Mattiu 7
7
Mbuna akarasusut nongan kiya kili hu ndramat
1Wawu mbuna akarasusut nongan kiya kili hu ndramat, pwen pe andre Ngindrai kintasusut nongan kimui tehen aliy opu kisa kili wawu pwi. 2Paratesah, Ngindrai andre kirasusut nongan kisa kili wawu, ara andre kihisoule ko, tehe wawu ngara karasusut nongan kiya kili hu ndramat. Pe sehe nongan pwahanou ngara apiyaniy kiya kili hu ndramat, ara andre Ngindrai kipiyani nongan ara ko, kimui kisa kili wawu yi.
3Paratesah, pe ngara aro nime konu kei hape ita mara nalim hamou, pe akowu tehe kei hamwat ita maram? 4Tehen tapeh apa pwai kiya kili nalim, apa, ‘Nakute konu kei ita maram,’ hapeko akowu tehe kei hamwat ita maram mbukenam? 5Wou ndramat para pwandrandraman! Wou ate kei hamwat ita maram kiyau kimu na, kihipwen, pwen andre alahiy para atuluwani nokulani konu kei ata nalim, pe atei.
6Pe wawu mbuna akaiki hu memelit haiyan kiya kili hu mwiy. Pe wawu mbuna akapiyani hu sowiy lahayan#7:6 Eng: pearls tawawu, kiya kili hu puw. Kapa akambusiy tehen tora, matisan hu kangastoro ndrita hu melit ara, pe karahatuwe hu, pe andre hu kapaiwani hu, pe kawisi wawu pe karamumuruwe wawu.
Akasok pe akaten pe akaralikiriy
7Akasok pe andre kaikiy kisata wawu, akaten pe andre akaya kahiy, akaralikiri papai pe andre papai kite kisa kili wawu. 8Paratesah, hiyeh kisok, ara andre kiwiriy, pe hiyeh kiten, ara andre kiya kahiy, pe hiyeh kiralikiri papai, ara andre papai kite kiya kili yiy.
9Hiyeh tawawu, kapa norun kisok ndrinanohun, andre kihang yiy pat sih? Pwi yoh. 10Pe kapa kisok ni hamou, andre kihang yiy mwat hamou? Pwi yoh! 11Pe kapa wawu tana wawu topwei para wawu kaiki hu yukyuk mwayih kiya kili noru wawu hu, konan wawu ndramat ngara kambusi kultuw mwomwan, pwen tehen tora ko, Tama wawu ita kol paingan yang, ara andre kihang hu yukyuk hiyan kiramwaitini hu melit hiyan ta wawu, kiya kili hu mepo hu ngara kasok yiy! 12Pwen pe sehe kultuw wawu namiliy para hu ndramat kambusiy kisa kili wawu, hu kultuw tehen tora ko, ara wawu kambusiy kiya kili hu. Pe iye ara ndroiyi nongan para pwahanou, pe ndroiyi nongna hu poropet.
Karam indrupep pe karam maihan
13Akasong akaya karam indrupep. Paratesah, karam para sai iyapwen te kol mepo hu ndramat andre kawiri ngandran kinto-kinto, ara maihan, pe sayan, ara waison; pe hu ndramat soyon, ara ngara hu kayasong aliy. 14Hapeko karam para sai iyapwen te kol para taleh, ara indrupep, pe sayan ara ngandrahan; pe hu ndramat noye kopu, ngara hu kayasong aliy.
Kei pe mbuwan
15Pe mara wawu kiro ta hu poropet pwasoyou. Yihu andre karapihiye hu tehe hu sipsip, pe kasa kili wawu; hapeko ndrokonan para aliy, nondriyahu, ara tehe hu mwiy puyap. 16Wawu andre kayirowe hu, ara kiya kultuwayihu. Yihu ndramat konoho rih mbuwa ndrinai kiho porokulun, ndre konoho rih sakei kiho poropalan, ara pwi. 17Pwen tehen tora ko, kei masih hiyan, ara huppwai pe sangihu hiyan. Pe kei masih mwomwan, ara huppwai pe sangihu mwomwan. 18Kei hiyan kinohoppwai pe sangin mwomwan, ara pwi. Pe kei mwomwan kinohoppwai pe sangin hiyan, ara pwi. 19Pe hu kei masih mepo hu konhoppwai hiyan pwi, ara andre katihihu pe kapiyani hu kaya nondriya mwan. 20Pwen tehen tora ko, andre akayirowe hu poropet pwasoyou, ara kiyau kultuwayihu ko.
21Wawu mbuna akapa ndre hu mepo hu ngara kayoh yo: ‘Yapan, Yapan,’ ara andre hu kasong kaya kolo king para kol paingan yang. Pwi yoh! Hapeko hu ndramat mepo ngara hu koro ndruwa namiliwa Tomo ita kol paingan yang, ara yihu kopu andre kasong kaya aliy. 22Pwen kiro mwonen lenge tamwaniye, hu ndramat soyon, ara andre hu kapwai, kapa toro: ‘Yapan, Yapan, iyau ngalam, yowu wong tehe hu poropet; pe iyau ngalam, yowu rapiyani hu payit; pe iyau ngalam, yowu mbusi hu ndraikiya pwoke soyon.’ 23Pwen andre kupwai ngawan kiya kili hu, kupa toro: ‘Yo ukowu ta wawu. Wawu ndramat para takultuw mwomwan, akaya mawen kili yo!’
Ndramat lohongan waison para puliya seu, pe ndramat lohongan waison pwi para puliya seu
24Pwen tehen tora ko, hiyeh ihilingi nongno pe itokuyaniy, ara tehe ndramat mepo lohongan waison pe ipuli suwen iro ndrita pat. 25Pe mbulou indrut, pe ndran irah, pe nohai imum pwokeyan pe iyahawan iya seu, hapeko seu kiniwuh pwi, paratesah, isoye ngara ndruw para seu tan iya mbulun iya, pe iro ndrita pat. 26Hapeko hiyeh mepo ihilingi nongno, pe kintokuyaniy pwi, ara yiy tehe ndramat mepo lohongan waison pwi, pe ipuli suwen iro ndrita kolkolai. 27Pe mbulou indrut, pe ndran irah, pe nohai imum iya pwokeyan pe iyahawan iya seu, pe seu iwuh pe imaloiwe masih.”
28Pe iro mwonen Yesu iwong hu nongan aro ihipwen, hu ndramat soyon mepo huro hilingi yiy, ara hulohonge ndrit iya hinonou tan. 29Paratesah, kinwong tehe ndramat hamou para hinuwani nongan para pwahanou tahu pwi, hapeko iro wong tehe ndramat mepo nongnan nopwaran.
Currently Selected:
Mattiu 7: nss
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
