Zenɛze 23

Sala zaa vai

1Sala zii ma voloi kpein ge ɠɛni ga kona ungila puufele maazu lɔfela (127). 2É zaani Kiliyate-Aaleɓa, nii é ga Eɓelɔn, Kanaan yooi zu. Abalaame ná-saa vai ɠɛɛni, é ma wɔlɔi wo. 3Naa ʋolu Abalaame wuzeɠeni, é anzai ma ʋoomai yɛ laani, é li, é ɓɔɛ Ɠɛte nuiti pɔ, 4é ɠɛ ti ma: «Nà ga wɛɛin, gè zeini wo zaama. À maaɠulu bosu ve zèa, gè ànzai maaɠulu, nii saai.»

5Ɠɛte nuiti ti gooɠaaʋoteni, ti ɠɛ ma: 6«Woilo gi-woo ma, màliɠii. GALA ge è ɠɛɛʋɛ ga nu wola gi zaama. È-anzai maaɠulu gá-ɠabayeɠeiti ma ʋagɔi zu. Gi tanɔpɛ ge la è ɠoma ga ná-kabayeɠe ve vaa è ya è-anzai maaɠulu vai zu.»

7Abalaame wuzeɠeni, é maaʋɛɛ zou nuiti bɛ, Ɠɛte mavofodaiti. 8É ɓɔɛ ti ʋɔ, é ɠɛ ti ma: «Ni wo va bu ga gè ànzai maaɠulu, à Soɠaal ná-doun zunui Efelon maanɛɛnɛ bɛ̀, 9ga é Makepela ʋugi ve zèa, toɠa nɔnɔ ʋe, nii é ná-kpala kpelamaʋɛ. É zɛ zèa ga sɔngɔ ɠitei nɔ wo ɠaazu, naa ɠa a kɛ é ɠɛ zèa ga maaɠulu bosuʋɛ.»

10Efelon ɠɛni zeini Ɠɛte nuiti saama. É Abalaame wooɠaaʋoteni Ɠɛte nuiti gaazu, ta niiti kpein ti ɠɛni lɛɛzu taazu ga siɠida ʋelei. 11É ɠɛ ma: «Ɓa-o, màliɠii, woilo gòo ma! Gè nà-kpalagi vea è ʋɛ, ta pugi nii é ná. Gè fea è ʋɛ ga faanɛɛ, nà-nuɓusɛiti gaazu, ga è è-anzai maaɠulu ná.» 12Abalaame maaʋɛɛni zou nuiti bɛ. 13É Efelon wooɠaaʋoteni, nii a kɛ ti pɛ ti gooi mɛni, é ɠɛni ma: «Woilo dɛɛ gòoi ma, ɗa ɓalaagi. Va bu gè kpalagi zɔngɔi ve è ya. Yeezei bu bɛ̀, nà ànzai maaɠulu ná niina.»

14Efelon Abalaame wooɠaaʋoteni, é ɠɛ ma: 15«Màliɠii, woilo gòoi ma, leeni ɠa a ɠɛ ga naa de yɔɠɔzu da ɗe, zooi naa vaa zu nii sɔngɔi ga wali ɠae unnaanigɔ (400)? È-anzai maaɠulu ná.» 16Abalaame vaani naa wu, nii Efelon boni, é wali ɠaei ɠaaluni, nii naa boni ma Ɠɛte nuiti gaazu, é lo wali ɠae unnaanigɔi (400) ʋa, eɠɛʋelei falibogi laaʋɛ ɠɛni la yaaɠoiti zea.

17Zekana Efelon ná-kpalagi é Makepela, Mamelé letemaʋɛ, kpalagi ta pugi é ná, guluiti ti kpalagi zu, kwɛpelemaʋɛ maaɠoolii zu, 18naati pɛ ti ɠɛɛni niina ga Abalaame nɔnɔ, Ɠɛte nuiti gaazu, naati kpein gaazu, niiti ti ɠɛni lɛɛzu taazu ga siɠida ʋelei. 19Naa ʋoluma Abalaame anzai Sala maaɠuluni Makepela ɓalagi ma ʋugi zu, Mamelé letema ʋelei, nii é ga Eɓelɔn, Kanaan yooi zu. 20Kpalagi ta pugi nii é ná, ti ɠɛni ga Abalaame nɔnɔ, naa ɠɛ ga kabamaʋɛ, é geyani Ɠɛte nuiti ma.

Currently Selected:

Zenɛze 23: GDZ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution-NonCommercial-NoDerivatives 4.0 International.

https://creativecommons.org/licenses/by-nc-nd/4.0/

Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.

Learn More About GALA Daawoo Zɛʋɛi