Maleko 3
3
Sabati unai Yesu ye kabihenamwanamwa
(Mataiyo 12:9-14; Luka 6:6-11)
1Sabati hesau Yesu ye mwalaesae sunago unai, na tamowai hesau nimayabayababana temenai. 2Paliseya tamowaidiyao hekadi Yesu kana mata se wasenei, unai iya se kitasipwanamwanamwaei, kabo Sabati unai tamowai ne ye henamwanamwa e nige. Ena ye henamwanamwa, kabo unai se hegilu. 3Kabo Yesu ye hededelau tamowai nimayabayababana wa unai ye wane, “Ku toloma.” 4Na ye henamaiyedi ye wane, “Laulau saha ye namwa ede mayadai Sabati unai: namwa ta ginauli o yababa, ta kabihenamwa o ta kaiunu?” Maudoidi wa se mwanouhai. 5Ye kitahetakikilidi, na ye kouyalayala yo nuwana ye yababa, matawuwuna ede se nuwakwailolokalili. Na ye hededelau tamowai wa unai ye wane, “Nimam ku heleleyama.” Kabo nimana wa ye helelelaei, ede Yaubada nimana wa ye henamwanamwa. 6Na kabo Paliseya tamowaidi se lau Heloda kana bodao maiyadiyao se koitalaliu idohagi Yesu bena kabo se unui.
Bodalakilaki Yesu se hemuliwatani
(Mataiyo 12:15-16; Luka 6:17-19)
7Na kabo Yesu maiyana hekahekatao se dahalai se lau Galili Gabwana unai, na Galili tamowaidi gwaudi se hemuliwatani. 8Yesu saha ye ginauli wa wasana se lapui meta bodalakilaki teha Yudeya yo Yelusalema yo Idumeya yo Yolidani teha kaluwabu udiyedi yo hinage Taiya yo Sidona magaidi udiyedi se laoma iya unai. 9Boda ye lakikalili unai madai Yesu se dudukahalaei, ede Yesu ye hededelau yona hekahekatao udiyedi bena waga gagilina se kabinonohai, unai bena kabo ye gelu. 10Na taukasiyebwa gwaudi ye henamwanamwadiko, unai kabo tamowai kasikasiyebwadi maudoidi se dudu se lau bena se kabilau Yesu unai. 11Na tamowai yaluwa yabayababadi kalidiyena wa iya se kita ede se tulibono iya talanuwana unai, na yaluwa yabayababadi wa se yogayoga se wane, “Kowa Yaubada natuna ede!” 12Yesu kabo ye guguyaidi tabu se hededehemasalaha iya kaiteya.
Yesu yona hekahekatao saudoudoi-labui ye hetolodi
(Mataiyo 10:1-4; Luka 6:12-16)
13Yesu ye sae koya hesau tupina unai. Temenai kaiteyadi ye henuwadi wa ye yoganedi na se laoma iya unai. 14Na Saudoudoi-labui ye kaisunuwaidi yo hesadi ye tole apostolo bena maiyanao se miya, yo bena kabo ye hetamalidi se lau se lauguguya. 15Na yona gigibwali ye mosei siya udiyedi, kabo yaluwa yababadi se hededehepesadi.
16Teina saudoudoi-labui ye yoganedi wa hesadi ede:
Simona, hesana hesau ye tole Petelo,
17Yamesi ma kana kaha Yowane, Sebedaiyo natunao, hesadi ye tole Bowanele, meta kaniyona ede, “Tulutululu natunao”,
18Andeleya,
Pilipo,
Batolomaiyo,
Mataiyo,
Tomasi,
Yamesi Alepaiya natuna,
Tadaiyo,
Simona Tauhaikabi,#3:18 Tauhaikabi ne meta boda hesau Yudeya unai hesana. Yodi nuwatu bena Yudeya se bom se kitaheteteꞌuyoidi. Unai Loma tamowaidiyao maiyadiyao se haihaikabi. Huyana Simona sola nige ye patulau Yesu unai, iya hinage kadi boda hesau. Unai iya hesana se tole Simona Tauhaikabi.
19yo Yudasi Isakaliyota, iya ede Yesu kana tauwalohai.
Yesu kana bogao iya bena se woyahai
20Kabo Yesu ye mwalaesae numa hesau kalona unai, na bodalakilaki se lagegogoꞌuyoma. Na iya maiyana hekahekatao nige yodi solasola bena se kaikai. 21Na Yesu kehanao wasana se lapui meta Yesu nige ye kaikai, unai se lau iya bena se woyahai, matawuwuna ede se nuwatui se wane, “Iya bena ye bwadebwade!”
Laugagayo taulauhekata Yesu yona gigibwali se hededeheyababa
(Mataiyo 12:25-29; Luka 11:17-22)
22Laugagayo taulauhekata hekadi Yelusalema unai se dobima se wane, “Satani iya luwana ne unai! Yaluwa yababadi ye hededehepesadi yodi wasawasa yona gigibwaliyena.” 23Yesu ye yoganedi na palabole hekadi ye hedededi kalidiwai, ye wane, “Satani kabo idohagi na Satani ye hededehepesa? 24Taba basileiya kesega se haitoledagela, kabo basileiya ne nige gonowana ye tolobayao. 25Taba boga kesega se haitoledagela, kabo boga ne nige gonowana se tolobayao. 26Taba Satani ye bom ye hewahewaiunuꞌuyoi na nuwana ye labulabui, kabo nige gonowana ye tolobayao, na ye kaiyawasi. 27Nige gonowana tamowai hesau ye mwalae tamowai yasiyasiyalana yona numa unai yona gogo ye haidi. Tamowai yasiyasiyalana wa taba ye paibagunai, na kabo yona numa gogodi ye haidi. 28Ya hededemamohoi: Yababa maudoidi yo Yaubada hededeyababaina Yaubada kabo ye nuwatugabaedi. 29Na taba tamowai hesau Yaluwa Tabuna ye hededeheyababa, kabo yona yababa wa taba nige ye nuwatugabaei. Kana gilu kabo ye bawahai ye lau ee nige kana siga.”
30Yesu yona hedehedede ta matawuwuna ede se wane, “Yaluwa yababana ye luwu iya unai.”
Yesu kana boga mamohoidi
(Mataiyo 12:46-50; Luka 8:19-21)
31Na Yesu sinana yo kana kahao se lagema dagela wa unai se totolo, na tamowai hesau se hetamali ye sae bena ye woihaei. 32Boda Yesu se tulihetakikili wa se hededelau iya unai se wane, “Sinam yo kam kahao yo loumwao, siya ede dagela ne unai na se henuwago.” 33Na ye henamai ye wane, “Sinagu kaiteya? Yo kagu kahao kaiteyadi?” 34Tamowai iya se tulihetakikili wa ye kaikewaidi na ye wane, “Sinagu yo kagu kahao ede teina! 35Kaiteya Yaubada yona nuwatu ye ginauliwatani meta iya kagu kaha ede, lougu ede, yo sinagu ede.”
Currently Selected:
Maleko 3: sbeP
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
