Mattiu 3

Yohanes Ndramat Para Paptais imwaniyani saya Yesu

1Pe iho nondriya hu lang ara, Yohanes Ndramat Para Paptais isarayah, pe iro pohowe nongan iya kili hu ndramat iro nondriya kol ndrohoyin para kol namandran hape Yutiya. 2Pe yiy iro pwai, iro pa, “Akarapaiwani ndriya wawu, paratesah, kolo king para kol paingan yang ara kinsa pakeh.” 3Yohanes, ara yiy ndramat mepo poropet Yisayah kinwong pwen kinna tan toro:

“Ngasa mbulukoyu hamou ita yoh iyau kol ndrohoyin, ita pa,

‘Karamwaniyani saya Yapan,

pe kasani meresayan kiro mwonen.’ ”

4Pe koyau ta Yohanes, ara husoruwei iyau yomu kamel, pe kondrei irakayani kundrayin, ara humangsaniy iyau kapilo mbulmwakau. Pe anandrinan ara hu kaspou pe kunan para yangiy. 5Pe hu ndramat huya kili yiy ara huyau Yerusalem pe Yutiya masih, pe hu kol masih mendreheh para pakeh ndran Yortan. 6Pe huya pohopoh iya hu pakut mwomwan tahu iya ngawan, pwen isumuluwani hu iya Ndran Yortan.

7Hapeko iro mwonen inime hu ndramira Parisiy pe hu Satyusiy soyon husa hape aleheh mepo iro sumuluwani hu ndramat iro aliy, pwen ipwai iya kili hu, ipa, “Wawu ndraye hu mwat mapairahu! Hiyeh kinpomwanye kinsa kili wawu, pe apakawop kaya mawen ndrinalokuh ta Yapan mepo itapo isa? 8Pe kapa akantapaiwani ndriya wawu ndrokonan, pwen kultuwayi wawu kipwaingani kaipisa wawu tehen aliy i. 9Pe wawu mbuna akahaterena wawu pe akapa, ‘Apraham ara tumbu yowu.’ Yo upwai isa kili wawu tehe, iyau kili hu pat aripo, Ngindrai ilahiy para kimbusi hu karayah hu tumbu Apraham. 10Pe semen kapereu, ara kinna pwen ita ndroiyi kei, pe hu kei masih mepo hu konhoppwai hiyan pwi, ara andre katihihu kaya pwan pe kapiyani hu kaya nondriya mwan.

11Yo urupo sumuluwani wawu iya ndran, ara ipwainganiy tehe wawu kantapaiwani ndriya wawu. Hapeko ndramat hiyeh nakisa kamulan, ara pwoke tan pwokeyan pe iho hin kili yo. Pe hatna pwelekan, ara kunlahiy para kutaliy pwi. Yiy andre kisumuluwani wawu kiya Mwoiwan Haiyan pe kiya mwan. 12Pe yiy iya ndrohona ponokuleya wit, pe imbultuwe suweleya pwan tan ita niman, para kisuwali pwisi wit kiya mawen, pe andre kimbultani sangi wit tan, kiya nondriya kaisowan. Hapeko pwisi wit, ara andre kitimwiy kiya mwan mepo kinoho mat pwi masih.”

Yohanes isumuluwani Yesu

13Iro mwonen lang ara, Yesu iyau Kaliliy pe iyarayah iya Ndran Yortan, para Yohanes kisumuluwani yiy. 14Hapeko Yohanes, ara pakipa pwi kiyatan, pe ipa, “Hiyan para wou asumuluwani yo, paratapeh pe wou apasa kili yo?”

15Hapeko Yesu isomwi yiy, ipa; “Konan; mahapo ambusi tesah kunpwai kinsa kili wou. Talu kambusi kultuw imwonen aro, para kirayah mannan tehe Ngindrai inamiliy.” Pwen Yohanes iho ndruwa nongna Yesu.

16Pe kinsumuluwani Yesu kinna ndran, pwen isa paingan, pe hape pwi ko, kol paingan yang, ara ite, pe inime Mwoiwa Ngindrai isa pwan mwensen tehe nombuwe pai hamou, pe iya ndrita Yesu. 17Pe ngasa mbulukoyu hamou iyau kol paingan yang isa, ipa, “Aro, ara Noru mepo ndriyo imbuluhi yiy. Yo upwesani yiy namandran iya.”

Currently Selected:

Mattiu 3: nss

Highlight

Copy