John 3

Iesu mi Nicodemus atopaposisina.

1Edo iji ainde, Parasi maneda embo da (1) isima edo esisina, edo ainda dao awa Nicodemus. Imo awa Jew embomaida gisijiari da (1). 2Embo emi muyaede Iesu da yai gundo ainde sisina, “Atopatari, embo da ainmi kariwa engogo ine edo eta awa ari tao ae atako God embo ainde isira. Awatedo nakare awa gari, imo awa atopatari God mi piesiri guputeta.”

3Iesu mi embo ainde mina sisina, “Eiwa awa gebé bajina imonde tena. Embo da ainmi God da gisijiari#3:3 God da gisijiari da moka awa ‘God da sima ari dave’. Iji boroko God da sima ari dave embo da ain Toregari Embo Iesu da toda God da yai gumaina, ainda yai awa God mi ainda sima ari dave arapa aina, edo God mi embo ainda do gisijido aina. Edo daedo, ainda moka nei awa, iji amboda Iesu tekago butuda gumbari God mi Iesu da toda embomai berari butuda sima dave edo aina. gari tao ae, atako embo awa tekago engari baina.”

4Nicodemus mi Iesu de sisina, “Embo duga awa nongo edo tekago ainda aimi engaini? Imo ainda aida urida torari tenda engari tao aeǃ”

5Iesu mi mina sisina, “Eiwa awa gebé bajina imonde tena. Embo da ainmi un ae God da Asisi deda engari awa bae gido, imo God da gisijiari yai torari tao ae. 6Embomai tamopiside awa tamopisi engedo era, edo God da Asisi awa asisi engedo eira. 7Ge eiwa nanemi imonde tetena gido kore ainyae, ‘Imomane tekago engari buwo.’ 8Bisimi enade bunade ainda jipapada tumundo eira. Edo imo ainda yavi ingido eta, ata nonda edo gundo eiri nonda maundo eiri awa gari tao ae. God da Asisi da wasiri awa dá ango embomai berarida yai ainkain ainda engari bari.”

9Edo Nicodemus mi ainde mina sisina, “Wasiri eiwa nongo nongo edo eiri?”

10Iesu mi embo ainde mina sisina, “Imo awa Israel embomaida atopapasigarida bajina da (1), edo imo roviravi eiwa gae ta? 11Eiwa awa gebé bajina imonde tena. Nakare rorae matu gari awa tedo era, edo ro jisimi gari awa karigedo era, ata natokare karigari awa imomane bae. 12Nane imondemane rorae butuda ro idegedo eira ainda ge tedo etena, ata imomane na gebé ae etewa. Awatedo nongo edo rorae utuda ge tano imomane gebé avi? 13Embo da ainmi utuda visido mambae ata Embo da Mai akuta. Edo daedo Embo da Mai utuda edo gupusina, edo imo utuda isima edo eira.#3:13 edo imo utuda isima edo eira. Guriki ove gaiari indewaemi ge eiwa doturitera. 14Edo Moses mi jimbagoda kariwa abu damodamoda jiri vivisisina ango,#3:14 Iji matuda Israel embomai abu damodamoda itero, jimbago kaedemi awamane gamundo esitera. Ango edo God mi Moses de ge sisina awa, jimbagoda kariwa siya edo jiari vitari, berari ainmi jisi ainda yai piedo kaviegari barate. Ge jirari eiwa Numbers 21:4-9 giwo. Embo da Mai awa daedo jiaro vitaina awa, 15berari ainmi gebé ari ainda yai pipiteira awa betainyae,#3:15 betainyae. Betari eiwawa natopo itari yai niyao matawa aveira ainda isira (Matthew 10:28 giwo.). ata wasiri natopo itari barate.

16“God mi embomai butu dededa dubobé burisina, awatedo ami ainda Mai dakaima awa pipisisina, berari ainmi gebé ari ainda yai pipiteira awa betainyae, ata wasiri natopo itari barate. 17Edo God mi ainda Mai butuda piesiri gupusina awa embomai butuda bekumba ainyae, ata ainda toda embomai butuda toregari borote. 18Embo da ainmi ainda gebé ari God da Mai da yai piedo eira awa, God mi imo bekumba ainyae, ata embo ainmi gebé ari ainda yai piae edo eira awa, aindabé ainda gebé ari God da Mai dakaimada yai piae, God mi matu bekumba esira. 19Edo God mi ango matu katesira, aindabé parara matu butuda gupusina, ata embomai buro bebegae edo esitera. Awatedo parara dubobae dodo muyae duboburitera. 20Berari ainmi bebegae edo eira, pararada gumbari gido ainda buro bebegae awa arapa aina, awatedo pararade sinigambari eite, edo pararada gumainyae edo eira. 21Ata embo ainmi God da gebé kera edo eira awa, pararada gundo eira. Ango ari embomai berarimi ainda buro awa God da gorobami edo esira awa arapa gara.”

John Bapataito Ari Embo mi Iesu averi awa karigesisina.

22Ainda amboda, Iesu ae ainda ambodani de idegedo yai Judea da maunsitera. Edo imo awamanede daedo yai ainda isite embomai bapataito edo esisina. 23Edo iji ainde John awa daedo yai Aenon ainda isite embomai bapataito edo esisina. Yai Aenon awa Salim nasi aikae. Aindabé un jiwae yai ainda isima edo esisina, awatedo embomai gumboro bapataito edo esisina. 24(John awa Herod mi bundari oroda piae gisida, wasiri eiwa idegesisina.)#Matthew 14:3; Mark 6:17; Luke 3:19-20

25Ango edo John da ambodani ae Jew embo da (1)demi tamo teiarida ge baitera. 26Edo awamane John da yai gundo sitera, “Atopatari, embo Jodani un kupo neida imonde daedo isiri, imo averi awa karigatata, giyoǃ Embo ami embomai bapataito eira. Edo embomai berari awa ainda yai mauntera!”

27Edo John mi mina sisina, “Embo da ainmi ainda jipapa akutami da rorae bari tao ae, atako God da awara tarimi piari baina. 28Imomane akuta na ge ro arapada siutani awa gotewa, ‘Na awa Keriso ae, ata ainda gumbae gisida God mi na piesiri guputena.’ 29Embo da ainmi eutu jimaina awa jimbari tutu, edo eutu awa ainda aro. Edo ainda otawo demonda petedo isite ainda ge yavi ingeite do yawabé aina. Dá ango, nato do yawa ari iji einde gundo beda esira. 30Embo ainda dao ikane vitarate, edo dao nato awa wotarate sisina.

31“Embo ikaneda edo gumbari, imo awa embo berari daginegari ikanebé. Embo butuda edo gumbari awa butu embo edo butu roraeda ge tedo eira. Embo utuda edo gumbari, imo awa embo berari daginegari ikanebé. 32Edo ami ro gosisina edo ingisina awa karigedo eira, ata da ainmi ainda ge awa bae edo eira. 33-34Aindabé embo awa God mi piesiri gupusina, ami God da ge tedo eira, edo God mi ainde Asisi tega itaebé pisido eira. Awatedo embo da ainmi ainda ge#3:33-34 ainda geda moka awa Iesu da ge. ingido gebé esira, ami arapa esira, God awa gebé. 35Mamo mi ainda Mai dubobudo eira, edo rorae berari ainda ipada pipisisina. 36Embo ainmi ainda gebé ari Mai da yai pisido eira, wasiri natopo itari budo eira. Ata embo ainmi Mai kera ae edo eira, wasiri natopo itari bainyae, atako God da sinigambari ainda yai isima edo eira.”

Currently Selected:

John 3: bhg

Highlight

Copy