Jenesis 16
16
Haagar ano Ismael
1Abrambaa embia Saarainoŋ aruŋa laligoŋ merabora mende meroto, Saaraiwaa weleŋ embia qata Haagar laligoro. Ii Iijipt embaga. 2Iinoŋ laligorotiwaajoŋ Saarainoŋ Abram kokaeŋ ijoro: “Poŋnoŋ soŋgo somoŋgoŋ nono merabora mende mewetiwaajoŋ gii mono weleŋ embana mena koro ama merabora moŋ mero noo buŋaga koloonaga.” Kaeŋ ijoro Abramnoŋ Saaraiwaa qaayaajoŋ uumotooŋgo ano. 3Abramnoŋ Keinan balonoŋ yambu 10 laligoro tegoro kambaŋ kanoŋ Abrambaa embia Saarainoŋ Iijiptga weleŋ embia Haagar meŋ loyawo motooŋ ewaotiwaajoŋ muro. 4Kaeŋ muro meŋ laligoro koro ano. Koro anjeŋ, kaeŋ moma galeŋ embia Saarai ii kanaiŋ jejewili ama muro.
5Kaeŋ ama muro Saarainoŋ Abram kokaeŋ ijoro: “Uunanoŋ boliro siimbobolo momakejeŋi, iikawaa qaayanoŋ mono goo qaanoŋ uma ewaa. Niinoŋ weleŋ embana goo boroganoŋ ambe koro ama ii moma iikanondeeŋ kanaiŋ jejewili ama noma laligoja. Kawaajoŋ Poŋnoŋ mono nii ano gii anaraa batunaranoŋ qaa gosiŋ jeŋ tegowa.”
6Kaeŋ ijoro Abramnoŋ kokaeŋ jero: “Weleŋ embaganoŋ mono geeŋgaa boroganoŋ laligojiwaajoŋ nomaeŋ mona sokonji, mono iikawaa so ii ama muba.” Kaeŋ jero Saarainoŋ Haagar laŋ horoŋ ureeŋ ama muro mesaoŋ togoŋ oloŋ koma keno.
7Keno Pombaanoŋ gajoba moŋnoŋ baloŋ qararaŋkoŋkoŋanoŋ apu jaaya mombaa kosianoŋ mokolooŋ muro. Apu jaaya ii Suur gomanoŋ kekembaa kana goraayanoŋ eja. 8Iikanoŋ mokolooŋ muŋ kokaeŋ jero: “Haagar, Saaraiwaa weleŋ embia, gii mono daeŋkaya kajaŋa dakanoŋ kembaga?”
Kaeŋ jero kokaeŋ meleeno:
“Nii galeŋ embana Saaraiwaanoŋga asaŋgoŋ oloŋ koma kajeŋ.”
9Kaeŋ jero Pombaa gajobanoŋ Haagar kokaeŋ jeŋ kotoŋ muro: “Gii mono mombo Saaraiwaanoŋ kema weleŋa qeŋ iwaa qaa baatanoŋ laligowa.” 10Qaa ii toroqeŋ kokaeŋ jero moro: “Haagar, nii mono goo gbiliuruga kolooŋseiseigia oŋombe jaŋgogia mende weeŋweeŋgoyaa so kaaŋa laligowuya.”
11Pombaa gajobanoŋ mombo toroqeŋ Haagar kokaeŋ ijoro:
“Gii kokowo koloojaŋa meraga mewaga.
Dologo koi tapekokoro moma saana
ii mono Pombaa gejianoŋ kemero moja.
Kawaajoŋ merawaa qata Ismael qaba. #16.11 Ismael: = Anutunoŋ gejianoŋ moja. 12Iinoŋ eja doŋgi bao kombo kaaŋa kolooŋ (aŋaa jaajaa laŋ kema kaŋ) laligowaa. Iinoŋ borianoŋ ejemba kuuya qetaama oŋono ejemba kuuya yoŋonoŋ ii qotogoŋ muŋ laligowuya. Iinoŋ kouruta kuuya yoŋowo kerekere aŋodeeŋ ama kanawaeŋ qeŋ laligowaa.”
13Kaeŋ ijoro Haagarnoŋ kokaeŋ jero: “Niinoŋ mono keteda koi moŋnoŋ nii niimakeji, ii iijeŋ.” Kawaajoŋ Poŋ iwaajoŋ qaa jeroti, iwaa qata kokaeŋ qama muro: “Gii Poŋ nii niimakejaŋi, ii koloojaŋ.” Qata kaeŋ qaro. 14Kania kawaajoŋ ama apu roŋ iikawaa qata ii Beer Lahai Roi (Laaligoyawo laligoŋ niimakejiwaa apu roŋa) qagita eja. Apu roŋ ii toroqeŋ gomaŋ woi qagara Kaades ano Bered iyoroo batugaranoŋ eja.
15 #
Gal 4.22
Haagarnoŋ Abrambaa meria mero. Abramnoŋ iyaŋaa meria Haagar meroti, iwaa qata Ismael qaro. 16Abramnoŋ yambuya 86 kolooro Haagarnoŋ Ismael mera ii Abrambaanoŋa mero. Kiaŋ.
Currently Selected:
Jenesis 16: ksr
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
