Kabavelamu 28
28
Mulineye Aisake inaqo Bedisiba waineye imiamia. Tutuyanina itomwaya-otoqa we matana ikapo, natuna tubuauna Iakobo ikatupwaieni. Dede mesaida ivalabubunedi beqa tamana Aisake ivonavenapwayeweni mesaida gumanina tomwayai. Tutuyanina tatana Iso inoqai paipaina, kanakapoka ioqala-otoqa, we wayaqina Iakobo inaluvewapai.
Aisake Iakobo ivetuneni Lebani waineye
1Beqa Aisake Iakobo iqoleni ivonavenapwayeweni we vona veluveluluninaeqa ivoneni ivo, “Kenani vavinena ge tamo kinaqia.#28:1 Me Kenani yaubadavo tupwaidiavo waidie isobwasobwanu. 2We kunaqo Mesopotemia waineye, tubumu Bedueli vanuqineye. No waineye avumu Lebani, gumanina inamu novudi, natudiavo waidie'eqa tamo kinaqia. 3We Yaubada Veluvelulunaotoqina inavonavenapwayewemu beqa komu kivenatuna we natumwavo inavepue-otoqa, we tubuleleleqimwavo kamukabeida tomo'otoqa kadiyoko bwaigidi we dikabaloinavo puedi. 4#Kaba 17:4-8Base mesaida Yaubada ivonadabadaba tamamu Ebelamo ivonavenapwayeweni, beqa Yaubada inavonavenapwayewemu wete tubuleleleqimwavo. Kamukabei dede pwayapwayanina waineye tamiamia mesaida olaolaga komi kwaikewai mipwayapwaya, gumanina Yaubada ivonadabedabeni Ebelamo waineye.”
Iakobo ikenokisakisa Bedeli waineye
10Iakobo Bedisibaeqa itauya inaqonaqo Elana taoni waineye. 11Valavala gunabeida iketoniveni, beqa tutuyanina ilekwa tamo vikai waineye iveyawai. No waineye ivebaekwa inakeno, tamo gileu ikewai kununeye iyatoi iketobala inakeno. 12We ikenokeno ikenokisakisa ikiseni luvewana pwayepwayeye itovoi ilaga tabwana abama ikavikavini, we luvewananina waineye Yaubada na'anelosevo puedi ilagalaga wete iobuobu.
13 #
Kaba 13:14, 15 We Iave luvewananina tabwaneye itovotovoi ivona ivo, “Yau Iave, tubumu Ebelamo na Yaubada wete tamamu Aisake na Yaubada. Pwayapwayanina waineye kukenokeno, aivelemu wete tubuleleleqimwavo aiveledi. 14#Kaba 12:3; 22:18We inayavula inanaqo youyaeqa (wesiti), bolimanaeqa (isiti), kotalaeqa (noti) wete kwaibogaeqa (sauti). Tubuleleleqimwavo aikavepue-otoqidi mesaida pwayapwaya kaupualina, gumanina ge tamo aitoi kanasala inawawai. Pwayepwayeye tomo'otoqa disusuvo matatabuna giamaina inababaneni komu wete tubuleleleqimwavo waimie'eqa. 15We Yau komu taiauda we vakai vikai waineye kinaqo aivekisabodebodemu, wete aivilemu aimaiemu dede pwayapwayanina waineye. Ge aibailemu kanaketoava vakai avonadabadaba waimue aivalabubunidi.”
16Matautauda Iakobo kenoeqa itovoi ivo, “Oo, mwaqitana dede vikainina waineye Iave imiamia. We Yau ge adayagovi.” 17We igololo bwaigina ivo, “Dede vikai igiavegolologu. Dede Yaubada navanuqa we abama kawana kanakabalugu.”
18Kawakawaiotoqe Iakobo ikenotovoi matautauda gileunina kununeye ikenokeno ikewai isivetovoia vikainina kanakiakiaya, we bunama ikewai ibunamai inagiavemaqetai Yaubada waineye. 19Beqa vikainina kanawavaqa iqoleni, Bedeli,#28:19 Bedeli kananuakawananaqai Ibeliu bonadie'eqa “Yaubada navanuqa.” we basenaqaida iqoleni Lusi.
20-22We Iakobo Yaubada waineye ivonadabadaba ivo, “Kago kivekisabodebodegu gusasala waineye we kanikani kivelegu wete kaleko kivelegu we aivila aimai tamagu navanuqe megugiamaina matautauda aisobwanu Komu waimue. We kago kivekisabodebodegu dede mesaida matautauda saku matatabudi kivelegu aiketovegeidi kadibou 10 waidie, we bou tamoqana aivelemu. Dede gileunina avetovoia kiakiaya mulineye dede waineye kamukabeida Komu Muvanuqa, we dede vikainina waineye tomo'otoqa komu waimue inasobwanu.”
Currently Selected:
Kabavelamu 28: mzz
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
