Lia Uluk Fohon 21
21
Sara nahoris Isak bodik Abraham
1-7Nosi ikus, MAROMAK moos natuun matak-malirin baa Sara, tuir Niakaan mamenon. Baa oras Abraham katuas tiꞌan, Sara moos koꞌus. Toꞌo niakaan oras, Sara nahoris nola oa mane ida. Hotu, Abraham nanaran oa nia, Isak (tan ‘isak’ lia isin naꞌak ‘hanasa’.) Baa oras Sara nahoris Isak nia, Abraham otas tinan atus ida ona.
Sara katak naꞌak, “Maromak nalo haꞌu kanasa. Haꞌu neon diꞌak. Ema naneo naꞌak, haꞌu la kbele ketan oan baa otas ferik nuneꞌe. Haꞌukaan laꞌen moos katuas basuk tiꞌan, mais haꞌu ksei bele kahoris oan bodik nia! Dadi, oras neꞌe, se-see dei mak rona lia neꞌe, sia moos nanasa bele-bele no haꞌu.”
Baa oras lawarik nia otas loron walu, Abraham moos nalo hamane aan baa nia, tuir Maromak ukun.
Hagar no Ismael kona habuꞌa
8Hotu, Isak hetak boot. Baa oras Sara atu keta nia, Abraham nalo dahur boot.
9-10Baa oras nia, Sara naree Abraham feen kiꞌik Hagar oan Ismael kakoen Isak. Naree nunia, Sara katak baa laꞌen naꞌak, “Teꞌur sai ata feto Mesir neꞌe no niakaan oan! Haꞌu la koꞌuk niakaan oan simu itakaan sasoin! Haꞌukaan oan Isak dei, mak netan hotu-hotu.”
11Rona nola nunia, Abraham noran la diꞌak, tan Ismael moos niakaan oan susu. 12Mais, Maromak katak baa Abraham naꞌak, “Abraham! Keta maneo feen kiꞌik no oan nia. Tuir Sara hakaran dei, tan o metan husar-binan mak Haꞌu kameno tiꞌan nia, tuir Isak. 13Mais Haꞌu moos katuun matak-malirin baa okaan feen kiꞌik oan Ismael. Tan Ismael moos, okaan oan susu duꞌuk. Nosi ikus, niakaan husar-binan dadi ema klubun ida!”
14Rona nola nunia, awan seisawan Abraham nalo bakae, foo baa Hagar, no tara wee fatik boot ida#21:14Wee fatik neꞌe, halo hosi kulit. Baa oras nia, Ismael otas liu tinan sanulu resin haat. Haree Lia Uluk Fohon 16:16; 21:5,8. baa niakaan baas. Hotu, nia nabusik feto nia no oan Ismael laꞌo. Hagar no oan Ismael moos laꞌo nasirin rai mamuk ida kreꞌis Beer Syeba.
15Baa oras wee hemun moos tiꞌan, Hagar laꞌo nela Ismael iha ai huun kiꞌik ida leon, 16tan nia naneo naꞌak, “Haꞌu la kterus karee oan neꞌe mate.” Hotu, Hagar nakiduk takseer roꞌa lima nulu nosi oan nia, hotu tuur, tanis nadeꞌun aan.
17Ismael moos tanis. Maromak moos rona niakaan lian. Hotu, Maromak Niakan makbukar laleꞌan ida bolu Hagar naꞌak, “Hagar! Tan saa o susar nuneꞌe? Keta mataꞌuk, tan Maromak rona tiꞌan okaan oan tanis. 18Mariik, baa maliku nia! Makbiit niakaan neon, tan Haꞌu atu kalo niakaan husar-binan dadi ema klubun boot.”
19Hotu, Maromak namoo Hagar matan, toꞌo nia bele naree wee knuuk ida. Nia nodi wee fatik baa tii wee, nodi naroo oan nia.
20-21Nunia hotu, Ismael no inan Hagar nein iha raihenek molik ida, naran Paran. Ismael boot mai, nia dadi ema mahanak matenek. Niakaan inan moos sasudin nia no feto Mesir ida. Hotu-hotu neꞌe dadi, tan Maromak namutuk no Ismael.
Abraham no Abimelek dame malu iha Beer Syeba
22Baa oras nia, Naꞌi Abimelek niakaan meo ulun ida, naran Pikol. Baa loron ida, sia rua mai nasoru Abraham. Naꞌi Abimelek dale baa Abraham naꞌak, “Abraham! Ami hatene Maromak namutuk no o. Etuk, o malo sa-saa dei, dadi. 23Oras neꞌe, haꞌu kusu o mameno modi marai aan iha Maromak oin maꞌak, o la beꞌur haꞌu ko haꞌukaan husar-binan. Haꞌu diꞌak ko o tiꞌan, dadi o moos musti diꞌak mo haꞌu ko haꞌukaan renun rai neꞌe.”
24Abraham moos simu naꞌak, “Diꞌak! Haꞌu karai aan.”
25Mais la kleur, Abraham nasaꞌe lia baa Naꞌi Abimelek naꞌak, “Ama naꞌi eman sia nadau nola haꞌukaan wee knuuk ida tiꞌan.”
26Rona nola nunia, Naꞌi Abimelek naꞌak, “Hei! Haꞌu kfoin rona lia neꞌe. Tan saa o la masara kedan lia nia? Haꞌu la katene see mak nadau.”
27-28Nunia hotu, Abraham no Naꞌi Abimelek namate menon no malu. Abraham nola karau baka no bibi malae, latan baa naꞌin. Hotu, Abraham boi nasai tuꞌan bibi malae inan salak matan hitu. 29Naree nunia, Naꞌi Abimelek nusu nia naꞌak, “Tan saa o malo nunia?”
30Abraham nataa naꞌak, “Ama naꞌi simu bibi malae matan hitu neꞌe ona, atu dadi tadak naꞌak, ama naꞌi simu haꞌu mak keꞌe wee knuuk nia.”
31Tan sia rua narai aan iha nia, sia moos nanaran fatin nia naꞌak, Beer Syeba. Neꞌe naꞌak, ‘wee knuuk harai aan’.#21:31Iha lia Ibrani, ‘Beer Syeba’ noo lia isin oi-oik. Neꞌe naꞌak: ‘wee knuuk dame’, lale, ‘wee knuuk sotir diꞌak’, lale, ‘wee knuuk hitu’, lale, ‘wee knuuk harai aan’.
32Hotu tiꞌan, Naꞌi Abimelek no niakaan meo ulun fila nikar baa siakaan rai Filistin. 33Hotu, Abraham taman ai tamariska#21:33Ai tamariska neꞌe, la noo iha rai Timor. Ai nia moris iha rai maran, mais tahan buras nohuun, tan abut tama leꞌan baa rai laran. Bibi naa ai neꞌe tahan. huun ida iha Beer Syeba. Nahuu baa oras nia, ai huun nia foo natene baa Abraham naꞌak, fatin nia, fatin loꞌu-sudur baa MAROMAK Mak Moris Nima-nimak. 34Hotu Abraham nein heik toꞌo kleur iha ema Filistin rain nia.
Currently Selected:
Lia Uluk Fohon 21: tetNTPO
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
