Lia Uluk Fohon 39
39
Yusuf no Potifar feen
1-2Hori hirak nia, ema Ismael sia nodi tiꞌan Yusuf baa rai Mesir. Iha rai nia, no ema boot ida naran Potifar. Potifar neꞌe, ulun bodik sondadu hotu-hotu mak daka naꞌi Mesir tofatik. Nia sosa nola Yusuf nosi ema sia, atu nalo baa ata iha uman. Iha uma nia, MAROMAK tulun Yusuf, toꞌo niakaan serwisu sia hotu-hotu laꞌo diꞌa-diꞌak. 3Yusuf ulun Potifar naree niakaan serwisu diꞌak nunia, nia moos natene ona naꞌak, MAROMAK mak nanis tulun Yusuf. 4Tan baa nia, Potifar nakara no fiar baa Yusuf, toꞌo foti nia nalo baa klosan ulun iha uman laran. Nia moos fiar baa Yusuf, nebee babilan uman no bein sasoin hotu-hotu. 5Tan Yusuf tuur iha Potifar uman, MAROMAK moos natuun matak-malirin baa Potifar, ema Mesir nia. Potifar sasoin uma laran, bein sasoin, toꞌos, no serwisu sia hotu-hotu laꞌo diꞌa-diꞌak. 6Tan Yusuf nalaꞌo diꞌa-diꞌak serwisu sia hotu-hotu, Potifar la nanoin sa-saa ona. Nia natene loos naa dei.
Baa oras nia, Yusuf isin lolon kabaas tebe-tebes. 7Nia tuur iha nebaa sei la kleur falik, Potifar feen neon monu baa nia. Tan baa nia, feto neꞌe tene Yusuf nebee sia rua toba namutuk.
8Mais Yusuf la noꞌuk. Nia katak baa feto nia naꞌak, “Keta nunia, ina! Haꞌukaan ama boot Potifar foo tiꞌan beran baa haꞌu atu kodi kaliku sa-saa hotu-hotu. 9Iha uma neꞌe, la no ema ida tenik mak netan beran liu haꞌu, tan ama boot naruka haꞌu tiꞌan atu kaliku sa-saa hotu-hotu. Hela mesan ina dei mak haꞌu la kbele kaliku. Oin nunabee, haꞌu kbele kalo hahalok aat nunia! Hahalok nia moos sakar Maromak hakaran!”
10Masik Yusuf la noꞌuk nalo aat nunia moos, sura loron Potifar feen tene Yusuf bei-beik. Yusuf moos dudu bei-beik.
11Baa loron ida Yusuf tama baa uma laran atu serwisu. Baa oras nia, la no ema seluk iha uma. 12Natene nola nunia, Potifar feen kaer nola Yusuf farun liman. Hotu, nia dada seten Yusuf nodi naꞌak, “Mai ona! Oras neꞌe ita rua mesan tiꞌan! Mai ita baa toba ona!”
Mais Yusuf la noꞌuk. Nia nakfodak sai toꞌo farun nakolu. Hotu, nia nalai sai. Mais feto nia kaer natoos Yusuf farun.
13Oras Potifar feen naree naꞌak Yusuf nalai nela farun, 14-15nia bolu ema serwisu sia nodi katak naꞌak, “Emi mai haree lai! Ohin nia, mane Ibrani nia tama baa haꞌukaan keꞌan laran! Nia atu nalo aat no haꞌu, mais haꞌu kahii makaꞌas, toꞌo nia nalai nela niakaan faru neꞌe! Haꞌukaan laꞌen nodi ema notar lalek neꞌe mai, atu namoe ita dei!”
16Potifar feen moos rai Yusuf farun nia, toꞌo laꞌen fila mai. 17Laꞌen fila mai tiꞌan, feen nasaꞌe lia naꞌak, “Ama! Ema Ibrani mak ama nodi mai tiꞌan nia, foin da-dauk neꞌe tama baa haꞌukaan keꞌan laran atu nalo lia kfoꞌer no haꞌu! 18Mais haꞌu kakrake makaꞌas, kodi bolu ema! Hotu mane nia nalai nela niakaan faru neꞌe!”
19Rona tiꞌan feen dale nunia, Potifar krakat tebe-tebes. 20Nia naruka ema baa kohi nola Yusuf. Hotu, sia natama Yusuf baa naꞌi Mesir niakaan bui.
21Mais MAROMAK la naluꞌa Yusuf. Nia tulun nima-nimak, toꞌo bui ulun moos nakara Yusuf tebe-tebes, 22no fiar baa Yusuf. Nia latan beran baa Yusuf atu naliku ema bui sia hotu-hotu, no nalaꞌok serwisu hotu-hotu iha nia. 23Tan Naꞌi Maromak tulun Yusuf nunia, serwisu hotu-hotu iha bui nia laꞌo diꞌa-diꞌak, toꞌo bui ulun moos la nanoin sa-saa ona iha bui nia.
Currently Selected:
Lia Uluk Fohon 39: tetNTPO
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
