Kabavelamu 19
19
1Tutuyanina anelosevo Ebelamo ikiaweni, kadikailuqa imai Sodoma waineye lavilavie. Lota imiabui imiamia Sodoma vanuqa kabalugu waineye. Tutuyanina ikisedi itovoi inaqo inavekedabababana manawadie isobwanu maiqinaeqa pwayepwayeye.#19:1 Dede tutuyanina waineye, vanuqa bwaigidi kadikala ilaga-otoqa ivelauvivila puepuena. Kabalugu tamoqana o kailuqa iyatoyatodi. Tomo'otoqa kabalugunidiavo waidie itatawaigou waidie iegimwane wete vakai dinuanua bwaigidi ivesipupuyedi waidie. 2We waidie ivesipupu ivo, “Komi gutomwayavo kwamai guvanuqe kaqemi kwailegwadi kwaikeno. Aivekisabodebodemi. Inakawananaqai kawakawaie kwaitauya kwainaqo.”
We ivo, “O, gebuka. Kima dede taoni kawasasadie maleweye kaikeno.”
3Lota iwewesedi, beqa inaqo taiauda ilugu navanuqe. We kani siaina ivalabubuni paipaidi wete beledi ivetavoqi ge mekana'isiti ikani.
4Ikani ikakava keno paipaina inuanuana, we Sodoma taoni bwaigina kanatomoqovo matatabudi, tubuau wete tomwatomwaya, Sodoma vanuqa kanaketoava waineye imai Lota navanuqa itovoi-kwaikwaipipineni. 5Iveqole Lota waineye ivo, “Kaiebei tomoqovonidiavo lovane imai waimue? Kima wayaqima kimaiedi waimeye taiauda kaikenoluqa.”
6We Lota isauyeni vanuqa kawaneye itovoi vanuqa kana'awa ibubuli. 7Ivo, “Gebuka, egwavo. Dede valabubuna kapoina ge kanasala kwaivalabubuni. 8Kwanoqai. Yau natugwavo vevinediavo kadikailuqa ge tamo tomoqovo taiauda idakeno. Sideqoidi, aiwaiedi vakai wayaqimi mesaida kwaivalabubunedi waidie, we tomoqovo dede imai yau waigue kagu'ulatauvo yau kaditovekisabodaboda beqa ge tamo vakai kwaivalabubuni waidie.”
9Matautauda ibaivila ivo, “Kuveqanaqo! Komu kumai malivikaieqa deqoina wayaqimu kiloinema mesaida guyau bwaigina. Deqoina komu waimue kapoiotoqina kaivalabubuni matautauda tomoqovo kadikailuqa waidie!” Lota ibibini mediveluluna inaqo nigo awa idatutubaia.
10We anelosevo kadikailuqa vanuqa naqeneye dimadi isiluguaqetedi Lota ibiuya vanuqa naqeneye iluguveni awa itutubodai. 11We tomoqovonidiavo matatabudi, gwagwama wete tomwatomwaya, maleweye matadi ikavepwaludi ilaukabitupa ge kanasala awa inakiseni.
12-13Beqa anelosevo kadikailuqa Lota waineye ivesipupu ivo, “Kima saiqanaqa vikai dede kailuvelakovi. Paina Iave bwadu puena inoqai taoni dede waineye beqa ivetunema taoni kailuvelakovidi. Kago komu muyokovo dede waineye inamiamiaqa—natumwavo lamoqidiavo wete vevinediavo, no tomoqovonidiavo kadikailuqa ivonadabadaba natumwavo kadikailuqa vevinediavo inanaqidi o tupwaidiavo mususuvo dede taoni waineye imiamia, kumaseagadi kwasauyemi!”
14Beqa Lota isauyeni maleweye ivesipupu no tomoqovonidiavo kadikailuqa ivonadabadaba natunavo kadikailuqa vevinediavo inanaqidi waidie ivo, “Iave saiqanaqa taoni inaluvelakovi, kwavedimadimana vikai dede kwabaileni.” We tomoqovonidiavo kadikailuqa dinuanuana nigo idasasaidibi.
15Vanuqa ikawananaqai mulineye valavala inalagaqeta, anelosevo kadikailuqa Lota iveketounaunai inavedimadimana. Ivo, “Tutuyanina taoni Iave inakaniqodadaqeni ge wayaqima komu kiwapa. Kuvedimadimana mwanemu, natumwavo vevinediavo kadikailuqa, gumanidiavo taiauda kwamiamia kumaseagadi taoni kwakiaweni.”
16We Lota iemumuna. Iave wayaqina yawaina inaketoyavuya, beqa anelosevo kadikailuqa dimaneye ikavekavina, mwanena, natunavo vevinediavo kadikailuqa dimadie taiauda isauyedi taoni ikiaweni inaqo maleweye vikai giamaina waineye. 17Tutuyanina isauyedi maleweye tamo anelose ivonedi ivo, “Kwalaukwavina vagi giamaimi! Ge kwaikisavilami, wete ge kwaiveyawai kawagova waineye. Kwalaukwavina kwanaqo koya waidie, vagi ge kwaiwapa.”
23Tutuyanina valavala ilagaqeta Lota menasusuvo ilekwa Soweli. 24Matautauda, Iave kaiyabeyabela maqaina boganina mesaida kwei ikalavainani abame'eqa iobu Sodoma wete Gomola waidie. 25Beqa taoni bwaigidi kailuqa iluvelakovidi, kawagova bwaigina matatabuna, tomo'otoqanidiavo taoninidiavo waineye imiamia wete saku puepuedi itabwatabwa pwayepwayeye. 26Tutuyanina waineye Lota mwanena mulineye imaimai ikisaviladi itovoi-vaqata ipakalidi kadikisa mesaida tamo koqala ligwagwa beqa ivalabubuni.
27Kawakawaiotoqe Ebelamo itovoi ivila inaqo kabavetonova giamaina waineye, base waineye Iave taiauda ivemaiqikisakisa. 28Matautauda ikisaobu Sodoma wete Gomola waidie kawagovanina matatabuna waineye lupwa bwaigina ilagalaga tadavona mesaida libi tadatunuya idakalakalata. 29Beqa Iave Ebelamo navelaukui Lota paipaina inuavekavini, tutuyanina taoninidiavo iluvelakovidi Lota iketoyavuya kaikalakalata waineye, matautauda kawagovanina waineye imiamia ideqakiaweni.
Currently Selected:
Kabavelamu 19: mzz
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
