Matiu 12
12
Yeesus Sabat fofa-pa uuwowa maek
(Mak 2.23-28, Luk 6.1-5)
1Aria iir oko-pa Sabat fofa-pa Yeesus ona teeria unow onaiya wit manin gone erepuma-pa wiar ikiwemik. Ikiwem-ikok ona teeria-ke wuailep wit makena wiar piitap aawep enim-ikiwem-ikemik. 2Naap oniwkin wi Farisi-ke wia urufap Yeesus maakemik, “Ei, no urufe, no
teeria fain i Sabat fofa-pa maa me onowa nain#12.2 Moses sira oko wuak nain feenap, Sabat fofa-pa uuwowa emi. Ne wi Farisi-ke maemik, wi eena wit makena piitap wapena-pa firirimep enemik nain, nain uuwowa-ke, naapeya sira puukamik. onap sira manek akena nain yiar puukamik!” 3Ne wia maakek, “Ni naap yia maiman. Nain iiriw yiena nembesir Dewit sira onak nain Mua Maneka opora-pa siisimep-puamik. Ni nain me-ko urufaman-i? Ona teeria onaiya ikim-ikok wuailemik. 4Ne Mua Maneka lotu koora wiar ikiwep emer ikowa Mua Maneka patirimik nain wiar aawep enemik. Emer ikowa nain wi pris muutiw enimimik ne mua oro-oram wia. Nain wis-ke wiar aawep enemik. Wi sira puukamik, naap-ko wia maemik-i? 5Ne ni, Moses sira wuomakek nain me wiar urufaman-i? Feenap, Sabat fofa-pa maa me uuwowa nain wi pris-ke tempel koora-pa maa eneka paemi Mua Maneka patirami Sabat sira nain puukimik, nain wi pina onaiya ikemik me wia naiman. 6Naapeya yo feenap mainen, makena, tempel koora maa maneka-ke, nain mua kuisow fan ikua nain tempel koora nomakek. 7Aria Mua Maneka-ke opora feenap maek,
‘Ni mua wia kemalowa sira nain kookaliyem. Ne maa eneka-pa efa patiriman nain me niar kookaliyem.’ (Hosea 6.6)
Ni opora fain kemena aawekaman-na wi mua sira me puukimik nain oram enuma me wia samorekaman. 8Yo Mua Muuka-ke Sabat sira unowa urufiyem.”
Yeesus mua wapena umok nain saliwak
(Mak 3.1-6, Luk 6.6-11)
9Aria Yeesus epa nain piipuap ikiwemi lotu koora oko wiar urupok. 10Ne mua oko, wapen okaiwi kuisow wiar samorarep paara opap ikua nain pun nan ikua. Ne wi Farisi-ke Yeesus opora-pa wuau naep nokaremik, “Napum mua Sabat fofa-pa wia saliwimik nain sira Moses wuomakek nain yiar puukimik-i e weetak?” 11Naap nokariwkin os-ke feenap wia maakek, “Aria ni mua Sabat fofa-pa sipsip kuisow miiw ona-pa niar orainon-na kamenap onowen? Sipsip nain akupap me aawowen-i? 12Ni kema suuweka, sipsip maa maneka-ki e mua maa maneka-ke? Naapeya Sabat fofa-pa mua wia asipowa nain sira eliwa.” 13Naap wia maakep-puami mua nain maakek, “No wapena tiine.” Naap maakeya wapena fakerap tiinep sariaremi wapena okaiwi saarik ikua. 14Ne aria wi Farisi naap urufap ikiwemik. Ikiwemi aakunemik, o kamenap onap ifakimiyen naemik.
Mua Maneka ona uuwow mua
15Aria Yeesus ifakimowa maemik nain ona miimap owowa nain piipuap owow oko ikiwok. Ne wi emeria mua unow onaiya ookamik. Naeya wi mua napuma wia saliweya sariaremik. 16Ne opora kekanowa feenap wia maakek, “Ni ikiwemi yo meta me efa manekeka.” 17Naap wia maakek nain iiriw Mua Maneka-ke ona profet Aisaiya maakek nain naap pepek erak. Feenap,
18“Mua faa yena uuwow mua-ke, yena iiriw eena pepekimep-puam nain-ke. Yena kema muneka, o waisow yo kema fufurariyem. Ne yena Ewar nain o sesekomamkun miiw unowa fain kakeniw ikowa sira manekap wia maakinon.
19O me riirinemi farem-miawinon. Era-pa opora mane-maneka aakuneya me wiar miimikuan.
20Wi mua kekanowa marewa nain me wia samorinon, ne wi mua iiwawun kua-pa ikemik nain me wia samorowa, wia aawinon. Naap oni-ikim-ikaeya kakeniw ikowa sira miiwa fain epa aawinon.
21Ne aria wi miiw emeria mua o waisow opora wiar opiwkin o unuma-pa eliwa ikaikuan.” (Aisaiya 42.1-4)
Mua Maneka-ke naap maek.
Yeesus o Belsebul-ke naemik
(Mak 3.20-30, Luk 11.14-23; 12.10)
22Aria Yeesus nan ikaeya mua oko mokok opa ne opaimika pun uumarek nain wiar amapekapemik. Mua nain sawur-ke anirawiwkin naap arek. Amapekapiwkin saliweya aakisa kuisow aakunemi maa urufak. 23Wi teeria maneka nain naap urufap soranep kakaemi wi-wieniw wiam nokaremi maemik, “Nee, mua fain Dewit muuka nain-ki e kamenion?” 24Nain wi Farisi-ke miimap maemik, “Mua fain sawur woos mua Belsebul-ke kekanowa iweya sawur wia iirariya.” 25Aria Yeesus wi kema nain wiar amisarep wia maakek, “Ni naap efa maeman nain fain kema suuweka, owow oko wi-wieniw wiam fookap irakikuan-na owowa onaiya iiwawun samorarikuan. Ne owowa kuisow mua wiam fookap irakikuan-na kekanep me ikaikuan. Weetak. Ne kerekera pun naap. 26Naapeya Satan pun sira naap, sawur wia iirarinon-na aa, ona teeria wameiya irakek naiyen. Ne wi kamenap kekanep ikaikuan?
27Aria yo Belsebul-ke kekanowa yieya sawur wia iirariyem, naap efa maiman-i? Nain makeniya-na niena teeria sawur wia iirarimik nain mua naareke kekanowa wieya naap onimik? Ikoka wis-ke naap onami ariman wuikuan, ni opora me makena-ke. 28Ne yo Mua Maneka Ewar Eliwa-ke efa kekanoweya sawur wia iirariyem, ni naap efa maep-na amisarowen, Mua Maneka ona pika kemena-pa nia wuowa epa fan imenarek.
29Aria feenap saarik. Mua oko mua kekanowa maa unowa wiar aawekam naep mokomokoka koora wiar ikiwep kekanowa wiar nomakep opap kaikap-puap maa unowa eliw wiar aawinon. Kekanowa me wiar nomakinon-na weetak.
30Mua eena yo efamiya me ikua nain yo iiwua-ke. Ne mua eena yo efamiya me uuwami mua me wia fiirimiya nain wia fafarumeya pukikuan. 31Naapeya nia maakiyem, pina unowa onimik ne Mua Maneka opora firekimik nain, pina wasirkikuan-na pina nain wiar iirarinon. Nain opora aakunemi Mua Maneka Ewar Eliwa firekimik nain pina nain me wiar iirarinon. 32Wi mua yo Mua Muuka efa firekami opora-ko onikuan-na Mua Maneka-ke pina nain wiar iirarinon. Ne wi Ewar Eliwa firekowa opora onikuan-na Mua Maneka-ke pina nain me wiar iirarinon. Pina anane naap wiar ikainon.” Naap wia maakek.
Mua sira kamenap ikua, ona opora pun naap
(Luk 6.43-45)
33Ne opora oko feenap wia maakek, “Ni nomokowa urufap maiman, ‘Nomokowa eliwa, makena pun eliwa. Ne nomokowa samora makena pun samora. Naapeya nomokowa makena urufap amisaremik.’ 34Ni faa, ifa samora upowa-ke. Ni kamenap onap-ko opor eliwa aakunowen. Moram ni kema-pa sira samora niar taanep ikua. Maa unowa kema-pa ikaeya opaimika-pa kosiep oraiya. 35Mua eliwa ona kema-pa opor eliwa imeniya, ne mua samora ona kema-pa opor samora imeniya. 36Naapeya ni feenap amisareka, wiimar Mua Maneka nia mekawow epa-pa ni mua kema me suuwowa opor samora aakuniman nain pina aawowen. 37Moram niena opor samora-pa maa anima-pa niam wuowen, ne niena opor eliwa aakunowa-pa epa eliwa aawowen.” Naap maek.
Maa miililina naiwkin Yeesus-ke weetak naek
(Mak 8.11-12, Luk 11.29-32)
38Naap ikok wi sira amis mua ne wi Farisi-ke Yeesus maakemik, “Somek mua, no maa miililina-ko oneya nefar urufiyen.” 39Ne wia maakek, “Ni aakis teeria fain emina kekanep Mua Maneka piipuaman, ne maa miililina-ko yia ofakoweya urufiyen naap maiman-i? Weetak, yo maa me oninen. Ni iiriw profet Yoona kamenap arek nain kema suuwap ileneka. 40Iiriw akena Yoona mera urom tepak-pa ikaeya fofa arow. Ne ikoka Mua Muuka pun sira naap, fofa arow eruw tepak-pa ikainon. 41Ne wiimar Mua Maneka nia mekawow epa-pa wi Niniwe-ke iikirap pina ariman niar wuikuan. Moram, wi iiriw pina onam-ikaiwkin Yoona-ke wiar ikiwep opora manekap wia maakeya miimap kema kiremik. Ne aakisa mua kuisow fan ikua fain-ke o nomakek. Nain o opora nia maakiya nain ni me miimap kema me kiriman. 42Ne iir nain pun Seba woos emeria-ke iikirap ni teeria fain pina ariman niar wuinon. Moram, o iiriw owow saria Solomon amis maneka ne opor eliwa wiar miimekam naep epasia akena-pa ekapok. Ne aakisa mua fan ikua fain-ke Solomon amis maneka wiar nomakek. Nain ni opora me wiar miimiman.”
Sawur wia iirariwkin kiiriw ekapemik
(Luk 11.24-26)
43Yeesus kiiriw maek, “Aria sawur mua oko mia-pa wiar ikok oromi epa reenowa ikiwep uurarow epa enuma akupam-miawinon. 44Epa me imeninon-na kema-pa feenap mainon, ‘Yo kirep yena epa awona nainiw iwinen.’ Naap maep kiiriw ekapep ona epa awona nain urufinon-na koor kemena gerenek maneka ikua, maa sakua marew. 45Naap urufap kiiriw nainiw ikiwep sawur samor akena ikur okaiwi-pa erup wia aawep ekapep neeke taanikuan. Naeya iiriw mua nain lawisiw samora ikua, ne ikoka iiwawun samorarinon. Ne ni teeria fain pun naap niar imenarinon,” naap wia maakek.
Yeesus onak ne wiamun teeria o akupamik
(Mak 3.31-35, Luk 8.19-21)
46Aria Yeesus-ke teeria maneka nain wiamiya aakunem-ikaeya ona wiamun ne onak naap ekapemik. Owaruma-pa ikok i wameiya-ko aakuniyen naep wia maakemik. 47Naeya mua oko-ke wia urufap Yeesus maakek, “Nena neene ne niamun unowa owaruma-pa ikok no nefa maimik.” 48Ne mua nain maakek, “Naarew ame yena aite ne aamun unowa-ke?” 49Naap maep ona teeria wiamiya ikua nain wapen miira wia mik-ikiwemi maek, “Ni unowa fain yena aite ne yena aamun-ke. 50Mua eena yena Auwa owow iinan-pa ikua nain kookalowa wiar ookimik nain yena aite, yena ekera ne yena aamun unowa-ke.”
Currently Selected:
Matiu 12: mhlNT
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
Matiu 12
12
Yeesus Sabat fofa-pa uuwowa maek
(Mak 2.23-28, Luk 6.1-5)
1Aria iir oko-pa Sabat fofa-pa Yeesus ona teeria unow onaiya wit manin gone erepuma-pa wiar ikiwemik. Ikiwem-ikok ona teeria-ke wuailep wit makena wiar piitap aawep enim-ikiwem-ikemik. 2Naap oniwkin wi Farisi-ke wia urufap Yeesus maakemik, “Ei, no urufe, no
teeria fain i Sabat fofa-pa maa me onowa nain#12.2 Moses sira oko wuak nain feenap, Sabat fofa-pa uuwowa emi. Ne wi Farisi-ke maemik, wi eena wit makena piitap wapena-pa firirimep enemik nain, nain uuwowa-ke, naapeya sira puukamik. onap sira manek akena nain yiar puukamik!” 3Ne wia maakek, “Ni naap yia maiman. Nain iiriw yiena nembesir Dewit sira onak nain Mua Maneka opora-pa siisimep-puamik. Ni nain me-ko urufaman-i? Ona teeria onaiya ikim-ikok wuailemik. 4Ne Mua Maneka lotu koora wiar ikiwep emer ikowa Mua Maneka patirimik nain wiar aawep enemik. Emer ikowa nain wi pris muutiw enimimik ne mua oro-oram wia. Nain wis-ke wiar aawep enemik. Wi sira puukamik, naap-ko wia maemik-i? 5Ne ni, Moses sira wuomakek nain me wiar urufaman-i? Feenap, Sabat fofa-pa maa me uuwowa nain wi pris-ke tempel koora-pa maa eneka paemi Mua Maneka patirami Sabat sira nain puukimik, nain wi pina onaiya ikemik me wia naiman. 6Naapeya yo feenap mainen, makena, tempel koora maa maneka-ke, nain mua kuisow fan ikua nain tempel koora nomakek. 7Aria Mua Maneka-ke opora feenap maek,
‘Ni mua wia kemalowa sira nain kookaliyem. Ne maa eneka-pa efa patiriman nain me niar kookaliyem.’ (Hosea 6.6)
Ni opora fain kemena aawekaman-na wi mua sira me puukimik nain oram enuma me wia samorekaman. 8Yo Mua Muuka-ke Sabat sira unowa urufiyem.”
Yeesus mua wapena umok nain saliwak
(Mak 3.1-6, Luk 6.6-11)
9Aria Yeesus epa nain piipuap ikiwemi lotu koora oko wiar urupok. 10Ne mua oko, wapen okaiwi kuisow wiar samorarep paara opap ikua nain pun nan ikua. Ne wi Farisi-ke Yeesus opora-pa wuau naep nokaremik, “Napum mua Sabat fofa-pa wia saliwimik nain sira Moses wuomakek nain yiar puukimik-i e weetak?” 11Naap nokariwkin os-ke feenap wia maakek, “Aria ni mua Sabat fofa-pa sipsip kuisow miiw ona-pa niar orainon-na kamenap onowen? Sipsip nain akupap me aawowen-i? 12Ni kema suuweka, sipsip maa maneka-ki e mua maa maneka-ke? Naapeya Sabat fofa-pa mua wia asipowa nain sira eliwa.” 13Naap wia maakep-puami mua nain maakek, “No wapena tiine.” Naap maakeya wapena fakerap tiinep sariaremi wapena okaiwi saarik ikua. 14Ne aria wi Farisi naap urufap ikiwemik. Ikiwemi aakunemik, o kamenap onap ifakimiyen naemik.
Mua Maneka ona uuwow mua
15Aria Yeesus ifakimowa maemik nain ona miimap owowa nain piipuap owow oko ikiwok. Ne wi emeria mua unow onaiya ookamik. Naeya wi mua napuma wia saliweya sariaremik. 16Ne opora kekanowa feenap wia maakek, “Ni ikiwemi yo meta me efa manekeka.” 17Naap wia maakek nain iiriw Mua Maneka-ke ona profet Aisaiya maakek nain naap pepek erak. Feenap,
18“Mua faa yena uuwow mua-ke, yena iiriw eena pepekimep-puam nain-ke. Yena kema muneka, o waisow yo kema fufurariyem. Ne yena Ewar nain o sesekomamkun miiw unowa fain kakeniw ikowa sira manekap wia maakinon.
19O me riirinemi farem-miawinon. Era-pa opora mane-maneka aakuneya me wiar miimikuan.
20Wi mua kekanowa marewa nain me wia samorinon, ne wi mua iiwawun kua-pa ikemik nain me wia samorowa, wia aawinon. Naap oni-ikim-ikaeya kakeniw ikowa sira miiwa fain epa aawinon.
21Ne aria wi miiw emeria mua o waisow opora wiar opiwkin o unuma-pa eliwa ikaikuan.” (Aisaiya 42.1-4)
Mua Maneka-ke naap maek.
Yeesus o Belsebul-ke naemik
(Mak 3.20-30, Luk 11.14-23; 12.10)
22Aria Yeesus nan ikaeya mua oko mokok opa ne opaimika pun uumarek nain wiar amapekapemik. Mua nain sawur-ke anirawiwkin naap arek. Amapekapiwkin saliweya aakisa kuisow aakunemi maa urufak. 23Wi teeria maneka nain naap urufap soranep kakaemi wi-wieniw wiam nokaremi maemik, “Nee, mua fain Dewit muuka nain-ki e kamenion?” 24Nain wi Farisi-ke miimap maemik, “Mua fain sawur woos mua Belsebul-ke kekanowa iweya sawur wia iirariya.” 25Aria Yeesus wi kema nain wiar amisarep wia maakek, “Ni naap efa maeman nain fain kema suuweka, owow oko wi-wieniw wiam fookap irakikuan-na owowa onaiya iiwawun samorarikuan. Ne owowa kuisow mua wiam fookap irakikuan-na kekanep me ikaikuan. Weetak. Ne kerekera pun naap. 26Naapeya Satan pun sira naap, sawur wia iirarinon-na aa, ona teeria wameiya irakek naiyen. Ne wi kamenap kekanep ikaikuan?
27Aria yo Belsebul-ke kekanowa yieya sawur wia iirariyem, naap efa maiman-i? Nain makeniya-na niena teeria sawur wia iirarimik nain mua naareke kekanowa wieya naap onimik? Ikoka wis-ke naap onami ariman wuikuan, ni opora me makena-ke. 28Ne yo Mua Maneka Ewar Eliwa-ke efa kekanoweya sawur wia iirariyem, ni naap efa maep-na amisarowen, Mua Maneka ona pika kemena-pa nia wuowa epa fan imenarek.
29Aria feenap saarik. Mua oko mua kekanowa maa unowa wiar aawekam naep mokomokoka koora wiar ikiwep kekanowa wiar nomakep opap kaikap-puap maa unowa eliw wiar aawinon. Kekanowa me wiar nomakinon-na weetak.
30Mua eena yo efamiya me ikua nain yo iiwua-ke. Ne mua eena yo efamiya me uuwami mua me wia fiirimiya nain wia fafarumeya pukikuan. 31Naapeya nia maakiyem, pina unowa onimik ne Mua Maneka opora firekimik nain, pina wasirkikuan-na pina nain wiar iirarinon. Nain opora aakunemi Mua Maneka Ewar Eliwa firekimik nain pina nain me wiar iirarinon. 32Wi mua yo Mua Muuka efa firekami opora-ko onikuan-na Mua Maneka-ke pina nain wiar iirarinon. Ne wi Ewar Eliwa firekowa opora onikuan-na Mua Maneka-ke pina nain me wiar iirarinon. Pina anane naap wiar ikainon.” Naap wia maakek.
Mua sira kamenap ikua, ona opora pun naap
(Luk 6.43-45)
33Ne opora oko feenap wia maakek, “Ni nomokowa urufap maiman, ‘Nomokowa eliwa, makena pun eliwa. Ne nomokowa samora makena pun samora. Naapeya nomokowa makena urufap amisaremik.’ 34Ni faa, ifa samora upowa-ke. Ni kamenap onap-ko opor eliwa aakunowen. Moram ni kema-pa sira samora niar taanep ikua. Maa unowa kema-pa ikaeya opaimika-pa kosiep oraiya. 35Mua eliwa ona kema-pa opor eliwa imeniya, ne mua samora ona kema-pa opor samora imeniya. 36Naapeya ni feenap amisareka, wiimar Mua Maneka nia mekawow epa-pa ni mua kema me suuwowa opor samora aakuniman nain pina aawowen. 37Moram niena opor samora-pa maa anima-pa niam wuowen, ne niena opor eliwa aakunowa-pa epa eliwa aawowen.” Naap maek.
Maa miililina naiwkin Yeesus-ke weetak naek
(Mak 8.11-12, Luk 11.29-32)
38Naap ikok wi sira amis mua ne wi Farisi-ke Yeesus maakemik, “Somek mua, no maa miililina-ko oneya nefar urufiyen.” 39Ne wia maakek, “Ni aakis teeria fain emina kekanep Mua Maneka piipuaman, ne maa miililina-ko yia ofakoweya urufiyen naap maiman-i? Weetak, yo maa me oninen. Ni iiriw profet Yoona kamenap arek nain kema suuwap ileneka. 40Iiriw akena Yoona mera urom tepak-pa ikaeya fofa arow. Ne ikoka Mua Muuka pun sira naap, fofa arow eruw tepak-pa ikainon. 41Ne wiimar Mua Maneka nia mekawow epa-pa wi Niniwe-ke iikirap pina ariman niar wuikuan. Moram, wi iiriw pina onam-ikaiwkin Yoona-ke wiar ikiwep opora manekap wia maakeya miimap kema kiremik. Ne aakisa mua kuisow fan ikua fain-ke o nomakek. Nain o opora nia maakiya nain ni me miimap kema me kiriman. 42Ne iir nain pun Seba woos emeria-ke iikirap ni teeria fain pina ariman niar wuinon. Moram, o iiriw owow saria Solomon amis maneka ne opor eliwa wiar miimekam naep epasia akena-pa ekapok. Ne aakisa mua fan ikua fain-ke Solomon amis maneka wiar nomakek. Nain ni opora me wiar miimiman.”
Sawur wia iirariwkin kiiriw ekapemik
(Luk 11.24-26)
43Yeesus kiiriw maek, “Aria sawur mua oko mia-pa wiar ikok oromi epa reenowa ikiwep uurarow epa enuma akupam-miawinon. 44Epa me imeninon-na kema-pa feenap mainon, ‘Yo kirep yena epa awona nainiw iwinen.’ Naap maep kiiriw ekapep ona epa awona nain urufinon-na koor kemena gerenek maneka ikua, maa sakua marew. 45Naap urufap kiiriw nainiw ikiwep sawur samor akena ikur okaiwi-pa erup wia aawep ekapep neeke taanikuan. Naeya iiriw mua nain lawisiw samora ikua, ne ikoka iiwawun samorarinon. Ne ni teeria fain pun naap niar imenarinon,” naap wia maakek.
Yeesus onak ne wiamun teeria o akupamik
(Mak 3.31-35, Luk 8.19-21)
46Aria Yeesus-ke teeria maneka nain wiamiya aakunem-ikaeya ona wiamun ne onak naap ekapemik. Owaruma-pa ikok i wameiya-ko aakuniyen naep wia maakemik. 47Naeya mua oko-ke wia urufap Yeesus maakek, “Nena neene ne niamun unowa owaruma-pa ikok no nefa maimik.” 48Ne mua nain maakek, “Naarew ame yena aite ne aamun unowa-ke?” 49Naap maep ona teeria wiamiya ikua nain wapen miira wia mik-ikiwemi maek, “Ni unowa fain yena aite ne yena aamun-ke. 50Mua eena yena Auwa owow iinan-pa ikua nain kookalowa wiar ookimik nain yena aite, yena ekera ne yena aamun unowa-ke.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.