo e ɗiɗo. 4O yahi to *mawɓe aardiiɓe diina e mawɓe reenooɓe *Wuro Seniingo, o darvidi e maɓɓe dow no o hokkirta Yeesu nder juuɗe maɓɓe. 5Ɗum veli ɓe korey, ɓe mbaɗi alkawal ɓe kokkey mo ceede. 6Kanko boo o jaɓi, o fuɗɗi yillaago laawol no o nyaamrata amaana Yeesu, naa e anndaangal yimɓe.
Yeesu hiirtodake e almaajiri'en muuɗum kiirtaari juulɗe Kuultol
(Matta 26.17-25 ; Markus 14.12-21 ; Yahayya 13.21-30)
7Nyannde *juulɗe Buroodi ɗum walaa ƴuufnirɗum wari. Nyalaande ndeen ɗum hirsata njawdiri *juulɗe Kuultol. 8Yeesu lili Biiturus e Yahayya, vi'i ɓe :
— Njahee ciryanee en nyaamdu juulɗe Kuultol.
9Ɓe ƴami mo ɓe mbi'i :
— Toye ngiɗɗaa min ciryoo ɗum ?
10O vi'i ɓe :
— Ɗoon to nattuɗon si'ire, on pottey e gorko e roondii ƴoogirde ndiyam. Tokkee mo faa nder wuro ngo o nattata, 11mbi'on jawmu wuro oon : « Moodibbo vi'i min ƴam maa : Toye suudu ndu o nyaamdata e almaajiri'en ma'ako nyaamdu juulɗe Kuultol ? » 12O holley on suudu ndu dow, mawndu mo''inaandu. Toon ciryantooɗon en nyaamdu juulɗe Kuultol.
13Sey ɓe njahi ɓe tawi koo ɗume noon no Yeesu vi'iri ɓe, ɓe ciryii koo ɗume gam juulɗe ɗeen.
Kiirtaari Jawmiraawo
(Matta 26.26-30 ; Markus 14.22-26 ; Ɗereewol Bulus aranol yahago to Korontu'en 11.23-25)
14Nde wakkaci waɗi, Yeesu e almaajiri'en muuɗum sappo e ɗiɗo njooɗii gam kiirtoo. 15Sey o vi'i ɓe :
— Mi haaɓii nyaamdugo e mooɗon ndu'u nyaamdu *juulɗe Kuultol, ko hokka mi torree. 16Gam emi vi'a on : mi ɓesdataa nyaamgo nyaamdu juulɗe Kuultol, sey to ma'ana ma'ajum heevii nder laamu Allah.
17Sey o hooƴi jardugel, o yetti Allah, o vi'i :
— Njaɓee cenndindiree innaboojam ɗaam. 18Gam emi vi'a on : gada hannde mi ɓesdataa yargo innaboojam, sey to laamu Allah warii.
19Ndeen o hooƴi buroodi, o yetti Allah, o fecci ndi, o hokki almaajiri'en ma'ako, o vi'i : — Ɗu'um ɗum ɓanndu am, hokkaandu gam mooɗon. Mbaɗee ga waɗgo noon gam hiimtaago yam. 20Noon boo, ɓaawo ɓe kiirtake, o hooƴi jardugel innaboojam, o vi'i :
— Ɗa'am woni alkawal kesal tabbitiniraangal e ƴiiƴam am ndufeteeɗam gam mooɗon. 21Ammaa raa nyaameyɗo amaana am ɗo'o nyaamdeymi nder le'al go'otal. 22Goonga, *Ɓii-Neɗɗo no maayrey noon no Allah siryorii, ammaa bone laatanto nyaameyɗo amaana ma'ako !
23Almaajiri'en puɗɗi ƴamƴamtirgo hakkunde mu''en, moye nder maɓɓe waɗata nga'al kuugal.
Geddi dow moye ɓuri manngu
24Geddi ummii hakkunde almaajiri'en dow moye laatii ɓurɗo manngu nder maɓɓe. 25Ndeen Yeesu vi'i ɓe :
— Laamiiɓe duuniyaaru e kolla yimɓe mu''en semmbee. Aardiiɓe boo e ngiɗi noddireego vallooɓe yimɓe. 26Ammaa onon, to' on mbaɗ noon. Ɓurɗo manngu nder mooɗon sey laatoo kama ɓinngel, aardiiɗo boo sey laatoo jaggantooɗo on. 27Moye ɓuri manngu, jooɗiiɗo nyaama, nakay ge'edoowo ? Ay ɗum oon jooɗiiɗo. Ammaa miin emi ɗo'o hakkunde mooɗon kama kuwoowo.
28Onon ngoni wondiɗɗaaɓe am goonga'en nder torraa ka njarmi fuu. 29Gam ma'ajum miin boo, mi hokkii on laamu, noon no Baabiraawo am mo dow hokkiri yam ngu, 30faa nyaamden njarden e le'al go'otal nder laamu am. Kadimaa njooɗooɗon dow jooɗorɗe ceri'a, cernanon leƴƴi Isiraa'iila sappo e ɗiɗi.
Yeesu vi'ii Biiturus no yeddey anndugo ɗum
(Matta 26.31-35 ; Markus 14.27-41 ; Yahayya 13.36-38)
31Yeesu vi'i :
— Simon, Simon, dara nana, *Ceyɗaan hokkaama laawol sorɓugo on, o jaarta on kama no ɗum jaartirta alkamaari. 32Ammaa mi waɗanii ma do'aare, gam to' goonɗinki maaɗa soɓtee. Aan boo, to a vittoyii to am, semmbiɗin banndiraaɓe maaɗa.
33Biiturus vi'i mo :
— Moodibbo, emi siryii yahadugo e maaɗa koo ɗum kaso. Kay, faa maa e maaydugo e maaɗa.
34Yeesu vi'i :
— Biiturus, emi vi'i maa : hannde jemma ko hokka njakaraari kurkita, a vi'ey a anndaa yam faa nde tati.
Ciryee gam wakkaci torraa
35Sey Yeesu vi'i ɓe :
— Nde lilnoomi on naa e ceede naa e jikaare koo paɗe, e woodi ko ndulluɗon naa ?
Ɓe mbi'i :
— Walaa.
36O vi'i ɓe :
— Ammaa jo'oni, goonɗo ceede, hooƴa ɗe, goonɗo jikaare boo hooƴa nde. Mo walaa kaafahi, soorra ngapaleewol muuɗum sooda go'oti. 37Emi vi'a on : nde'e aayaare vi'inde : O fiidaama e halluɓe sawru wo'oru#22.37 Ecaaya 53.12, doole nde heeva dow am, gam ko vinndaa dow am fuu ɓadake heeɓgo.
38Almaajiri'en mbi'i :
— Moodibbo, raa kaafaaje ɗiɗi.
O vi'i ɓe :
— Ɗum heƴii.
Do'aare Yeesu dow vaamnde Jaytunje
(Matta 26.36-46 ; Markus 14.32-42)
39Yeesu vurtii yahi *vaamnde Jaytunje, noon no o voovi waɗgo. Almaajiri'en ma'ako boo e tokki mo. 40Nde ɓe njottii yaayre ndeen, o vi'i ɓe :
— Mbaɗee do'aare gam to' on njan nder jarrabeeki.
41Ndeen o woɗɗitii ɓe seɗɗa ko waɗata dimma ferannde haayre, o diccii o waɗi do'aare o vi'i :
42— Baaba am, to a jaɓii sottinanam nge'el jardugel ka'a torraa. Ammaa ta'a waɗ ko ngiɗmi, waɗ ko ngiɗɗaa, aan.
43Sey malaa'ikaajo ivoyi dow, vanngani mo semmbiɗini mo. 44Nder mettam ɓeram ma'ako, sey o ɓesdi semmbiɗingo do'aare, faa asawre ma'ako laatii kama baade ƴiiƴam e simta e lesdi.
45Nde o heyni do'aare, o so''ii to almaajiri'en ma'ako, o tawi eɓe ɗaanii, ɓe comii gam ɓerɗe maɓɓe mettii. 46O vi'i ɓe :
— Ko ɗannini on ? Ummee mbaɗee do'aare, gam to' on njan nder jarrabeeki.
Nanngeeki Yeesu
(Matta 26.47-56 ; Markus 14.43-50 ; Yahayya 18.3-11)
47Ila o heynaay bolle, sey yimɓe ɗuuɗɓe ngari. Yahuuda go'oto nder almaajiri'en ma'ako sappo e ɗiɗo e aardii ɓe. Yahuuda ɓaditii Yeesu faa taaroo e ma'ako. 48Yeesu vi'i mo :
— Yahuuda, e hinnoore higaaku nyaamrataa amaana *Ɓii-Neɗɗo naa ?
49Nde almaajiri'en Yeesu ngi'i ko yiɗi waɗgo, ɓe mbi'i mo :
— Moodibbo, min pe''a ɓe ?
50Go'oto maɓɓe fe''i nofru maccuɗo *aardiiɗo diina mawɗo ndu nyaamo.
51Ammaa Yeesu vi'i :
— Ngooree ! To' on ɓesdu !
Ndeen Yeesu meemi nofru neɗɗo oon, hoyni mo.
52Sey Yeesu vi'i mawɓe aardiiɓe diina e mawɓe reenooɓe Wuro Seniingo e arɗuɓe Yahuudu'en warɓe nanngugo mo :
— Ko jeyi ngarduɗon e kaafaaje e cabbi kama nanngooɓe pasoowo ? 53Dum emi wondi e mooɗon nder *Wuro Allah Seniingo, on nanngaay yam. Ammaa jo'oni ɗum wakkaci mooɗon, wakkaci laamu Ceyɗaan.
Biiturus vi'ii anndaa Yeesu faa nde tati
(Matta 26.57-58 ; Matta 26.69-75 ; Markus 14.53-54 ; Markus 14.66-72 ; Yahayya 18.12-18 ; Yahayya 18.25-27)
54Sey ɓe nanngi Yeesu ɓe ndillidi e muuɗum ɓe njahari mo wuro *aardiiɗo diina mawɗo. Biiturus boo e tokkiri ɓe ɓaawo to fooɗtii. 55Ɓe kuɓɓi yiite nder filiire wuro, ɓe njooɗii. Biiturus wari jooɗii nder maɓɓe. 56Sey goɗɗo korɗo yi'i emo jooɗii takkol yiite. Korɗo oon raari mo booɗɗum vi'i :
— O'o neɗɗo e wondunoo e Yeesu.
57Ammaa Biiturus yeddi vi'i :
— Kay oya, mi anndaa mo.
58Ɓaawo ɗoon seɗɗa goɗɗo yi'i mo vi'i :
— Aan maa a go'oto nder tokkuɓe mo.
Ammaa Biiturus vi'i :
— Higoo, mi walaa nder maɓɓe !
59Faro awaa go'otum ɓaawo ma'ajum, goɗɗo ummitini haala kaan vi'i :
— Daahir o'o gorko e wondunoo e Yeesu, gam o Gaaliilankeejo.
60Biiturus vi'i mo :
— Kay higoo, mi fahamataa maa ko mbi'ataa !
Ila o omndaay honnduko, njakaraari kurkiti. 61Ndeen Yeesu yeeƴii raari Biiturus. Sey Biiturus hiimtii ko Yeesu vi'inoo ɗum : « Hannde ko hokka njakaraari kurkita, a vi'ey a anndaa yam nde tati. » 62Biiturus vurtii yaasi o voyi bojji naawɗi.
Yeesu fiyaama jaltiniraama
(Matta 26.67-68 ; Markus 14.65)
63Yimɓe nannguɓe Yeesu puɗɗi jaltinirgo mo e fiigo mo. 64Ɓe cuddi gite ma'ako eɓe ƴama mo eɓe mbi'a :
— Anndit piiɗo ma.
65Ɓe naawrani mo haalaaji feere-feere.
Yeesu yaharaama yeeso Kawtal Sernooɓe Diina
(Matta 26.59-66 ; Markus 14.55-64 ; Yahayya 18.19-24)
66Nde veeti, arɗuɓe Yahuudu'en e *mawɓe aardiiɓe diina e *moodiɓɓe Tawreeta kawriti. Yeesu waddaa yeeso kawtal maɓɓe. 67Ɓe mbi'i :
— To a *Almasiifu, yecca min.
Ammaa Yeesu vi'i ɓe :
— Koo to mi yeccake on maa, on njaɓataa. 68To mi ƴamii on boo on toontataako yam. 69Ammaa gada jo'oni, *Ɓii-Neɗɗo no jooɗoto e nyaamo Allah mo baawɗe.
70Ɓe fuu ɓe mbi'i :
— To noon, aan a *Ɓiɗɗo Allah naa ?
O vi'i ɓe :
— Noon no mbiiɗon.
71Ɓe mbi'i :
— En ngalaa bukaata caaydaaku feere, gam enen e ko'e meeɗen en nanii ko o vi'i e honnduko ma'ako.
Currently Selected:
Luka 22: fuq
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
