Rut 4
4
Kinawin si Boꞌas duk si Rut
1Si Boꞌas manaꞌik pī si pagmitingan laꞌi si tarangka dinding puweblohin duk ningkoloꞌ iye laꞌi. Ubus palabey isab usba eymulla Elimelek dembuwaꞌin, iye bakas tinaꞌat weꞌ si Boꞌas dehelluhin. Lingananne iye, paꞌinne, “Dayiꞌ kew pitu, bagay, ningkoloꞌ kew tuꞌu.” Hangkan pī iye duk ningkoloꞌ. 2Ubus daꞌak si Boꞌas sempūꞌ meꞌ bahiꞌ puweblohin ningkoloꞌ isab laꞌi. Bu ningkoloꞌ siye. 3Ubus paꞌin si Boꞌas si usbane miyaꞌan, “Si Naꞌomi pitu balik amban lahat Moꞌab bu mabayaꞌ magpabelli bulak usbate ley Elimelek. 4Tapikilku weꞌ subey kew akahanku. Bang bayaꞌ bellinu bulakin subey bellinu si harapan meꞌ aꞌa duk bahiꞌ maningkoloꞌ matuꞌu inin. Saguwaꞌ bang gaꞌi kew mabayaꞌ, magaka kew, supaya kataꞌuhanku. Peggeꞌ kaꞌu mapatut dehellu mangeddoꞌ bulakin ubus bu aku.” Nambung lellahin, paꞌinne, “Aweꞌ, aku ne ngeddoꞌne.” 5Ubus paꞌin si Boꞌas, “Na, bang si kaꞌu ne bulakin, subey isab si kaꞌu si Rut dende balu bangsa Moꞌabin, supaya niyaꞌ puliꞌ usbate mamateyin duk gaꞌi lepas bulakden amban pamilyade.” 6Nambung lellahin paꞌinne, “Bang sā īꞌ, gaꞌi ku. Peggeꞌ bang eddoꞌku bulakin mekelutang#4:6 Peggeꞌ bulakin sukuꞌ si puliꞌ mamateyin bu makapagkaꞌat dī pusakaꞌne bang niyaꞌ pe anakne namba. aku. Si kaꞌu ne, bang aku, gaꞌi takoleꞌku.”
7Masa ewwalley iye addat meꞌ bangsa Israꞌelin bang niyaꞌ aꞌa malinda kapatutne melli bulakin si saweꞌne, subey luwasanne tehompaꞌnen duk pangurungne si pamalindahanne kapatutin. Iye inin tandaꞌ weꞌ puwas ne palkalaꞌin. 8Hangkan paꞌin usba miyaꞌan pu si Boꞌas, “Kaꞌu ne ngeddoꞌne,” bu luwasanne tehompaꞌnen.#4:8 Meꞌ sulat sinduwehin tambahande: duk pangurungne pu si Boꞌas. 9Ubus paꞌin si Boꞌas si meꞌ bahiꞌin duk kēmon aꞌa malaꞌihin, “Ellew inin kaꞌam ne saksiꞌkun. Kēmon maniyaꞌ pu si eymulla Elimelekley duk si Kilyon duk si Mahlon eddoꞌku ne amban Naꞌomi. 10Eddoꞌku isab si Rut, dende bangsa Moꞌab, bakas anda si Mahlonley, duk maganda ku si iye supaya mamateyin tege puliꞌ duk gaꞌi lepas pusakaꞌnen duk ēn mamateyin gaꞌi lepas si usbane duk si lahatne. Ellew inin kaꞌam ne saksiꞌkun.” 11Manjari meꞌ bahiꞌin duk kēmon aꞌa sinduwe malaꞌihin missā, paꞌinde, “Aweꞌ, naksiꞌ ne kami. Karayaw pamanjari Tuhanin dende mapaꞌasek si lumaꞌnun kuweꞌ si Rakel duk si Leꞌa masaley, siye kapapuꞌan kēmon bangsa Israꞌelin. Karayaw ngabasagan kew si lahat Eprata duk bantu kew si Betlehem. 12Karayaw urungan Tuhanin kaꞌam tubuꞌ duk dende mabataꞌ inin, duk karayaw pamilyanun kuweꞌ pamilya papuꞌten bi si Peres#4:12 Si Peres inin dembuwaꞌ meꞌ kapapuꞌan si Boꞌas., anak si Yahud duk si Tamarin.”
13Ubus ineddoꞌ weꞌ si Boꞌas si Rut duk hinangne anda. Pag magdembuwaꞌ ne siye iledjikiꞌan siye weꞌ Tuhanin duk betteng ne si Rut bu nganak lella. 14Ubus paꞌin meꞌ dende si puweblohin pu si Naꞌomi, “Pudjite bi Tuhanin, ellew inin inurungan kew weꞌ ne ampu. Karayaw ngabantu iye diyalem bangsa Israꞌel. 15Karayaw sabab nakanak inin gaꞌi ne lemmaꞌ lessanu duk ipatne kew bang kew bahiꞌ. Peggeꞌ inanakan iye weꞌ eyuꞌannu mamalasa si kaꞌuhin duk pesōng iye hāp si kaꞌu amban pituꞌ anak lella.” 16Ubus pinippi nakanakin weꞌ Naꞌomi duk inipat weꞌ ne. 17Meꞌ dende saweꞌne magtapit lumaꞌin missā, paꞌinde, “Niyaꞌ ne anak Naꞌomi lella.” Duk ēnande iye si Obed. Ujudnen si Obed sama si Jesse, duk si Jesse sama si Daꞌud.#4:17 Si Daꞌud inin ujudnen manjari sultan bangsa Israꞌel.
18Iye inin meꞌ tubuꞌ si Peresin: si Peres sama si Hesron, 19si Hesron sama si Aram, si Aram sama Amminadab, 20Amminadab sama si Nahson, si Nahson sama si Salmon, 21si Salmon sama si Boꞌas, si Boꞌas sama si Obed, 22si Obed sama si Jesse, si Jesse sama si Daꞌud.
Currently Selected:
Rut 4: yakV
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.