Markus 12

Balndol dow remooɓe halluɓe

(Matta 21.33-46 ; Luka 20.9-19)

1Sey Yeesu fuɗɗi volirango ɓe e balndol, o vi'i :

— Goɗɗo neɗɗo aawi ngesaa *innabooje, o howani ka, o wasi ngaska makka nder ma'aka gam ɓiɗgo ɓikkon innabooje. O mahi suudu towndu gam reenooɓe ngesaa kaan. Ndeen o hokki ka woɓɓe remooɓe mo''ina ka, o waɗi jahaangal. 2Nde wakkaci ɓennduki innabooje ɗeen waɗi, o lili maccuɗo ma'ako to yimɓe ɓe o reenni ngesaa kaan, gam o jaɓonoya mo geɗal ma'ako nder ɓikkon innabooje ɗeen. 3Ammaa reennaaɓe ɓeen nanngi maccuɗo oon, ɓe piyi mo, ɓe tuufi mo junngo mehere. 4Sey jawmu ngesaa oon fuɗɗiti lili goɗɗo maccuɗo to maɓɓe. Kanko maa ɓe kuɗi mo ɓe eli mo. 5Sey o ɓesdi o lili goɗɗo maccuɗo, kanko maa ɓe mbari mo. O lili maccuɓe ɗuuɗɓe. Ɓe piyi woɓɓe, ɓe mbari woɓɓe. 6Jo'oni jawmu ngesaa kaan e hororii go'oto mo o lilaay, waato ɓiyiiko mo o yiɗi. Timmoode ma'ajum o lili ɓiɗɗo oon to maɓɓe, o vi'i : « Ɓe teddiney ɓiyam. » 7Ammaa reennaaɓe ngesaa ɓeen mbi'i hakkunde mu''en : « Too, raa donoowo ngesaa kaan. Ngaree mbaren mo, ndonu ngesaa kaan laatoo ngu meeɗen. » 8Sey ɓe nanngi mo, ɓe mbari mo, ɓe peri mo yaasi ngesaa kaan.

9Too, noye jawmu ngesaa kaan waɗata ? O warey o halka ɓe, o reenna ngesaa kaan woɓɓe. 10On meeɗaay janngugo ko woɗnde aayaare vi'i naa ? Nde vi'i :

Haayre nde mahooɓe kibini,

kayre laatii ɓurnde jogaago mahadi.

11Kanjum, ɗum kuugal Jawmiraawo,

ngal kaayniingal e giiɗe meeɗen.#12.10-11 Jabuura 118.22-23

12Aardiiɓe ɓeen ndaari laawol no nanngirta mo, gam eɓe anndi dow maɓɓe o waɗi balndol ngool, ammaa eɓe kula yimɓe. Gam ma'ajum ɓe ngoori mo, ɓe ndilli.

Biyaago ceede janngal

(Matta 22.15-22 ; Luka 20.20-26)

13Ɓaawo ma'ajum, ɓe lili woɓɓe *Fariisa'en e woɓɓe yimɓe *Hiruudus to Yeesu, gam ɓe keɓa ko ɓe nanngirta mo nder bolle ma'ako. 14Ɓe ngari to Yeesu, ɓe mbi'i ɗum :

— Moodibbo, emin anndi ko mbi'ataa e ko mbaɗataa ɗum goonga. A hollataa yimɓe peerootiral, a hooƴii yimɓe fuu e poti. Kadimaa a ekkitina laawol Allah e goonga. Too, yecca min, e haani min mbiyoo *Kaysar#12.14a Kaysar ɗum innde laamu Rooma. ceede janngal#12.14 Janngal woni lamfo., na ɗum haanaa ? 15Min mbiyoo ceede janngal, na to' min mbiyo ?

Ammaa Yeesu e anndi eɓe ngiɗi ƴoynugo ɗum, o vi'i ɓe :

— Ko jeyi ndaaroton godaago yam ? Ngaddanee yam ceedel ajurfaari mi yi'a ngel.

16Ɓe ngaddani mo ceedel ngeel. O ƴami ɓe :

— Footo moye e innde moye woni dow ma'agel ?

Ɓe toontii mo ɓe mbi'i :

— Ɗum Kaysar.

17O vi'i ɓe :

— Too, kokkee Kaysar ko woni ɗum Kaysar, kokkee Allah boo ko woni ɗum Allah.

Toontol ma'ako haaynii ɓe korey.

Ƴamol dow ummitaaki maayɓe

(Matta 22.23-33 ; Luka 20.27-40)

18*Saduuki'en e mbi'a maayɓe ummitataako. Woɓɓe maɓɓe ngari to Yeesu, ɓe ƴami mo ɓe mbi'i :

19— Moodibbo, *Muusa vi'ii to neɗɗo hoovake debbo, maayii rimdaay e ma'ako, sey minyum koo mawnum wa'ata mo, gam heɓana dimdaaɗo muuɗum maayɗo ɓiɓɓe. 20Too, ndeenno e woodi woɓɓe rimdaaɓe worɓe njoveeɗiɗo. Afo hoovi debbo, maayi rimdaay e ma'ako. 21Ɗiɗaɓo wa'ati debbo oon. Kanko maa o maayi, o rimdaay e ma'ako. Tataɓo maa noon. 22Ɓe fuu njoveeɗiɗo ɓe koovake debbo oon, ɓe maayi ɓe ndimdaay e ma'ako. Ɓaawo ɗoon debbo oon maayi. 23Too, nyannde maayɓe ummitinte, debbo oon, koree moye o laatotoo nder maɓɓe ? Gam ɓe fuu njoveeɗiɗo ɓe koovakeno mo.

24Yeesu toontii ɓe vi'i :

— On mboofi, gam on anndaa *Deftere, on anndaa baawɗe Allah boo. 25To maayɓe ummitake nder maayde, worɓe koovataako, rewɓe boo koovataake, ammaa ɓe laatoto kama malaa'ika'en. 26Dow ummitaaki maayɓe, on njanngaay Deftere *Muusa dow habaru vaafre huɓɓunde yiite naa ? Allah vi'ii mo : « Miin woni Allah mo *Ibraahim, Allah mo *Iciyaaku, Allah mo *Yaakuubu. »#12.26 Burtaaki 3.6 27Kanko naa o Allah maayɓe, ammaa o Allah foofooɓe. On majjii korey !

Dooka ɓurka manngu

(Matta 22.34-40 ; Luka 10.25-28)

28Go'oto nder *moodiɓɓe Tawreeta ɓadii nani geddi ɗi Yeesu wa'adi e Saduuki'en. Nde o nani Yeesu toontake ɓe booɗɗum, sey o ƴami ɗum, o vi'i :

— Nder dookaaji *Tawreeta, kaye ɓuri manngu ?

29Yeesu toontii mo vi'i :

— Ɓurka manngu woni : « Nanee, onon yimɓe *Isiraa'iila : Allah Jawmiraawo meeɗen, o go'oto. 30Yiɗ Allah Jawmiraawo maaɗa e ɓernde maaɗa fuu, e yonki maaɗa fuu, e hakkiilo maaɗa fuu, e semmbee maaɗa fuu. »#12.29-30 Tokkitaaki Tawreeta 6.4-5 31Ɗiɗaɓa woni : « Yiɗ ko'odiɗɗaawo maaɗa noon no ngiɗruɗaa hoore maaɗa. »#12.31 Lewinkoo'en 19.18 Nder dookaaji Allah fuu, ɓurɗi ɗi'i ɗiɗi semmbee ngalaa.

32Sey moodibbo Tawreeta oon vi'i :

— Moodibbo, a vi'ii goonga nde mbiiɗaa Allah o go'oto, walaa goɗɗo sey kanko tan. 33Neɗɗo yiɗa mo e ɓernde muuɗum fuu, e hakkiilo muuɗum fuu, e semmbee muuɗum fuu, yiɗa mo wondi noon no yiɗiri hoore muuɗum, kanjum, ɗum ɓurii sadakaaji guleteeɗi e sadakaaji koriiɗi fuu.

34Nde Yeesu yi'i o toontorake e hakkiilo, sey vi'i mo :

— Goonga, a woɗɗidaa e *laamu Allah.

Ɓaawo ma'ajum, koo moye huli ƴamgo mo ƴamol feere.

Ƴamol dow Almasiifu

(Matta 22.41-46 ; Luka 20.41-44)

35Wakkaci Yeesu ekkitinta nder fiiliire *Wuro Allah Seniingo, o ƴami o vi'i :

— Ko jeyi *moodiɓɓe Tawreeta mbi'anta Almasiifu o ɓii-Dawda ? 36Gam *Dawda e hoore muuɗum vi'ii e *Ruhu Ceniiɗo :

« Jawmiraawo vi'ii Jawmiraawo am :

Jooɗa e junngo am nyaamo,

faa mi waɗa wanywanyɓe maaɗa laatoo jaaɓruɗum kosɗe maaɗa. »#12.36 Jabuura 110.1

37To Dawda e hoore muuɗum noddirii mo « Jawmiraawo », ndeen noye Almasiifu laatortoo ɓiyiiko ?

Kakkilee e moodiɓɓe Tawreeta

(Matta 23.1-36 ; Luka 20.45-47)

Jama'aare ɗuuɗnde yewanii Yeesu e velvelo. 38Nder ekkitinol ma'ako o vi'i :

— Kakkilee e *moodiɓɓe Tawreeta, yiɗɓe yiilaago e ɓornii ngapaleeji juutɗi, yiɗɓe hinneego nder luuɓe. 39Eɓe ngiɗi jooɗaago njaayri mawɓe nder *cuuɗi-ga'ajorɗi, e nyannde juulɗe ! 40Kamɓe nyaamata jawdi rewɓe ɓe worɓe mu''en maayi, ɓe te'eta cuuɗi mu''en, eɓe njuttina do'aare, gam ɓe ngi'ee. Kamɓe ɓe cernante ceri'a ɓurka hallugo.

Kokkal yayriijo mo gorko muuɗum maayi

(Luka 21.1-4)

41Yeesu jooɗii nder *Wuro Allah Seniingo ha'ade to ɗum resata ceede gam Wuro ngoon. Emo raara no yimɓe mba'atirta ceede mu''en. Riskuɓe ɗuuɗɓe mba'ati ceede ɗuuɗɗe nder. 42Sey goɗɗo yayriijo cooyɗo mo gorko muuɗum maayi wari wa'ati tammahon ɗiɗon, ɗum ceedon seɗɗa tan. 43Sey Yeesu noddi *almaajiri'en muuɗum vi'i ɓe :

— Emi vi'a on goonga : ko o'o yayriijon cooyɗo hokki e ɓuri ko horiiɓe fuu kokki. 44Gam kamɓe ɓe kokkii seɗɗa gada nder ɗuuɗal risku maɓɓe. Ammaa kanko nder cooyndam ma'ako, o hokkii ko o marortoo fuu nder foofaango ma'ako.

Currently Selected:

Markus 12: fuq

Highlight

Copy