Lukas 10

Pangandaꞌakan siye pitumpūꞌ duk duwehin

1Puwas miyaꞌan niyaꞌ pe pitumpūꞌ duk duwe aꞌa kawakilan weꞌ ne duk dinaꞌak weꞌ ne padehellu pī si kēmon meꞌ kalahat-lahatan sōng papīhannen. Pinalengngan siye weꞌ ne duwangan-duwangan. 2Paꞌinne si siye, “Meꞌ aꞌahin kuweꞌ dalil tanaꞌ sarang ne pinagani. Luha tanaꞌin saguwaꞌ kulang mamaganihin. Hangkan subey kaꞌam māku-māku si Tuhan, iye dapuꞌ tanaꞌin, supaya iye ngandaꞌak meꞌ aꞌa pī maganine. 3Na, lumengngan ne kaꞌam. Saguwaꞌ pahatul kaꞌam, peggeꞌ palengngante kaꞌam pī si meꞌ aꞌa laꞌatan; kuweꞌ kaꞌam dalil meꞌ anak bili-bili pī dem kaꞌekkahan asu bingis. 4Daꞌa kaꞌam magboꞌo pitaka atawa bāg atawa tehompaꞌ. Sine-sine tasampangbi si lān, daꞌa kaꞌam subey pahali missā. 5Duk bang niyaꞌ lumaꞌ pamanaꞌikanbi, paꞌinun bi dahuꞌ, ‘Karayaw urungan Tuhanin kasanyangan kēmon dem lumaꞌ inin.’ 6Bang niyaꞌ aꞌa laꞌi pataꞌ inurungan kasanyangan, paꞌamban du kasanyangan pinākubin laꞌi si iye. Saguwaꞌ bang gaꞌ, gaꞌ du niyaꞌ kaꞌujudan pinaꞌinbi miyaꞌan. 7Patennaꞌ kaꞌam si dambuwaꞌ lumaꞌ hadja. Daꞌa kaꞌam magpinda-pinda patennaꞌan. Mangan kaꞌam duk nginum kaꞌam ine-ine bettadande kaꞌam, peggeꞌ kuweꞌ miyaꞌan tangdande si kaꞌamin. Aꞌa maghinangin pataꞌ tinangdanan. 8Kalumaꞌan antag-antag katekkahanbi, bang addatan meꞌ aꞌahin du kaꞌam, kakanun bi ine-ine bettadande kaꞌam. 9Pakoleꞌun bi meꞌ masaki malaꞌihin duk paꞌinun bi si meꞌ aꞌahin, ‘Taꞌabut ne pagbayaꞌ Tuhan si kaꞌamin.’ 10Saguwaꞌ kalumaꞌan antag-antag katekkahanbi, bu gaꞌi kaꞌam addatan meꞌ aꞌahin, pī kaꞌam si meꞌ kalsara duk paꞌinun bi, 11‘Pagpagan kami amban bettis kami bisan leppug bulak kalumaꞌanbi inin, tandaꞌ weꞌ muwas ne kami si kaꞌam. Saguwaꞌ subey kataꞌuhanbi weꞌ asal taꞌabut ne pagbayaꞌ Tuhanin.’ 12Akahante kaꞌam,” paꞌin si Isa, “weꞌ pagtaꞌabut ellew pangahukum Tuhan manusiyaꞌin, pasōng teꞌed bohat hukuman si meꞌ aꞌa si kalumaꞌan miyaꞌan amban hukuman si lahat Sodomin, lahat mabawag sabab duse meꞌ aꞌanen.”

Kaꞌaseꞌ-aseꞌ meꞌ aꞌa manggaꞌi makahagadin

(Mateo 11:20-24)

13“Kaꞌaseꞌ-aseꞌ kaꞌam meꞌ aꞌa Korasinin. Kaꞌaseꞌ-aseꞌ kaꞌam meꞌ aꞌa Betsaidahin. Peggeꞌ bang laꞌi miyaꞌan si lahat Tiros duk Sidon pangahinanganku meꞌ hinangan balakatan tahinangku luꞌu si kaꞌamin, tiggel ne miyaꞌan meꞌ aꞌa malaꞌihin magsusun duk ngalebbahan duseden duk sa addatden magsemmek karut siye duk mandi duk abu pamakitede pagsusunden. 14Pagtaꞌabut ellew paghukumin, pasōng teꞌed bohat hukuman si kaꞌamin amban hukuman si meꞌ aꞌa Tiros duk Sidonin. 15Duk kaꞌam, meꞌ aꞌa Kapernaumin,” paꞌin si Isa, “weꞌ kannalbi pinalangkew kaꞌam pī diyataꞌ langit? Pinadiyawaꞌ du kaꞌam pī dem narkaꞌ.” 16Paꞌin si Isa pe si meꞌ tindegnen, “Sine-sine pakale si panoloꞌbin, kuweꞌ du aku pinakalenen. Sine-sine gaꞌi ngasip kaꞌam, kuweꞌ du aku manggaꞌi inasipnen. Duk sine-sine gaꞌi ngasip aku, hātinen gaꞌi du isab asipne Tuhanin, iye mamapitu aku si dunyahin.”

Pagbalik pitumpūꞌ duk duwehin

17Gaꞌ du tiggel tekka ne balik pitumpūꞌ duk duwehin laꞌi pu si Isa. Kēgan siye manamal. Paꞌinde pu si Isa, “Tuwan, bisan hatiꞌ meꞌ seyitanin tuhutde pangandaꞌakan kamihin basta taꞌat kami ēnnun.” 18Paꞌin si Isa si siye, “Asal takiteku nakuraꞌ seyitanin laboꞌ kuweꞌ lalat. Tadaꞌag ne basagnen. 19Payamanun bi, kaꞌurungan kaꞌam weꞌ ku balakat supaya bisan kaꞌam makadiꞌik sawe atawa sipitkāꞌ, gaꞌi du makaꞌine kaꞌam. Duk gaꞌi isab kaꞌam tadaꞌag weꞌ bantaten bi nakuraꞌ seyitanin. Gaꞌ isab niyaꞌ makapagkaꞌat kaꞌam bisan ine. 20Daꞌa iye kasinnahanbin peggeꞌ meꞌ seyitanin nuhut pangandaꞌakanbin, saguwaꞌ subey kasinnahanbin peggeꞌ tasulat ne ēnbin weꞌ Tuhanin si surgaꞌ.”

Magkēg si Isa

(Mateo 11:25-27; 13:16-17)

21Manjari waktu miyaꞌan, pinakēg teꞌed si Isa weꞌ Niyawa Sutsihin duk paꞌinne, “O Ammaꞌ, kaꞌu magbayaꞌ si langit duk bulakin, pudjite kew teꞌed peggeꞌ urungannu kataꞌu meꞌ aꞌa maꞌawamin duk tapukannu kataꞌu inin amban meꞌ aꞌa malangkew pangadjiꞌnen duk amban meꞌ makasabutin. Aweꞌ, Ammaꞌ, asal pudjite kew peggeꞌ kuweꞌ inin kinabayaꞌannun.” 22Duk paꞌin si Isa pe, “Bakas pinangandel ne si aku kēmon-kēmonin weꞌ Samaku, Tuhanin. Gaꞌ niyaꞌ ngataꞌuhan bang sine ku, aku Anak Tuhanin, luwal hadja Samakun, Tuhanin. Duk gaꞌ isab niyaꞌ ngataꞌuhan bang sine Samakun, luwal hadja aku, anaknen duk sine-sine pineneꞌkun, iye pamakilalehanku Samakun.”

23Manjari paharap si Isa si meꞌ tindegnen duk paꞌinne si siye hadja, “Asal hāp pe kaꞌam peggeꞌ takitebi kēmon meꞌ takitebi inin. 24Akahante kaꞌam, ekka meꞌ nabi duk meꞌ sultan awwalley mabayaꞌ teꞌed ngite takitebi kuweꞌitu inin, saguwaꞌ gaꞌ inin takitede. Mabayaꞌ teꞌed isab takalede meꞌ takalebi kuweꞌitu inin saguwaꞌ gaꞌ takalede.”

Dalilan sabab aꞌa hāp amban Samariyahin

25Manjari niyaꞌ dambuwaꞌ guru pandey si saraꞌ āgama pī pu si Isa. Niyaꞌ tilewne panuleyanne si Isa. Paꞌinne, “Tuwan, ine subey hinangku supaya ku pinasukuꞌan umul gaꞌ niyaꞌ tamananne?” 26Nambung si Isa, paꞌ inne, “Ine teꞌ tasulat dem saraꞌ Tuhan inambanan si Musahin? Ine tabatsanun laꞌi?” 27Nambung iye, paꞌinne, “Paꞌin saraꞌin: Subey kalasahannu Tuhanin, Panuhutannun, dambūs-būs ateynun duk pikilannun duk basagnun. Duk subey kalasahannu saweꞌnun kuweꞌ pangalasanu dinun.” 28“Tewwaꞌ sambungnun,” paꞌin si Isa. “Hinangun iyan duk pinasukuhan du kew umul gaꞌ tamananne.”

29Manjari guru miyaꞌan gaꞌi bayaꞌ tadaꞌag, hangkan paꞌinne pu si Isa, “Sine teꞌ saweꞌku subey kinalasahankun?” 30Nambung si Isa magdalilan, paꞌinne, “Niyaꞌ dambuwaꞌ Yahudi padurul amban Awrusalam hap puweblo Ariha. Sābune si lān, ilaꞌugan iye weꞌ meꞌ mundu. Pinapeddiꞌan iye weꞌ de duk ineddoꞌ weꞌ de meꞌ kēmonnen sampay semmek si barannen. Sōng matey iye ubus bu inambanan iye weꞌ de. 31Duk magsātaꞌ, niyaꞌ dambuwaꞌ imam Yahudi nuhut lān miyaꞌan. Pagkitene aꞌahin, palibuwad iye amban dambiyaꞌ. 32Damikkiyan isab niyaꞌ seddili aꞌa lumabey si antag miyaꞌan. Aꞌa inin Yahudi isab, tubuꞌ si Libi duk hinangnen nabangan imam si langgalin. Pagkitene aꞌahin, palibuwad isab iye. 33Gaꞌ du tiggel niyaꞌ dambuwaꞌ aꞌa bangsa Samariya, si paglengngananne tapī iye laꞌi si antag miyaꞌan. Pagkitene aꞌahin, maꞌaseꞌ teꞌed iye. 34Patapit iye pī duk tambalanne bakatnen duk isellan duk boheꞌ ubas, ubus bu pinekkes weꞌ ne. Ubus binengket weꞌ ne bu pinasakey si hayepne duk binoꞌo weꞌ ne pī si lumaꞌ paghegpaꞌ-hegpaꞌan duk inuntul weꞌ ne laꞌi. 35Pagsasumuhin, ngurung iye sīn si dapuꞌ lumaꞌin duk paꞌinne si iye, ‘Ipatun aku aꞌa inin. Bang kagastu kew labi amban sīn inin, bayedante saꞌ kew pagbalik ku pitu.’ ”

36Manjari paꞌin si Isa si guruhin, “Na, si aꞌa tellungan miyaꞌan, inggehin pikilnu asal bennal mapasaweꞌ si aꞌa ilaꞌugan weꞌ meꞌ munduhin?” 37Nambung iye, paꞌinne, “Mamaꞌaseꞌ si iyehin duk manabang iyehin.” Manjari paꞌin si Isa si iye, “Pī kew, hinangun sa hininang aꞌa miyaꞌan.”

Panindew si Isa si Marta duk Mariyamin

38Palanjal disi Isa duk meꞌ tindegnen duk tekka siye si dambuwaꞌ kalumaꞌan. Niyaꞌ laꞌi dambuwaꞌ dende inēnan si Marta. Inaddatan si Isa laꞌi si lumaꞌne. 39Niyaꞌ pungtinaꞌi si Marta dende inēnan Mariyam. Si Mariyam inin ningkoloꞌ si antag bettis si Isa pakale-kale si meꞌ binissānen. 40Si Marta sasew teꞌed weꞌ hinangne maꞌekkahin magpanyap para pu disi Isa. Hangkan patapit iye pu si Isa duk paꞌinne, “Tuwan, gaꞌi ke hinangnu ine bisan ku tiyaꞌ pasagadan pungtinaꞌikun maghinang dendang-dendangan? Daꞌakun be iye nabangan aku.” 41Saguwaꞌ sambungan si Isa iye, paꞌinne, “Kaꞌu Marta, suse kew duk ekka makasasew kaꞌu bu gaꞌ du niyaꞌ tantu kagunahanne. 42Dambuwaꞌ du hadja mahadje kagunahannen. Duk tapeneꞌ weꞌ Mariyam mahāp inin duk gaꞌi inin kaꞌānan amban iye.”

Currently Selected:

Lukas 10: yakV

Highlight

Copy