ཡོ༌ཧཱ༌ནན༌ 5

བེད༌སེ༌དཱའེ༌ ཟིང༌ངི༌ཀ༌ ནད༌པ༌ གྱལ༌ཅུག༌ག༌ ཛདས༌།

5:1-15

1ཏེ༌ སྟིང༌ནེ༌ ཡ༌ཧུ༌དཱ༌པ༌གུན༌ནི༌ ཏུས༌ཆེན༌ཞིག༌གི༌ ཏུས༌ གཙོ༌བོ༌ ཡེ༌ཤུ༌ ཡེ༌རུ༌ཤ༌ལེམ༌ གྱལ༌ས༌ སྐྱོདས༌། 2ཡེ༌རུ༌ཤ༌ལེམ༌མི༌ ནང༌ང༌ ལུག༌ ཟེར༌ཁན༌ནི༌ གྱས༌སྒོའེ༌ ཉེ༌མོའ༌ ཟིང༌ཞིག༌ ཡོད༌པིན༌, ཀ༌བོའ༌ ཨིབ༌རི༌པའེ༌ སྐད༌ལ༌ བེད༌སའི༌ད༌ ཟེར༌རད༌པིན༌, ཡང༌ ཏེ༌བོའ༌ ཐོག༌ ཡོད༌ཁན༌ནི༌ ཡབས༌ ལྔའེ༌ སྐོར༌ཏེ༌ ཡོད༌པིན༌། 3ཏེ༌ ཡབས༌གུན༌ནི༌ཀ༌ ནད༌པ༌: ཁོངས༌ཁན༌, ཞ༌ར༌ དང༌ ཞ༌འོ༌ མང༌པོ༌ཞིག༌ ཉལ༌ཏེ༌ ཡོད༌པིན༌། 4#5:4 སྔུན༌མའེ༌ གརིས༌པའེ༌ སྐད༌དི༌ སྤེ༌ཆ༌ མང༌ཆེའེ༌ ནང༌ང༌ 5:3b-4 མེད༌ཏེ༌ ཨིན༌ནོག༌། སྟིང༌མ༌ ཁ༌ཅིག༌གི༌ ནང༌ང༌ “གཙོ༌བོ༌ དཀོན༌མཆོག༌གི༌ ཕོ༌ཉ༌ ཧུན༌མེད༌ལ༌ པར༌པར༌ལ༌ སྐྱོད༌ཏེ༌ ཏེ༌ ཟིང༌ངི༌ ཆུ༌བོ༌ སྐུལ༌ལད༌པིན༌། ཏེ༌ ཆུ༌བོ༌ སྐུལ༌ལ༌ཅིག༌ ཏེ༌ ཟིང༌ངི༌ ནང༌ང༌ གོ༌མ༌རང༌ ཞུགས༌ཉན༌ཁན༌ནི༌ ནད༌པ༌བོ༌ ནད༌ནེ༌ གྱལ༌ལད༌པིན༌ ཏེ༌བོའེ༌ཕིའ༌ ནད༌པ༌ མང༌པོ༌ ཏེ༌ ཟིང༌ངི༌ ཆུ༌ སྐུལ༌ལ༌ ཛད༌ཅེས༌ལ༌ སྲུངས༌ཏེ༌ དུག༌གད༌པིན༌” བྲིས༌ཏེ༌ ཡོད༌ཏེ༌ ཨིན༌ནོག༌། 5ཏེ༌ཀ༌ ཁོངས༌ཏེ༌ ལོ༌ 38 ཆའ༌ཁན༌ནི༌ མི༌ཞིག༌ ཡོད༌པིན༌། 6ཡེ༌ཤུའི༌ ཁོ༌ ཟིགས༌ཏེ༌ ལོ༌ མང༌པོ༌ཞིག༌ནེ༌ ཕར༌ལ༌ ཁོངས༌ཏེ༌ ཡོད༌ཁན༌བོ༌ ཁྱེན༌ན༌ ཛད༌པ༌ ཁོང༌ངི༌ ཁོའ༌ ཏྲིའ༌ ཛདས༌, “ཁྱོ༌རང༌ འི༌ ཟུ༌མོ༌བོ༌ནེ༌ ཕན༌ན༌ ཐད༌ད༌ རག༌ག༌?”

7ཁོའེ༌ ཟེརས༌, “གཙོ༌བོ༌, ཟིང༌ངི༌ ཆུ༌བོ༌ སྲུག༌ ཟ༌ནེ༌ ང༌ འི༌ ནང༌ང༌ ཞུགས༌ཤེས༌ལ རོགས༌ ཅོ༌ཁན༌ སུའང༌ མེད༌, ཡང༌ ང༌ དུན༌ལ༌ ལེབ༌བི༌ སང༌ སྔུན༌ལ༌ ཡང༌སུ༌ཞིག༌ ཏེ༌ནང༌ང༌ ཞུགས༌ ཚར༌དུག༌།”

8ཡེ༌ཤུའི༌ ཁོའ༌ མོལས༌, “ལོངས༌, རང༌ངི༌ མལ༌ཙ༌ ཁུར༌ ཡང༌ གྲུལ༌།”

9ཁོ༌ ཏེན༌ན༌མལ༌ལ༌ གྱལ༌, རང༌ངི༌ ཉལ༌སྟན༌ ཁུར༌ཏེ༌ གྲུལ༌ཅེས༌ གོ༌ཟུག༌, ཏེ༌ ཛད༌པ༌བོ༌ ཤབ༌བད༌དི༌ ངལ༌ཚོའེ༌ ཞག༌ག༌ ཇུང༌ཏེ༌ ཨིན༌པིན༌། 10ཏེན༌ན༌བོའེ༌ཕིའ༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ གྱལ༌ཅུག༌ག༌ ཛད༌ཁན༌ནི༌ མི༌བོའ༌ ཟེརས༌, “དི༌རིང༌ ཤབ༌བད༌དི༌ ངལ༌ཚོའེ༌ ཞག༌ག༌ ཁྱོ༌རང༌ངི༌ ལས༌ ཅོ༌མི༌ཆོག༌། ཆོས༌ཁྲིམས༌ ནང༌ཞིན༌ ཁྱོ༌རང༌ང༌ ཉལ༌སྟན༌ ཁུར༌ཅེས༌སི༌ གོངས༌པ༌ མི༌ཏང༌།”

11ཁོའེ༌ ཁོང༌གུན༌ལ༌ ལན༌ཏངས༌, “ང༌ ཕན༌ཅུག༌ག༌ ཛད༌ཁན༌ནི༌ མི༌བོའེ༌ མོལ༌ལ༌རག༌ ‘རང༌ངི༌ ཉལ༌སྟན༌ ཁུར༌ཏེ༌ གྲུལ༌།’”

12ཁོང༌གུན༌ནི༌ ཁོའ༌ ཏྲིས༌, “ཁྱོ༌རང༌ང༌ ཉལ༌སྟན༌ ཁུར༌ཏེ༌ གྲུལ༌ ཟེར༌ཁན༌བོ༌ སུ༌ ཨིན༌ནོག༌?”

13ཁོའ༌ ཁོ༌ ཕན༌ཅུག༌ཁན༌བོ༌ སུ༌ ཨིན༌ གྱུས༌ མེད༌པིན༌, ཅིའ༌ཞུ༌ན༌ ཡེ༌ཤུ༌ ཏེ༌རུ༌ མི༌ཚོགས༌སི༌ ནང༌ང༌ སྟོར༌ སོང༌། 14སྟིང༌ནེ༌ ཡེ༌ཤུའི༌ ཁོ༌ ཆོད༌ཁང༌ངི༌ ནང༌ང༌ ཟིགས༌ ཡང༌ ཁོའ༌ མོལས༌, “ལྟོས༌ ཏ༌ ཁྱོ༌རང༌ གྱལ༌ཏེ༌ ཨིན༌ནོག༌། སྡིག༌པ༌ ཅོ༌ཅེས༌ ཕོང༌, ཏེ༌ མན༌ན༌ ཁྱོ༌རང༌ང༌ འི༌ སང༌ ཐུའ༌ ཇུང༌སྲིད༌ཅེས༌ ཨིན༌ནོག༌།” 15ཏེ༌ནེ༌ ཁོ༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ཀ༌ སོང༌ཏེ༌ ཟེརས༌, “ང༌ ཕན༌ཅུག༌ག༌ ཛདས༌ཁན༌བོ༌ ནི༌ ཡེ༌ཤུ༌ ཨིན༌ནོག༌།”

དཀོན༌མཆོག༌གི༌ སྲས༌སི༌ ཝང༌ཆ༌།

5:16-30

16གཙོ༌བོ༌ ཡེ༌ཤུའི༌ ཏེན༌ན༌ ཙོགས༌སི༌ ཧ༌ལས༌ཤེས༌སི༌ ཛད༌པ༌གུན༌ ཤབ༌བད༌དི༌ ངལ༌ཚོའེ༌ ཞག༌ག༌ ཛད༌ པ༌སང༌, ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཁོང༌ངི༌ མོལ༌ཁན༌ དང༌ ཛད༌ཁན༌ གུན༌ནི༌ གྱབ༌གལ༌ ཅོ༌ཅེས༌ གོ༌ཟུག༌། 17ཨིན༌ནའང༌ ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ ཡབ༌ དཀོན༌མཆོག༌གི༌ ཏུས༌གྱུན༌ ཆག༌ལས༌ ཛད༌ཅེས༌པོའེ༌, ངེའང༌ ཅོའད༌།” 18ཡ༌ཧུ༌དཱ༌པ༌གུན༌ནི༌ ཁོང༌ སད༌ཅེས༌སི༌ རྩོན༌གྲུས༌ མང༌ང༌ སྲན༌ཏྲེ༌ ཅོས༌, ཅིའ༌ཟེར༌ན༌ ཡེ༌ཤུའི༌ ཡ༌ཧུ༌དཱ༌པོའེ༌ ཤབ༌བད༌དི༌ ཞག༌གི༌ ཁྲིམས༌པོ༌ ཅག༌ཅེས༌, མ༌ཚད༌ ཁོང༌ངི༌ དཀོན༌མཆོག༌ག༌ ཁོང༌རང༌ངི༌ ཡབ༌ མོལ༌ཏེ༌ ཁོང༌རང༌ དཀོན༌མཆོག༌ དྲན༌དྲ༌ ཐེའ༌ཛདས༌།

19ཡེ༌ཤུའི༌ ཁོང༌གུན༌ལ༌ ལན༌སལས༌, “ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, སྲས༌ ཁོ༌རང༌ ཅིག༌པོའ༌ ཅའང༌ ཅོ༌ཉན༌ན༌ མ༌ནོག༌། ཡབ༌ དཀོན༌མཆོག༌གི༌ ཛད༌ཁན༌ ཁོའེ༌ ཐོང༌ཁན༌བོ༌ མ༌ནེ༌ སྲས༌སི༌ ཅོའ༌ མ༌ནོག༌། ཡབ༌བི༌ ཅི༌ ཅོའ༌ ཛད༌ནའང༌ སྲས༌སིའང༌ ཅོའ༌ནོག༌། 20ཡབ༌བི༌ སྲས༌ལ༌ ཅམས༌པ༌ ཛད༌ཅེས༌པོའེ༌ ཁོང༌ངི༌ ཆག༌ལས༌ ཚང༌མ༌ སྲས༌ལ༌ སྟན༌ན༌ ཛད༌ད༌ནོག༌། ཡབ༌བི༌ འི༌གུན༌ནི༌ སང༌ ཇིགས༌པོ༌ ལས༌གུན༌ སྲས༌ལ༌ ཅོ༌ཅེས༌ལ༌ སྟན༌ན༌ ཛད༌ཨིན༌, ཏེ༌ནེ༌ ཁྱོ༌ཞ༌གུན༌ མང༌ང༌ ཧ༌ལས༌ཨིན༌། 21སྤེར༌ན༌ ཀ༌ཟུག༌ ཡབ༌བི༌ ཤི༌ཁན༌གུན༌ སོན༌ཏེའ༌ ལང༌ང༌ ཛད༌ཏེ༌ སྲོག༌ སལ༌ལད༌, ཏེན༌ན༌ ཙོགས༌ལ༌ སྲས༌སིའང༌ ཁོ༌རང༌ ཐད༌ཁན༌གུན༌ལ༌ མི༌ཚེ༌ ཏང༌ཨིན༌། 22ཡབ༌བི༌ སུ༌ཞིག༌གའང༌ ཤགས༌ མ༌ཛད༌ད༌, ཤགས༌ ཅད༌ཅེས༌སི༌ ཝང༌ ཚང༌མ༌ སྲས༌ལ༌ སལ༌ལ༌ ཛད༌ཏེ༌ ཨིན༌། 23ཏེ༌ ཝང༌བོ༌ སལ༌ལ༌ ཛད༌ཅེས༌སི༌ གྱུན༌ཚན༌བོ༌ ནི༌, ཀ༌ཟུག༌གི༌ ཡབ༌བ༌ མི༌ཚང༌མའེ༌ རྩི༌ཝ༌ ཅོའད༌ ཏེན༌ན༌ ཙོགས༌ལ༌ མི༌ཚང༌མའེ༌ སྲས༌ལའང༌ རྩི༌ཝ༌ ཏང༌ཅེས༌པོ༌ ཨིན༌ནོག༌། སྲས༌ལ༌ རྩི༌ཝ༌ མ༌ཅོ༌ཁན༌གུན༌ནི༌ ཏན༌ཏན༌ལ༌ སྲས༌ ཀལ༌ལ༌ ཛད༌ཁན༌ནི༌ ཡབ༌བའང༌ རྩི༌ཝ༌ མ༌ཅོའ༌ ཨིན༌ནོག༌།”

24“ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ངའེ༌ ལོན༌གུན༌ལ༌ ཉན༌ཏེ༌ ང༌ ཀལ༌ཁན༌ནི༌ དཀོན༌མཆོག༌གི༌ཀ༌ ཏད༌པ༌ ཁྱོང༌ཁན༌གུན༌ལ༌ ཐའ༌མེད༌པའེ༌ མི༌ཚེ༌ ཡོད༌, ཡང༌ ཁོང༌གུན༌ནི༌ སྡིག༌པ༌གུན༌ལ༌ ཆད༌པ༌ མི༌ཕོག༌། ཁོང༌གུན༌ ཤི༌ཅེས༌ནེ༌ ཐར༌ཏེ༌ ཐའ༌མེད༌པའེ༌ མི༌ཚེ༌ ནང༌ང༌ ལེབས༌ཏེ༌ ཨིན༌ནོག༌།”

25“ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ཏུས༌པོ༌ ལེབ༌ཅེས༌ ཡོད༌ མ༌ཚད༌ ལེབ༌ ཚར༌ཏེ༌ ཨིན༌, ནམ༌ སེམས༌ཉིད༌དི༌ ཐོག༌ནེ༌ ཤི༌ཁན༌གུན༌ནི༌, དཀོན༌མཆོག༌གི༌ སྲས༌སི༌ སྐད༌ ཚོར༌ཨིན༌། ཡང༌ ཚོར༌ཏེ༌ ཨིད༌ཤེས༌ ཅོ༌ཁན༌གུན༌ སོན༌ཏེའ༌ ལུས༌ཨིན༌། 26ཀ༌ཟུག༌གི༌ ཡབ༌བ༌ སྲོག༌ སལ༌ཅེས༌སི༌ ཝང༌ ཡོད༌, ཏེན༌ན༌ ཙོགས༌ལ༌ ཁོང༌ངི༌ སྲས༌ལ༌ སྲོག༌ ཏང༌ཅེས༌སི༌ ཝང༌བོ༌ སལ༌ལ༌ ཛད༌ཏེ༌ ཨིན༌། 27ཁོ༌ ནི༌ མི༌རིགས༌སི༌བུ༌ ཨིན༌ པ༌སང༌, ཡབ༌བི༌ ཁོའ༌ ཤགས༌ ཅད༌ཅེས༌སི༌ ཝང༌ཆ༌ སྟད༌ད༌ ཛད༌ཏེ༌ ཨིན༌། 28ངའེ༌ ཟེར༌ཁན༌བོའ༌ ཧ༌ མ༌ལས༌ཤིག༌, ཏེ༌ཏུས༌པོ༌ ལེབ༌ཅེས༌ ཡོད༌, ནམ༌ ཤི༌ཁན༌ ཚང༌མའེ༌ སྤུར༌ཁང༌ངི༌ ནང༌ང༌ དཀོན༌མཆོག༌གི༌ སྲས༌སི༌ སྐད༌པོ༌ ཚོར༌ཏེ༌ 29སྤུར༌ཁང༌གུན༌ནེ༌ བིང༌ཏེ༌ ཡོང༌ཨིན༌། ལས༌ ཟང༌པོ༌ ཅོ༌ཁན༌གུན༌ ཐའ༌མེད༌པའེ༌ མི༌ཚེ༌ ཕིའ༌, ཡང༌ ངན༌པ༌ ཅོ༌ཁན༌གུན༌ ཐའ༌མེད༌པའེ༌ ཆད༌པའེ༌ ཕིའ༌ ལང༌ཨིན༌། 30ངའ༌ ང༌རང༌ང༌ ཅའང༌ ཅོ༌ མི༌ཉན༌, དཀོན༌མཆོག༌གི༌ མོལ༌ཁན༌ ནང༌ཞིན༌ལ༌ ཤགས༌ ཏང༌ངད༌, ཡང༌ ངའེ༌ ཤགས༌གུན༌ནི༌ ཀྲང༌པོ༌ ཨིན༌ ཅིའ༌ཟེར༌ན༌ ངའེ༌ ང༌རང༌ ཐད༌ཁན༌ ནང༌ཞིན༌ མན༌པ༌, ང༌ ཀལ༌ལ༌ ཛད༌ཁན༌ནི༌ ཡབ༌བི༌ ཐུགས༌ཐད༌ ནང༌ཞིན༌ ཅོའད༌།”

གཙོ༌བོ༌ ཡེ༌ཤུའི༌ སྐོར༌ལ༌ སྤང༌པོ༌།

5:31-47

31གཙོ༌བོ༌ ཡེ༌ཤུའི༌ ཏ༌རུང༌ངའང༌ མོལས༌, “ཀལ༌ཏེས༌ ངའེ༌ ང༌རང༌ངི༌ སྐོར༌ལ༌ སྤང༌པོ༌ ཏང༌ངད༌ན༌ ངའེ༌ སྤང༌པོ༌བོའ༌ ཞན༌མ༌གུན༌ དེན༌ མི༌ཤེས༌། 32ཞན༌མ༌ཞིག༌གི༌ ངའེ༌ སྐོར༌ལ༌ སྤང༌པོ༌ སལ༌ལད༌, ཡང༌ ང༌ གྱུས༌ཡོད༌ ཁོང༌ངི༌ ངའེ༌ སྐོར༌ལ༌ སལ༌ཁན༌ནི༌ སྤང༌པོ༌ ཀྲང༌པོ༌ ཨིན༌། 33ཁྱོ༌ཞའེ༌ ཡོ༌ཧཱ༌ནན༌ནི༌ཀ༌ མི༌གུན༌ ཏྲིའ༌ལ༌ ཀལས༌པ༌, ཁོང༌ངི༌ ངའེ༌ སྐོར༌ལ༌ དེན༌བའེ༌ སྤང༌པོ༌ ཏངས༌། 34ང༌ མི༌གུན༌ནི༌ སྤང༌པོའ༌ རག༌ལས༌ཏེ༌ མེད༌, ཨིན༌ནའང༌ ཁྱོ༌ཞ༌གུན༌ལ༌ ཐར༌པ༌ ཐོབ༌ཅེས༌སི༌ ཕིའ༌ ཡོ༌ཧཱ༌ནན༌ནི༌ སྤང༌པོའེ༌ སྐོར༌ལ༌ ཤད༌དད༌། 35ཡོ༌ཧཱ༌ནན༌ ནི༌ འོད༌ ལྡང༌ཤན༌ བར༌ཨིན༌ ཡོད༌ཁན༌ཞིག༌ ཨིན༌པིན༌, ཡང༌ ཁྱོ༌ཞ༌གུན༌ སྐབས༌སྟོགས༌ཤིག༌ ཏེ༌ འོད༌པོའེ༌ ལྡངས༌སི༌ ནང༌ང༌ དུགས༌ཏེ༌ ཐད༌པོ༌ ཅོས༌། 36ངའེ༌ ལག༌ག༌ ཡོ༌ཧཱ༌ནན༌ནི༌ སྤང༌པོའེ༌ སང༌ ཇིགས༌པོ༌ སྤང༌པོ༌ཞིག༌ ཡོད༌, ཡབ༌ དཀོན༌མཆོག༌གི༌ ངའ༌ གྲུབ༌ཅུག༌ཅེས༌ལ༌ སྟད༌ད༌ ཛད༌ཁན༌ནི༌ ལས༌གུན༌ ངའེ༌ ཅོ༌ཨིན༌ ཡོད༌ ཡང༌ ཏེན༌ན༌ ལས༌གུན༌, ང༌ ཡབ༌བི༌ ཀལ༌ལ༌ ཛད༌ཁན༌བོའེ༌ སྤང༌པོ༌ ཨིན༌། 37ང༌ ཀལ༌ལ༌ ཛད༌ཁན༌ནི༌ ཡབ༌བི༌, ངའེ༌ སྐོར༌ལ༌ སྤང༌པོ༌ སལ༌ཏེ༌ ཨིན༌། ཁྱོ༌ཞ༌གུན༌ནི༌ ཁོང༌ངི༌ སུང༌སྐད༌ མ༌ནེ༌ མ༌ཚོར༌ར༌ ཡ༌ ཁོང༌ངི༌ ཡིབས༌ མ༌ནེ༌ མ༌ཇལ༌ལ༌ ཨིན༌ནོག༌། 38ཁོང༌ངི༌ ལོན༌ ཁྱོ༌ཞ༌གུན༌ནི༌ སྙིང༌ངི༌ ནང༌ང༌ ལུས༌ས༌ མི༌དུག༌, ཅིའ༌ཟེར༌ན༌ ཁྱོ༌ཞ༌གུན༌ནི༌ ང༌ དཀོན༌མཆོག༌གི༌ ཀལ༌ལ༌ ཛད༌ཁན༌བོའེ༌ཀ༌ དེན༌ མ༌ཤེས༌།”

39“ཁྱོ༌ཞའེ༌ ཏམ༌པའེ༌ སུང༌རབས༌ལ༌ མ༌ ཞིབ༌སལ༌ ཉམ༌པོ༌ ལོབ༌ཇོང༌ ཅོ༌རུག༌, ཅིའ༌ཟེར༌ན༌ ཁྱོ༌ཞ༌གུན༌ནི༌ ཏམ༌པའེ༌ སུང༌རབས༌ གྱུད༌ཏེ༌ ཐའ༌མེད༌པའེ༌ མི༌ཚེ༌ ཐོབ༌བ༌ནོག༌ སམ༌དུག༌། ཏེན༌ན༌ སུང༌རབས༌པོའེ༌ ངའེ༌ སྐོར༌ལ༌ སྤང༌པོ༌ ཏང༌ང༌ནོག༌། 40ཏེ༌ནེའང༌ ངའེ༌ཀ༌ ཨིད༌ཤེས༌ ཅོས༌ཏེ༌ ཐའ༌མེད༌པའེ༌ མི༌ཚེ༌ ཐོབ༌ཅེས༌ལ༌ ཁྱོ༌ཞའ༌ ཐད༌ད༌ མི༌དུག༌།”

41“ང༌ ནི༌ མི༌གུན༌ནི༌ སྟོད༌པ༌ ཏང༌ཅེས༌པོའ༌ ཐད༌ད༌མེད༌, 42ཨིན༌ནའང༌ ཁྱོ༌ཞ༌གུན༌ནི༌ སེམས༌སི༌ ནང༌ང༌ དཀོན༌མཆོག༌གི༌ ཕིའ༌ ཅམས༌པ༌ མེད༌ཁན༌བོ༌ ང༌ གྱུས༌ཡོད༌། 43ང༌ ང༌རང༌ངི༌ ཡབ༌བི༌ ཝང༌ཆའེ༌ ནང༌ང༌ ཡོང༌ནའང༌ ཁྱོ༌ཞ༌གུན༌ནི༌ ང༌ གའ༌སུས༌ མ༌ཅོས༌། ཀལ༌ཏེས༌ ཞན༌ཞིག༌ ཁོ༌རང༌ངི༌ ཝང༌ཆའེ༌ ནང༌ང༌ ཡོང༌ན༌ ཁྱོ༌ཞ༌གུན༌ནི༌ ཁོའ༌ གའ༌སུས༌ ཅོ༌ཨིན༌། 44ཁྱོ༌ཞ༌གུན༌ནི༌ ཀ༌ཟུག༌གི༌ ངའེ༌ཀ༌ ཏད༌པ༌ ཁྱོང༌ཨིན༌, ནམ༌ ཁྱོ༌ཞ༌གུན༌ ཅིག༌ དང༌ ཅིག༌ནེ༌ སྟོད༌པ༌ ཐོབ༌ཅེས༌ལ༌ ཐད༌དུག༌, ཨིན༌ནའང༌ དཀོན༌མཆོག༌ ཅིག༌ཅིག༌པོའེ༌ སྟོད༌པ༌ ཐོབ༌ཅེས༌པོ༌ ཙལ༌ལ༌ མི༌དུག༌།”

45“ཁྱོ༌ཞའེ༌ མ༌སམ༌ཤིག༌ ཡབ༌བི༌ སྐུན༌དུན༌ལ༌ ངའེ༌ ཁྱོ༌ཞ༌གུན༌ལ༌ སྐྱོན༌ ཀལ༌ཨིན༌། ཁྱོ༌ཞ༌གུན༌ལ༌ སྐྱོན༌ ཀལ༌ཁན༌བོ༌ ཁྱོ༌ཞ༌རང༌ངི༌ རེ༌ཝ༌ བོར༌ཁན༌ནི༌ མོ༌ཟེས༌ ཨིན༌ནོག༌། 46ཀལ༌ཏེས༌ ཁྱོ༌ཞ༌གུན༌ནི༌ མོ༌ཟེས༌སི༌ཀ༌ ཏད༌པ༌ ཅོས༌པིན༌ན༌, ངའེ༌ཀའང༌ ཏད༌པ༌ ཅོས༌ཏེ༌ ཡོད༌གྲོ༌, ཅིའ༌ཟེར༌ན༌ ཁོང༌ངི༌ ངའེ༌ སྐོར༌ལ༌ བྲིའ༌ ཛད༌ཏེ༌ ཨིན༌ནོག༌། 47ཁྱོ༌ཞ༌གུན༌ནི༌ མོ༌ཟེས༌སི༌ བྲིའ༌ ཛད༌ཁན༌བོའ༌ ཨིད༌ མ༌ཤེས༌ པ༌སང༌, ངའེ༌ ཟེར༌ཁན༌གུན༌ལ༌ ཁྱོ༌ཞའེ༌ ཀ༌ཟུག༌གི༌ དེན༌ཤེས༌ཨིན༌།”

Currently Selected:

ཡོ༌ཧཱ༌ནན༌ 5: lbj

Highlight

Copy