Lukas 16

Tatungguꞌ malalem akkalnen

1Manjari inakahan weꞌ si Isa meꞌ tindegnen dalilan seddili. Paꞌinne, “Niyaꞌ dambuwaꞌ aꞌa dayahan, hininang weꞌ ne dambuwaꞌ meꞌ daraꞌakannen tatungguꞌ si meꞌ alataꞌnen kēmon. Manjari tasumbung si iye tatungguꞌ miyaꞌan weꞌ luwal koꞌ ngakkal duk pakaꞌatanne alataꞌ amunen. 2Hangkan pinasan iye weꞌ ne duk pagtekka iye, paꞌin amunen si iye, ‘Ine teꞌ takaleku sabab kaꞌu inin? Sōnganun ne si aku listahan meꞌ bayuꞌ-bayuꞌan si antanannun duk sīn mapaꞌasek duk sīn mapaluwasin peggeꞌ gaꞌi ne kew hinangku tatungguꞌ.’ 3Paꞌin daraꞌakanin si dine, ‘Ine enteꞌ hinangku kuweꞌitu? Tiyaꞌ ne ku patahalaꞌ amukun. Gaꞌi ne ku basag maghinang si bulak duk leman ku isab māku-māku sīn. 4A, kataꞌuhanku ne,’ paꞌinne, ‘bang ine subey hininangkun, duk bang pinatahalaꞌ ne ku amban hinangkun, niyaꞌ du meꞌ aꞌa makajari papīhanku.’ 5Manjari ilinganan weꞌ ne dangan-dangan kēmon meꞌ taga utang si amunen. Paꞌinne si dehellu mapīhin, ‘Piye utangnun si amukun?’ 6‘Dahatus mital isellan,’ sambungnen. Manjari paꞌinne si iye, ‘Tiyaꞌ disibunun. Ningkoloꞌ kew padayiꞌ bu sulatun luꞌu limempūꞌ mital hadja.’ 7Duk paꞌinne si dambuwaꞌin, ‘Kaꞌu, piye utangnun?’ Paꞌinne, ‘Dahatus karut paley.’ Manjari paꞌinne si iye, ‘Tiyaꞌ disibunun, sulatun luꞌu walumpūꞌ.’ 8Pagkale amunen hininang daraꞌakanne mangakkal miyaꞌan, sinanglitan pe iye weꞌ ne peggeꞌ akkalan iye. Taꞌu koꞌ iye mikil para si pasōngannen.” Manjari paꞌin si Isa, “Meꞌ aꞌa manggaꞌi manuhut Tuhanin akkalan teꞌed amban meꞌ aꞌa manuhut Tuhanin, peggeꞌ taꞌu siye maꞌuntungan saweꞌden para si di kahāpanden.

9“Hangkan akahante kaꞌam,” paꞌin si Isa, “gunahun bi alataꞌbi tuꞌu si dunyahin paghinang hāp, supaya bang taꞌabut kaꞌam matey duk gaꞌi ne tagunabi alataꞌbin, tinayimaꞌ du kaꞌam laꞌi si lahat patennaꞌanbi salama-lamahin. 10Bang kapangandelan aꞌahin si alataꞌ kuweꞌahat, kapangandelan du isab iye si alataꞌ ekka. Damikkiyan isab bang aꞌahin gaꞌi kapangandelan si alataꞌ kuweꞌahat, gaꞌi du isab iye kapangandelan si alataꞌ ekka. 11Na, bang kaꞌam pinasukuꞌan alataꞌ tuꞌu si dunya inin bu gaꞌi kaꞌam kapangandelan, asal gaꞌi pinangandel si kaꞌam alataꞌ mabennalin. 12Duk bang gaꞌi kaꞌam kapangandelan ngantan alataꞌ dumaꞌin si kaꞌamin, gaꞌi pinangurung si kaꞌam sukuꞌ si kaꞌamin.

13“Gaꞌ niyaꞌ daraꞌakan makajari magbanyagaꞌ si duwe amu. Peggeꞌ kalasahanne iyan dambuwaꞌin duk kabunsihanne dambuwaꞌin. Atawa tuhutne teꞌed dambuwaꞌin duk gaꞌi asipne dambuwaꞌin. Bang pilakin mamahalgaꞌ si kaꞌamin, gaꞌi kaꞌam makajari maghinang isab si Tuhan.”

Meꞌ panoloꞌ si Isa sinduwehin

(Mateo 11:12-13; 5:31-32; Markus 10:11-12)

14Takale weꞌ meꞌ Pariseohin meꞌ pinaꞌin si Isa miyaꞌan. Pinagsayehan si Isa weꞌ de peggeꞌ sinna siye si pilak. 15Saguwaꞌ paꞌin si Isa si siye, “Kaꞌam iyan magpakite si aꞌa weꞌ bentel kaꞌam, saguwaꞌ kataꞌuhan Tuhanin du dem ateybin. Meꞌ kinimmatan mahalgaꞌ weꞌ meꞌ aꞌahin, gaꞌ du niyaꞌ kagunahanne bang si Tuhan.

16“Masa gaꞌ pe pitu si Yahiya magpandi-pandi meꞌ aꞌahin, iye minahalayakin sabab saraꞌ si Musahin duk meꞌ tasulat kanabihanin. Saguwaꞌ kemuwe pitu Yahiya duk sampay maꞌin iye minahalayakin aka-aka hāp sabab pagbayaꞌan Tuhanin duk meꞌ aꞌahin magtuyuꞌ teꞌed duk siye umasek pī si pagbayaꞌan Tuhanin. 17Saguwaꞌ saraꞌ si Musahin asal gaꞌi du pinda kapatutnen. Mura pe ilūnan bulak duk langitin amban dambuwaꞌ balis si saraꞌin ginantiꞌan.”

18Paꞌin si Isa pe, “Sine-sine nimanan andanen bu maganda seddili, magjina iye. Duk sine-sine maganda si dende bituwanan, magjina iye.”

Aꞌa dayahanin duk si Lasarus

19Ubus paꞌin si Isa, “Niyaꞌ dambuwaꞌ aꞌa dayahan, luwal magsemmek mahalgaꞌ manamal duk kahabaꞌ ellew hāp hadja kinakannen. Gaꞌ niyaꞌ kulang si iye. 20Duk niyaꞌ isab aꞌa miskin, ēnnen si Lasarus. Lapat puhuꞌnen weꞌ dugsal. Kahabaꞌ ellew binoꞌo iye pī si tarangka lumaꞌ aꞌa madayahan miyaꞌan. 21Peggeꞌ kabayaꞌannen bang du siꞌ iye kaꞌurungan meꞌ lebbi-lebbi kinakan aꞌa dayahanin duk iye makaꞌakan. Bisan meꞌ asuhin pī ngandelatan meꞌ dugsalnen. 22Manjari matey aꞌa mamiskin miyaꞌan duk binoꞌo iye weꞌ meꞌ malaꞌikatin pī si palaꞌihan Ibrahimin si surgaꞌ. Ubus matey du isab aꞌa dayahanin duk kinubul iye. 23Laꞌi si ahilat kapeddiꞌan manamal aꞌa dayahanin. Pahangad iye duk takitene laꞌi si katalahan Ibrahim. Takitene isab si Lasarus laꞌi si bihing Ibrahim. 24Magtawus iye ngalingan pu si Ibrahim. ‘O Apuꞌ Ibrahim,’ paꞌinne. ‘Maꞌaseꞌ ne kew si aku. Daꞌakun Lasarus pitu. Ambat patottokne timbōꞌnen dem boheꞌ bu pettakanne dellaꞌkun peggeꞌ peddiꞌan ku teꞌed tuꞌu dem ebbut inin.’ 25Saguwaꞌ paꞌin Ibrahim, ‘Bagay, essebun weꞌ tasangkanu ne kēmon bayuꞌ-bayuꞌan mahāpin kaꞌellumnun, bu si Lasarus tasangkanen malaꞌatin. Saguwaꞌ kuweꞌitu hāp ne pāsahannen tuꞌu, bu kaꞌu magsandal peddiꞌ. 26Duk dumaꞌin hadja inin, saguwaꞌ si ellette bi niyaꞌ kongkong luha pinapī, supaya matuꞌu mabayaꞌ mapiyuhin gaꞌi tapiyu, duk damikkiyan maluꞌuhin gaꞌi tapitu.’ 27Manjari paꞌin aꞌa dayahanin, ‘Bang sa iyan, Apuꞌ, gaꞌ dapatku. Saguwaꞌ pabuyuꞌ-buyuꞌ ku si kaꞌu, daꞌakun si Lasarus pī si lumaꞌ samakun, 28peggeꞌ niyaꞌ laꞌi lime pungtinaꞌiku lella. Daꞌakun siye sinessaꞌan pu Lasarus subey pindahande kawul-piꞌilden supaya siye gaꞌi tapitu si lahat pagsandalan peddiꞌ inin.’ 29Saguwaꞌ paꞌin Ibrahim, ‘Laꞌi du si siye meꞌ tasulat si Musahin duk tasulat meꞌ kanabihan sinduwehin. Ambat pakalede.’ 30‘Gaꞌi be pakalede, Apuꞌ Ibrahim,’ paꞌinne. ‘Saguwaꞌ bang niyaꞌ dambuwaꞌ aꞌa matey ellum balik bu pī si siye, asal pagsusunande iyan duseden duk lebbahande ne.’ 31Saguwaꞌ paꞌin Ibrahim si iye, ‘Bang gaꞌi pakalede meꞌ tasulat si Musahin duk meꞌ kanabihan sinduwehin, gaꞌi du siye iyan tasegeꞌ bisan pe niyaꞌ aꞌa bakas matey bu ellum balik hap pī si siye ngakahan siye.’ ”

Currently Selected:

Lukas 16: yakV

Highlight

Copy