གོ༌ཟུག༌ 13
13
ཨབ༌རམ༌ དང༌ ལོད༌ བེས༌།
13:1-18
1ཏེན༌ན༌བོའེ༌ཕིའ༌ ཨབ༌རམ༌ ཨི༌ཇིབ༌ནེ༌ རང༌ངི༌ ན༌མ༌ དང༌ ཁོ༌རང༌ང༌ ཡོད༌ཁན༌ ཚང༌མ༌ ཁུར༌ཏེ༌ ཀེན༌ ཆོགས༌ལ༌ ནེ༌གེཝ༌ ཟེར༌སའེ༌ ནས༌ས༌ ལོགས༌ཏེ༌ སོང༌, ལོད༌དའང༌ ཁོ༌ ཉམ༌པོ༌ སོང༌། 2ཨབ༌རམ༌ མ༌ ཆུག༌པོ༌ གྱུར༌། ཁོའ༌ མུལ༌, སེར༌ དང༌ ཀྲུད༌ཏྲོ༌ མང༌པོ༌ ཡོད༌པིན༌། 3ནེ༌གེཝ༌ནེ༌ ཁོ༌ ནས༌ས༌ ཅིག༌ནེ༌ ཅིག༌ག༌ དུག༌ཨིན༌ བེ༌ཐེལ༌ལ༌ ལེབ༌ལེབ༌ ཚོག༌པ༌ སོང༌, བེ༌ཐེལ༌ དང༌ ཨའི༌ པར༌རི༌ ནས༌ས༌ ཀ༌བོའེ༌ཀ༌ སྔུན༌ལའང༌ ཁོའེ༌ ཁོ༌རང༌ངི༌ ཀུར༌བོ༌ ཙུགས༌ཏེ༌ 4ཆོད༌ཁྲི༌ རྩིགས༌ཏེ༌ ཡོད༌ཁན༌ནི༌ ཏེན༌ན༌ ནས༌ས༌བོའེ༌ཀ༌ ཁོའེ༌ ཡང༌སྐྱར༌ ཡ༌ཝ༌ དཀོན༌མཆོག༌ག༌ ཅོལས༌།
5ཏ༌ ཨབ༌རམ༌ ཉམ༌པོ༌ ཡོད༌ཁན༌ནི༌ ལོད༌དའང༌ ར༌ལུག༌གི༌ ཁྱུ༌, བ༌ལང༌ངི༌ ཁྱུ༌ དང༌ མི༌གུན༌ནི༌ ཕིའ༌ ཀུར༌ མང༌པོ༌ཞིག༌ ཡོད༌པིན༌། 6ཨིན༌ནའང༌ ཁོང༌ ཉིས༌ཀོའེ༌ ཀྲུད༌ཏྲོའ༌ ལྡང༌ཤེས༌སི༌ རྩ༌ཁ༌ ཏེ༌ ནས༌སའེ༌ ནང༌ང༌ སྨིན༌ མ༌ཐུབ༌, ཅིའ༌ཟེར༌ན༌ ཁོང༌གུན༌ལ༌ ཀྲུད༌ཏྲོ༌ མ༌ མང༌པོ༌ སོང༌ཏེ༌ ཡོད༌པིན༌། 7ཏེན༌ན༌བོའེ༌ཕིའ༌ ཨབ༌རམ༌ དང༌ ལོད༌དི༌ སེམས༌ཅན༌ ཚོ༌ཁན༌གུན༌ནི༌ པར༌ལ༌ ཛིང༌མོ༌ ཆ༌ཅེས༌ གོ༌ཟུགས༌། ཏེ༌ཏུས༌ལ༌ ཀེ༌ནན༌པ༌ དང༌ པེ༌རིཟ༌པ༌ གུན༌ནའང༌ ཏེན༌ན༌ ནས༌སའེ༌ ནང༌ང༌ དུག༌གད༌ཀྱག༌།
8ཏེ༌ནེ༌ ཨབ༌རམ༌མི༌ ལོད༌ལ༌ ཟེརས༌, “ང༌དང༌ ཡ༌ ང༌དང༌ངི༌ སེམས༌ཅན༌ ཚོ༌ཁན༌གུན༌ནི༌ པར༌ལ༌ ཛིང༌མོ༌ མི༌ཏང༌, ཅིའ༌ཟེར༌ན༌ ང༌དང༌ ཉིས༌ཀོ༌ སྤུན༌ ཨིན༌ནོག༌། 9ང༌དང༌ངི༌ དུན༌ལ༌ ས༌ཀྱད༌ མ༌ ཆེན༌མོ༌ཞིག༌ ཡོད༌ཏེ༌ ཨིན༌ནོག༌། ཁྱོ༌རང༌ ཐད༌ཁན༌ནི༌ ས༌ཀྱད༌དི༌ ཁག༌པོ༌ ལྡོམ༌, ང༌དང༌ ཉིས༌ཀོ༌ བེ༌ཨིན༌། ཀལ༌ཏེས༌ ཁྱོ༌རང༌ ཡོ༌མ༌ ཆོགས༌ལ༌ ཆ༌ན༌ ཏེ༌ནེ༌ ང༌ ཡས༌པ༌ ཆོགས༌ལ༌ ཆེན༌, ཡ༌ ཁྱོ༌རང༌ ཡས༌པ༌ ཆོགས༌ལ༌ ཆ༌ན༌ ང༌ ཡོ༌མ༌ ཆོགས༌ལ༌ ཆེན༌།”
10ལོད༌དི༌ ཟོའར༌ གྲོང༌ཁྱེར༌རི༌ ཆོགས༌ལ༌ ལྟས༌པ༌, ཁོའ༌ ཡོར༌དཱན༌ ལུང༌པ༌བོ༌ ཀ༌རུང༌ས༌ མ༌ སྔོན༌པོ༌, ཨི༌དན༌ནི༌ ས༌ཆའེ༌ ཚས༌ ཡ༌ ཨི༌ཇིབ༌བི༌ ས༌ཆའ༌ ཙོགས༌ ཐོང༌། ༼ཏེ༌བོ༌ ཡ༌ཝའེ༌ སོ༌དོམ༌ དང༌ གོ༌མོ༌རའི༌ གྱལ༌ས༌གུན༌ ཁྲེས༌ཏོར༌ ཅོའེ༌ སང༌ སྔུན༌ལ༌ ཨིན༌པིན༌།༽ 11ལོད༌དི༌ ཁོ༌རང༌ངི༌ ཕིའ༌ ཡོར༌དཱན༌ནི༌ སྤང༌ཐང༌ ཚང༌མ༌ ལྡམས༌ཏེ༌ ཤར༌ ཆོགས༌ལ༌ སོང༌། ཏེ༌ཟུག༌གི༌ ཁོ༌ དང༌ ཨབ༌རམ༌ ཉིས༌ཀོ༌ བེ༌། 12ལོད༌ ཡོར༌དཱན༌ ཐང༌ངི༌ གྱལ༌ས༌གུན༌ནི༌ ཕྲོའ༌ དུགས༌ཏེ༌ ཁོ༌རང༌ངི༌ ཀུར༌བོ༌ སོ༌དོམ༌མི༌ གྱལ༌སའེ༌ ཉེ༌ཁོར༌ལ༌ ཙུགས༌། ཨིན༌ནའང༌ ཨབ༌རམ༌ ཀེ༌ནན༌ནི༌ ས༌ཆའེ༌ ནང༌ང༌ དུགས༌། 13ཏ༌ སོ༌དོམ༌པ༌གུན༌ མངས༌ཏེའང༌ ངན༌པ༌ ཡོད༌ཅེས༌པོའེ༌ ཡ༌ཝའེ༌ གྱབ༌གལ༌ལ༌ སྡིག༌པ༌ ཆད༌མེད༌ལ༌ ཅོའད༌པིན༌།
14ལོད༌ སོང༌ ཚར༌ཏེ༌ སྟིང༌ནེ༌ ཡ༌ཝའེ༌ ཨབ༌རམ༌མ༌ མོལས༌, “ཁྱོ༌རང༌ ཡོད༌སའེ༌ ནས༌སའེ༌ ཀ༌ནེ༌ མིག༌ སྟགས༌ཏེ༌ ཆོགས༌ ཚང༌མ༌ལ༌ ལྟོས༌། 15ཁྱོ༌རང༌ངི༌ མིག༌ནེ༌ ཐོང༌ཁན༌ནི༌ ནས༌ས༌ ཚང༌མ༌ ཏུས༌གྱུན༌ནི༌ ཕིའ༌ ངའེ༌ ཁྱོ༌རང༌ དང༌ ཁྱོ༌རང༌ངི༌ པུར༌གྱུད༌གུན༌ལ༌ ཏང༌ཨིན༌། 16ཡང༌ ཇིག༌རྟེན༌ནི༌ཀ༌ ཡོད༌ཁན༌ནི༌ ཐལ༌བ༌ ཙོགས༌ལ༌ ངའེ༌ ཁྱོ༌རང༌ངི༌ པུར༌གྱུད༌གུན༌ སུ༌ཞིག༌གའང༌ རྩི༌ མི༌ཉན༌ཅེས༌ མང༌པོ༌ ཕེལ༌ཅུག༌ཨིན༌། 17ཏ༌ སོང༌ ཡང༌ ས༌ཀྱད༌དི༌ ཆོགས༌ ཚང༌མ༌ལ༌ ཁོར༌, ཅིའ༌ཟེར༌ན༌ ངའེ༌ འི༌ ཚང༌མ༌ ཁྱོ༌རང༌ང༌ ཏང༌ཨིན༌།”
18ཏེ༌ནེ༌ ཨབ༌རམ༌མི༌ ཀུར༌གུན༌ ཁྱེར༌ཏེ༌ ཧེབ༌རོན༌ནི༌ ནང༌ང༌ ཡོད༌ཁན༌ནི༌ མམ༌རེ༌ ཟེར༌ཁན༌ནི༌ མི༌བོའེ༌ མིང༌ཅན༌ ལྕང༌མ༌གུན༌ནི༌ ཉེ༌མོའ༌ དུག༌ག༌ལ༌ ཙུག༌ཅུགས༌, ཡང༌ ཏེ༌རུ༌ ཁོའེ༌ ཡ༌ཝའ༌ ཅོལ༌ཅེས༌ལ༌ ཆོད༌ཁྲི༌ཞིག༌ རྩིགས༌།
Currently Selected:
གོ༌ཟུག༌ 13: lbj
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
