Matiu 27

Di saran tar e Iesu tetek e Pailat

(Mk 15:1; Lk 23:1-2; Jn 18:28-32)

1Ana kobot ning ot, a leklek a tena artabarla rop tetek e God pa na ningnigo anuna tarai, la warwara taum o e Iesu sur dir umkoli. 2La dot pas naur a kuna, la beni pa la saran tari tetek e Pailat, a tnan ningnigo ana matanitu.

E Judas i popos

(Ap 1:18-19)

3E Judas, esaning i saran tar e Iesu uting na kun a hiruala, ning ka tasmani mang di ka warkurai tar e Iesu sur ir mat, a tnan bal maris i kibasi. I ulak ana natol a bonot a silwa tetek a leklek a tena artabarla tetek e God pa a ningnigola. 4Pa i atongi mang, “Ia ka tol tar a toltol laulau, anasa ia ka asobor tar esaning bel i tol ta laulau.” Pa la kelesi mang, “Mila, mila mangasa? U ot!” 5I minggen sen natol a bonot a silwa ting na rumai a artabar, pa i han pa i popos.

6A leklek a tena artabarla tetek e God la kibas pas a silwala, pa la atongi mang, “Bel i tostos ana warkurai sur dalar suah a mani ne ting na gongon a mani, anasa a mani ne arlou tagun a barsan ning di umkoli.” 7Pa la warwara taum pas ono, pa la lou pas a puka piu kusun a tena tol kuro ana piopap, sur dir por a minat a wasirala tingia. 8I ma ning di atong a pukna ning “A piu a suluk,” pa a tarai la atongi larning tuk anone. 9Larne di tolsot pas a warwara ning e Jeremaia a propet ka atong tari nating mang, “La kibas pas natol a bonot a silwa, a matana ning a tarai Israel la suah tari ana barsan ning. 10Pa di lou pas a puka piu anuna tena tol kuro ana piopap, ana silwala, arlar ana Leklek i atong tari tak.”

E Pailat i deken e Iesu

(Mk 15:2-5; Lk 23:3-5; Jn 18:33-38)

11E Iesu i tur namatana e Pailat, a ningnigo tagun a matanitu, pa a ningnigo i dekeni mang, “U a king anuna tarai Juda?” Pa e Iesu i kelesi mang, “I ot ning u atongi.” 12Ning a leklek a tena artabarla tetek e God pa na ningnigo la tiwi, bel i keles la. 13Pa e Pailat i dekeni mang, “Bel u longor a warwara ne la tiu u ono?” 14Bel i keles la ana ta artitiu ning la tiwi ono. Pa a ningnigo tagun a matanitu i kulkulan kol ono.

Di saran a warkurai sur e Iesu ir mat

(Mk 15:6-15; Lk 23:13-25; Jn 18:39—19:16)

15Ana raula rop ting na tatatnan pukakiar a lotu na Hanlakai, a ningnigo tagun a matanitu i sira pak sen takai a barsan ning i kes ting na rumai a dodot, ning a tarai la mang suri. 16Ana rau ning, ning a barsan a risana e Barabas i kes ting na rumai a dodot ana nuna tatatnan toltol laulau, pa a taraila rop la tasman a magirana. 17Ning a kunum a tarai la hanot taum tetek e Pailat, i deken la mang, “Esi ning mulo mang sur ar pak seni tetek mulo? E Barabas o e Iesu, esaning di atongi ana Karisito?” 18I atongi larne, anasa ka tasmani mang, a Parisaiola la saran tar e Iesu teteki ana laulau a nuknukinla. 19Ning e Pailat kaning ot i tol a warkurai, anuna hane i saran sen a warwara teteki mang, “Gong u tol ta utna ana tena tostos ning, bel ta rongo anunai. Anasa nangana morom, a reresa, pa a ututnala a oroi i ana barsan ning, i alaulau anuka lalaun.”

20Ika a leklek a tena artabarla tetek e God pa a ningnigola la akamtur a balan a kunum a tarai sur lar nunung sur e Barabas, pa dir umkol e Iesu. 21A ningnigo tagun a matanitu i deken la mang, “Esi na halindiau ning mulo mang sur ar pak seni tetek mulo?” La kelesi mang, “E Barabas.” 22E Pailat i deken la mang, “Asa ning ar toli o e Iesu, esaning di atongi ana Karisito?” La rop la kelesi mang, “Sai ahati saot na rakai kutus!” 23Pa i deken la mang, “Sur asa? Esi na laulau a utna ning ka tol tari?” Ika la kukukuk rakrakai mang, “Sai ahati saot na rakai kutus!”

24Ning e Pailat i oroi i mang, bel i tolsot pas ta utna, pa a tnan purpuruon milau ir hanot, i kibas pas a malum, i gos pas naur a kuna na matan a kunum a tarai, pa i atongi mang, “A langolango kusun a suluk a tena tostos ne. Mulo ot dir warkurai mulo ono.” 25A tarai rop la kelesi mang, “I wakak ka, a warkurai a arkeles ona sulukna ir kes omila pa na natnatumila otleng.” 26E Pailat i pak sen e Barabas tetek la. Ning di ka miras tar e Iesu, i saran tari tana tena harumla sur lar sai ahati saot na rakai kutus.

Na tena harum la morot laulau o e Iesu

(Mk 15:16-20; Jn 19:2-3)

27Na tena harum anuna ningnigo tagun a matanitu la dat kas e Iesu uting na tnan rumai ana nunla a ningnigo. Pa la ben taum na tena harum rop teteki. 28La pak sen anuna kaenla, pa la amermer tari ana kubar a kaen. 29Pa la iris pas a inau a suksukna pa la suah tari ting na pukulna arlar ana kukuh anuna king. La atongtong tari ana bulse ting na sot a kuna#27:29 A kubar a kaen, a kukuh pa a bulse ditol tatatai arlar ana mermer anuna king. pa la kes ana bokona hanla namatana, pa la morot laulau ono mang, “U a king anuna tarai Juda!” 30Pa la namisi, la kibas pas a bulse ning kusuni, pa la dapdapis a pukulna ono. 31Ning la ka morot laulau tar ono, la pak sen a kubar a kaen kusuni. La amermer tari ulak ana nuna kaenla, pa la ben purumi sur dir sai ahati saot na rakai kutus.

Di sai ahat e Iesu saot na rakai kutus

(Mk 15:21-32; Lk 23:26-43; Jn 19:17-27)

32Ning la purum la barat pas ning a te Sairini, a risana e Saimon, pa la angongosi sur ir los a rakai kutus ane Iesu. 33La hanot ting na pukna di atongi o e Golgota, a kamkam a warwara ning mang a “Pukna na lasa na pukul.” 34La saran tar a wain ta e Iesu, ning di ka tol taman tari ana utna ning i mapak. Ika, ning i toho i, bel i mang sur ir gangi. 35Ning la ka sai ahat tari saot na rakai kutus, la pilai laki sur lar asalar anuna kaenla tetek la taktakai. 36Lamur la kes pa la tai alar e Iesu. 37Saot na pukul e Iesu ting na rakai kutus, la suah tar a warwara na artitiu ono, di tumus tari mang,

“ine e iesu, a king anun a tarai juda.”

38Pa di sai ahati otleng naur a tena kinkinau taum ono saot na naur a rakai kutus, takai ting na sot, pa takai ting na kair. 39La ning la hanan bolos e Iesu, la atong laulau i pa la alalen pukulunla teteki. 40Pa la atongi mang, “U ma ning u atongi mang ur regen sen a rumai a artabar pa ur tol ulak pasi ana natol a pukakiar ka, anone ur alaun pas u ot. Ning u a Nat e God, ur purum kusun a rakai kutus.” 41Arlar ka otleng tetek a leklek a tena artabarla tetek e God pa tena asaerla tagun a warkurai pa a ningnigola, la morot laulau o e Iesu, la atongi mang, 42“I alaun pas a tarai masik, ika bel ir tolsot sur ir alaun pasi. Ning i a King anuna tarai Israel, ono otne ir purum kusun a rakai kutus pa dalar tortorot ono. 43I tortorot o e God. Ning e God i mang, ono otne ir alaun pasi, anasa i ot ka atong tari mang, ‘Iau a Nat e God.’” 44Naur a tena kinkinau otleng ning dia kulam taum ono, dia otleng dia atong laulau i.

E Iesu i mat

(Mk 15:33-41; Lk 23:44-49; Jn 19:28-30)

45Tur pasi ana iah kamis, tuk ana natol a puka kamis ana rah, a hanua rop i mormorom. 46Ning i natol a puka kamis, e Iesu i kukukuk rakrakai mang, “Eloi, Eloi, lema sabakatani?” A kamkama warwara ning i manglarne, “Anuk a God, anuka God, sur asa ning u han kusun iau?” Buk Song 22:1

47Ning dingla na tarai onla ning la tur milau la longori, la atongi mang, “I arkabah sur e Elaija.” 48Ono otning, ning a halinla i dun, pa i kibas pas a utna ning i sira dop a polo. I amurung pasi ting na wain ning i mititir, i suahi ting na rakai pa i tulsu kasi usaot sur e Iesu ir gangi. 49Dingla na tarai otleng onla, la atongi mang, “Te, dalar noreni kaba. Dalar oroi ning e Elaija ir han purum sur ir alaun pasi, o bel.” 50E Iesu i kukuk rakrakai ulak, pa i suah sen a malwasna.

51Ono otning a kaen na alalar kutus tingui na rumai a artabar i taksilir potor, turpasi saot utumo lain. A mamais i hanot, pa na hatat la tapagal. 52Na kulam a minatla la sapang, pa a galis a tarai ane God ning la ka mat, la kamtur ulak. 53La purum kusun na kulam a minatla. Pa lamur tana kamkamtur ulak ane Iesu, la hanot saot e Jerusalem, a hanua anun e God, pa la tur ot tetek a galis a tarai. 54A ningnigo anuna tena harumla, pa la otleng ning la tur taum onoi sur lar tai alar e Iesu, la kilang a mamais, pa la oroi a ututnala ning i hanot, pa la matmataut kol. La atongi mang, “I momol, a barsan ne a Nat e God.”

55A galis a gurarala otleng ning la mur e Iesu mitumo e Galili sur lar nangani, la tur bakbak tar ot pa la oroi a ututnala ne. 56Ting na arpotor tanla, natol a hane otleng ne, e Maria Magdalen, pa e Maria e tana e Jems pa e Josep, pa a kabatnan naur a nat e Sebedi.

Di aborbor e Iesu ting na kulam a minat

(Mk 15:42-47; Lk 23:50-56; Jn 19:38-42)

57Ning ka rah, ning a tena gongon, a te Arimatia, a risana e Josep, i otleng ning a kaklik a asaer ane Iesu, 58i han tetek e Pailat pa i nunungi sur a minat e Iesu. Pa e Pailat i arsune sur dir saran tari tana. 59E Josep i kibas pas a minatna, pa i irisi ana wakak a tona kaen, 60pa i aborbor tari ting na nuna tona kulam a minat, ning ka kel tari ting na ris a hat. I lakir alar tar a taman a kulam a minat ana tnan hat, pa i han kusuni. 61E Maria Magdalen pa ning a halindia maurana otleng, dia kes tar salanigo na kulam a minat.

La tai alar a kulam a minat

62Ana pukakiar lamur, a Pukakiar Sabat, a leklek a tena artabarla tetek e God pa a Parisaiola la han tetek e Pailat. 63La atai i mang, “Leklek, mila nuk pas a warwara anuna tena asasongo ne. Ning kaning ot i laun, i atongi mang, ning natol a pukakiar ir rop, ir kamtur ulak. 64Ur sune sen al tarai sur lar tai alar wakak a kulam a minat, arlar ana natol a pukakiar, sakana anuna tarai a asaer lar hanot pa lar kinau pas a minatna, pa lar atai a tarai mang ka kamtur ulak kusun a minat. Pa a asasongo ne, ir laulau kol tana asasongo ning nating e Iesu ka atong tari.” 65E Pailat i atai la mang, “Mulor ben pas na tena tai alar pa mulor han. Mulor tai alar wakak a kulam a minat arlar ot ana numulo a tastasmai.” 66Pa la han, pa la arakrakai alar tar a kulam a minat. La suah a ngas a asilang sur lar tasmani ning tik ka sapang tari. Pa la atur tar na tena tai alar sur lar tai alari.

Currently Selected:

Matiu 27: lbb

Highlight

Copy