Sen 22
22
Ahi vis Ebraham keke vou vini natnali koa Aesak
Senesis 22:1-19
1Avong muli, Ahi vit vasak vis Ebraham. Sakini vise vit, “!Ebraham!”#Hib 11:17-19
Ka Ebraham vit, “!O-o, inau li ke!”
2Ahi viteni mini vit, “Kikur natmali kati koa Aesak, koa envatien onom mariso mul ien, ka kihina en atan ten out Moraea. Ekonek en hou tai koa nitie minuk, ku vini ka kiniti hehi sanien tai onom minau.”
3Sakini, out mulan, Ebraham ra ruain av, sak mesein tounah keil ka lingi en dongki sen. Kur Aesak ka meatin toumien onen elu telvita en out koa Ahi viteni mini. 4Telmual va vio … en avong etel teni, telles out koa Ahi vat kati mini mul soutin neli veah. 5Navong lesi mukok, Ebraham viteni min meatin toumien keilu onen vit, “Milheto ekok hetal dongki ekek. Ehon ekek ka inau melheha en out keiva ekek, ka melheha netan min Ahi. Evus, melhemai ris ven kamil.”
6Ebraham san av ten sanien min Aesak vousi, ka kei kur naef ka vatihang. Navong lumual ruai luva, 7Aesak viteni min tata onen vit, “!Tata!”
Tata onen vit, “?Asa natkuli?”
Aesak visi vit, “?Nalesi lokur av ka ahang, ka sipsip koa lovaniti vahi sanien kave?”
8Ebraham vit, “Ahi, kei varei hesani.” Ka keilu lumual ruai luva.
9Navong lurokol out koa Ahi vat kati, Ebraham kur ahat keil, mumon ahor ten sanien eni ka ling av ien. Evus, par kat natnali ka lingi matil kat av keil nesa.#Tiem 2:21 10Evus, kahut lat naef onen vit vasal vini. 11Ka hatte tas, angelo onen Iahova viso ka en out nesa vit, “!Ebraham, Ebraham!”
Ka kei vit risi vit, “O-o, inau li ke.”
12“Konou vinitei ehon onom. Konoumontei tounah nasut natmali. Ekek nakilea keke keik kovouhou min Ahi ka kolong kati, veni keik kormutut kattei natmali ran Ahi, natmali kati koa tas koa vi onom.”
13Ebraham lele ka les nani rendan koa meahos, hon verai mul en holeai tai. Sakini, luv lat viau ran Aesak ka va kur nani keke vakur vulin natnali. Muasi mat ka muniti suk vi sanien onen vina min Ahi. 14Ebraham ling isen out enek vi ‘Iahova Jaerah’ koa aneite teni vi ‘Iahova sani.’ Ka selusien koanik, meatin keil amul aviteni rokol kosa avit, “En hou onen Iahova, kei varei hesani.”
15Angelo onen Iahova selus min Ebraham hatte elu vit, 16“Ahi viteni mukok: ‘Numon hatkatien hetal minuk en isok keke nitokol katuk hehi houlu mok veni keik kormutut kattei natmali ranau, natmali kati koa tas koa vi onom.#Hib 6:13-14 17Navat kati keke nitokol katuk, numon vatiamal onom koa ikistal enuk ihi houlu vis ihi houlu mok isuval hitu ten teilang vuo isuval veien ten atas. Onom keil u vasi meatin keil koa avit avoumon rea vatal min keil.#Hib 11:12 18Vatiamal onom keil ihi sise ten tokolkatien onak heha min vangi meatin vasi keil ten out netan. Koanek hehi sanien onak minuk veni kolong kat inau.’”#Umen 3:25 19Ebraham keilu natnali luva ris ven meatin toumien keilu onen. Ka telva ris en out koa amul ien koa avise en Bersiba, ka aro ien ral min one keil sua houlu.
Navong sua onen Serah rokol handred tai hanumau tai ka oulu mun (127), kei mat. Ebraham rangisi ka vit vatahini ka sakras ven atan kati onen tovuol. Sakini, vul titi atan ran meatin tai en out enek ka rahin ahin onen mul ien.
Sua etel muli, ka navong sua onen Aesak rokol hanumau elu (40), kei retalihe suk ral min ahin tai ten out Haran, isen Rebekah. Kei vi natin Nahor, tunali Ebraham. Rovitei tuetin, avu Ebraham mat ka titan keilu, Aesak ka Ismael, lurahini vesesal en out koa arahin Serah ien. Navong mat, sua onen Ebraham rokol handred tai, hanumau etel ka teindan elim emun (175).
Currently Selected:
Sen 22: pma
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
