Mateus 5

Yesus nanorin iha foho kiꞌik ida leten

1Baa oras Yesus titu-naree ema lear lolok mai, Nia saꞌe baa foho kiꞌik ida atu tuur iha nia. Maktuir sia mak Nia boi tiꞌan nia mai kreꞌis atu nanono Nia. 2Hotu Nia nahuu nanorin sia.

Ema mak sotir lalek iha raiklaran, sia sotir iha Maromak fohorain

(Lukas 6:20-23)

3Yesus nanorin naꞌak, “Ema kiak sia, sia sotir,

tan Naꞌi Maromak duꞌuk mak siakaan Naꞌin iha laleꞌan.

4Ema mak laran susar sia, sia sotir,

tan Naꞌi Maromak duꞌuk namaus sia.#Yesaya 61:2

5Ema kiꞌik sia, sia sotir,

tan sia atu simu fafaꞌek nosi Naꞌi Maromak.#Kananuk Sia 37:11

6Ema mak buka Naꞌi Maromak dalan moris loos, sia sotir,

tan Naꞌi Maromak atu foo saa mak sia buka.#Yesaya 55:1-2

7Ema mak neon monu baa ema, sia sotir,

tan Naꞌi Maromak moos atu neon monu baa sia.

8Ema mak neon moon sia, sia sotir,

tan sia atu naree duꞌuk Naꞌi Maromak.#Kananuk Sia 24:3-4

9Ema mak nalo ema dame malu, sia sotir,

tan Naꞌi Maromak atu temi sia naꞌak, ‘Haꞌukaan oan.’

10Ema mak netan susar tan tuir Naꞌi Maromak, sia sotir,

tan Naꞌi Maromak duꞌuk mak siakaan Naꞌin iha laleꞌan.#1 Petrus 3:14

11Kalo ema nasusar emi tan emi tuir Haꞌu, emi moos sotir. Kalo sia dale aat baa emi, no naktolek emi, nodi nahaat emikaan naran, emi moos sotir.#1 Petrus 4:14 12Emi musti neon boot, tan Naꞌi Maromak atu foo saseban boot baa emi iha laleꞌan. Mais hanoin! Lahoos emi mesan mak hetan susar nunia, tan ema moos nalo aat nunia baa Maromak makoꞌan uluk aan sia.”#2 Lia Rai Israꞌel no Rai Yahuda 36:16; Kristus Klosan Lian 7:52

Ema mak iha Maromak fohorain, sia musti moris hanesan masin no kroman

(Markus 9:50; Lukas 14:34-35)

13Hotu Yesus dale naꞌak, “Emikaan moris musti dadi hanesan masin bodik ema raiklaran. Kalo ema beer haan midar, sia musti tau masin. Mais, kalo masin miis tiꞌan, la noo folin ona. Ema soe loos baa dalan, hotu sama tan.#Markus 9:50; Lukas 14:34-35

14Emikaan moris moos musti dadi hanesan kroman bodik ema raiklaran. Emi musti haksinak hanesan kota ida iha foho leten mak ema waꞌin bele titu-naree.#Yohanis 8:12, 9:5 15Ema mak nalaka badut, la subar badut nia iha sasanan laran. Mais sia rai baa fatin aas, nebee bele naroma uma isin hotu-hotu.#Markus 4:21; Lukas 8:16, 11:33 16Emi musti moris nunia. Emi musti haksinak, nebee ema waꞌin bele titu-naree emikaan moris mak diꞌak, toꞌo sia tonu naꞌak, ‘Emikaan Aman iha laleꞌan, makaꞌas tebes!’ ”#1 Petrus 2:12

Yesus mai atu natoꞌo Ukun-badu Musa, lahoos atu nalakon

17Hotu Yesus dale naꞌak, “Arumak emi haneo haꞌak, Haꞌu kmai iha raiklaran neꞌe atu kalakon Ukun-badu mak Naꞌi Maromak foo baa Bei Musa ka? Lale! Arumak emi haneo haꞌak, Haꞌu la ktitu saa mak Maromak makoꞌan sia nanorin hori uluk ka? Lale! Haꞌu kmai neꞌe, atu kalaꞌo katoꞌo lia nia sia hotu-hotu. 18Rona, tan Haꞌukaan dalen neꞌe, tebes no loos! Kalo laleꞌan no raiklaran sei iha, Ukun-badu nia sia nafati nohuun. Masik lia lotun oan ida moos, la lakon. Hotu-hotu nafati toꞌo tetuk.#Lukas 16:17 19Noo ema mak la titu ukun balu, tan sia naneo naꞌak, ‘Ukun ida neꞌe, lia kiꞌik. Dadi, haꞌu la ktuir!’ Hotu ema nia nanorin baa ema seluk, nebee keta tuir. Tan lisan nunia, Naꞌi Maromak iha laleꞌan atu nafoli ema nia naꞌak, ema kiꞌik. Mais ema mak nalaꞌo ukun nia sia nodi nanorin ema seluk nebee nalo tuir, Naꞌi Maromak atu nafoli ema nia naꞌak, ema boot. 20Fiar Haꞌu! Kalo emi la moris tuir Naꞌi Maromak hakaran liu nosi ema manorik ukun no ema partee Farisi sia, emi la bele tama Niakaan fohorain no la bele dadi baa Niakaan ema.”

Ema mak iha Maromak fohorain, keta nawan saꞌe malu

(Lukas 12:57-59)

21Hotu Yesus dale naꞌak, “Emi hatene tiꞌan ukun sia mak Naꞌi Maromak foo baa itakaan bei uluk sia naꞌak, ‘Keta hoꞌo ema. Noo tenik, kalo ema noꞌo ema, musti kona kastikar.’#Ema Israꞌel Sai Nosi Mesir 20:13; Hanoin Hikar Dalan Moris 5:17 22Mais haꞌu katak nuneꞌe: keta nawan saꞌe malu, tan ema mak nawan saꞌe niakaan maluk, nia sala. Ema mak deꞌan niakaan maluk naꞌak, ‘O momok!’, ema nia musti nataa iha makotu lia oin. No ema mak nakbehek niakaan maluk naꞌak, ‘O bulak!’, nia atu kona kastikar iha haꞌi naraka.

23Tan lia nia, kalo o modi sera baa Naꞌi Maromak, hotu manoin maꞌak okaan maluk sei nawan saꞌe o, 24diꞌak liu rai hein sera nia lai, hotu baa dame malu, foin mai matetu sera nia baa Naꞌi Maromak.

25Kalo ema nalo lia baa o, diꞌak liu lai-lais baa musu dame mo nia. Kalo lale, ema nia atu dada nodi o baa makotu lia oin. Hotu makotu lia atu latan o baa ema makdaka bui, nebee natama o baa bui laran. 26Haꞌukaan dalen neꞌe, tebes no loos! O atu mein bei-beik iha bui laran, toꞌo selu kotu okaan tusan hotu-hotu.”

Ema mak iha Maromak fohorain, keta halo lia kfoꞌer

27Hotu Yesus dale naꞌak, “Emi hatene tiꞌan ukun-badu naꞌak, ‘Keta halo lia kfoꞌer.’#Ema Israꞌel Sai Nosi Mesir 20:14; Hanoin Hikar Dalan Moris 5:18 28Mais Haꞌu katak nuneꞌe: Ema mak foti matan titu-naree feto ida, hotu nia beer toba no feto nia, ema nia nalo lia kfoꞌer tiꞌan iha neon laran. 29Tan lia nia, kalo o malo sala modi okaan matan kwana, sukit soe dei. Diꞌak liu o tama laleꞌan modi matan mesak dei, nosi o kona soe baa haꞌi naraka modi matan rua.#Mateus 18:9; Markus 9:47 30Kalo o malo sala modi okaan liman kwana, taa kotu baa dei. Diꞌak liu o tama laleꞌan modi liman sorin dei, nosi o kona soe baa haꞌi naraka modi liman rua.”#Mateus 18:8; Markus 9:43

Ema mak iha Maromak fohorain, keta soe malu

(Mateus 19:9; Markus 10:11-12; Lukas 16:18)

31Hotu Yesus dale naꞌak, “Emi hatene tiꞌan ukun-badu naꞌak, ‘Ema mak soe feen, musti foo hakerek soe malu baa feto nia.’#Hanoin Hikar Dalan Moris 24:1-4; Mateus 19:7; Markus 10:4 32Mais Haꞌu katak nuneꞌe: Kalo laꞌen soe feen, mais feen la isin ida nakur biti-kluni, laꞌen nalo nia nakur biti-kluni tiꞌan. Kalo mane seluk nola feto nia, mane nia moos nakur biti-kluni.”#Mateus 19:9; Markus 10:11-12; Lukas 16:18; 1 Korintus 7:10-11

Ema mak iha Maromak fohorain, sia nalo tuir siakaan mamenon

33Hotu Yesus dale naꞌak, “Emi hatene tiꞌan ukun-badu mak Naꞌi Maromak foo baa itakaan bei uluk sia naꞌak, ‘Kalo ema namate menon nodi narai aan temi Naꞌi Maromak naran, ema nia tatalik no mamenon nia tiꞌan.’#Ukun-badu Naꞌilulik 19:12; Sura Renu Israꞌel 30:2; Hanoin Hikar Dalan Moris 23:21 34Mais Haꞌu katak nuneꞌe: Keta harai aan hodi temi laleꞌan, tan laleꞌan nia, Naꞌi Maromak Niakaan tofatik.#Yakobus 5:12; Yesaya 66:1; Mateus 23:22 35Keta harai aan hodi temi raiklaran, tan raiklaran nia, Naꞌi Maromak Niakaan tau ain fatik. Keta harai aan hodi temi Yerusalem, tan Yerusalem nia, Naꞌi Boot Niakaan kota.#Yesaya 66:1; Kananuk Sia 48:3 36Keta harai aan hodi temi okaan ulun, tan okaan ulun nia la noo beran atu naruka fuuk lahon ida moos atu dadi metan lale mutin. 37Kalo o makara mamate menon, katak dei maꞌak, ‘Tebes’. Kalo la makara, katak dei maꞌak ‘Lale’. Kalo maꞌak liu tan tenik, lia nia nahabut baa diabu.”

Ema mak iha Maromak fohorain, keta selu aat hodi aat

(Lukas 6:29-30)

38Hotu Yesus dale naꞌak, “Emi hatene tiꞌan ukun-badu naꞌak, ‘Kalo ema nahaat okaan matan, mahaat sakar niakaan matan. Kalo ema nahonu okaan neꞌan, mahonu sakar niakaan neꞌan.’#Ema Israꞌel Sai Nosi Mesir 21:24; Ukun-badu Naꞌilulik 24:20; Hanoin Hikar Dalan Moris 19:21 39Mais Haꞌu katak nuneꞌe: Keta selu aat hodi aat. Kalo ema basa okaan hasan sorin, mabusik basa tenik sorin balu. 40Kalo ema nalo lia baa o atu nola okaan faru, foo tenik okaan faru klobor baa. 41Kalo sondadu seten o atu matiu niakaan naha toꞌo laꞌo kilo ida, matiu modi liu baa, toꞌo kilo rua. 42Kalo ema nusu okaan naha ida, foo baa dei. Kalo ema beer nola hein okaan naha ida, foo baa dei.”

Ema mak iha Maromak fohorain, sia nadomi ema mak hirus sia

(Lukas 6:27-28,32-36)

43Hotu Yesus dale naꞌak, “Emi rona tiꞌan ukun-badu naꞌak, ‘Madomi okaan maluk, mais hirus ema mak hirus o.’#Ukun-badu Naꞌilulik 19:18 44Mais Haꞌu katak nuneꞌe: Musti madomi ema mak hirus o, modi makroꞌan nebee Naꞌi Maromak natuun matak-malirin baa ema mak nasusar o. 45Kalo o malo nunia, o matudu maꞌak, o neꞌe Ama iha laleꞌan Niakaan oan. Nia naseꞌi loro matan atu naksinak bodik ema diꞌak. Nia moos naseꞌi atu naksinak bodik ema aat. Nia natuun udan ween bodik ema mak nalo tuir Niakaan haruka, namutuk no ema mak sakar Niakaan haruka. 46Kalo o madomi loos ema mak nadomi o, o maneo maꞌak Naꞌi Maromak musti selu matak-malirin baa o ka? Lale! Tan ema aat moos nadomi siakaan belu mak nadomi sia. 47Kalo o foo loos dame baa okaan belu, niakaan saa mak liu? Tan ema mak la fiar baa Naꞌi Maromak moos nalo tuir nunia. 48Hanoin! Okaan Ama iha laleꞌan nadomi ema hotu-hotu. O moos musti malo tuir nunia!”#Ukun-badu Naꞌilulik 19:2; Hanoin Hikar Dalan Moris 18:13

Currently Selected:

Mateus 5: tetNTPO

Highlight

Copy